MATIYE 24

Yeesu waate sam ɓalke bə Kuli kə Pepeŋ

(Mar. 13.1-4; Liki 21.5-7)

1Yeesu kəlaŋ warda giidə *Kuli kə Pepeŋ da. Bə minti wə bə ɗe na caw, *kaa gə guuduŋ zeŋ suru da bə bi a gaw duru cəərə Kuli kə Pepeŋa minti wə bə hərsə-hərsi pis-pisi ŋaanaanə moŋ. 2Kəya wə minti: «Aŋ yaŋ nuutu bə ase kar gə sar kuli toŋa gila keɗe mo? Gəəzi ten waataŋ, kuli toŋ gila bə ce yaŋ wəra neŋneŋ keɗe, koo pərki du kəman yaake bə malə-mele cəərə kumsu ada ba.»

Gəəliŋ də lasiŋ

(Mar. 13.5-13; Liki 21.8-19)

3Adoro, Yeesu ɗeŋ a isi warna cin kəəyə *pərki bə minti yə məntu Oliviyeŋ na. Kəya *kaa gə guuduŋ zeŋ suru da té təwa, yə əsəŋ bə law ku minti: «Waatə are la kəm mo, kel teŋ ɗe a ji haa kotnə mo? Karman maa ji mo bə ge dər are minti tam maŋ bə hare da daana cəərə tewe bə koŋa mo?» 4Yeesu hərnəy kel minti: «Aŋ jəə la wəra gə gunə-guni kir minti hulum a ləŋaŋ wəra ba. 5Gud maa mo, kaa ablaw piti yaŋ bə ji kusri damdi té kəna ten ana. Mindi mindi mo bə waate yaŋ minti tó kəna Kristu, *Hulum bə minti Pepeŋ ŋəmnuŋ! Kəya yə laŋte kaa yaŋ wəra ablaw faɗi. 6Aŋ bə əskiti sam anə duuri bə səraŋ máŋ-máŋiŋ daana nayto too-too-to'iŋ yaŋ gəm. Aŋ a jeme walka ba, gud maa mo kel teŋ kir ji, paapa kəm tewe də koŋ faɗi ba.

7Aŋ bə ase gidiirə kaa yaŋ bə piti cəərə gidiirə kaa gaalaŋa, seŋka mooto cəərə daalaŋ mooto gəm. Tay bə jəəti yaŋ daana seŋkaŋ bə miirtiti yaŋ a ko ta'-ta'i. 8Kar teŋ gila keɗeŋ, yə gə ŋarə-ŋere haa də gəəli bə minti həlgəŋ fəlu a kəkəy bə minti a ɗele weŋ. 9Kəya yə bə ayaŋ yaŋ minti yə ləsaŋ la, yə bə awte sərdəŋ yaŋ wəra gəm. Gidiirə kaŋ keɗe bə məlaŋ dərəŋ yaŋ wəra gud səmana. 10A ko toŋa kəyaŋ, de kə kaa ablaw awte yaŋ wəra, yə bə jəəti akoloki cəərə kumsi daana yə malte dər kumsi yaŋ wəra ablaw gəm. 11Kaa ablaw ji kusri yaŋ damdi té *kaa kə jogte ku mini kə Pepeŋ ana, yə bə piti yaŋ apəya bə laŋte kaŋa wəra ablaw. 12Gud bə minti baymeleŋ bə duusi wəra ablaw tə bə moŋ, bele bə minti kaa ablaw a bə juutuŋ bə arse yaŋ wəra. 13Səma hulum bə minti əsəŋ ne ŋəŋ ku kel teŋa hãã a me duŋ, wə seere yaŋ wəra. 14*Kel pəsaŋ kəmarwaŋ té gə waate sam *Kumna kə Pepeŋ kəyaŋ, yə bə wəətəy yaŋ wəra a koŋa keɗe minti kaŋ əskə bar kəkəy bə cəərə kel teŋ la. Haa kəyaŋ, tewe bə koŋ tuli yaŋ faɗi gəm.»

