MATIYE 26

Kaa kəmtəŋ kə kaanə Ziwifiŋ goldekəkəy bə awe Yeesu wəra

(Mar. 14.1-2; Liki 22.1-2; Zaŋ 11.47-49, 53)

1Bə minti Yeesu təwaŋ waate bə kel teŋ wəra keɗe kəyaŋ, wə əsəŋ bə waate *kaa gə guuduŋa minti: 2«Aŋ wəra gə asə-ase minti yaakaŋ máŋ haa hiti ɓasi bə minti *kəɗwəy gə Pakiŋ jiŋ. Kəya yə bə aye *Kormə Hulúm yaŋ wəra a kaŋ minti yə ɓəlu la wəra a kəbaŋ gə largaŋa.»

3Kəya kəkamna kə *kaa kə keere Pepeŋ də kaa kəmtəŋ gə tiinə kaanə Ziwifiŋ təpaŋ ciiri ger Kayifi, *kumna boblo bə keere Pepeŋ. 4Yə doŋ ku kumsi wəra məna cəərə Yeesu minti té daw la dəgaaya-dəgaaya bə ɗe a əwu wəra. 5Səma yə bə waate minti: «Áŋ a daw dər kəɗwəya ba, kaa kə ablaw piti də wáŋ aduubə də kumsi ɗawmay mo.»

Həlgəŋ ge son bə siisi pisi cəərə Yeesu

(Mar. 14.3-9; Zaŋ 12.1-8)

6Bə minti Yeesu giidə wəlasi də Betaniŋaŋ, wə ɗeŋ ger Simoŋ bə minti yə məntu «Simoŋ bə fə̃ya.» 7Həlgə kəman zeŋ suru da, tərnə dayga pərki kaasa, yə mante pərki toŋ minti «albaater#26.7 «Albaater» haa gidiirə pərki kəman bə minti pokte bay gəəli.», son bə siisi pisi bə gusi awəy-awəy giidə. Bə minti Yeesu bə hame je'iŋ, a əsəŋ bə gawa du cuuru faɗi. 8*Kaa gə guuduŋ asaŋ kel teŋ bədoona kəyaŋ, yə humuŋ kuy anə yak-yak-yaki bə waate minti: «A ɓalkaŋ son wəra haa bə maa mo? 9Wə sə a gusə la wəra kəna gusiŋ, wə sə a fele soloy ablaw bə aye a kaa kə caacaŋ ɗaw.» 10Yeesu əsnəy ɗiki di bədoona kəyaŋ, wə minti: «Aŋ ɓalke ɗiki də həlgəŋ haa səm mo? Kel gə minti a jiiniy hebkəna sarənaŋ, haa joŋre pisi faɗi. 11Kaa kə caacaŋ ha'aŋ, teŋ bə ji yaŋ sarəŋa kəna saksaki. Səma ten toŋ ha'aŋ, ten bə ji paapa sarəŋa saksaki ba. 12Bə minti a gaanan son pisiŋ cəərənaŋ, a ɗampənan kusrən wəra bə mi ge dən a tələŋkəŋa. 13Gəəzi ten waataŋ, a ko muntu muntu mo cəərə seŋkaŋa keɗe, bə minti *Kel pəsaŋ kəmarwaŋ teŋ bə waate yaŋ wəra adaŋ, yə tope bəlam də karman bə minti həlgə taŋ a juunuŋ yaŋ wəra gəm. Bədoona ana cəərə kaŋ hare yaŋ bə ɗiki cəərə saksaki.»

Zudasi gusi Yeesu wəra

(Mar. 14.10-11; Liki 22.3-6)

14Kəya hulum kəman bə aduubə də *kaa gə gud Yeesu hor ciiri ɓasiŋ, yə məntu Zudasi Iskariyoti, wə kooroŋ sar kəkamna kə *kaa kə keere Pepeŋ 15bə ɗe a lay kuy minti: «Jəəne minti ten ayaŋ Yeesuŋ, aŋ ayan maa mo?» Kəya yə əynu soloy kooso hor-hor soope faɗi. 16Də ko toŋ ateŋa faɗi, wə yaakaŋ máŋ bə mi haa minti tó fele dər tó pisi bə əyəy Yeesu wəraŋ haa kotnə mo.

