ZAŊ 4

Yeesu nele də həlgə də Samari

1Kaŋ waataŋ kaanə *Farisiyeŋ warna minti Yeesu bə tapə-tepe kaa guudu daana wə bə jəəti batema a kaŋ ablaw dəŋaŋ Zaŋ ɗaw ŋaanaanə mo. 2A gəəziŋa ha'aŋ, Yeesu jəətəŋ batem a kaŋ paapa tó də kusru ba, juutunu haa *kaa gə guuduŋ. 3Bə minti Yeesu əskəŋ kel gə minti kaŋ bə wəətiya a kaanə Farisiyeŋ cuuru bədoona kəyaŋ, wə yaakaŋ seŋka də Zudeŋ faɗi, wə haraŋ Galile. 4Bə minti wə tulə la warna Galile naŋ, kəkəy kele kəm duuru Samari na pəraki.

5Kəya wə tuukuŋ giidə vil də Samari kəmana, yə manta Sikar. Vil taŋ maŋ sar taakaw də minti Zakopi a ayna dayday a kurmuyu Zosefiŋ. 6Karta kə Zakopiŋ gə gaa-ge a ko toŋa. Yeesu gəyaŋ wəra kas ɗeŋ səm moŋ, wə ɗeŋ a isi je'i ku karta teŋa də cəwa də daaway.

7*Həlgə də Samari kəman bəŋ a ɗi kan. Kəya Yeesu əsəŋ bə waata minti: «Həlgəŋ, ayan kan la.» 8Də ko toŋ ha'aŋ, kaa gə guuduŋ a jəŋ paapa suru ada ba, yə a kooroŋ giidə vil bə ɗe a gusi kar kə hame. 9Kəya həlgəŋ wəətunu minti: «Tam gila hulum bə Ziwifi, ten haa həlgə də Samari gəm, tam bə mante kan kaasəna haa naanaanə mo?» A gəəziŋa, kaanə Ziwifiŋ bele tepe cəərə karmana də kaanə Samariŋ ba anə ceki. 10Wə harna kel minti: «Karman bə minti Pepeŋ əyu a kaŋ a jəə la də diriŋ, daana hulum bə minti bə mante kana kəəsi gilaŋ a jəə la də diri gəm, sə a mante kan kəəsu haa te ɗaw. Wə sə a əyəy haa kan gə aye dədərgəŋ.»

11Kəya a hərnu kel minti: «Hulum bə hateŋ, karman bə ɗi kan paapa kaasəma ba, kartaŋ gila yə kempeleŋ tə gəm, tam bə fele kan té gə aye dədərgəŋ haa də ane də mo? 12Karta teŋ gilaŋ, moomo də áŋ Zakopi əynəy a are haa tó. Tó də kusru, wə saŋ kan diŋ, kərmuyuŋ də bege nuutuŋ səənəy gəm. Tam bə waataŋ hebkəna haa minti tam dəŋnu mo?» 13Kəya wə harna kel minti: «Kan gə giidə karta teŋ gilaŋ, mindi mindi mo jəəne bə səətəyaŋ, kinkin harte bə tupu saksaki. 14Səma hulum bə minti se kan gə minti ten bə əyu duŋ, kinkin daw hõy pəda anə ceki. Kan té gə minti ten bə əyu duŋ, yə kole giidu damdi kəsar də kan gə minti ãye warda də səɓakiŋ ana. Teŋ haa kan gə aye dədərgə də bay teweŋ.» 15A minti: «Hulum bobloŋ, ayan kan té la kir minti ten a ji də caadə bi a ɗi kan pəda, kinkin a don hõy pəda.»

16Yeesu waatəna minti: «Ɗee la a mante gidriŋ da, bəəda duuru.» 17A hərnu du minti: «Gedrən paapa.» Wə minti: «Te waataŋ haa akəsa minti gidri paapaŋ, 18gud maa mo, kaŋkar gə minti te a tupnuy, yə wiiɗiw; hulum bə minti te guudu hebkənaŋ, wə paapa gidri bə gəm. Te waataŋ kel haa a kuɗiŋa.»

