ZAŊ 5

Yeesu seere hulum bə hurufi

1Adordə ko toŋa kəyaŋ, bə minti kaanə Ziwifiŋ bə ji kəɗwəy neete kəmanaŋ, Yeesu kooroŋ Zeruzalem na ada na gəm. 2Giidə vil taŋa ha'aŋ, goloŋ bə hərsə-hərsi yaŋ ada sar ku kuli bə minti yə məntu Ku Kuli kə Kaamaŋ. Gadlay gə karə-kere ku goloŋ toŋa wiiɗiw. Yə mante goloŋ toŋ də ku Hebereŋ minti Betsata. 3Gud gadlay toŋa ha'aŋ, gidiirə kaa kə ɗemeŋ ablaw ada anə lam-lam: kaa kə bəwə-bəwiŋ, kaa kə dəlay, kaa kə hurufiŋ. [Yə bə mi ɗoote bə kana. 4Gud maa mo hulum bə digi kə Barkaŋ kalte dər kana hõy-hõy bə ɗuutitiya. Hulum bə ɗeme bə minti ɗeŋ ne a kele dər goloŋa ajew də kumsuŋ, ɗeme nuutuŋ jəə la nuutu kəna naanaanə ɗaw, toŋ seere wəra.]

5Hulum bə hurufi kəman a jəŋ ada, wə laataŋ duuru hor-hor soope cuuru azəgən. 6Kəya Yeesu əsnu adawra lam, wə əskəŋ gəm minti wə laataŋ də ɗeme toŋ hebkəna ablaw ɗaw, wə əsəŋ bə wəətu minti: «Tam bele minti tam seerə la wəra mo?» 7Hulum bə hurufiŋ hərnu kel minti: «Hulum boblo, kan gə goloŋ ɗootoŋ neŋ, hulum bə kəyan paapa sarəna bə kəlan diri ba. Də ko bə minti ten bə hərti bə ɗe adaŋ, hulum baalaŋ ɗe a kele wəra ada ajew dən.» 8Yeesu minti: «Faa la apəya, haa gisi nəmtiŋ la, ɗee la.» 9A ko toŋa faɗi, hulum seereŋ wəra, wə haŋ gisi nuutuŋ, wə əsəŋ bə ɗe faɗi gəm.

Kel teŋ jəŋ haa dər *hi bə faake kə Pepeŋa. 10Kəya kaanə Ziwifiŋ əsəŋ bə waate hulum bə seerə-seereŋa minti: «Dayna haa hi bə faake kə Pepeŋ, *ku giliŋ ayaŋ kəkəy minti haa gisi la duru ba.» 11Wə hərnəy kel minti: «Hulum bə minti seerenen wəraŋ, waatənan minti ten haa gisi nin la, ten ɗee laŋ, haa tó.» 12Yə minti: «Waatənam kel teŋ haa mindi toŋ mo?» 13Doloy ha'aŋ, hulum bə minti a siirunuŋ paapa də duru ba, gud maa mo Yeesu lenteŋ warna aduubə də kaa kə ablaw na.

14Sawəwa adordə ko toŋa, Yeesu bə ɗeŋ a ŋefe duuru giidə *Kuli kə Pepeŋa. Wə wəətunu minti: «Golə la, tam máŋ wəra hebkəna holoŋ-holoŋ, səma, a ji baymele pəda kir minti kel kəman a tuuki cəərəma gə deŋe teŋ ba!» 15Hulum kooroŋ bə ɗe a waate kaanə Ziwifiŋ minti a seereŋ tó wəra doloy kəna Yeesu. 16Də ko toŋ kəyaŋ, kaanə Ziwifiŋ əsəŋ bə ge Yeesu də kel gud bə minti wə seereŋ hulum haa dər hi bə faake kə Pepeŋa. 17Də teŋ keɗe, wə minti: «Barən kəm saksaki a jəəti bə joŋre toŋa, ten kir ji haa joŋre toŋ gəm.» 18Gud kel nuutu teŋa kəyaŋ, kaanə Ziwifiŋ əsəŋ bə golde kəkəya pisi golda minti té əwu la wəra. Gud maa mo, wə ɓalkaŋ ku gili bə waate sam hi bə faake kə Pepeŋ təwa ba, wə mantaŋ Pepeŋ minti Bar toŋ faɗi, kəya wə ŋəraŋ kusru wəra gəga'-gəga'i duuru də kel teŋ.