Baymele bə jeeɗem-jeeɗem bə ɓalke ko hasiŋ

(Mar. 13.14-23; Liki 17.23-24; 21.20-24)

15«Kəya aŋ bə ase karman bə jeeɗem-jeeɗem bə ɓalke ko bə ablaw-ablaw bə əsə-isi a *ko cetceti kə Pepeŋa. Daniyel *hulum bə jogte ku mini kə Pepeŋ a wəətunu səmu warda.» (Hulum bə minti bə aŋke kel teŋaŋ, iskiy guudi la wəra pisi!) 16«Bə minti kel teŋ tuluŋ neŋ, kaa gə minti giidə seŋka də Zudeŋaŋ gadtə la nuutu wəra a ko bə minti pərkiŋ ada naŋ faɗi. 17Hulum bə minti a jəŋ ne apəya cəərə kuli nuutuŋaŋ, wə a ve warda adawra da bə kele giidu a humti kar nuutuŋ pəda. 18Hulum bə minti a jəŋ ne giidə akaŋ naŋ, wə a hare akera bə ɗe a golde dəməəmə də ɓasi pəda gəm. 19Gəəliŋ ateŋa haa kə kəram gə məənəŋ daana kaayaŋ gə minti də kərməyiŋ a kawaŋ! 20Aŋ toosə la kir minti kel teŋ kəya a awe dər ko bə pəəruŋa ba, dər *hi bə faake kə Pepeŋa bə gəm. 21Gud maa mo a mele bə gud koŋ da hãã hebkənaŋ, sar lasi mooto də minti ɗe a ji ateŋa jəŋ kəm hõy ba. Daalaŋ də deŋe taŋ kəya ɗe a ji hõy pəda gəm. 22Pepeŋ a ɗəkə la bə hare hiti bə ablaw toŋ wəra adoro baŋ, hulum sə a deŋe wəra anə məna ba. Səma gud kaayaŋ gə minti wə a ŋəmnəy, wə həru yaŋ wəra adoro.

23Bədoona ana, kaa kəman waatənaŋ ne minti Kristu, *Hulum bə minti Pepeŋ ŋəmnuŋ yaŋ kənaŋ, kumundu ba kanna a ko kəman na anəkay, aŋ a de kel neeteŋ ba. 24Gud maa mo kaa gə minti ji kusri minti té kəna Kristu, Hulum bə minti Pepeŋ ŋəmnuŋ, kumundu ba kaa kə jogte ku mini kə Pepeŋ, bə pi diri yaŋ ablaw. Yə jəəti kar kəmtəŋ gə ŋili kaŋ yaŋ bə ge dər minti haa də səɓaki kə Pepeŋ, daana yə jəəti miɗi kəmtəŋ yaŋ gəm kir minti té sə a nakə laŋ, koo kaa gə minti Pepeŋ ŋəmnəy wəra a kusruŋ, té sə a ləŋəy wəra. 25Kəya ta, ten waatənaŋ kel wəra ajewa faɗi. 26Yə waatənaŋ ne minti Kristu yaŋ giidə ful naŋ, aŋ a ɗe ba. Yə waatənaŋ ne minti wə bə metə-mete a ko kəmanaŋ, aŋ a doy kuy bə gəm. 27Gud maa mo *Kormə Hulúm bi ha'aŋ, damdi koŋ welɗe a gud koŋ da hãã ɗe a ve warna a tiinə koŋ naŋ ana. 28‹A ko bə minti titiŋ adaŋ, marlaŋ lewe ada#24.28 Job 39.30.›»

Kormə Hulúm hare da

(Mar. 13.24-31; Liki 21.25-31)

29«Adordə lasiŋ bə dər ko toŋ naŋ, cəwaŋ bə ge giziɓi wəra, leere də kitir bə ji pəda gəm, seskaŋ bə awte yaŋ warda, səɓaki də apəyaŋ miirti yaŋ gəm. 30Də ko toŋ kəyaŋ, karman bə veɗe yaŋ warda apəy da bə ge dər kaŋ minti *Kormə Hulúm day da. Kəya kaasaw də kaa gə cəərə seŋkaŋ keɗe bə laawe yaŋ ablaw, daana yə ase Kormə Hulúm yaŋ bə bi da apəy da dər kamraŋ da wəra də səɓaki daana dər pəɗakiŋa bə welɗe wəra kaŋkaŋ. 31Kəya, bə minti atoltom mootoŋ hagaŋ neŋ, wə ve *kaa kə digi nuutuŋ yaŋ wəra agev də seŋkaŋa waaɗe keɗe, a ko bə minti a məlaŋ guudə hãã warna a ko bə minti a haŋ ku adaŋ, bə tepe cəərə kaa gə minti Pepeŋ a ŋəmnəy wəraŋ a ko bə məna.

