LIKI 16

Ku kumti cəərə hulum bə minti paapa bə ame akəsa baŋ

(Mat. 6.24)

1Yeesu waataŋ *kaa gə guuduŋ pa minti: «Hulum bə bege kəman yaŋ, wə məlaŋ hulum bə ame cəərə kar nuutuŋa. Kəya kaŋ bəŋ a waate hulum bə bege minti: ‹Hulum bə joŋre nəmtiŋ bə ɓalkam kar nəmtiŋa wəra.› 2Kəya burduŋ məntunu, wə wəətunu minti: ‹Ten əski kel teŋ cəərəma bədoona ana haa naanaanə mo? Don bəlam də joŋre nəmtiŋ la wəra, gud bə minti tam ji hulum bə joŋre nin pəda.› 3Kəya hulum bə joŋreŋ əsəŋ bə waate kusru minti: ‹Bərdən sarmənan ne wəra a joŋreŋa haa kənaŋ, ten bə ji naanaanə mo? Səɓaki dən də kərpə-kerpe bə kéɗé, kese dərəna bə mantete kar kasi kaŋa. 4Səma kel gə minti ten bə jəy hebkənaŋ də dərən, minti wə gaanan ne wəraŋ, kaŋ don irku dən yaŋ nuutu girdi!› 5Kəya wə mantaŋ kaa gə minti bal kə burduŋ ciiriŋ warda məna-məna keɗe. Wə waataŋ bə ajew minti: ‹Bal kə bərdən cəərəma aniinə mo?› 6Hulum bə bal hərnu kel minti: ‹Bal də bidoŋ komtoŋ bə son cəərəna kəsi.› Kəya hulum bə ame kar hərnu kel minti: ‹Doo kefter bə bal nəmtiŋ la, əsə la adawra cəlam, jeerə la máŋ hor wiiɗiw.› 7Wə waataŋ hulum baalaŋ pa minti: ‹Nəmtiŋ, bal cəərəma aniinə mo?› Wə hərnu kel minti: ‹Cəərəna səwal bə kaasaw kəs-kəsi wiiɗiw.› Hulum bə joŋreŋ hərnu kel minti: ‹Doo kefter bə bal nəmtiŋ la, jeerə la máŋ kəs-kəsi waaɗe.› 8Kəya bərdə hulum aŋkaŋ sam hulum nuutu bə hãy-hãy, gud bə minti wə jəŋ joŋreŋ də hel. Kaa kə dogoynaŋ asaŋ hel bə ji joŋre neeteŋ aduubə də kumsi dəŋaŋ kaa kə pəɗakiŋ.»

9Yeesu wəətənəy minti: «Ten bə waataŋa minti aŋ topə jaa la də bege bə gul-gula bə cəərə seŋkaŋ. Bə minti bege toŋ təwaŋ ne wəraŋ, yə doŋ irku dəŋ yaŋ a ko bə bay teweŋ na.

10Hulum bə minti jəəne ɓeti a kar koncoŋaŋ, wə ji wəra ɓeti a kar kəmtəŋa gəm. Hulum bə minti jəəne də hãy-hãy a kar koncoŋaŋ, wə ji wəra də hãy-hãy a kar kəmtəŋa gəm. 11Jəəne minti tam jəŋ joŋreŋ də bege bə gul-gula bə cəərə seŋkaŋ pisi ɓeti baŋ, Pepeŋ bə ayam bege bə gəəzə-gəəziŋ mo? 12Jəəne minti tam jəŋ joŋreŋ pisi ɓeti də bege kə hulum baalaŋ baŋ, Pepeŋ bə ayam dər nəmtiŋ yaŋ nuutu mo?

13Hulum bə joŋre neke bə jəw a kəkamna ɓasi ba. Ɗalba wə bele naayaw toŋ daana wə mele dər naayaw toŋ wəra, ɗalba wə he cəərə naayaw toŋ apəya daana wə gole naayaw toŋ wəra ko bə boobo. Aŋ neke bə aye kusrəŋ a Pepeŋ daana soloy ɓasi keɗe ba!»

14Bə minti kaanə *Farisiyeŋ əskəŋ kel teŋ wəra neŋneŋ keɗeŋ, yə awtaŋ hin cəərə Yeesu gud bə minti yə bele soloy ablaw. 15Yeesu wəətənəy minti: «Aŋ, aŋ haa kaa gə minti ji kusrəŋ ɗeker dər kaŋaŋ, səma Pepeŋ asaŋ ku tarməyaŋ. Kel gə minti dər kaŋa pəsaŋ baanə baŋ, yə dər Pepeŋa bayməlaŋ.»

