ZAŊ 18

Kəkamna kə kaanə Ziwifiŋ de Yeesu

(Mat. 26.47-56; Mar. 14.43-50; Liki 22.47-53)

1Adordə toose toŋa kəyaŋ, Yeesu kooroŋ də *kaa gə guuduŋ warna agal nayta də paaŋe də Sedroŋ na. Ko bə minti yə vaŋ ada naŋ, kəbaŋ a jəŋ gə karə-kere ada. 2Ko toŋ a də dər Zudasi, hulum bə minti bə ji akolokiŋ cuuruŋ gud bə minti Yeesu a jəŋ bə ɗeete ada na saksaki də kaa gə guuduŋ. 3Kəya Zudasi kəlaŋ tiinə kəsooto gə Roma daana kaa gə gole cəərə *Kuli kə Pepeŋ gə minti kəkamna kə *kaa kə keere Pepeŋ, də kaanə *Farisiyeŋ, a vəənəy. Kəsootoŋ a wəra gə ganə-gene də kar kə duuriŋ siri, lampa kəəsi, də gədəwa bə cəwa də do'tə-do'te ku. Wə kooroŋ diiri a ko bə kəbaŋ bə minti anə Yeesu ada naŋ faɗi. 4Yeesu wəra bə asə-ase kel gə minti bə ji yaŋ suruŋ keɗeŋ tə bə moŋ, zeŋ siri na, wə wəətənəy minti: «Aŋ golde haa mindi mo?» 5Yə minti: «Are golde haa Yeesu bə Nazaretiŋ.» Wə minti: «Ten gil kənaŋ haa tó.» Zudasi, hulum bə ji akolokiŋ cuuruŋ, a jəŋ siri ada. 6Bə minti Yeesu wəətənəy anəkay minti: «Ten gil kənaŋ haa tó», yə dadəgaŋ warna də digniy, yə vaŋ adawra ruti! 7Yeesu ləənəy kuy pa minti: «Aŋ golde haa mindi mo?» Yə minti: «Yeesu bə Nazaretiŋ». 8Tó minti: «Ten a waatənaŋ minti ten gil kənaŋ haa tó. Aŋ jəəne bə golde haa ten, aŋ yaakə kaayaŋ la bə koore.»

9Kəya kel gə minti wə a wəətənəy doŋ kuy wəra a ko toŋa minti: «Barən, kaa gə minti tam a aynan dən kaasənaŋ, ten lenteŋ kumundu wəra guudi anə məna ba#18.9 Zaŋ 6.39; Zaŋ17.12.» 10Simoŋ Piyer a jəŋ də macəlam kəəsu, wə bəənə wəra, wə ŋeŋ kosnə hulum kemer bə joŋre kə *kumna boblo bə keere Pepeŋ warna nalaŋ. Sam hulum bə joŋre toŋ minti Malkusi. 11Səma Yeesu waataŋ Piyer minti: «Harə macəlam nəmti la a huli duŋa. Ɗiki nəmtiŋ waatam haa minti kopi bə seŋ də lasiŋ ada bə minti barən aynan dən, ten saw bə mo?»

Yə koore də Yeesu tiinə Annə

(Mat. 26.57-58; Mar. 14.53-54; Liki 22.54)

12Kəya kəsootoŋ də kumna neeteŋ daana kaa gə gole cəərə *Kuli kə Pepeŋ doŋ Yeesu, yə untunu kəəsu. 13Yə ɗeŋ duuru ajew kəm haa tiinə Annə. Annə haa akaarə Kayifiŋ, bə minti dər le toŋa *kumna boblo bə keere Pepeŋ. 14Haa kəna Kayifi toŋ toki bə minti a waataŋ kaanə Ziwifiŋ minti: «Hulum meŋ ne gud kaŋa, haa maryaŋ#18.14 Zaŋ 11.50.»