Yeesu ji kəɗwəy gə Pakiŋ də kaa gə guuduŋ

(Mar. 14.12-25; Liki 22.7-20; Zaŋ 13.21-30; I Kor. 11.23-26)

17Dər hi bə ajew bə *kəɗwəy gə hame mappa də bay siipəŋaŋ, *kaa gə gud Yeesuŋ bəŋ suru bə bi a law ku minti: «Tam bə balə-bele minti are ɗampam hame bə *Pakiŋ la haa a ko muntu mo?» 18Kəya Yeesu hərnəy kel minti: «Aŋ ɗee la giidə vil də Zeruzalem ger hulum kəmana, aŋ wəətu la minti: ‹Hulum bə hate kaŋ bə waatam da minti cəwa kə toŋ wəra maŋ. Tó ɗe a hame Pakiŋ gerdəma də kaa gə gud toŋ.›» 19Kaa gə guudu teŋ jəŋ kel damdi wə a wəətənəy ana, kəya yə ɗampaŋ hame bə Pakiŋ faɗi.

20Bə minti koŋ ziɓiŋ wəra kəyaŋ, wə əsəŋ bə hame də kaa gə guudu hor ciiri ɓasiŋ. 21Bə minti yə bə hame laki, wə wəətənəy minti: «Gəəzi ten waataŋ, hulum bə gud aŋ lakiŋ kənaŋ bə ji akoloki yaŋ cəərəna.» 22Kəya tərməyi jilniy ablaw. Mindi mindi əsəŋ bə waate minti: «Barkaŋ haa paapa ten bə ba!» 23Wə hərnəy kel minti: «Hulum bə minti a cepteŋ mappa nuutuŋ dər kəsawa dəərən, bə ji akolokiŋ cəərəna haa tó. 24*Kormə Hulúm me yaŋ wəra palpal damdi kefter kə Pepeŋ a waataŋ cuuru wəra ha'aŋ ana. Səma gəəli ablaw kə hulum bə minti ji akolokiŋ cuuruŋ! Hulum toŋ a waa la wəra baŋ, a marya ɗaw!» 25Zudasi bə minti bə jəw akolokiŋ yaŋ cuuruŋ ləənu ku minti: «*Hulum bə hateŋ, haa paapa ten bə ba.» Yeesu hərnu kel minti: «Tam wəətəy haa tam də kusrum.»

26Bə minti yə bə hameŋ, wə toosoŋ bə ge pisiŋ cəərə mappaŋa, wə ɗoklona dərə, wə ayna a kaa gə guuduŋ. Wə wəətənəy minti: «Aŋ doorə la, aŋ hamə la, haa kəya kusrən.» 27Adoro wə haŋ kopi bə seŋ, wə jəŋ suuse a Pepeŋ cuuru, wə əynu a kaa gə guuduŋ, wə wəətənəy minti: «Aŋ keɗe, aŋ saa la, 28gud maa mo haa kor dən bə minti Pepeŋ doŋ *jaa təmarwaŋ də kaŋ duuruŋ. Wə bə ge yaŋ wəra gud kaa kə ablawa minti Pepeŋ vəəgə giidu la wəra cəərə baymele neeteŋa. 29Ten waataŋ, ten se kumuy bə atələələma hõy pəda, hãã bə minti ten ɗe a se kimirwiŋ dəərəŋ a *Kumna kə Pep Barən naŋ.» 30Yə gaŋ gudul bə Pakiŋ gaa kəyaŋ#26.30 Dər hi bə *Pakiŋ ha'aŋ, yə kaate gudul bə giidə Ps. 113—118., yə vaŋ warda bə koore cəərə *pərki bə minti yə məntu Oliviyeŋ.

