MATIYE 27

Yə ɗe də Yeesu tiinə Pilati

(Mar. 15.1-2; Liki 22.66; 23.1; Zaŋ 18.28)

1Bə minti cəwaŋ daagaŋ warda anəkay, kəkamna kə *kaa kə keere Pepeŋ də kaa kəmtəŋ gə tiinə kaanə Ziwifiŋ, yə haa *kaa kəmtəŋ gə jeme kəətiŋ, doŋ kuy wəra məna cəərə Yeesu minti yə əwu la wəra. 2Yə doŋ Yeesu, yə bəŋnu wəra baŋi, kəya yə kooroŋ a əyu a *Pilati, kumna bə minti Sezar usnuŋ.

Zudasi ge zeewe wəra

3Zudasi bə minti a jəŋ akolokiŋ cəərə Yeesuŋ asaŋ anəkay minti kəəti doŋ Yeesu minti yə əwu la wəraŋ, laaweŋ duunu kas ɗikiŋ, wə kooroŋ də soloy kooso hor-hor soope'iŋ bə ɗe a həru a kəkamna kə *kaa kə keere Pepeŋ də kaa kəmtəŋ kə tiinə kaŋ. 4Wə wəətənəy minti: «Ten jəŋ baymele a ko bə minti ten ayaŋ hulum ɗekeriŋ wəra a meŋ.» Səma yə hərnu kel minti: «Kel naare maa ada mo? Teŋ haa kel nəmti!» 5Kəya wə vaŋ soloy giidə *Kuli kə Pepeŋa, wə kooroŋ a ge zeewe wəra faɗi. 6Kəkamna kə kaa kə keere Pepeŋ humuŋ soloy, yə minti: «Kəkəy paapa cəərə áŋa minti áŋ vaa soloy tó la kəya aduubə də bege bə giidə Kuli kə Pepeŋa ba gud bə minti kəya soloy bə kor.» 7Adordə minti yə doŋ ku kumsi wəra doo kəyaŋ, yə gusuŋ aka kə hulum bə hərsi kar də soloy toŋ. Yə koloŋ aka taŋ wəra ko bə teɗker kə kə irkuŋ. 8Haa gud teŋa ta minti hãã dayna yə mante aka taŋ «aka də kor.» 9Kəya kel gə minti Zeremi *hulum bə jogte ku mini kə Pepeŋ a wəətənəy, doŋ kuy wəra minti: «Yə doŋ soloy kooso hor-hor soope'iŋ, haa soloy bə minti kaanə *Israyel a goloŋ hulum toŋ minti wə kir soloy toŋ bədoona ana'iŋ. 10Yə ayaŋ soloy tó bə gusi aka kə hulum bə hərsi kar damdi Barkaŋ a waatənan wəraŋ ana#27.10 Zach. 11.12,13.»

Pilati jeme kəəti də Yeesu

(Mar. 15.2-15; Liki 23.2-5, 13-25; Zaŋ 18.28—19.16)

11Yeesu máŋ tiinə kumna bə minti Sezar a usnuŋ. Wə əsəŋ bə le ku Yeesu minti: «Tam haa kumna kə kaanə Ziwifiŋ mo?» Wə minti: «Tam waataŋ haaŋa.» 12Səma bə minti kəkamna kə *kaa kə keere Pepeŋ də kaa kəmtəŋ gə tiinə kaanə Ziwifiŋ əsəŋ bə gawa də kel, wə haraŋ kel pəda. 13Kəya *Pilati wəətunu minti: «Kel gə minti yə wəətəy cəərəma ha'aŋ, tam paapa bə iskiya bə mo?» 14Səma wə hərnu kel anə məna cəərə kel kəmana ba. Kəya kel teŋ ŋələŋ Pilati ablaw faɗi.

15Ana dər *kəɗwəy gə Pakiŋa saksaki ha'aŋ, hulum bə daŋgay bə minti kaa kə ablaw bele minti Pilati gaw da wardaŋ, wə gay di warda. 16Hulum kəman bə səmu bə hagə-hage a yaŋ a daŋgaya ada, səmu minti Yeesu Barabasi. 17Pilati laŋ ku kaa gə tapə-tepe ciiri tiilimaŋ minti: «Aŋ bele minti ten gaŋ la warna haa Yeesu Barabasi mo, Yeesu bə minti yə məntu Kristuŋ mo?» 18Wə waataŋ bədoona gud bə minti wəra də duru minti yə jəw haa sərkə du bə minti yə bəŋ a əyu a toŋ.

19Bə minti Pilati kəm a ko bə jeme kəətiŋa cin, muruŋ əynu ku mini da minti: «A kele kusrum dər kel kə hulum tó ɗekeriŋa ba, gud maa mo duugŋ kəna ha'aŋ, ten gəyaŋ wəra hasi kas sooneŋ gud kel du.»