32Aŋ golə la cəərə gəlaɓiŋ. Bə minti kan gə suruŋ nəknu da ne wardaŋ daana wə əsəŋ ne bə veŋ, aŋ ase faɗi minti pisir wəra maŋ. 33Bədoona ana gəm, bə minti aŋ asaŋ kar teŋ ne kəya keɗe bə jiŋ aŋ asə la wəra faɗi minti koŋ máŋ wəra maŋ. 34Gəəzi ten waataŋ, kaa gə minti kəm zugi hebkənaŋ bese wəra keɗe bay ase kel teŋ bə ji də diri ba. 35Tarmə pepeŋ daana seŋkaŋ bə ji ajew na pəda, səma kel katən bə ji yaŋ saksaki.»

Aŋ əsə la wəra gə gunə-guni

(Mar. 13.32, 35; Liki 12.39-40; 17.26-27, 34-35)

36«*Kormə Hulúm hare da dər hi muntu mo, dər cəwa məntə moŋ, hulum anə məna paapa bə asə-ase ba; koo *kaa kə digi kə Pepeŋ, koo Kurmuyuŋ asaŋ bə gəm. Pep Abaŋ ɗaaməna bə asə-ase haa tó. 37Bə minti Kormə Hulúm hare daŋ, kel bə ji yaŋ haa damdi kel gə minti a jəŋ dər hi kə Noweŋaŋ ana. 38Gud maa mo ajew də minti kan kəmtəŋ kəm bay heŋ, kaŋ a bə hame, bə se, bə tope kərama, bə ayte kərməyiŋa a kaŋkar gəm hãã bə minti Nowe kəlaŋ giidə turti mootoŋaŋ. 39Kaŋ asaŋ gud kel gə minti bə ji yaŋ ba hãã də hi bə minti kan haŋ wəraŋ daana yə humnuy keɗeŋ gəm. Kel bə ji haa bədoona dege'-dege'i dər hi bə minti Kormə Hulúm hare daŋ. 40Ateŋa ha'aŋ, kaa jəŋ ne ɓasi bə ji joŋre giidə akaŋ, yə he məna, yə yaake wəra məna gəm. 41Kəram jəŋ ne ɓasi bə ecceŋ, yə he məna, yə yaake wəra məna gəm. 42Aŋ gəm, aŋ jəə la wəra gə gunə-guni! Gud maa mo hi bə minti Barkaŋ nəətiŋ hare duru daŋ, aŋ paapa gə asə-ase duuru ba. 43Səma aŋ asə la pisi minti: a jəə la minti bərdə kuliŋ ase cəwa də duugŋ də minti hulum bə dəgaayaŋ bi dərəŋ wəraŋ, wə sə a isi wəra je'i dədərgə, wə sə a yaake hulum bə dəgaayaŋ bə co'e kuli nuutuŋa ba. 44Gud teŋa ta, aŋ gəm, aŋ əsə la wəra gə ɗampə-ɗampe, gud maa mo aŋ ase cəwa də minti Kormə Hulúm hare da dərəŋ ba.»

Hulum bə joŋre ɓetiŋ

(Liki 12.42-46)

45«Hulum bə joŋre ɓeti də hel, haa mindi mo? Haa hulum bə minti bərdə kuliŋ yəəkunu ame bə giidə kuliŋ kəəsu, minti wə ɓarsə hameŋ la a kaa kə joŋreŋ wəra a kuɗiŋaŋ. 46Waaleŋ ji yaŋ cəərə hulum bə joŋre bə minti burduŋ haraŋ da ne a fəlu bə ji joŋre toŋa bədoonaŋ! 47Gəəzi ten waataŋ, burduŋ aye ame bə kar nuutuŋ yaŋ keɗe a hulum bə joŋre toŋ. 48Səma jəəne minti hulum bə joŋre toŋ də sərkəŋ, wə əsəŋ ne bə waate kusru minti: bərdən doŋ cuuru warda, 49kəya wə isi bə lete kumsu kaayaŋ gə joŋreŋa, wə hame daana wə se də kaa kə markə-markeŋ gəm. 50Kəya burduŋ hare da máŋ hõy ha'aŋ dər hi bə minti wə a paapa bə məwa pədaŋ, cəwa də minti wə bi dərəŋ paapa də duru pədaŋ gəm. 51Kəya wə bə jəw daŋgay du yaŋ, wə bə jəw haa damdi kaa gə minti waate kel neeteŋ də kuy təwaŋ ana. A ko toŋa ha'aŋ, yə herɗe kisni yaŋ ada, yə hage yaŋ ada kas gəəliŋ gəm.»

Currently Selected:

MATIYE 24: KERNT05

Highlight

Copy