Piyer malte ku cəərə Yeesu

(Mat. 26.69-70; Mar. 14.66-68; Liki 22.55-57)

15Anə Simoŋ Piyer də *hulum baalaŋ bə gud Yeesu həənu bəlam du. Hulum baalaŋ bə guudu toŋ a jəŋ wəra də dər *kumna boblo bə keere Pepeŋ. Gud teŋa ta kəkəy cuuru bə kele na aker na giidə tiilim də kuli kə kumnaŋ na. Kəya wə kəlaŋ gud Yeesu faɗi gəm. 16Piyer toŋ yaakaŋ warda ku kəsarkaw da, taakaw da. Kəya hulum bə gud Yeesu naytoŋ kəlaŋ warda, wə ɗeŋ a nele də həlgə də gole ku kəsarkaw, kəya wə haraŋ bə kele da máŋ də Piyer guudu da faɗi. 17Həlgə də joŋre də minti gole ku kəsarkaw waataŋ Piyer minti: «Tam paapa hulum bə gud kaa gə gud Yeesu toŋ gəm bə mo?» Piyer minti: «Ten paapa hulum bə guudi ba!» 18Kaa kə joŋreŋ kə kumna bə keereŋ daana kaa gə gole cəərə *Kuli kə Pepeŋ a kuŋ cəwa kas kosõõyeŋ. Yə ɓəknə cəərə wəra cẽẽ bə hoole, Piyer bə hoole siri ada gəm.

Kumna boblo bə keere Pepeŋ le ku Yeesu

(Mat. 26.59-66; Mar. 14.55-64; Liki 22.66-71)

19*Kumna boblo bə keere Pepeŋ əsəŋ bə le ku Yeesu cəərə *kaa gə guuduŋa daana cəərə kel gə minti wə bə hətəya a kaŋ gəm. 20Yeesu minti: «Ten waataŋ kel wəra anə kəkər a kaŋ. Ten hətnəy saksaki haa giidə *kuli bə toose kə kaanə Ziwifiŋa daana giidə *Kuli kə Pepeŋa a ko bə minti kaanə Ziwifiŋ tapte ciiri adaŋ. Ten meteŋ mete bə wəətəy ba. 21Tam bə lan kun hebkəna haa səm mo? Kaa gə minti a jeɓrenen kun, lay kuy la cəərə kel gə minti ten a wəətənəy diŋ, yə wəra də diri anə kaŋkaŋ.»

22Hulum bə gole cəərə Kuli kə Pepeŋ kəman ada əskəŋ kel teŋ kəyaŋ, wə laŋ Yeesu duru kəŋ faɗi bə wəətu na minti: «Tam haa mindi mo bə hare kel a kumna boblo bə keereŋ bədoona anaŋ?» 23Wə minti: «Jəəne minti ten waataŋ kel a kuɗiŋa baŋ, gay guudi la wəra. Səma jəəne minti ten wəətənəy a kuɗiŋaŋ, tam bə laanan haa səm mo?» 24Kəya Annə rəəwunu bə əntə-ənti kəəsu ger Kayifi, *kumna boblo bə keere Pepeŋ.

Piyer hare bə malte ku cəərə Yeesu pa

(Mat. 26.71-75; Mar. 14.69-72; Liki 22.58-62)

25Də ko toŋ ha'aŋ, Simoŋ Piyer a kəm bə hoole saksaki. Kəya yə ləənu ku minti: «Tam paapa hulum bə gud *kaa gə gud Yeesu toŋ gəm bə mo?» Piyer maltaŋ ku minti: «Ten paapa hulum neete ba!» 26Hulum bə joŋre kə *kumna boblo bə keere Pepeŋ kəman, toŋ haa kusul də hulum bə minti Piyer a ŋiinu kusnu wəraŋ, əsəŋ bə waate Piyera minti: «Ten a asnam kanda giidə kəbaŋ gə karə-kere da duuru bə mo?» 27Səma Piyer haraŋ bə malte ku wəra cuuru pa. Də ko toŋ anə derra gogloki hõõdoŋ faɗi.