Pepeŋ aye səɓakiŋ a kurmuyuŋ haa tó

19Yeesu haraŋ kel a kaanə Ziwifiŋ minti: «Gəəzi, gəəzi, ten waataŋ, ten Kormə Pepeŋ neke bə ji karman bay cəərən ba. Ten ji haa kar gə minti ten asaŋ Barən bə jiitiyaŋ təwa faɗi. Kar gə minti wə jəy keɗeŋ, ten jəy bədoona dege'-dege'i gəm. 20Gud maa mo wə bəlan, wə kan dərən cəərə kar gə minti tó də kusru bə jiitiyaŋ. Wə bə kan dərən yaŋ cəərə kar gə ji gə deŋe teŋa pə ɗaw, kəya aŋ ŋili yaŋ wəra ablaw. 21Damdi Barən pəəti kaa kə mee-meŋ wəra wə hərəy wəra dədərgə zugiŋ ana, ten gəm, ten aye dədərgə yaŋ a mindi mindi mo damdi giidən bəlaŋ anaŋ gəm. 22Barən jeme kəəti də hulum anə məna ba, səma abay də jeme kəətiŋ, wə aynan dən wəra keɗe, 23kir minti kaŋ keɗe han cəərən la apəya damdi yə bə haw cuuru apəyaŋ ana gəm. Hulum bə minti paapa bə han cəərəna apəya baŋ, wə he cəərə Barən bə minti gaanan daŋ bə gəm.

24Gəəzi, gəəzi, ten waataŋ, hulum bə minti iski kel gə minti ten wəətəy, wə doŋ ne gud Barən bə minti gaanan daŋ gəm, hulum toŋ fəlaŋ dədərgə də bay teweŋ ne wəra ɗaw. Kəəti daw pəda, wə cakɗaŋ da ne warda cəərə meŋ da, wə máŋ wəra a dədərgəŋa ɗaw. 25Gəəzi, gəəzi, ten waataŋ, koŋ bə neke yaŋ, wə nəkaŋ ne ɗaw, bə minti kaa kə mee-meŋ bə əski kel gə minti Kormə Pepeŋ bə wəətəy yaŋ. Kaa gə minti əskənən kun neŋ, yə ji yaŋ zugi dədərgə. 26Gud maa mo, Barən haa hulum bə minti dədərgəŋ bi haa suru daŋ tə bə moŋ, wə jəŋ kir minti dədərgəŋ bəəda haa sar ten kurmuyuŋ da bədoona dege'-dege'i gəm. 27Wə aynan abay bə jeme kəətiŋ kaasəna gud minti ten haa *Kormə Hulúm. 28Aŋ a ŋili gud kel teŋa ba, gud bə minti ko neke yaŋ bə minti kaa kə mee-me gə minti wəra a tələŋkəŋaŋ əskən dordən yaŋ, 29yə ve yaŋ warda giidə tələŋkə neeteŋ da. Kaa gə minti teŋ a jəətəŋ haa kel pəsaŋ, yə hare yaŋ wəra dədərgə, yə ji yaŋ zugi. Kaayaŋ gə minti teŋ a jəətəŋ haa kel kə bayməlaŋ, yə hare yaŋ wəra dədərgə, səma kəətiŋ doy. 30Ten paapa də abay də ji karman ten də kusrən ba, ten jeme kəətiŋ haa damdi Barən a waatənan səmu wəraŋ anə dege'-dege'i faɗi. Kəəti katən a kuɗuŋa gud minti ten golde haa paapa bə ji kel gə minti giidən bələy baŋ, ten golde haa ji bə kel gə minti giidə Barən bə minti gaanan daŋ bələy.

