لوقا 10
10
سِيذِيثْنغ عِيْسَى يسّكّ ثْنَاين أُو سبْعِين اَذ بشَّرن
1منْبَعْد إِ مَانَايَا يخْضَر سِيذِيثْنغ يجّن ثْنَاين أُو سبْعِين ن يمحْضَارن، ئِسّكّ-يثن ثْنَاين ثْنَاين يزْوَارن-اَس غَار كُڒ ثنْدِينْت ذ ومْشَان إِݣ يݣَّا نتَّا اَغَارْسن يرَاح.
2ينَّا-ٱسن إِ يمحْضَارن نّس: "ثَفدْجَاحْث اَطَّاس وَلَكِن ذْرُوْس يشوَّارن إِي غَا يخذْمن. تَّارث زِي بَاب ن ثْفدْجَاحْث اَذ يَرْنِي يشوَّارن ذݣ ومَرْجع نّس. 3رُوْحث، أَقَا سّكّغ-كنِّيو اَمشْنَاو يزْمَارن جَار وُوْشَّانن. 4وَار كِذْوم كسِّيم نِي ثَزعْبُوْڒْث، نِي اَقْرَاب، نِي ثِسِيڒَا. وَار تْسدْجَامم شَا خ ونِّي غَا ثَافم ذݣ وبْرِيذ. 5خْمِي غَا ثَاذْفم غَار شَا ن ثدَّارْث، إِنِيم ذ اَمزْوَارُو: سْڒَام خ ثدَّارْث-أَ. 6مڒَا يقْبڒ-كنِّيو بَاب ن ثدَّارْث نِّي، أَتَاف اَكِذس تِيڒِي لْبَرَكَا نْوم. مڒَا وَار كنِّيو يقْبِيڒ شَا، أَتَاف وَار كِذس تْغِيمِي شَا لْبَرَكَا نْوم. 7قِّيمم ذِي ثدَّارْث نِّي، شّم سْوم زِي مِين غَارْسن مِينْزِي ونِّي يتْبشَّارن غَارس ڒْحَقّ اَذ يتْخَاڒس. وَار تْرَاحم شَا زِي ثدَّارْث غَار ثدَّارْث. 8خْمِي غَا ثَاذْفم شَان ثنْدِينْت، مڒَا قبْڒن-كنِّيو أَيثْبَاب نّس، شّم س مِينْزِي ذَاوم غَا ؤُشن. 9سْݣنْفَام يمهْڒَاش نْسن إِنِيم-اَسن قَا ڒْمُلْك ن أَربِّـي يُوْذس-د غَارْوم.
10-11مڒَا ثُوْذْفم غَار شَا ن ثنْدِينْت وَار كنِّيو قْبِيڒن شَا أَيثْبَاب نّس، فّْغم سّنِّي غَار يبْرِيذن نّس إِنِيم-اَسن قَا ؤُڒَا ذ ثَعجَّاشْت ن ثنْدِينْت نْوم ذَايْنغ يڒصْقن ذݣ يضَارن نّغ اَت نمْسح. وَلَكِن يتْخصَّا-كنِّيو اَذ تسّْنم بلِّي ڒْمُلْك ن أَربِّـي يُوْذس-د. 12أَذَاوم ينِيغ: ذِي يُوْم لْحِسَاب ذ لْعِقَاب اَذ يِيڒِي لْعِقَاب ن ثنْدِينْت نِّي كْتَار زِي لْعِقَاب ن ثنْدِينْت ثَعفَّانْت ن سَدُوْم.
13يَا ڒفْضِيحث نّش يَا أَبِيلَاج ن كُوْرَزِيم! يَا ڒفْضِيحث نّش يَا أَبِيلَاج ن بَيْت صَيْدَا! مَعْلِيك لْمُعْجِزَاث-أَ إِي ذَايْوم يوقْعن، وقْعنْت ذِي ثْندَّام ثِعفَّانِين ن صُوْر ذ صَيْدَا، أَتَاف أَيْثْبَاب نْسنْت تُوْبن مشْحَاڒ زݣ وَامِي، إِڒِي ݣِّين اَرُّوْض ن لْحُزن قِّيمن خ يِيغّذ#10.13 ئِغّذ قَّارن-ث إِ ثْنِيْفسْت. حمَا اَذ د تْبَان تُوْبَا نْسن. 14أَقَا ثِندَّام ثِعفَّانِين نِّي ن صُوْر ذ صَيْدَا اَذ يڒِينْت حْسن زَّايْوم ذِي يُوْم لْحِسَاب ذ لْعِقَاب. 15ئِي شك، آي اَبِيلَاج ن كَفرْنَاحُوْم! مَا تْغِير-اَش اَذ تْݣَعّْذذ غَار وجنَّا؟ لَّا، قَا شك اَذ تهْوِيذ غَار لْجَحِيم."