Yeesu minti Piyer malte ku yaŋ cəərə tó

(Mar. 14.26-31; Liki 22.33-34, 39; Zaŋ 13.37-38)

31A ko toŋa Yeesu waataŋ kaa gə guuduŋ minti: «Aŋ bə ji yaŋ gə gajgə-gajge dər de nəəti bə guudəna. Gud maa mo Pepeŋ waataŋ wəra giidə kefter nuutuŋa minti: ‹Ten bə awe hulum bə gole cəərə kaamaŋ wəra, yə bə meere yaŋ wəra də tara keɗe gəm#26.31 Zach. 13.7›. 32Səma, bə minti ten haraŋ ne wəra dədərgə adordə meŋaŋ, ten bə ji yaŋ tiiniŋ na Galile na.» 33Kəya Piyer wəətunu faɗi minti: «Jəəne nuutu minti kaayaŋ keɗe gajgaŋ ne gud kel dəmaŋ ɗawmay moŋ, ten toŋ gajge ba!» 34Yeesu hərnu kel minti: «Gəəzi ten waatam, dayna-dayna, duugŋ kəna derra faɗi, ajew də minti goglokiŋ hõõdeŋ, tam bə malte kum yaŋ wəra cəərəna kampa soope ɗaw.» 35Piyer wəətunu minti: «Jəəne nuutu minti ten mee la wəra dəərəm, ten malte kun cəərəma ba!» Kəya *kaa kaayaŋ gə guuduŋ keɗe əsəŋ bə waate bədoona faɗi gəm.

Yeesu toose Getsemane

(Mar. 14.32-42; Liki 22.40-46)

36Kəya Yeesu də *kaa gə guuduŋ tuukuŋ a ko kəmana, yə məntu minti Getsemane. Kəya wə wəətənəy minti: «Aŋ əsə la kəna cin-cin, ten ɗe kəm kanna a toose.» 37Wə humuŋ anə Piyer də karmə Zebede ɓasiŋ guudu, wə kooroŋ warna diiri hal. Kəya tərmuyu əsəŋ bə ceme wəra, wə dəraŋ laawe wəra faɗi gəm. 38Wə wəətənəy minti: «Laaweŋ kalnan cəərən, golde ko bə me. Aŋ əsə la kəna sarəna wəra gə gunə-guni.» 39Wə yəəkənəy, wə zeŋ kas anə ɗawəwa kəyaŋ, wə məlaŋ tiinu adawra, wə əsəŋ bə toose Pepeŋa minti: «Barən, a jəə la kəna minti kəkəy yaŋ, zenə kopi bə lasi toŋ la wəra sarəna. Səma, kel teŋ jəə la paapa damdi giidən bəlaŋ ana ba, yə jəə la damdi giidim beleŋ ana.» 40Adoro wə haraŋ sar kaa gə guudu soope'iŋ, wə ɗeŋ a fələy wəra a kina. Wə waataŋ Piyer minti: «Koo ler məna aŋ nəkaŋ bə ji dədərgə dəərən ba anə ceki? 41Aŋ əsə la wəra gə gunə-guni, aŋ toosə la kir minti aŋ əsə la ŋəŋ tiinə ke bə kuŋa. Hulum kisirkiŋ wəra bə ɗampə-ɗampe dər ɗiki du bə ji pisiŋ, səma a kusukiŋa, wə wəra bə dawə-dewe, wə neke bə jəw ba.» 42Kəya wə haraŋ bə ze na warna kas anə ɗawəwa kampa bə ɓasiŋ pa. Wə əsəŋ bə toose minti: «Barən, jəəne minti kopi tó bə lasiŋ ze wəra ba minti ten saw laŋ, kel teŋ jəə la haa damdi giidim bəlaŋ ana.» 43Adoro, wə haraŋ siri na, wə ɗeŋ a fələy a kina pa, gud bə minti diri bə jəy kina wəra hasi. 44Kəyaŋ, wə haraŋ bə ze na warna kas anə ɗawəwa pa, wə haraŋ bə toose kampa bə soopeŋ bə dogte kel gə ajewa toki. 45Kəya wə haraŋ sar kaa gə guuduŋ daŋ, wə wəətənəy minti: «Aŋ kəm a kina daana aŋ bə faake bə pə mo? Cəwa nəkaŋ ne bə minti yə aye ten *Kormə Hulúm wəra kasi kaa kə bayməlaŋaŋ. 46Aŋ pətə la! Hulum bə minti ayan wəraŋ day cawa. Áŋ jəmu duru la.»