Yə ɗe də Yeesu tiinə Pilati

(Mat. 27.1-2, 11-14; Mar. 15.1-5; Liki 23.1-5)

28Bəbəəgaŋ kəyaŋ, yə kəlaŋ warda də Yeesu ger Kayifi da, yə kooroŋ duuru ger kumna bə minti Sezar a usnuŋ. Bə minti yə tuluŋ sar kuli boblo nuutuŋaŋ, kəkamna kə kaanə Ziwifiŋ doŋ haa bə ve aker na minti té kolə la paapa *cetceti ba ŋaanaanə moŋ ba, gud bə minti yə bele hame *kəɗwəy gə Pakiŋ#18.28 Jəəne minti kaanə Ziwifiŋ vaŋ ne giidə kuli kə hulum bə minti toŋ paapa bə Ziwifi ba damdi Pilati anaŋ, yə ji cetceti pəda, kəkəy paapa ciiri minti yə hame kəɗwəy gə Pakiŋ pəda gəm.. 29Kəya *Pilati kumnaŋ kəlaŋ warda siri da tiilim da, wə ləənəy kuy minti: «Aŋ bə ge hulum toŋa gila də kel məntəŋ mo?» 30Kəya yə minti: «Hulum gilaŋ a jəə baymele la baŋ, are sə a bi duuru tiinəma ba.» 31Tó minti: «Aŋ harə la duuru, aŋ də kusrəŋ, aŋ jəmu kəəti du la də ku gili nəətiŋ.» Yə minti: «Aŋ ayaŋ kəkəy a are bə jeme kəəti də hulum bə əwu wəra ba.» 32Haa də hel taŋ minti kel gə minti Yeesu a wəətənəy bə ge dər kaŋ minti tó bə me haa naanaanə me moŋ, doŋ kuy wəraŋ.

33Pilati haraŋ aləw na kaynaŋ, wə mantaŋ Yeesu suru na, wə wəətunu minti: «Tam haa kumna kə kaanə Ziwifiŋ nuutu mo?» 34Yeesu minti: «Tam waataŋ kel teŋ haa nuutu də ɗiki dəm mo, kaa gaalaŋ waatənam dəm cəərəna mo?» 35Wə minti: «Ten paapa bə Ziwifi ba. Kamnam gə Ziwifiŋ derra də kəkamna kə *kaa kə keere Pepeŋ bəŋ dəərəm a nəənən haa té. Tam jəŋ haa maa bədoona mo?» 36Wə minti: «Ten hame *Kumna katən paapa damdi kaa gə cəərə seŋkaŋ ana ba. Ten a jəə la bə té anaŋ, kaa gə guudən sə a duuri guudəna bə he ku kaŋ wəra minti yə a ayan a kəkamna kə kaanə Ziwifiŋ ba. Gəəzi, Kumna nin paapa damdi kə kaa gə cəərə seŋkaŋ ana ba.» 37Kəya Pilati minti: «Tam haa kumna tə bə mo?» Wə minti: «Tam wəətənəy ne wəra tam faɗi, ten kumna. Ten waŋ cəərə seŋkaŋa haa bə bi a ji bar kəkəy wəra cəərə gəəziŋa. Hulum bə minti doŋ gəəziŋ neŋ, wə ɗe gud kel gə kuna.» 38Pilati minti: «Gəəziŋ, haa maa mo?»

Yə jeme kəəti də Yeesu

(Mat. 27.15-31; Mar. 15.6-20; Liki 23.13-25)

Kəya *Pilati haraŋ sar kaanə Ziwifiŋ na tiilim na pa. Wə wəətənəy minti: «Ten fəlaŋ kel anə məna suru bə daw də kəəti ba. 39Damdi to'osi náŋ waate anaŋ, saksaki a leŋa ten ge hulum bə daŋgay wəra məna dər hi bə *kəɗwəy gə Pakiŋa a nəənəŋ. Hebkəna ha'aŋ, aŋ bele minti ten gaŋ la warna haa kumna nəətiŋ bə Ziwifi mo?» 40Kəya yə əsəŋ bə naakte kuya keɗe minti: «Paapa tó ba! Are bele haa Barabasi!» Anaaŋa, Barabasi toŋ haa bandi ɗaw.

Currently Selected:

ZAŊ 18: KERNT05

Highlight

Copy