Kaa gə minti ji bar kəkəy cəərə Yeesuŋ

31Ten jəəne bə ji bar kəkəya cəərə kusrəna ten də kusrən, aŋ neke bə de haa də kel katən ba. 32Səma hulum baalaŋ yaŋ bə ji bar kəkəya cəərəna, wəra də dərən minti kel gə minti wə wəətəy cəərəna keɗeŋ, yə gəəzi. 33Aŋ a vaŋ kaa bə ɗe a jeɓre kel kə Zaŋ Batisiŋ, kel gə minti wə a wəətənəy di cəərən daŋ, yə a kuɗiŋa. 34Səma, bərdə kəkəy kaŋkaŋi bə cəərən paapa hulum kisirki ba. Bar kəkəy bə minti Zaŋ juunu cəərənaŋ, ten a wəətunu səmu haa minti aŋ nakə la bə seere wəra. 35Zaŋ a jəŋ haa damdi lampa də minti yə do'a bə wele koŋ wəraŋ ana. Aŋ doŋ haa bə ji waale dər pəɗaki taŋa dər ko anə ga'i bagŋ. 36Səma kar gaalaŋ yaŋ bə ji bar kəkəya wəra cəərəna dəŋaŋ kə Zaŋ. Kar teŋ haa joŋre bə minti Barən aynan dən minti ten təwu laŋ. Joŋre toŋ waatan səman daana wə ge dər kaŋ minti Barən gaanan da. 37Barən bə minti gaanan daŋ bə ji bar kəkəy cəərəna gəm. Səma aŋ uskunu durdu hõy ba, aŋ əsnu duru hõy bə gəm. 38Aŋ doŋ kel nuutuŋ ku tarməyaŋa kay ba gud bə minti, ten bə minti wə a gaanan daŋ, aŋ doŋ guudəna ba. 39Aŋ vərgi gud Kefter kə Pepeŋ wəra anə ke'-ke'i də ɗikiŋ minti aŋ fele dədərgə də bay teweŋ haa giidu. Kel gə giidə kefter toŋ anə derra bə jəəti bar kəkəya cəərəna daw! 40Də teŋ keɗe, aŋ ɗempa a bi sarəna ba minti aŋ falə dədərgə də bay teweŋ laŋ.

41Ten golde paapa minti kaŋ tokɗon la ba. 42Səma kel dəŋ də dərən minti bele bə Pepeŋ paapa ku tarməyaŋa ba. 43Ten bəŋ haa kir kasi Barən, aŋ doŋ haa minti ten a ji sarəŋa ba. Ana doloy ha'aŋ, hulum baalaŋ bəŋ ne sarəŋa bə bi a waataŋ dər kel nuutuŋ, aŋ de haa də toŋ sarəŋa səma! 44Aŋ bele nəətiŋ haa hage bə sam kumsəŋ aduubə də kumsəŋa. Səma aŋ golde haa paapa minti Pep ɗaaməna'iŋ tokɗoŋ laŋ ba. Yə haa kəya tə gəm, aŋ bə de guudəna haa naanaanə de mo? 45Aŋ a ɗiki minti ten bə ɗe a gaŋ yaŋ də kel tiinə Pepeŋa haa ten ŋaanaanə moŋ ba. *Moyisi, hulum bə minti aŋ a məlaŋ ɗiki dəŋ cuuruŋ, bə gaŋ də kel tiinə Pepeŋa dəmaŋ haa tó. 46A jəə la minti aŋ doŋ gud Moyisi gəəziŋ, aŋ sə a de guudəna faɗi gəm, gud maa mo wə jeereŋ kel haa cəərəna derra faɗi. 47Aŋ doŋ gud kel gə minti wə jiiriniŋ ba tə bə moŋ, aŋ bə neke bə de gud kel katəna haa naanaanə de səma mo?»

Currently Selected:

ZAŊ 5: KERNT05

Highlight

Copy