19A minti: «Hulum bobloŋ, ten asaŋ ne minti tam kəna *hulum bə jogte ku mini kə Pepeŋ. 20Pərki#4.20 Pərkiŋ haa pərki bə minti yə məntu Garizim. Kaanə Samari a bə toose Pepeŋa haa cuuru. toŋ gila, kəmoomo də are kaŋ awalna a Pepeŋ haa cuuru. Aŋ kaanə Ziwifiŋ, aŋ minti ko bə ke awalnaŋ ji haa Zeruzalema təwa.» 21Wə minti: «Həlgəŋ, don kel nin la, koŋ neke yaŋ nuutu minti aŋ bə ke awalnaŋ a Pep Abaŋ paapa cəərə pərkiŋa gila ba, Zeruzalema bə gəm. 22Aŋ kaanə Samariŋ, aŋ ke awalna nəətiŋ a Pepeŋ ha'aŋ, wə paapa də dərəŋ ba. Are kaanə Ziwifiŋ ke awalna a nuunu ha'aŋ, wə də dər are, gud maa mo seereŋ bəŋ haa ger kaanə Ziwifiŋ da. 23Səma ko bə minti kaa kə ke awalna a Pep Abaŋ damdi giidu bele anaŋ bə neke yaŋ, wə nəkaŋ ne ɗaw. Kaa teŋ bə ke awalnaŋ haa də səɓaki kə Tiiruŋ daana də gəəzi bə minti bəŋ ku daŋ. Haa kəya gom də kaa kə ke awalna gə minti giidə Pepeŋ bələy. 24Pepeŋ haa Tiiruŋ, kaa gə minti kaw awalna, yə kaarə la də səɓaki kə Tiiruŋ daana də gəəzi nuutuŋ.» 25A minti: «Wəra də dərən minti *Hulum bə minti Pepeŋ ŋəmnuŋ bə bi yaŋ, hulum tó bə minti yə məntu Kristuŋ. Wə bəŋ ne akaceŋaŋ, wə ke gud kar yaŋ wəra keɗe a áŋ.» 26Wə minti: «Ten bə minti bə wəətəy kela gilaŋ, ten kəna hulum toŋ gadi faɗi.»

27Də bə minti yə kəm bə nele lakiŋ, kaa gə gud Yeesu tuluŋ faɗi gəm. Bə minti yə əsnu bə nele də həlgəŋ, yə ŋələŋ wəra hasi. Də teŋ keɗe hulum guudi anə məna bəŋəŋ ku wəra ba anə ceki bə law ku minti: «Tam golde haa maa kaasa mo? Tam nele dəərə haa səm moŋ?»

28Kəya həlgəŋ yaakaŋ dayga naataŋ lam ku kartaŋa, a haraŋ giidə vil a tope bəlam də kel a kaŋ minti: 29«Aŋ bəəda a gole hulum kəman, wə topnon bəlam də kel gə minti ten a jiitiniy wəra keɗe. Wə haa *Hulum bə minti Pepeŋ ŋəmnuŋ ɗawmay mo?» 30Kəya kaŋ vaŋ warda giidə vil da, yə kooroŋ sar Yeesu da faɗi.

31Də ko toŋ ha'aŋ, kaa gə gud Yeesuŋ a bə luɓu minti: «Hulum bə hateŋ, hamə la tə gəm mo.» 32Kəya wə wəətənəy minti: «Hame katən yaŋ, səma wə paapa də dərəŋ ba.» 33Kaa gə guuduŋ əsəŋ bə lete ku kumsi minti: «Hulum bəŋ a əyu karman bə hame mo?» 34Wə minti: «Hame katən ha'aŋ, haa bə ji kel gə minti giidə hulum bə minti a gaanan daŋ bələy, daana bə de ku joŋre bə minti wə a aynan di daŋ. 35Aŋ yaŋ bə waatete kel kəmana minti: ‹Kitir bə ceme kaasaw yaakaŋ kəm waaɗe.› Səma ten toŋ ha'aŋ, ten waataŋ: aŋ gosə gole akaŋ la kəm pisi mo, a wəra də naa-ne kir ceme ɗaw. 36Hulum bə cəmaŋ bə fele werke nuutuŋa wəra daana wə bə kote cəərə kar dəŋa bə vay a dədərgə də bay teweŋa. Hulum bə jo'e kaasaw də hulum bə cəməy tepe keɗe bə ji waaleŋa haa sə teŋ. 37Kel gə minti aŋ wəətətəy minti: ‹Hulum kəman jo'e kaasaw, hulum baalaŋ cəməy›, kel teŋ haa gəəzi. 38Ten də kusrən, ten vaanaŋ bə ɗe a ceme kaasaw gə giidə aka də minti aŋ a kaɗna paapa aŋ baŋ. A kaɗna haa kaa gaalaŋ, aŋ koloŋ máŋ bə fele gud joŋre neeteŋa.»

