MARKƏ 16

Yeesu hare wəra dədərgə adordə meŋa

(Mat. 28.1-8; Liki 24.1-11; Zaŋ 20.1)

1*Hi bə faake kə Pepeŋ raawaŋ wəra raawa kəyaŋ, Mari də wəlasi də Magdalaŋ, Mari nər Zaki, daana Salome gusuŋ son bə siisi pisi kəəsi na minti té ɗe a sətu sar titi də Yeesu. 2Bəbəəgaŋ dər Dəmasiŋa, cəwaŋ daagaŋ warda anəkay, yə tuluŋ sar teɗkera. 3A kəkəy bə ɗe naŋ, yə a bə waate aduubə də kumsi minti: «Ɗee a lakte pərkiŋ wəra a náŋ ku teɗkera haa mindi tə mo?»

4Yə humuŋ diri bə gole anəkay, yə asaŋ pərkiŋ wəra bə laktə-lakte bəy agəjaŋa. Ana haa pərki boblo boblo pa! 5Yə vaŋ giidə tələŋkəŋa kəyaŋ, yə asaŋ puranul kəman də jamba bərwa suru bə əsə-isi cin kəəsi kemer. Kəya walka jəmnəy wəra faɗi. 6Səma wə wəətənəy minti: «Aŋ a ji walka ba! Aŋ golde haa Yeesu bə Nazareti bə minti yə a ɓəlnu wəra a kəbaŋ gə largaŋa bə mo? Wə paapa kəna pəda, wə haraŋ ne wəra dədərgə. Aŋ golə ko bə minti yə a gəənu adaŋ la ha'aŋ, wə ane bəy ada pə mo? 7Bə hebkənaŋ, aŋ ɗee la a waate anə Piyer də *kaa gə guudu kaayaŋ minti wə yaŋ tiiniŋ na Galile na, aŋ ɗe a əsu haa a ko toŋ na, damdi wə a waatənaŋ wəra ajewaŋ ana.» 8Yə haraŋ bə ve da warda anə cəlam-cəlam giidə teɗker da, yə kooroŋ də tara warna bə miiri na anə yaɓ-yaɓ-yaɓi daana wəra gə lentə-lente dər ɗiki di gəm. Yə bəŋəŋ kuy anə ɓe'i bə waate karmana a hulum ba kas walkaŋ.

Yeesu veɗe kusru wəra a sərdə kaa gə minti a bə ɗeete guuduŋe#16.8 Konce du 9-20 yaŋ nuutu giidə kefter bə Gerekiŋa ablaw, səma kefter bə Gereki ɓasi bə acekjew bə dayday, wə paapa giidə toŋa ba. Gud teŋa ta, sərdə kaŋ ɗiki haa minti kefter kə Markə tewe a konce du 8, yə vaŋ naytoŋ máŋ laka ada haa ve.

[ 9Yeesu haraŋ wəra dədərgə adordə meŋa bəbəgiŋ də Dəmasiŋ. Wə vəɗaŋ kusru wəra kəm ajew haa a Mari də giidə wəlasi də Magdalaŋ, də minti wə a sarmaŋ kəwal wəra hõy cəərə seeɗaŋ. 10Kəya a kooroŋ a waate karman bə minti a əsnuŋ a kaa gə minti a bə ɗeete guuduŋ. Yə a haa dər laaweŋa daana a bə hage də kan gə diri. 11Səma bə minti yə əskəŋ ku minti wə yaŋ wəra bə harə-hare dədərgə daana minti tá əsnu warda də dər tá gəm, yə doŋ kel teŋ ba anə ceki.

12Adordə teŋaŋ, wə vəɗaŋ kusru wəra a *kaa ɓasi guudi, wə bə kolə-kole kas hal ɗəwa. Kaa teŋ a bə koore haa giidə kəbaŋ na. 13Yə haraŋ giidə vil da bə bi a waate kaayaŋ, səma yə duuniy kuy bə gəm.

14Bə dəyaŋ pa, wə vəɗaŋ kusru máŋ haa a *kaa gə guudu hor ciiri məna'iŋ, yə a bə hame. Wə jiiniy gəbaŋ cəərə bay de neeteŋa daana minti yə hẽŋeŋ wəra də kaa gə minti əsnu wəra bə harə-hare dədərgə gud bə minti yə duuniy kuy baŋ. 15Kəya wə wəətənəy minti: «Aŋ ɗee la wəra a koŋa keɗe bə ɗe a waate *Kel pəsaŋ kəmarwaŋ wəra a kaŋ neŋneŋ keɗe. 16Hulum bə minti doŋ ne daana yə juunu batem neŋ, wə seere yaŋ wəra. Hulum bə minti doŋ baŋ, kəəti kə Pepeŋ daw yaŋ. 17Kaa gə minti doŋ ne jəəti kar yaŋ bə ge dər minti Pepeŋ bə kəyəya: də səman, yə sarmete kəwal yaŋ, yə waatete ku kaa gə minti yə a wəətunu hõy baŋ yaŋ gəm. 18Yə humtuŋ ne nuutu kəəsiŋa kancaw ɗaw, kumundu ba yə saŋ neŋa karman kəman bə awe kaa ɗaw, wə jəy baymele anə weseki ba. Yə maltaŋ kasi ne sar kaa kə ɗemeŋaŋ, yə seere yaŋ wəra gəm.»

19Barkaŋ Yeesu wəətənəy kel teŋ bədoona waata kəyaŋ, Pepeŋ həənu warna apəy na, wə usnu a kəəsu kemera. 20Té kaa gə guuduŋ kooroŋ a waate Kel pəsaŋ kəmarwaŋ wəra a koŋa keɗe. Barkaŋ bə kəyəya, wə əynəy səɓaki də jəəti kar gə məɗ-miɗiŋ. Kel teŋ ge dər minti yə waate wəra haa kel kə gəəziŋ.]

Currently Selected:

MARKƏ 16: KERNT05

Highlight

Copy