LIKI 17

Sərdə hate kə Yeesuŋ

(Mat. 18.6-7, 15, 21-22; Mar. 9.42)

1Yeesu waataŋ *kaa gə guuduŋ minti: «Kel gə minti feke kaŋ dər baymeleŋaŋ raawe wəra cəərə kaŋa bay ji ba, səma gəəliŋ ji yaŋ cəərə hulum bə minti kaŋ ku hulum ne bə ji baymeleŋaŋ. 2Yə a gaa hulum toŋ la dər kan kəmtəŋa də kuuni bə ecce bə əntə-ənti kuuru ɗaw, kəm haa kel ga'i saksaki jəəne minti wə gaŋ gom də beebe konce toŋ ne gila bə yaake kəkəy bə deŋaŋ. 3Aŋ amə kusrəŋ la pisi! Seenem jəŋ baymele ne sarəmaŋ, gilu la pisi. Jəəne minti wə koloŋ kirku ne a baymele nuutuŋ, vəəgə giidim la wəra cuuru. 4Jəəne minti wə jəətəŋ baymele ne sarəma dər hi bə məna kampa seeɗaŋ, minti wə hartaŋ də ne səram da kampa seeɗa gəm, minti tó koloŋ kerkə tó ne a baymele kə toŋ, vəəgə giidim la wəra cuuru.»

Səɓaki də deŋ

(Mat. 17.20)

5*Kaa kə vaa-veŋ waataŋ Barkaŋ minti: «Zee gud de naareŋ la ajewa!» 6Barkaŋ haraŋ kel minti: «De nəətiŋ sə a jəə la boblo bə dər kolɓoy anaŋ, aŋ waataŋ kəbaŋ té kəmtəŋ ne gila minti: ‹Bəə la wəra, ɗee la warna a gere dər kan kəmtəŋ naŋ›, yə sə a doŋ kuŋ.»

Hulum bə joŋreŋ ji joŋre pisi naanaanə mo

7«Mindi aduubə dəŋa minti də hulum bə joŋre bə keɗe mo, ɗalba bə ame bege mo, wə haraŋ də ne minti akaŋ, wə wəətu yaŋ minti: ‹Bəəda, ɗee la a hame so cəlam› mo? 8Wə wəətu paapa bədoona ba, wə wəətu yaŋ ɗaw haa minti: ‹Waɗə so la wəra, kolə dəməəmə də joŋre la sarəma, ayan kar la hãã bə minti ten təwaŋ hame bə soŋ ne wəra daana ten saŋ ne wəraŋ gəm. Adordə teŋa, tam neke kəm bə hame, daana bə se gəm ta.› 9Wə ji suuse a hulum bə joŋreŋ cəərə joŋre bə minti wə juunuŋ ba, gud bə minti haa joŋre nuutuŋ. 10Aŋ gəm taŋ, yə sarəŋa bədoona gəm. Joŋre bə minti yə a aynaŋ dəŋ bə jiŋ, aŋ təwnu ne wəraŋ, aŋ waatə la minti: ‹Are kəna kaa kə joŋre bagŋ, are jəŋ haa joŋre bə minti are sə a jəw.›»

Yeesu seere kaa kə fə̃ya hor

11Bə minti Yeesu a kəkəy bə ɗe Zeruzalemaŋ, wə kəlaŋ adəwaldə seŋka də Samariŋa, daana Galile. 12Bə minti wə bə kele giidə wəlasi kəmanaŋ, kəya kaa kə fə̃ya hor bəŋ a ŋefe duuru. Yə əsəŋ warda məɗa. 13Kəya yə əsəŋ bə naakte kuya koloŋ bə wəətu minti: «Yeesu, Hulum bə hateŋ, asə caadə are la!» 14Bə minti wə əsnəy, wə wəətənəy minti: «Aŋ ɗee la a veɗe kusrəŋ wəra a *kaa kə keere Pepeŋ.» Bə minti yə bə ɗe a kəkəya zugiŋ, yə seereŋ wəra faɗi. 15Hulum guudi məna bə minti wə asaŋ minti tó seereŋ wəraŋ, wə haraŋ adoro da bə tokɗe Pepeŋa, bə naakte ku koloŋ-koloŋ. 16Kəya wə tuukuŋ sar Yeesu, wə vaŋ də guguuru kəmpuru, wə kuɓuŋ də ku tərmuyu adawra, daana wə juunu suuse. Hulum toŋ, wə *hulum bə Samari. 17Kəya Yeesu waataŋ minti: «Kaa horiŋ bə seereŋ wəra keɗe bə mo? Kaayaŋ tampəla'iŋ ane mo? 18Teŋ ha'aŋ, hulum ɗəkəŋ bə hare da a tokɗe Pepeŋ guudi anə məna bə mo, haraŋ də ha'aŋ hulum bə aŋay təwa mo?» 19Kəya Yeesu wəətunu minti: «Faa la apəya, ɗee la; de nəmtiŋ seerenem ne wəra.»

