MATIYE 23

Kaŋ a ji kusri damdi kaanə Farisiyeŋ də kaa kə hate ku giliŋ ana ba

(Mar. 12.38-40; Liki 20.45-47)

1Kəya Yeesu əsəŋ bə waate kaa kə ablawa də *kaa gə guuduŋ minti: 2«Kaanə *Farisiyeŋ də *kaa kə hate ku gili kə Pepeŋ, kəkəy bə joge *ku gili kə *Moyisiŋ wəra bə ayə-aye haa a niini. 3Gud teŋa ta, aŋ iskiy kuy la, aŋ jəə kel gə minti yə hataŋ dəŋ la keɗe, səma aŋ a ɗe gud kel gə minti yə jəy ba. Gud maa mo yə tepe də kel gə minti yə hətəy a kaŋ ba. 4Yə malte kar gə eele gə bay tekeŋ cəərə kaŋa. Té də kusri ha'aŋ, yə paapa bə kəyəya də kəəsi bə təkəy kar teŋa ciiri ba. 5Kar gə minti yə jəy keɗe ha'aŋ, yə bele veɗe kusri wəra minti kaŋ asə té la. Kəya yə gaɓtaŋ kopi kəmtəŋ siri#23.5 Pepeŋ waataŋ kaanə Israyel minti yə doo kel kə tó la ciiriya daana yə intiy la kəəsi. Kopi bə əntə-ənti kəəsiŋ, kel kə Pepeŋ gə jeertə-jeerte giidu. Kaanə Farisiyeŋ jəŋ kopi boblo kuurə kəəsi minti kaŋ waatə sam té la. Ex. 13.9,16; Deut. 6.8, ku dəməəmə neeteŋ də tanə-tene kempeleŋ anə bəjər-bəjərəŋa#23.5 Deut. 22.12; Nomb. 15.37-41. 6A ko bə anə kəɗwəyaŋ, yə golde haa ko bə əsti kə kaa kəmtəŋ. Bə minti yə giidə *kuli bə toose kə kaanə Ziwifiŋaŋ, yə golde haa ko bə əsti bə minti yə ji yaŋ wəra kəkər lakiŋ. 7Yə golde haa minti kaŋ mirkə té la wəra anə pasyak-pasyaki a ko bə anə alumaŋa. Yə bele minti kaŋ mantə té la minti té kəna ‹kaa kə hateŋ› pa. 8Səma nəətiŋ ha'aŋ, aŋ a yaake hulum bə mantəŋa minti ‹hulum bə hateŋ› ba. Gud maa mo, hulum bə hataŋ wə haa ɗaaməna faɗi, aŋ kaa kaayaŋ teŋ keɗe kəsaanə kumsuŋ. 9Aŋ a mante hulum bə adawra cəərə seŋkaŋa kəna minti toŋ kəna ‹bəraŋ› ba, gud maa mo bəraŋ wə haa ɗaaməna faɗi, haa Bəraŋ bə minti apəy daŋ. 10Aŋ a yaake kaŋ bə mantəŋa minti ‹kəkamnaŋ› ba, gud maa mo kumnaŋ wə ɗaaməna faɗi, haa Kristu. 11Hulum bə minti aduubə dəŋa boblo tiiniŋaŋ, toŋ haa hulum bə jəŋ joŋreŋ. 12Hulum bə minti haŋ cəərə kusru ne apəyaŋ, Pepeŋ bə həru yaŋ wəra adoro; hulum bə minti haraŋ cəərə kusru ne adoroŋ, Pepeŋ bə haw cuuru yaŋ apəya gəm.»

Gəəli bə minti cəərə kaanə Farisiyeŋa də kaa kə hate ku giliŋ

(Liki 11.39-52)

13«Gəəliŋ nəəti aŋ kaanə *Farisiyeŋ də *kaa kə hate ku gili kə Pep gə minti waate kel nəətiŋ də kuŋ təwaŋ! Gud maa mo aŋ gisiŋ ku kuli bə *Kumna kə Pepeŋ wəra dər kaŋa. Aŋ də kusrəŋ, aŋ ve ada na ba, səma kaa gə minti a də caadə ve ada naŋ, aŋ həənəy kuy wəra bay ve gəm.

[ 14Gəəliŋ nəəti aŋ kaanə Farisiyeŋ də kaa kə hate ku gili kə Pep gə minti waate kel nəətiŋ də kuŋ təwaŋ! Gud maa mo aŋ tope kar kə kəram gə bay, səma aŋ əsəŋ ne bə tooseŋ, aŋ toose anə taa-taa-taa minti aŋ kaa pəsaŋ ŋaanaanə mo. Pepeŋ bə ɗe a jəŋ daŋgay dəŋ yaŋ dəŋaŋ kə kaa kaayaŋ gud kel teŋa kəya.]