16ينَّا-ٱسن عِيْسَى إِ يمحْضَارن نّس: "ونِّي يتْسْڒَان إِ وَاوَاڒ نْوم، أَتَاف يتْسْڒَا-يَايِي إِ نش. ونِّي وَار كنِّيو يقْبِيڒن شَا، أَتَاف ؤُڒَا ذ نش وَار ذَايِي يقْبِيڒ شَا. ونِّي وَار ذَايِي يقْبِيڒن شَا نش، أَتَاف وَار يقْبِيڒ شَا ونِّي ذَايِي د يسّكّن."
ثْنَاين أُو سبْعِين ن يمحْضَارن نِّي ذوّْڒن-د س ڒفْرَاحث
17ذوْڒن-د ثْنَاين أُو سبْعِين نِّي ن يمحْضَارن فَرّْحن. نَّان-اَس إِ عِيْسَى: "آ سِيذِي، قَا ؤُڒَا ذ جْنُوْن تݣّن-اَنغ اَرَّاي عْلَاحْسَاب يسم نّش."
18ينَّا-ٱسن عِيْسَى: "تُوْغَا تْوَاڒِيغ شِيطَان يوْضَا-د زݣ وجنَّا مَامش د يوطَّا ڒْبَرْق. 19أَقَا تِيشّغ-اَوم جّْهذ إِي زِي غَا ثْعفّْسم خ يفِيغرَان ذ ثْغِرْذمِيوِين ذ مَارَّا جّْهذ ن ڒَعْذُو، وَار كنِّيو يتْضَرِّي وَالُو. 20إِنَّمَا، وَار فَرّْحث شَا وَامِي جْنُوْن ذَاوم تݣّن اَرَّاي. لَّا، فَرْحث وَامِي يسمَاون نْوم ؤُرِين زمّن ذݣ وجنَّا."
21ڒخْدّنِّي يفَرح عِيْسَى س أَرُّوْح يقدّْسن ينَّا: "حمْذغ-شك آ بَابَا آ سِيذِي أَربِّـي ن وجنَّا ذ ثْمُوْرْث ڒَاحقَّاش ثسْنُوْفَّرذ مَانَايَا خ يمِيغِيسن ذ لْعُلَامَا، ثْسظْهَارذ-ث-يد إِ يحنْجِيرن يمزْيَانن. وَاه آ بَابَا، ڒَاحقَّاش اَمُّو إِي خَاك يَارْضَا.
22ئِمُّوْش-اَيِي كُڒْشِي زِي بَابَا. وَار يسِّين حَدّ مِين يعْنَا مِّيس منْغِير بَابَاس. وَار يسِّين حَدّ مِين يعْنَا بَابَاس منْغِير مِّيس. بَابَاس، أَث سّْنن غِير يِنِّي ؤُمِي يخس مِّيس اَذَاسن ثِيذ يسْمظْهَار."
23ئِنقْڒب غَار يمحْضَارن نّس وَاحذْسن ينَّا-ٱسن: "سَّعْذ ن ثِيطَّاوِين نِّي يࢲْرِين مِين ثࢲْرِيم! 24مِينْزِي اَذَاوم ينِيغ: أَطَّاس ن لْأَنْبِيَا ذ يزدْجِيذن رْزُوْن اَذ ࢲرن مِين تْوَاڒَام، وَلَكِن وَار ث ࢲْرِين شَا. رْزُوْن اَذ سْڒن مِين ثسْڒَام، وَلَكِن وَار ث سْڒِين شَا."
ڒْمِثَال ن يِج وثَرَّاس زِي أَيث-سَامَرْيَا يتݣّن ڒْخِير
25يُوْسَا-د يجّن زݣ يِنِّي يتْشرَّاحن شَّرِيعَا يخس اَذ يجَرّب عِيْسَى ينَّا-ٱس: "آ لْمُعَلِّم، مِين غا ݣّغ حمَا اَغَارِي ثِيڒِي ثُوْذَارْث ن ڒبْدَا؟"
26ينَّا-ٱس عِيْسَى: "مِين ثقَّار شَّرِيعَا؟ مِين ذَايس ثسّْنذ؟"
27يَارَّا خَاس ونِّي ينَّا-ٱس: "ئِتْخصَّا-ٱش اَذ تخْسذ سِيذِي أَربِّـي نّش س مَارَّا ؤُڒ نّش ذ مَارَّا اَرُّوْح نّش ذ مَارَّا جّْهذ نّش ذ مَارَّا ڒَعْقڒ نّش. أَذ تخْسذ اَجَّار نّش اَمشْنَاو يخف نّش."
28ينَّا-ٱس عِيْسَى: "غَارك ڒْحَقّ ذِي مِين ثنِّيذ. اݣّ زَّايس حمَا اَغَارش ثِيڒِي ثُوْذَارْث."