Yə de Yeesu

(Mar. 14.43-52; Liki 22.47-53; Zaŋ 18.2-11)

47Ku Yeesu bay awe adawra cekiŋ, Zudasi kəna caw. Wə haa *hulum bə gud kaayaŋ hor ciiri ɓasi gə gud Yeesuŋ. Wə tuluŋ də kaa gə minti kəkamna kə *kaa kə keere Pepeŋ daana kaa kəmtəŋ gə tiinə kaŋ a vəənəy daŋ. Yə gə ganə-gene hənjəm də caafay, də gədəwa gəm. 48Zudasi bə minti əyu wəraŋ a waataŋ kaŋ warda cəərə kel gə minti tó bə jəy yaŋ. Wə minti: «Hulum bə minti ten ɗeŋ ne a suɓu gəbyu bə mirkuŋ, haa tó faɗi, aŋ daw la!» 49Kəya wə kooroŋ anə ɗeker cəərə Yeesu na faɗi, wə wəətunu minti: «*Hulum bə hateŋ!» Kəya wə suɓnu gəbyu faɗi gəm. 50Yeesu wəətunu minti: «Daara, karman bə minti tam bəŋ a jəw, jəw la faɗi.» Kəya kaa kaayaŋ gə minti a bəŋ guudu daŋ duunu faɗi. 51A ko toŋa kəya, hulum gud kaayaŋ gə gud Yeesuŋa pəŋ macəlam nuutuŋ wəra, wə haŋ kosnə kafkam kə *kumna boblo bə keere Pepeŋ warna nalaŋ. 52Kəya Yeesu wəətunu minti: «Harə macəlam nəmti la a huli dəŋa gud maa mo kaa gə minti ji joŋreŋ də macəlam kəəsiŋ, yə bə fele meŋ haa kəəsu gəm. 53Tam paapa bə asə-ase minti ten bə nakə-neke bə mante Barən, kəya wə ayan *kaa kə digi da anə guɓi faɗi bə mo? 54Kaa kə digi a bəə laŋ, kel gə minti kefter kə Pepeŋ a wəətənəy sə a de kuy ba. Gud maa mo, wə a waataŋ minti kel sə a ji haa bədoona ana.» 55A ko toŋa kəya Yeesu waataŋ kaa kə ablaw minti: «Aŋ gene da də macəlam, də gədəwa bə bi a doŋ ha'aŋ, aŋ ɗiki haa minti ten hulum bə feke agum a kaa mo? Ten a bə əsti a hiŋa saksaki giidə tiilim də *Kuli kə Pepeŋa bə hatete kaŋa, aŋ doonon ba. 56Səma, kel teŋ jəŋ gila keɗe haa minti, kel gə minti *kaa kə jogte ku mini kə Pepeŋ a jiiriniy, doo kuy la wəra.» Kəya kaa gə guuduŋ gadtaŋ wəra də tara, yə yəəkunu.

Yeesu tiinə kaa kəmtəŋ gə jeme kəətiŋa

(Mar. 14.53-65; Liki 22.54-55, 63-71; Zaŋ 18.12-18)

57Kaa gə minti a doŋ Yeesu daŋ, yə kooroŋ duuru ger Kayifi, *kumna boblo bə keere Pepeŋ. *Kaa kə hate ku gili kə Pepeŋ də kaa kəmtəŋ gə tiinə kaanə Ziwifiŋ a wəra gə tapə-tepe ciiri girdu ada. 58Kəya Piyer adoro da anə tooto caw bə ɗe da gud Yeesu da hãã wə ɗeŋ a kele warna guudu na giidə tiilim də kuli kə kumna boblo bə keereŋ na. Wə ɗeŋ a isi sə kaa gə joŋreŋ kə kumnaŋa bə gole kela minti yə ɗe a awe naanaanə mo.