Bi də Kumna kə Pepeŋ

(Mat. 24.26-27, 37-39)

20Kaanə *Farisiyeŋ laŋ ku Yeesu minti: «Pepeŋ bə bi a hame kumna nuutuŋ haa kotnə mo?» Wə hərnəy kel minti: «Pepeŋ bi a hame kumna nuutuŋ paapa wəra kəkər minti kaŋ əsu ba. 21Wə paapa minti kaŋ bə waate minti: ‹wə kəna›, ɗalba ‹wə kanna›, paapa, gud bə minti Pepeŋ wəra bə hame kumna nuutuŋa aduubə dəŋa kəna.»

22Adoro wə waataŋ *kaa gə guuduŋ minti: «Hi kəman bə bi yaŋ minti aŋ də caadə ase hi bə minti *Kormə Hulúm bi duuruŋ, səma aŋ ase hi toŋ ba. 23Yə bə waataŋ yaŋ minti: ‹Wə kanna, wə kəna!›, səma aŋ a ɗe ada ba, aŋ a fi tara ada na bə gəm. 24Gud maa mo, Kormə Hulúm bi ha'aŋ damdi koŋ welɗe agal naytaŋ da hãã wəra agal naaya taŋa nemnem ana. 25Səma ajewa ha'aŋ, Kormə Hulúm kir lese wəra kəm ablaw daana kaa kə hebkənaŋ ŋuryu la wəra gəm.

26Kel gə minti jəŋ dər hi kə Noweŋaŋ, yə ji yaŋ bədoona ana dege'-dege'i dər hi bə minti Kormə Hulúm bi duuruŋ gəm. 27Dər hi kə Nowe daŋ, kaŋ bə hame, bə se, bə tope kərama, bə ayte kərməyiŋa a kaŋkar, hãã bə minti Nowe kəlaŋ giidə turti mootoŋaŋ. Kəya kan kəmtəŋ haŋ da, yə bəsaŋ kaa kaayaŋ wəra keɗe.

28Bədoona ana pa, kel teŋ bə ji yaŋ damdi dər hi kə Lotiŋ ana gəm. Kaŋ bə hame, bə se, bə gusi kara, bə gusi kar neeteŋa wəra, bə keɗe, daana bə hərsiti kuliŋa. 29Səma, dər hi bə minti Loti yaakaŋ vil də Sodom wəraŋ, Pepeŋ raytaŋ cəwaŋ apəy da akas ko bə hage ana, də karman bə saawte kaa. Cəwa taŋ kuŋ kaanə Sodom wəra keɗe. 30Kel bə ji yaŋ haa bədoona dege'-dege'i dər hi bə minti Kormə Hulúm pəŋ duru neŋ.»

31«Dər hi toŋa ha'aŋ, hulum bə minti a jəəne apəya cəərə kuli nuutuŋa, kar nuutuŋ jəəne aləwaŋ, wə a ve wəra adawra bə bi a humuy pəda. Bədoona ana pa, hulum bə minti a jəəne warna giidə akaŋ naŋ, wə a hare akera pəda. 32Aŋ ɗəkə la cəərə mar Lotiŋa.

33Hulum bə minti bele anə ɗaaməna minti tó jəə la caw saksakiŋ, wə bese dədərgə du wəra haa bese ɗaw. Hulum bə minti bəsaŋ dədərgə du ne wəraŋ, wə seerəna wəra haa seere. 34Ten bə waataŋa, dər ko bə duugŋ toŋa, kaa jəəne kerkə kumsi a kəɓər gə məna ɓasiŋ, yə he yaŋ məna, yə yaake yaŋ məna. 35Kəram jəəne bə ecce ɓasi a ko bə mənaŋ, yə he yaŋ məna, yə yaake yaŋ məna. [ 36Kaa kaŋkar ɓasi bə kéɗé giidə aka, yə he yaŋ məna, yə yaake yaŋ məna.»] 37Kaa gə guuduŋ ləənu ku minti: «Barkaŋ, kel teŋ ji haa a ko muntu mo?» Wə hərnəy kel minti: «A ko bə minti titiŋ adaŋ, haa ko bə minti marlaŋ lewe adaŋ gəm.» – 17 18

Currently Selected:

LIKI 17: KERNT05

Highlight

Copy