29وَلَكِن ونِّي يتْشرَّاحن شَّرِيعَا يرزُّو اَذ يُوْش ڒْحَقّ خ يِيخف نّس، ينَّا-ٱس إِ عِيْسَى: "مِين يعْنَا وَاجَّار ينُو؟"
30يَارَّا خَاس عِيْسَى ينَّا-ٱس: "ئِجّن ن بْنَاذم يهوَّا زِي ثنْدِينْت ن لْقُدْس يݣُّوْر غَار ثنْدِينْت ن أَرِيحَا. فّْغن-د اَكِذس يخوَّانن ذݣ وبْرِيذ كّْسن-اَس اَرُّوْض نّس، ؤُوْثِين-ث جِّين-ث جَار ثُوْذَارْث ذ ڒْموْث. 31يعْذُو سّنِّي يجّن ن ڒفْقِي ذݣ وبْرِيذ نِّي، ئِࢲْرِي-ث يَرْوڒ زَّايس. 32ڒخْدّنِّي يعْذُو-د سّنِّي يجّن زِي شُّرْفَا ن أَيْث-لَاوِي، عَاوذ يخْزَر ذَايس يَرْوڒ. 33وَلَكِن يج وثَرَّاس زِي ثْمُوْرْت ن أَيث-سَامَارْيَا يتْسَفَر يعْذُو-د سّنِّي، ئِࢲْرِي-ث يقّس-اَس. 34ئِقَارّب غَارس ييْسِي زّشْت ذ وَامَان ن وضِيڒ يذْهن-اَس س يجَارِيحن نّس يشّد-اَس-ثن. ڒخْدّنِّي يسْني-ث خ وغْيُوْڒ نّس، يُوْوِي-ث غَار يِجّن ن ثدَّارْث ن يمْسَافَرن يتْهلَّا ذَايس يݣَّا ذَايس ڒْخِير. 35ثِيوشَّا نّس ييْسِي-د ثْنَاين ن دِينَار يُوْشَا-اَس-ثن إِ بَاب ن ثدَّارْث ن يمْسَافَرن ينَّا-ٱس: تْهِلَا ذَايس، شْحَاڒ مَا خَاس ثْغَسْطَارذ نّغْنِي، أَتَاف نش خْمِي د غَا اَسغ اَذَاش ثن اَرّغ." 36ينَّا-ٱس عِيْسَى إِ ونِّي: "مِين تْوَاڒِيذ شك؟ مِين يعْنَا ونِّي زِي ثْڒَاثَا نِّي إِي غَا يِيڒِين ذ اَجَّار ن بْنَاذم نِّي إِي طّْفن يخوَّانن؟"
37ينَّا-ٱس ونِّي يتْشرَّاحن شَّرِيعَا قَا ذ اَثَرَّاس نِّي إِي ذَايس يݣِّين ڒْخِير."
ينَّا-ٱس عِيْسَى: "رُوْح، اݣّ مَانَاينِّي ؤُڒَا ذ شك."
مَرْثَا ذ مَرْيَم
38عِيْسَى ذ يمحْضَارن نّس ݣُّوْرن خ وبْرِيذ. يُوْذف غَار يِجّن ن دْشَار، ثْرحّب زَّايس يجّن ن ثمْغَارْث قَّارن-اَس مَرْثَا غَار ثدَّارْث نّس. 39أَكِذس يجّن ن وتْشْمَاس نتَّاث قَّارن-اَس مَرْيَم ثْرُوْح ثقِّيم غَار يضَارن ن سِيذِيثْنغ ثبْذَا تْصنَّاط إِ وَاوَاڒ نّس.
40مَرْثَا ثنُّوْغ اَطَّاس ذِي شّْغڒ ن ثدَّارْث. ثُوْسَا-د ثنَّا-ٱس إِ عِيْسَى: "آ سِيذِي، مَا وَار ذَاش ثشْقِي شَا وتْشْمَا ثقِّيم وَاهَا ثجَّا-ٱيِي وَاحْذِي خدّْمغ شّْغڒ؟ إِنِي-يَاس اَذَايِي ثْعَاون بَعْذَا!"
41-42ينَّا-ٱس سِيذِيثْنغ: "آ مَرْثَا آ مَرْثَا، بْنَاذم يتحْذَاجَا غِير يجّن ن ڒْحَاجث. شم ذَايم اَمْنُوْس تْخيَّاقذ خ وَاطَّاس ن ثْمسْڒَايِين، مَرْيَم ثِيخْضَر مِين يصبْحَان وَار ذَاس يتْوَاكّس شَا."
Currently Selected:
لوقا 10: ريف
Highlight
Share
Copy
Want to have your highlights saved across all your devices? Sign up or sign in