20A ko toŋa kəyaŋ, kəkamna kə *kaa kə keere Pepeŋ də kaa kəmtəŋ gə tiinə kaanə Ziwifiŋ koloŋ ɗiki də kaa kə ablaw wəra minti yə waatə la minti wə gaa Barabasi da warda, səma Yeesu ha'aŋ, yə əwu la wəra. 21Kəya kumnaŋ haraŋ bə lay kuya pa minti: «Gud kaa té ɓasiŋaŋ, ten gaŋ da warda haa mundu mo?» Té minti: «Barabasi!» 22Wə haraŋ bə lay kuya pa minti: «Yeesu bə minti yə məntu Kristuŋ, aŋ gə balə-bele minti ten jəə toŋ la naanaanə mo?» Yə keɗe minti: «Ɓəlu la wəra a kəbaŋ gə largaŋa ɓele!» 23Wə minti: «Wə jəŋ maa bə baymeleŋ mo?» Yə zeŋ gud naakte bə kuy máŋ pisi ze minti: «Ɓəlu la wəra haa ɓele!» 24Wə asaŋ minti kel kə toŋ paapa bə hame gewa siri baŋ daana yə zeŋ guudi máŋ waŋ pisi ze ɗaw, wə haŋ kan kəəsu, wə baadaŋ kəəsu wəra tiinə kaa kə ablawa, wə minti: «Kor də hulum toŋ paapa cəərəna ba, teŋ kel nəəti!» 25Kəya kaŋ keɗe minti: «Kor du harə la cəərə are də karmə are gə moomoŋ!» 26Kəya, wə gəənəy Barabasi warna faɗi. Wə vaŋ sootoŋ bə witi Yeesu də keleki, adoro wə əynəy di minti yə ɗee la a ɓəlu wəra a kəbaŋ gə largaŋa.

Kəsootoŋ dafɗe Yeesu

(Mar. 15.16-20; Liki 23.11; Zaŋ 19.2-3)

27Kəsooto kə kumnaŋ kooroŋ də Yeesu giidə kuli kə kumna Pilatiŋ, a ko bə minti yə məntu «Peretəwar.» Kəya yə mantaŋ kəsooto gə minti yə də kumsiŋ warda sar Yeesu da keɗe. 28Kəya yə puunu dəməəmə nuutuŋ wəra, yə dərnu dəməəmə hərlə suru. 29Yə ləpaŋ kəjəm lapi, yə ɗəknu cuuru diiri, yə əynu gədəwa seeka kəəsu kemera. Kəya yə əsəŋ bə feke də gigiiri tiinu bə dəfɗu minti: «Suuse nəmti, kumna kə kaanə Ziwifiŋ!» 30Yə əsəŋ bə tuftu kiɗikiŋa suru, yə doŋ seeka də kəəsuŋ, yə lətnu cuuru dəərə. 31Yə awtaŋ hin wəra cuuru pis-pisi kəyaŋ, yə bəŋ dəməəmə hərlə də suruŋ wəra, yə hərnu dəməəmə nuutuŋ suru. Kəya yə duunu, yə kooroŋ duuru bə ɗe a ɓəlu wəra.

Yə ɓele Yeesu wəra

(Mar. 15.21-32; Liki 23.26-43; Zaŋ 19.16-24)

