ZAŊ 19

1Kəya Pilati ayaŋ kəkəy a kəsootoŋ minti yə doo Yeesu la, yə wutu la də kelekiŋ. 2Kəsootoŋ ləpaŋ kəjəm lapi, yə ɗəknu cuuru diiri, yə dərnu dəməəmə hərlə#19.2 A jəŋ bə tere dəməəmə hərlə gom də taŋa daana kaŋkəlaŋa haa kəkamnaŋ. suru gəm. 3Yə zeŋ suru bə dugtu kela bə wəətu minti: «Suuse nəmti, kumna kə kaanə Ziwifiŋ!» Yə lətnu duru ada gəm.

4Pilati haraŋ bə kele da warda pa. Wə waataŋ kaanə Ziwifi minti: «Aŋ golə la, ten gaŋ dəŋ warna tiilim na. Aŋ asə la wəra pisi minti ten fəlaŋ kel anə məna sar hulum toŋa bə daw də kəəti ba.» 5Kəya Yeesu kəlaŋ warda də kaŋkəlaŋ kəjəm gə kuɓə-kuɓi cuuru, də dəməəmə hərlə suru ada gəm. Pilati minti: «Aŋ golə la, hulum gila.»

6Səma, bə minti kəkamna kə *kaa kə keere Pepeŋ də kaa gə gole cəərə *Kuli kə Pepeŋ əsnu kəyaŋ, yə əsəŋ bə naakte kuya faɗi minti: «Ɓəlu la wəra a kəbaŋ gə largaŋa! Ɓəlu la wəra a kəbaŋ gə largaŋa!» Pilati minti: «Aŋ ɗee la a ɓəlu wəra a kəbaŋ gə largaŋa haa aŋ də kusrəŋ, gud maa mo, ten toŋ ha'aŋ, ten fəlaŋ kel anə məna suru kir daw də kəəti ba.» 7Kaanə Ziwifiŋ minti: «*Ku gili naare yaŋ, wə waate haa minti əwu la wəra, gud bə minti wə jəŋ kusru minti tó haa Kormə Pepeŋ.»

8Bə minti Pilati əskəŋ kel teŋ kəyaŋ, walka bə de Yeesu də kəətiŋ zeŋ guudə bə jəwa máŋ pisi ze. 9Wə haraŋ aləwa bə ɗe a le ku Yeesu minti: «Tam bəŋ haa də ane da mo?» Səma Yeesu hərnu kel ba anə ceki. 10Pilati minti: «Tam haran kel bə koo! Paapa də dərəm minti ten də abay bə gam wəra, ɗawba bə ɓəlam wəra a kəbaŋ gə largaŋa bə mo?» 11Yeesu minti: «Pepeŋ a ayam abay də apəyaŋ da baŋ, tam sə a neke bə ji karman sarəna anə məna ba. Haa gud teŋa ta minti hulum bə minti aynan a nəənəm ha'aŋ, wə jəŋ baymele dəŋam.» 12Də ko toŋ kəyaŋ, Pilati əsəŋ bə golde hela minti tó gaw la wəra. Kəya kaanə Ziwifiŋ əsəŋ bə naakte kuya minti: «Tam gəənu ne wəraŋ, tam paapa jaa də kumna boblo Sezar pəda! Hulum bə minti waate minti tó kumnaŋ, wə haa hulum bə acukur kə Sezar gadi faɗi.»

13Pilati əskəŋ kel teŋ anəkay, wə kəlaŋ Yeesu warda tiilim da, wə ɗeŋ a isi cəərə jaaŋa də ceme kəətiŋa. Yə mante ko toŋ minti ‹Ko bə degə-degeŋ›, yə məntu də ku Hebere minti: ‹Gabata›. 14Kel teŋ jəŋ haa də cəwa də daaway, dər hi bə ɗampe *kəɗwəy gə Paki gə minti ji a dibiini duŋaŋ. Pilati waataŋ kaanə Ziwifiŋ minti: «Aŋ golə la, kumna nəətiŋ gila!» 15Səma yə əsəŋ bə naakte kuya minti: «Əwu la wəra awe! Əwu la wəra awe! Ɓəlu la wəra a kəbaŋ gə largaŋa!» Wə minti: «Aŋ bele minti ten ɓalə kumna nəətiŋ la wəra a kəbaŋ gə largaŋa mo?» Kəkamna kə kaa kə keere Pepeŋ hərnu kel minti: «Kumna naare baalaŋ paapa, naareŋ haa Sezar faɗi!» 16Kəya Pilati əynəy Yeesu minti yə ɗee la a ɓəlu wəra a kəbaŋ gə largaŋa.