15Gəəliŋ nəəti aŋ kaanə Farisiyeŋ də kaa kə hate ku gili kə Pep gə minti waate kel nəətiŋ də kuŋ təwaŋ! Gud maa mo aŋ gəryi cəərə seŋkaŋa daana dər kan kəmtəŋa bə fele hulum koo nuutu məna minti toŋ tapə la guudəŋa. Aŋ fəlnuŋ ne kəyaŋ, aŋ kulu bə ji baymeleŋa kir se gəəliŋ dər cəwa də bay teweŋa dəŋaŋ nəətiŋ kəm pə ɗaw!

16Gəəliŋ nəəti aŋ kaa kə bəwə-bəwi gə taɗte kumsəŋ! Aŋ waate kaŋ minti: ‹Hulum kəlaŋ ku ne də *Kuli kə Pepeŋ, wə jəŋ kel teŋ pədaŋ, kel paapa. Səma jəəne minti wə kəlaŋ ku haa də kooso bə gusi bə awəy-awəy bə giidə Kuli kə Pepeŋ, wə doo ku kel teŋ la wəra me'i.› 17Aŋ kaa kə bəwə-bəwi té gə bay ase kel! Karman bə deŋe kumsuŋ haa muntu mo? Kooso bə gusi bə awəy-awəy mo, ɗawba Kuli kə Pep bə minti koloŋ kooso toŋ wəra karman pisi bə gaa-ge dəra'i a Pepeŋ mo? 18Aŋ waataŋ pa minti: ‹Hulum kəlaŋ ku ne də *ko bə jəəti keereŋ a Pepeŋ, wə jəŋ kel teŋ pədaŋ, kel paapa. Səma jəəne minti wə kəlaŋ ku haa də karman bə minti yə əynu bə keereŋ, wə doo ku kel teŋ la wəra me'i.› 19Aŋ kaa té gə bəwə-bəwiŋ! Karman bə deŋe kumsuŋ haa muntu mo? Karman bə minti yə əynu bə keereŋ mo, ɗawba ko bə ji keere bə minti kole karman bə minti yə əynu wəra dəra'i a Pepeŋ mo? 20Hulum kəlaŋ ku ne də ko bə jəəti keereŋ, wə kəlaŋ ku haa də kar gə minti gə vaa-ve cuuru adaŋ keɗe faɗi gəm. 21Hulum kəlaŋ ku ne də Kuli kə Pepeŋ, wə kəlaŋ ku haa də Pep bə minti bə əsə-isi giidu adaŋ faɗi gəm. 22Hulum kəlaŋ ku ne də tarmə pepeŋ, wə kəlaŋ ku haa də jaaŋa də *Kumna kə Pepeŋ daana də tó Pep bə minti bə əsə-isi cəərəŋ faɗi gəm.

23Gəəliŋ nəəti aŋ kaanə Farisiyeŋ də kaa kə hate ku gili kə Pep gə minti waate kel nəətiŋ də kuŋ təwaŋ! Gud bə minti aŋ ayte agal hora də anə agumgum, də awerwereŋ, də kosnə kəsaw kaayaŋ keɗe a Pepeŋ. Anaaŋa kel kəmtəŋ gə giidə ku gili kə Pepeŋ damdi anə ji bə kel ɗekeriŋ, ji bə giidəŋ pəsaŋ sar kaŋa daana ɗeŋ, cəərəŋ jəŋ a teŋa ba. A haa kar gə minti aŋ a sə a jəy, səma aŋ a yaake kel kaayaŋ wəra bay ji bə gəm. 24Aŋ kaa kə bəwə-bəwi gə taɗte kumsuŋ teŋ, kar gə minti aŋ sətəy, aŋ tupuy wəra tupi minti kəkəw a kalte kuŋa ba, ana doloy ɗaw ha'aŋ, aŋ bə ləkti joŋjoŋa anə zəg-zəgiŋ!

25Gəəliŋ nəəti aŋ kaanə Farisiyeŋ də kaa kə hate ku gili kə Pep gə minti waate kel nəətiŋ də kuŋ təwaŋ! Gud maa mo aŋ baade nəətiŋ haa kerkə kəəyəw gə se kan də kaɓkaw təwa, anaaŋa giidiŋ wəra gə ɗostə-ɗoste də ɗiki bə dəgaayaŋ daana də həryəm də kar gə minti aŋ ɗiki ciiriŋ. 26Tam hulum bə Farisiyeŋ bə bəwə-bəwiŋ! Malə guudum la bə ɗampe ku tarməyama wəra damdi yə baade giidə kəəyəw daana kaɓkaw wəraŋ ana. Kirkiŋ bə baade kusru yaŋ bay cuuru faɗi.