39Kaanə Samari ablaw gə giidə vil taŋ koloŋ bə de gud Yeesu haa gud kel gə minti həlgəŋ a tupnuy bəlam di minti: «Wə topnon bəlam də kel gə minti ten a jiitiniy wəra keɗe'iŋ.» 40Bədoona ta, kaanə Samariŋ tuukuŋ suru kəyaŋ, yə əsəŋ bə luɓu minti wə jəə la máŋ sar té kəna caw. Kəya Yeesu doŋ haa bə hiti siri ada ɓasi. 41Kaŋ zuluŋ máŋ pisi zuli dəŋaŋ kaayaŋ gə ajew bə de gud kel gə minti tó də kusru wəətənəy diŋ. 42Yə əsəŋ bə waate həlgəŋa minti: «Are doŋ haa paapa gud kel niitiŋa təwa pəda. Are əskəŋ kel nuutuŋ máŋ də kosnə are, are asaŋ wəra faɗi gəm minti wə haa Hulum bə seere kaa gə cəərə seŋkaŋ.»

Yeesu seere kormə hulum bə ku joŋre boblo kə kumna wəra

(Mat. 8.5-13; Liki 7.1-10)

43Adoro hiti ɓasi, Yeesu yaakaŋ ko toŋ, wə haraŋ giidə seŋka də Galileŋ. 44Wə də kusru a waataŋ warda minti: «Yə humuŋ kosoŋ hõy cəərə *hulum bə jogte ku mini kə Pepeŋa giidə seŋka nuutuŋa ba.» 45Səma də bə minti Yeesu tuluŋ giidə seŋka də Galile naŋ, yə duunu irku du wəra pis-pisi gud bə minti yə a ɗeŋ a *kəɗwəy gə Pakiŋ giidə vil də Zeruzalem gəm, yə a asaŋ kar gə minti wə a jiitini adaŋ də diri.

46Kəya Yeesu haraŋ Kaana da giidə seŋka də Galileŋa, haa ko bə minti wə a koloŋ kan wəra ada kumuy. Hulum bə ku joŋre boblo kə kumna a jəŋ giidə vil də Kapernama, kurmuyuŋ a jəŋ də ɗeme ada gəm. 47Wə əskəŋ anəkay minti Yeesu yaakaŋ Zude warda, wə máŋ hebkəna giidə seŋka də Galileŋaŋ, wə kooroŋ suru a jəw kamkam minti wə ɗee la Kapernam bə ɗe a seere kormə toŋ wəra, kəmpuru ku tələŋkəŋ. 48Yeesu wəətunu minti: «Aŋ ha'aŋ, aŋ asaŋ miɗi daana kar kə ŋili kaa bə jəə-ji baŋ, aŋ de guudəna ba.» 49Hulum hərnu du minti: «Hulum bobloŋ, áŋ ɗee la gerdən hebkəna, jəəne paapa áŋ fəlu wəra bə mee-me.» 50Yeesu wəətunu faɗi minti: «Ɗee la akera, kormoyom haraŋ ne wəra holoŋ.» Hulum doŋ gud kel gə minti Yeesu wəətunu duŋ, wə kooroŋ faɗi. 51Wə bə ɗe na caw, kaa kə joŋre nuutuŋ bəŋ a jəmu duru, yə əsəŋ bə wəətu minti: «Kormoyom haraŋ ne wəra holoŋ.» 52Kəya wə ləənəy kuy minti: «Wə haraŋ bə ji wəra ɗəwa haa də cəwa məntə mo?» Yə minti: «Kusru bə salmə-salmeŋ arsaŋ haa deegŋ də cəwaŋ də həə-hi kuurə a gamla.» 53Bar pur asaŋ faɗi minti kel teŋ jəŋ haa də cəwa də minti Yeesu a waataŋ tó minti: «Kormoyom haraŋ ne wəra holoŋ». Kəya wə doŋ gud Yeesu də gə girduŋ keɗe. 54Haa kəya miɗi bə ɓasi bə minti Yeesu juunu bə veɗe kel nuutuŋ wəra a kəkəy bə minti wə yaakaŋ Zude warda, wə haraŋ Galileŋ.

Currently Selected:

ZAŊ 4: KERNT05

Highlight

Copy