Ku gili kə Moyisiŋ də Kel pəsaŋ kəmarwaŋ

(Mat. 11.12, 13; 5.18, 32; 19.9; Mar. 10.11-12)

16*«Ku gili kə Moyisiŋ daana jeere kə *kaa kə jogte ku mini kə Pepeŋ da anə hãã tuukuŋ wəra dər ko kə Zaŋ Batisiŋa, kaŋ jəŋ joŋreŋ haa diiri. Məlaŋ guudu dər ko kə Zaŋ Batisi da, yə waataŋ *Kel pəsaŋ kəmarwaŋ gə *Kumna kə Pepeŋ wəra, daana mindi mo bə golde də səɓaki a kusru minti tó kele ada.

17Anaaŋa seŋkaŋ də ko bə apəyaŋ tewe wəra bay gəəli dəŋaŋ karmə jeere gə giidə ku gili kə Pepeŋ.

18Hulum bə minti buusuŋ muruŋ ne wəraŋ, wə ɗeŋ ne a de daalaŋ, wə jəŋ haa piwpiw faɗi. Hulum bə minti doŋ həlgə də buusə-buusi neŋ, wə jəŋ haa piwpiw gəm.»

Ku kumti cəərə hulum bə hurmaŋa də Lazar

19«Hulum bə hurma kəman yaŋ, wə feke nuutuŋ dəməəmə pasa də gusi awəy ablaw, wə jəətiti kəɗwəy saksaki. 20Hulum bə caaca yaŋ, səmu minti Lazar, kusru wəra keɗe də maavorgo, wə bə əsə-isi lam ku kəsarkaw kə hulum bə hurmaŋa. 21Wə də taynə hame so bə minti awte wəra adawra kasi hulum bə hurmaŋaŋ. Máŋ kəyaŋ, káayaŋ pəəti a halɗe dər toso nuutuŋ.

22Hõy məna, hulum bə caacaŋ meŋ, *kaa kə digi kə Pepeŋ həənu, yə kooroŋ duuru sar *Abraham. Adoro, hulum bə hurmaŋ meŋ gəm tá, yə gəənu a tələŋkə. 23Wə bə lese ablaw a ko kə kaa kə mee-meŋa tə bə moŋ, wə haŋ duru apəya, wə asaŋ Abraham warna tooto də Lazar suru na. 24Kəya ta wə naaktaŋ ku koloŋ minti: ‹Barən Abraham, asan caadən la! Gaa Lazar la, wə darə niinə karmə kəəsu da dər kan da, minti yə arsan kəsəlɗən la, gud bə minti ten bə lese ablaw dər cəwaŋa.› 25Səma Abraham wəətunu minti: ‹Kormonti, ɗəkə la kəm, tam fəlaŋ bege nəmtiŋ a caw dəma, kə Lazar wə fəlaŋ nuutuŋ lasi. Bə hebkənaŋ, duru teŋeŋ ne kəna, nəmtiŋ, tam fəlaŋ máŋ lasiŋ gəm ta. 26Gə deŋe kumsiŋ, aduubə də áŋa dəərəŋ, tələŋkə mooto kələmləma yaŋ ada. Bədoona ana, kaa gə minti bele cakɗe warna səraŋ naŋ, yə a cakɗe na ba. Kaa gə səraŋ a neke bə cakɗe warda sar are da bə gəm.›

27Hulum bə hurmaŋ waataŋ minti: ‹Ten jəm kamkam, barən Abraham, gaa Lazar la ger barən 28gud bə minti kəsaanan yaŋ da ada wiiɗiw. Wə ɗee la a gay kusni, kir minti yə də kusri a bi dər ko tó bə lasiŋa kəna pəda.› 29Abraham wəətunu minti: ‹Kəsaanam teŋ ha'aŋ, jeeré kə anə *Moyisiŋ də kə *kaa kə jogte ku mini kə Pepeŋ yaŋ siri da, yə əskə la guudi.› 30Hulum bə hurmaŋ waataŋ minti: ‹Barən Abraham, teŋ kəya neke ba. Səma jəəne minti hulum bə mee-meŋ haraŋ ne wəra dədərgə daana haraŋ ne warna siri naŋ, yə kole kirki yaŋ a baymele neeteŋ.› 31Abraham wəətunu minti: ‹Jəəne minti yə bəlaŋ iski kefter kə Moyisiŋ də kə kaa kə jogte ku mini kə Pepeŋ baŋ, hulum bə mee-me harə la nuutu warna dədərgə caw siri na ɗaw, yə daw ku bə pa.›» – 16 17

Currently Selected:

LIKI 16: KERNT05

Highlight

Copy