Yə ɓele Yeesu wəra a kəbaŋ gə largaŋa

(Mat. 27.32-44; Mar. 15.21-32; Liki 23.26-43)

Kəya kəsootoŋ doŋ Yeesu. 17Wə kəlaŋ warda giidə vil da haa də kəbaŋ gə larga nuutuŋ kuuru. Yə kooroŋ a ko kəman na, yə məntu minti ‹ko bə haa-he kəskəŋ gə cəŋ›, də ku Hebereŋ minti ‹Golgota›. 18Yə ɓəlnu a kəbaŋ gə largaŋa haa a ko toŋa, yə ɓəlaŋ kaa gaalaŋ suru ada ɓasi gəm, nayto a gala gəm, a gala gəm, Yeesu aduubə diya.

19*Pilati waataŋ kaa minti yə ɓalə jeere la wəra apəya cəərə kəbaŋ gə largaŋa. Jeere toŋ waate minti: «Yeesu bə Nazaretiŋ, kumna kə kaanə Ziwifiŋ». 20Kaanə Ziwifiŋ ablaw nəkaŋ bə aŋke kel teŋ gud bə minti ko bə minti yə a ɓəlaŋ Yeesu adaŋ wəra maŋ sar vila, daana yə jiiriniy də ku Hebere, də ku Lateŋ daana də ku Gereki gəm. 21Kəya kəkamna kə kaa kə keere gə Ziwifiŋ waataŋ Pilati minti: «Tam sə a jeere minti ‹Kumna kə kaanə Ziwifiŋ› ba, kulu la minti: ‹Hulum toŋ a waataŋ minti tó kumna kə kaanə Ziwifiŋ›». 22Pilati minti: «Kel gə minti ten jiiriniy, yə yaake bədoona ta'i gə jeerə-jeere.»

23Bə minti kəsootoŋ ɓəlaŋ Yeesu wəra a kəbaŋ gə largaŋa ɓalə kəyaŋ, yə humuŋ dəməəmə nuutuŋ, yə ɓarsəna guudə waaɗe, mindi mo fəlaŋ pəlaŋ. Yə humuŋ dəməəmə nuutu jamba-jambaŋ gəm. Dəməəmə taŋ paapa də laa-le ba, yə kaana haa ke. 24Kəsootoŋ əsəŋ bə waate aduubə də kumsi minti: «Áŋ a caarta wəra ba, áŋ jəə kooya bə siisi la cəərə.» Kel gə jeerə-jeereŋ gə giidə Kefter kə Pepeŋ doŋ kuy wəra haa bədoona ana minti: «Yə ɓarsənan dəməəmə katən wəra, nayta jamba-jambaŋ, yə jəŋ kooya bə siisi cəərə#19.24 Ps. 22.19.» Haa kəya kel gə minti kəsootoŋ jiiniy.

25Anə nər Yeesu, nawraŋ, Mari mar Kolopasiŋ, daana Mari də giidə wəlasi də Magdala, a jəŋ laki maŋ sar kəbaŋ gə larga kə Yeesuŋa. 26Yeesu asaŋ anə nuru də *hulum bə guudu bə minti wə bəluŋ sara maŋ gil, wə waataŋ nuru minti: «Nərən, gil siri haa kurmuyiŋ.» 27Wə waataŋ hulum bə guuduŋ gəm minti: «Gil sarəmaŋ haa nərəm.» Də ko toŋ da faɗi, hulum bə gud Yeesuŋ duunu nuru warna girdu na.

Me də Yeesu

(Mat. 27.45-56; Mar. 15.33-41; Liki 23.44-49)

28Adordə kel teŋa kəyaŋ, Yeesu asaŋ faɗi minti tó doŋ ku joŋreŋ bə minti tó sə a jəw ne wəra keɗe. Bə de ku kel gə jeerə-jeereŋ gə giidə kefter kə Pepeŋa wəra keɗeŋ, wə minti: «Kinkin doonon.» 29Dayga də ɗosə-ɗose də kumuy bə atələələma bəlan-bəlani kəman bə minti yə məntu ‹vineegər› a jəŋ ada lam. Kəya yə gəɓaŋ sooso ku kəbaŋ gə minti yə məntəy ‹isopiŋ›, yə ɗeŋ a luɗu dər vineegər da, yə əynu ku Yeesu. 30Yeesu gosoŋ vineegər anəkay, wə minti «Joŋreŋ doŋ ku ne wəra keɗe ta.» Kəya wə cokoŋ cuuru, wə guɓuŋ duru faɗi.

