LIKI Kel gə minti áŋ fələy giidə kefter toŋaŋ
Kel gə minti áŋ fələy giidə kefter toŋaŋ
Liki jeereŋ Kel Pəsaŋ kəmarwaŋ nuutuŋ, wə kəənəy gədəəgi diŋ damdi kə Markəŋ ana gəm. Wə jeereŋ minti:
– Zaŋ Batisi ji joŋre damdi hulum bə minti ɗampe kəkəy kə Yeesu ana (3.1-20), bə waate sam batema daana bə minti Sataŋ kaŋ ku Yeesu (3.21—4.13).
– Yeesu jəŋ Galile wəra kəkər caw, bə waate kel kə Pepeŋa a kaŋ, daana bə seere kaa kə ɗemeŋa wəraŋ (4.14—9.50).
– Gəryi kə Yeesu bə minti wə ɗeŋ Galile bə raawe Zeruzalem (9.51—19.28). Liki jeereŋ sar jeere kə Markə kəna ada ablaw: anə ku kumtiŋ cəərə hulum bə Samari pisiŋaŋ, cəərə hulum bə bege bə tiniiniŋaŋ, cəərə pur bə minti a lenteŋ wəra yə haraŋ bə fəluŋ, daana də tope bəlam də helɗe bə ger anə Marta də Mari.
– Joŋre kə Yeesu bə minti wə juunu Zeruzalemaŋ (19.29—21.38).
– Sam lasi kə Yeesu də me du (22—23).
– Kefter nuutuŋ təwaŋ də sam kəɗwəy gə Pakiŋ (24), də hare də Yeesu wəra dədərgə adordə meŋaŋ. Wə vəɗaŋ kusru a kaa kə doo-deŋ a kəkəy bə ɗe Emayusiŋaŋ ajew də bə minti wə koore apəyaŋ.
Səma Luc jeereŋ sərdə kel ada dəra də kə Markəŋ, gud bə minti wə kəənu duru wəra pisi, minti gəəzi də hate kə toŋ jəə la wəra pəɗaki (1.1-4). Liki jeereŋ kefter nuutuŋ, wə məlaŋ guudu a gud kel da a kəsar də Yeesu, daana a kəsar də Zaŋ Batisi (1, 2). A ko toŋa áŋ aŋke haa waate bə minti hulum bə digiŋ waataŋ Mariŋ, də we kə Zaŋ Batisiŋ, də we kə Yeesuŋ, bə minti kaa kə ame begeŋ bəŋ a kaw awalna, daana gudul kə Mariŋ, kə Zakariŋ, kə Simeyon gəm.
A mele bə gud kel kə Likiŋa, wə topoŋ bəlam də kel wəra derɗek-derɗeki cəərə kel gə minti məlaŋ guudi sar Yeesu də apəy da, daana cəərə kəsar də kaanə Israyela. Bi kə Yeesu koloŋ kəkəy kə kaa gə cəərə seŋkaŋ. Liki ge dər kaŋ cəərə bele bə minti Pepeŋ bəlaŋ kaa gə minti yə a bə guluya baahãy (gə minti yə ŋuryunuy wəraŋ, anə kəram, kaa kə caaca, daana kaa gə aŋay). Wə ge dər kaŋ cəərə joŋre boblo kə Tiiru Cetcetaŋa, də waale bobloŋ daana də toose bə minti bə tapə-tepe də Kel pəsaŋ kəmarwaŋ gəm.
Liki jeereŋ kel nuutuŋ a kaa gə minti asaŋ to'osi kə kaanə Israyel kəm ablaw baŋ. Wə bele minti ɗiki di jəə la wəra pəɗaki, daana bə kay gud kel gə minti teŋ kəmarwaŋ siriŋ. Dər hulum bə dogoynaŋa, kefter kə Liki haa kefter bə minti iski bay gəəli. Áŋ jəŋ ne bə tupu bəlam duŋ, áŋ ase Hulúm bə seere kaŋ. –
Currently Selected:
LIKI Kel gə minti áŋ fələy giidə kefter toŋaŋ: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.