59Kəkamna kə *kaa kə keere Pepeŋ də *kaa kəmtəŋ gə jeme kəəti kə kaanə Ziwifiŋ keɗe əsəŋ bə golde kaa gə minti gaa Yeesu la də kel kir minti kəətiŋ daw la haa bə əwu wəra faɗi. 60Yə fəlaŋ ba. Kaa ablaw kəənu də kel kə ŋetə-ŋeteŋ, səma yə fəlaŋ kel kə hulum ada anə məna gə nakə-neke bə daw ba. A tewe bə kelaŋ, kaa bəŋ nuutu ɓasi bə bi a waate minti: 61«Hulum toŋ gila waataŋ minti: ‹Ten bə nakə-neke bə ce *Kuli kə Pepeŋ wəra daana ten hare bə hursu dər hiti soope faɗi.›» 62Kəya kumna boblo bə keere Pepeŋ faŋ apəya, wə laŋ ku Yeesu minti: «Kaŋ kaanam də kel ha'aŋ, tam paapa bə nakə-neke bə hare kel ciiri ba anə faɗi?» 63Yeesu nuutu ba'-ba'i. Kəya kumna bobloŋ haraŋ bə law ku pa minti: «Ten waatam, tam kele kum yaŋ də sam Pep bə dədərgəŋ bə waate are minti tam haa *Hulum bə minti Pepeŋ ŋəmnuŋ, Kormə Pepeŋ mo?» 64Yeesu hərnu kel minti: «Tam wəətənəy haa tam də kusrum toki. Ten waataŋ, də ko bə hebkənaŋ, aŋ bə ase *Kormə Hulúm yaŋ bə əsə-isi a kasi kemer kə Pep Bar Səɓakiŋa, aŋ bə əsu yaŋ bə bi da apəy da dər kamraŋ da gəm.» 65Kəya kumna bobloŋ caaraŋ dəməəmə nuutuŋ wəra kas waŋ, wə waataŋ faɗi minti: «Wə sartaŋ sam Pepeŋ ne wəra! Áŋ də caadə bərdə kəkəy muntu pə mo? Aŋ əskəŋ kel gə minti wə sartaŋ sam Pepeŋ diiriŋ wəra. 66Ɗiki dəŋ cuuru naanaanə mo?» Yə hərnu kel minti: «Wə kirka a awe wəra haa awe!» 67Kəya yə əsəŋ bə tuftu kiɗikiŋa duru, yə iptunu duru də kəəsi, sirdiŋ lətnu duru gəm. 68Yə wəətunu minti: «*Hulum bə minti Pepeŋ ŋəmnuŋ! Tam *hulum bə ase kar tə kəm, waatə la, laanam haa mindi mo?»

Piyer malte ku cəərə Yeesu

(Mar. 14.66-72; Liki 22.56-62; Zaŋ 18.17, 25-27)

69Də ko toŋ ha'aŋ, Piyer a jəŋ bə əsə-isi je'i giidə tiilim də kuliŋa. Kəya həlgə də joŋre kəman kə *kumna boblo bə keere Pepeŋ zeŋ suru da, a əsəŋ bə wəətu minti: «Tam ha'aŋ, tam a də Yeesu bə Galileŋ gəm bə mo?» 70Səma Piyer maltaŋ ku wəra tiinə kaŋa keɗe minti: «Karman bə minti te wəətuŋ paapa də dərən ba.» 71Kəya wə zeŋ warna anəkay ku ku kuli bə taakaw na, həlgə də joŋre daalaŋ əsnu, a əsəŋ bə waate kaa gə minti a jəŋ laki adaŋ minti: «Hulum toŋ gila, wə a jəŋ də Yeesu bə Nazaretiŋ gəm.» 72Piyer dogoŋ malte kuŋ pa bə kele ku máŋ gadi faɗi minti: «Hulum toŋ paapa də dərən ba!» 73Əsəŋ anə sawəwa kəyaŋ, kaa gə minti a jəŋ adaŋ kooroŋ sar Piyer da bə bi a wəətu minti: «Gəəzi tam hulum bə gud kaa teŋ, gud maa mo dordom də waate kel gaanam guudum wəra minti tam bə Galile gəm.» 74Kəya Piyer əsəŋ bə waate faɗi minti: «Jəəne minti ten ŋeŋ haa kel, Pepeŋ gan la daŋgay! Ten waataŋ wəra haa waateŋ faɗi: hulum toŋ paapa də dərən ba!» Də ko toŋ anə derra goglokiŋ hõõdoŋ faɗi. 75Cəərə Piyer haraŋ bə ɗiki kel gə minti Yeesu a wəətunu duŋ minti: «Ajew də minti goglokiŋ hõõdeŋ, tam malte kum yaŋ wəra cəərəna kampa soope#26.75 Mat. 26.34.» Kəya wə kəlaŋ warna taakaw na bə hage ablaw.

Currently Selected:

MATIYE 26: KERNT05

Highlight

Copy