Sooto kepe Yeesu kuuyu

31Kel teŋ jəŋ haa də hi bə minti *hi bə faake kə Pepeŋ a dibiini duŋaŋ. Hi bə faake toŋ haa hi bə minti paapa akas kumsu bə diidaya ana ba. Haa gud teŋa ta minti kəkamna gə Ziwifiŋ a bəlaŋ minti yə jəə la a kəbaŋ gə largaŋa baŋ. Kəya yə mantaŋ kasi *Pilati minti wə vaa kəsootoŋ la bə ɗe a ce kampar kaa kə ɓaltə-ɓalteŋ wəra minti yə mee la wəra cəlam daana yə təkəy titi di da warda. 32Kəsootoŋ tuluŋ ada na, yə caŋ kampar hulum bə ɓalə-ɓele bə sar Yeesu wəra məna, kə nayto bə ɓasiŋ gəm. 33Bə minti yə tuukuŋ cəərə Yeesu kəyaŋ, yə fəlnu wəra bə mee-me ɗaw, kəya yə cəənu kəmpuru wəra pəda. 34Səma sooto kəman kəpnu kuuyu də cuŋkuy, kəya kor gaŋ warda də kan faɗi. 35Hulum bə minti bə ji bar kəkəya cəərə kel teŋaŋ əsnəy də duru. Kel gə minti wə wəətənəy ciiriŋ, yə gəəzi. Wəra də duru minti wə waate gəəziŋ ciiri kir minti aŋ doo la gəm. 36Kel teŋ jəŋ bədoona haa bə de ku kel gə minti wəra gə jeerə-jeere giidə Kefter kə Pepeŋa minti: «Yə bə caw kəskəŋ du wəra anə məna ba#19.36 Ex. 12.46; Nomb. 9.12; Ps. 34.21.» 37Wəra bə jeerə-jeere a ko baalaŋa pa minti: «Yə mele diri yaŋ cəərə hulum bə minti yə a kəpnuŋ#19.37 Zach. 12.10.»

Yə ge Yeesu a tələŋkə

(Mat. 27.57-61; Mar. 15.42-47; Liki 23.50-56)

38Adordə kel teŋa kəyaŋ, Zosefi, hulum bə giidə vil də Arimateŋ, ɗeŋ a mante kəkəy kasi *Pilati bə he titi də Yeesu bə ɗe a gaara a tələŋkə. Wə haa *hulum bə gud Yeesu gəm səma wə a bə de guudu dəgaaya-dəgaaya kas walka də kaa kəmtəŋ kə kaanə Ziwifiŋ. Pilati əynu kəkəy bə he titiŋ, kəya wə kooroŋ a haara faɗi. 39Nikodem, hulum kəman bə minti a ɗeŋ hõy sar Yeesu duugŋ, təpaŋ gud Zosefi na gəm. Wə haŋ son kəman kəəsu na, duru bə tapə-tepe də son bə siisi pisi yə məntu «mir» daana də «alowes» gəm, eele duŋ kelew hor-hor soope mo, bədoona ana. 40Yə haŋ titiŋ, yə hayɗəna də ladəra də minti yə a kaŋ kar gə siisi pəsaŋ cəərəŋ. Yə jəŋ kel haa də to'osi də minti kaanə Ziwifiŋ kaate titi neeteŋ dəərəŋ. 41Ko bə minti yə ɓəlaŋ Yeesu wəra adaŋ, kəbaŋ a jəŋ gə karə-kere də aŋar də ko toŋ. Giidə kəbaŋ teŋa ha'aŋ, tələŋkə təmarwa də ceɗə-ceɗe kəəyə pərki a jəŋ ada, yə gaŋ titi hõy kəm giidə ba. 42Kəya yə gaŋ titi də Yeesu ada faɗi gud bə minti kel teŋ jəŋ haa dəəgŋ ajew də *hi bə faake kə Pepeŋa daana tələŋkə a jəŋ maŋ gəm.

Currently Selected:

ZAŊ 19: KERNT05

Highlight

Copy