LIKI 18

Ku kumti cəərə həlgə də baya də hulum bə ceme kəətiŋ

1Kəya Yeesu waataŋ kel də *ku kumti a *kaa gə guuduŋ, bə gay diri minti yə kirka toose a kuɗuŋa saksaki daana minti yə a dere hor bə hasi. 2Wə wəətənəy minti: «Hulum bə ceme kəəti yaŋ giidə vil kəmana, wə ji walka kasi Pepeŋ ba, wə əski ku hulum anə məna bə gəm. 3Həlgə də bay kəman yaŋ giidə vil taŋa ada gəm, a pəəti suru saksaki a wəətu minti: ‹Jamə kəəti naare la wəra aduubə də are də hulum bə acukur nin.› 4Hiti ablaw wə ɗempa a jeme kəətiŋ ba. Kəya ta, wə əsəŋ bə ɗiki minti: ‹Ten ji walka kasi Pepeŋ nuutu ba, daana ten əski ku huluma bə gəm. 5Səma, gud bə minti həlgə taŋ gəyan saksaki, ten jama kəəti naataŋ wəra. Ten jəŋ bədoona baŋ, a naaktan cəərən saksaki.›» 6Kəya Barkaŋ waataŋ pa minti: «Aŋ əskə kel kə hulum bə jeme kəəti bə baymeleŋ la kəm mo. 7Golə la kəm, Pepeŋ bə jeme kəəti kə kaa gə minti wə vərnəy, bə minti bə naakte kuya a nuunu daaway də duugŋ bə mo? Wə mi yaŋ bay jəməy tulul di mo? 8Ten waataŋ, wə jəməy kəəti neeteŋ yaŋ wəra pisi cəlam. Səma bə minti *Kormə Hulúm haraŋ də neŋ, wə fele hulum bə doo-de yaŋ nuutu cəərə seŋkaŋa anə məna mo?»

Ku kumti cəərə hulum bə Farisiyeŋa,də hulum bə tope lambaŋ

9Yeesu waataŋ *ku kumtiŋ haa paŋ, a sərdə kaa gə minti gole kusri ɗeker tiinə Pepeŋa, daana gole kaa kaayaŋ diri mənaŋ. 10«Kaa kəman ɓasi, yə vaŋ giidə *Kuli kə Pepeŋa bə toose. Məna hulum bə *Farisiyeŋ, naayaw toŋ *hulum bə tope lamba. 11Hulum bə Farisiyeŋ faŋ apəya, wə bə toose gal giidu minti: ‹O Pepeŋ, ten jəm suuse cəərə kel gə minti ten paapa akas kaa kaayaŋa ana baŋ. Yə kaa kə dəgaaya, yə kaa kə bayməlaŋ, kaa kə piwpiw daana pa ten paapa akas hulum bə tope lamba toŋa gila ana bə gəm. 12Dər aluma məna, ten *jaate də kun kampa ɓasi, daana ten aytam gal hora də kar nin gə minti ten fəltəy wəra keɗe pa.› 13Kə hulum bə tope lambaŋ, wə əsəŋ nuutuŋ warna məɗa, wə ɗempa a he duru apəya anə weseka ba. Səma, wə əsəŋ bə rayte kəəsu də laawe minti: ‹O Pepeŋ, asan caadən la! Ten haa hulum bə baymele.› 14Gud teŋa ta, ten waataŋ: də bə minti hulum toŋ haraŋ akeraŋ, Pepeŋ əŋkunu hulum ɗekeri, səma wə aŋkaŋ hulum bə Farisiyeŋ ba. Gud bə minti mindi mo keɗe haŋ cəərə kusru ne apəyaŋ, yə həru yaŋ wəra adoro. Səma hulum bə minti haraŋ kusru ne adoroŋ, yə haw cuuru yaŋ apəya.»

Yeesu ge pisiŋ cəərə kəmar koncoŋa

(Mat. 19.13-15; Mar. 10.13-16)

15Kaa kəman bəŋ də kəmar koncoŋ a Yeesu minti wə maltə kəəsu la siri bə gay pisiŋ ciiri. Bə minti kaa gə gud Yeesuŋ əsnəy bə ɗe da anəkay, yə wəətənəy minti yə a bi da diiri ba. 16Səma Yeesu mantaŋ kəmar koncoŋ suru da bə waate minti: «Aŋ yaakə kəmar koncoŋ la, yə bəəda səran da, aŋ a hay kuy warda ba. Gud maa mo ɗe a ve a *Kumna kə Pepeŋa haa kaa gə minti ji kusri damdi té ana'iŋ. 17Gəəzi ten waataŋ, hulum bə minti doŋ haa minti Pepeŋ jəə la kumna cəərə tó damdi beebe konceŋ de haŋ ana baŋ, wə kele a Kumna kə Pepeŋa ba anə ceki.»

Hulum bə begeŋ də Kumna kə Pepeŋ

(Mat. 19.16-30; Mar. 10.17-31)

18Kumna kə kaanə Ziwifi kəman laŋ ku Yeesu minti: «Hulum bə hate bə minti jəəti pisiŋ, ten jəə maa la minti ten fele dədərgə də bay teweŋ mo?» 19Yeesu hərnu kel minti: «Tam minti ten hulum pisi. Asə la minti hulum pisi anə məna paapa; Pepeŋ pisi haa tó ŋel məna faɗi. 20*Ku giliŋ kə Pepeŋ wəra də dərəm minti: ‹A ji piwpiw ba, a awe titi ba, a ji dəgaaya ba, a ŋete kel sar kumsuma ba, haa cəərə bəram la apəya də nərəm#18.20 Ex. 20.12-16.›» 21Hulum hərnu kel minti: «Ten humuŋ kosoŋ cəərə ku gili toŋa ha'aŋ, hãã a puranul dən da faɗi.» 22Bə minti Yeesu əskəŋ kel teŋ kəyaŋ, wə wəətunu minti: «Karman yaakaŋ wəra sarəma məna. Gusə kar nəmtiŋ la wəra keɗe, ayə soloy diŋ la wəra a kaa kə caacaŋ, kəya tam ɗe a fele bege nəmti bə gəəzə-gəəziŋ yaŋ apəy na. Adoro bəəda, tapə la guudəna nuutu ta.» 23Bə minti hulum əskəŋ kel teŋ kəyaŋ, laawe duunu, gud bə minti wə də bege ablaw.