27Gəəliŋ nəəti aŋ kaanə Farisiyeŋ də kaa kə hate ku gili kə Pep gə minti waate kel nəətiŋ də kuŋ təwaŋ! Gud maa mo aŋ haa damdi teɗker də satə-sate wəra bərwaŋ ana, də minti gole máŋ wəra pasa baanə baŋ, səma giidə də ɗosə-ɗose də kəskəŋ də kaa gə mee-meŋ daana də kar kə cimə-cimiŋ. 28Aŋ haa bədoona ana gəm. Kerkəŋa anəkay ha'aŋ, aŋ gole dər kaŋa wəra kaa ɗekeri, ana doloy ha'aŋ, ku tarməyaŋ wəra bə ɗosə-ɗose haa də kel gə minti aŋ wəətəy də kuŋ təwa daana də baymeleŋ.

29Gəəliŋ nəəti aŋ kaanə Farisiyeŋ də kaa kə hate ku gili kə Pep gə minti waate kel nəətiŋ də kuŋ təwaŋ! Gud maa mo aŋ hərsiti teɗker pəsaŋ cəərə *kaa kə jogte ku mini kə Pepeŋa, daana aŋ jeerteŋ wəra cəərə teɗker kə kaa gə minti jəəti ɗeker anə wikik-wikiki. 30Kəya aŋ raawe bə waate minti: ‹Are a jəə la wəra zugi dər kəmoomo də areŋ, are a sə a tepe ku are diiri bə awte kaa kə jogte ku mini kə Pepeŋa wəra ba.› 31Aŋ də kusrəŋ, kel gə minti aŋ wəətəy jəəti kəmnə də kəkəy minti aŋ haa kaasaw də kaa gə minti a awtaŋ kaa kə jogte ku mini kə Pepeŋ wardaŋ. 32Kel gə minti kəmoomo dəŋ a məlnəy guudi daŋ, aŋ raawə la máŋ diiri ta, aŋ doy kuy la wəra!

33Aŋ kancaw teŋ, aŋ karmə akay! Aŋ ɗəkəŋ minti aŋ fiti yaŋ wəra ku gəəli bə minti aŋ ɗe a saw dər cəwaŋaŋ haa də hel məntə mo? 34Gud teŋa ta, ten bə vaŋ kaa kə jogte ku mini nin, kaa kə ase gud kel, daana kaa kə hate ku gili kə Pepeŋ wəra a kuɗiŋa yaŋ na. Aŋ awte sirdiŋ yaŋ wəra, aŋ ɓalte sirdiŋ yaŋ wəra a kəbaŋ gə larga, aŋ witi sirdi gaalaŋ yaŋ giidə *kuli bə toose nəətiŋa, aŋ bə təkəy bəlam di yaŋ bə ləsəya giidə vil daalaŋ-daalaŋa. 35Bədoona ana ta, kaa ɗekeriŋ gə minti aŋ əwtənəy wəraŋ, məlaŋ guudi da də titi də Abel hulum ɗekeriŋ, hãã də Zakari kormə Barasiŋ bə minti aŋ a əwnu giidə *Kuli kə Pepeŋa aduubə də ko bə jəəti keereŋa də *ko cetcetiŋ, gəəli də kor neeteŋ awe yaŋ cəərəŋa. 36Gəəzi ten waataŋ, kəəti də lasi də minti a sə a ji cəərə kaa gə minti awtaŋ kaŋ, bə awe yaŋ cəərə kaa kə dogoynaŋa.»

Yeesu laawe cəərə kaanə Zeruzalema

(Liki 13.34-35)

37«O, aŋ kaanə Zeruzalem, aŋ kaanə Zeruzalem! Aŋ gə minti awte *kaa kə jogte ku mini kə Pepeŋ wəraŋ, daana awte kaa gə minti Pepeŋ a faknaŋ dəŋ daŋ wəra də pərkiŋ! Ten də taynə taptaŋ cəərəŋ damdi dəbərgəŋ tapte cəərə karməyaŋ gud gəraŋ də anaŋ kampa ablaw, səma aŋ bəlaŋ ba! 38Golə la, kuli nəətiŋ ji yaŋ wəra bə ŋoryə-ŋorye bə anə kəɓər lam. 39Gud maa mo ten waataŋ, aŋ bə asan hõy pəda hãã də ko bə minti aŋ bə waate minti: ‹Pisiŋ jəə la cəərə hulum bə minti bə bi da a sam Barkaŋ daŋ#23.39 Ps. 118.26!›»

Currently Selected:

MATIYE 23: KERNT05

Highlight

Copy