24Bə minti Yeesu əsnu bədoona anaŋ, wə waataŋ minti: «Bə kele a Kumna kə Pepeŋaŋ, gəəliŋ nuutu gil tiinə kaa kə begeŋa faɗi! 25Joŋjoŋ neke nuutu bə kele a tələŋkə də paatala mo? Ãhãã! Bə minti hulum bə begeŋ kele a Kumna kə Pepeŋ naŋ, gəəli dəŋaŋ toŋ kəm pə ɗaw!»

26Kaa gə minti bə jiɓru kuŋ minti: «Bə jəəne bədoonaŋ, bə neke bə fele seereŋ haa mindi toŋ pə mo?» 27Səma Yeesu hərnəy kel minti: «Karman bə minti hulum kisirkiŋ neke bə jəw baŋ, Pepeŋ neke bə jəw.» 28Kəya Piyer wəətunu minti: «Kə are kaayaŋ teŋ gəm mo? Are yaakaŋ kuli naareŋ warda keɗe bə ham bəlam dəm.» 29Yeesu hərnəy kel minti: «Gəəzi ten waataŋ, hulum mundu mundu mo bə minti yaakaŋ kuli nuutuŋ, muruŋ, kəsəənuŋ, kəmnuŋ, kərmuyuŋ, gud kel də Kumna kə Pepeŋaŋ, 30də ko bə hebkənaŋ, hulum toŋ ɗe a fele kar yaŋ ablaw dəŋaŋ kaayaŋ té gə minti wə yəəkənəy wəraŋ. Dər ko bə minti bə bi adoroŋ, wə bə fele dədərgə də bay teweŋ gəm.»

Yeesu doge waate sam me du kampa bə soopeŋ

(Mat. 20.17-19; Mar. 10.32-34)

31Yeesu mantaŋ *kaa gə guudu hor ciiri ɓasiŋ suru wəra bay ciiri, wə wəətənəy minti: «Aŋ bə ase, áŋ koore Zeruzalem. Kel gə minti *kaa kə jogte ku mini kə Pepeŋ a jiirini wəra cəərə ten *Kormə Hulúmaŋ, yə ɗe a de kuy yaŋ warna haa ada na. 32Yə ayan yaŋ wəra a kaa gə minti paapa kaanə Ziwifi baŋ, yə awte hin yaŋ cəərəna, yə sartan yaŋ, yə tuftuŋ kiɗiki yaŋ sarəna, 33yə bəran yaŋ bere də kelekiŋ daana yə bə awan yaŋ wəra. Kəya dər hi bə soopeŋaŋ, ten hare yaŋ wəra dədərgə adordə meŋa.» 34Səma kaa gə guuduŋ əskəŋ gud kel té gə minti wə bə wəətiyaŋ ba. Guudiŋ əskəŋ kəəsi ba; wə waataŋ haa cəərə maa mo, paapa də diri ba.

Yeesu biŋi dər hulum bə bəwə-bəwiŋ wəra

(Mat. 20.29-34; Mar. 10.46-52)

35Bə minti Yeesu tuukuŋ maŋ sar Zerikoŋ, hulum bə bəwə-bəwi kəman yaŋ bə əsə-isi agəjaŋ də kəkəya cin bə laare kara kasi kaŋa. 36Bə minti wə əskəŋ kaa kə ablaw bə ɗeŋ, wə mantaŋ minti: «Bə ɗe haa mindi mo?» 37Kəya yə hərnu kel minti: «Bə ɗe haa Yeesu bə Nazaretiŋ.» 38A ko toŋa wə əsəŋ bə naakte ku minti: «Yeesu, *Kormə Davidiŋ, asan caadən la kəm mo!» 39Kaa gə minti bə ɗe na tiinə kaa na ajew naŋ əsəŋ bə jəw gəbaŋa minti wə zenə la. Tó ha'aŋ, wə zeŋ gud naakte kuŋ pisi ze ɗaw minti: «Kormə Davidiŋ, asan caadən la kəm mo!» 40Kəya Yeesu əsəŋ gil, wə minti: «Aŋ bəəda duuru!» Bə minti hulum bə bəwə-bəwiŋ tuukuŋ sar Yeesu maŋ, Yeesu ləənu ku minti: 41«Tam bele minti ten jəm maa la mo?» Wə hərnu kel minti: «Barkaŋ, jən la kir minti dərən asə la.» 42Yeesu wəətunu minti: «Dərəm bəŋə la wəra! De nəmtiŋ seerenem ne wəra.» 43Hebkən-hebkəna faɗi, duru əsəŋ bə ase, kəya wə haŋ kəkəy gud Yeesu faɗi bə tokɗe Pepeŋa. Bə minti kaa kə ablaw keɗe asaŋ kel teŋ kəyaŋ, yə əsəŋ bə tokɗe Pepeŋa gəm. –

Currently Selected:

LIKI 18: KERNT05

Highlight

Copy