32Bə minti yə vaŋ warda anəkay, yə ŋəfaŋ də hulum kəman yə məntu Simoŋ, wə haa hulum bə Siren. Yə həənu guudu bə he kəbaŋ gə larga kə Yeesuŋa. 33Yə tuukuŋ a ko bə minti yə məntu Golgota, gud sam toŋ haa minti «ko bə haa-he kəskəŋ gə cəŋ.» 34Kəyaŋ, yə əynu kumuy bə atələələma bə duru bə tapə-tepe də karman gəlag-gəlagi bə kolte kaŋ wəra gəmər-gəməriŋ. Wə gusnu anəkay, wə doŋ haa bə saw ba. 35Kəya yə ɓəlnu wəra a kəbaŋ gə largaŋa, adoro yə jəŋ kooya bə siisi bə ɓarse dəməəmə nuutuŋ wəra a kusri#27.35 Ps. 22.19. 36Yə əsəŋ ada laki bə gulu cuuru. 37Yə ɓəlnu jeere kəman apəya cəərə kəbaŋ gə largaŋa, yə jeereŋ ada haa kel gə minti yə əwnu wəra guudiŋ minti: «Hulum toŋ haa Yeesu, kumna kə kaanə Ziwifiŋ.» 38Yə ɓaltaŋ kaa kə dəgaaya suru ada ɓasi gəm, məna a kəəsu kemera, naytoŋ a kəəsu gulaŋa. 39Kaa gə minti bə feke a kəkəy toŋa sərtunu bə le ciiri le bə anə lam 40minti: «Tam bə minti pokte *Kuli kə Pepeŋ wəraŋ, dər hiti soope tam hare bə hursuŋ, tam jəəne haa Kormə Pepeŋ gəəziŋ, seerə kusrum la wəra tam də kusrum, vaa da warda a kəbaŋ gə largaŋ da bə pə mo!» 41Kəkamna kə *kaa kə keere Pepeŋ də *kaa kə hate ku gili kə Pepeŋ daana kaa kəmtəŋ gə tiinə kaanə Ziwifiŋ əsəŋ bə dəfɗu gəm minti: 42«Wə seerteŋ kaa kaayaŋ wəra, wə neke bə seere kusru pədaŋŋa! Wə haa Kumna kə kaanə *Israyel tə gəm, wə vaa da warda a kəbaŋ gə largaŋ da hebkəna faɗi, kəya are de yaŋ guudu. 43Wə a doŋ gud Pepeŋa, jəəne minti Pepeŋ bəluŋ, wə budu la wəra hebkəna da faɗi#27.43 Ps. 22.9. Gud maa mo wə a waataŋ minti: ‹Ten kəna Kormə Pepeŋ› tə gəm.» 44Kaa kə dəgaaya gə minti gə ɓaltə-ɓalte suruŋ əsəŋ bə sərtu haa bədoona gəm.

Me də Yeesu

(Mar. 15.33-41; Liki 23.44-49; Zaŋ 19.25-30)

45Ɗeŋ a deye daaway ɗeker, koŋ gaŋ giziɓi wəra cəərə seŋka taŋa keɗe hãã də cəwa də le kaaraŋ aker daŋ. 46Də cəwa taŋ kəyaŋ, Yeesu naakaŋ ku də kuy minti: «Eli, Eli, lama sabaktani?» Gud kel teŋ haa minti: «Pep katən, Pep katən, tam ŋoryonon wəra səm mo#27.46 Ps. 22.1?» 47Sərdə kaa gə minti a jəŋ adaŋ əskəŋ kel teŋ kəyaŋ, yə minti: «Hulum toŋ bə mante *Eli!» 48Kəya hulum guudi gədaŋ də tara a humi sooso da, wə kəlnu dər kumuy bə atələələm bəlan-bəlani da, wə kəpnu ku seeka kapi, wə əynu a Yeesu minti wə suɓu la. 49Kaa kaayaŋ minti: «Aŋ anə ba'i, áŋ ase yaŋ jəəne minti Eli bi a budu wəraŋ.» 50Yeesu haraŋ bə naake ku koloŋ pa, wə guɓuŋ duru faɗi.

51A ko toŋa kəya Zeruzalemaŋ, dəməəmə mooto də minti də gaa-ge giidə *Kuli kə Pepeŋaŋ məlaŋ caareŋ apəy da, vaŋ wəra adawra no'-no'i. Seŋkaŋ miiriŋ, pərkiŋ ɓarsətaŋ duru wəra gəm. 52Kəya ku teɗker pəŋtəŋ wəra, kaa cetcetiŋ gə minti a jəŋ wəra gə mee-meŋ hartaŋ warda dədərgə adordə meŋa. 53Yə vaŋ warda giidə teɗker da. Adordə minti Yeesu haraŋ wəra dədərgə adordə meŋaŋ, yə kooroŋ giidə vil kə Pepeŋ#27.53 Vil taŋ haa Zeruzalem., kaa ablaw əsnəy də diri. 54Kumna bə sooto kəsaŋ daana kəsooto gə minti a jəŋ bə gole cəərə Yeesuŋ asaŋ seŋkaŋ bə miiri də kar kaayaŋ bə jəəti bədoona keɗe kəyaŋ, walka jəmnəy, yə əsəŋ bə waate minti: «Hulum toŋ a haa kormə Pepeŋ gəəzi!»

55A ko toŋa ha'aŋ, kəram ablaw a jəŋ gə əsə-isi warda anə tooto laki bə gole da. Haa kəram gə minti a həənu bəlam du bə jəw joŋreŋ da anə hãã Galile daŋ. 56A jəŋ aduubə di ha'aŋ, Mari də giidə wəlasi də Magdalaŋ, Mari nər anə Zaki də Zosefi, də nər karmə Zebedeŋ gəm.

Zosefi bə Arimate ge Yeesu a tələŋkə

(Mar. 15.42-47; Liki 23.50-56; Zaŋ 19.38-42)

57Cəwaŋ ɗeŋ a dere wəra kəyaŋ, hulum bə bege kəman bə giidə vil də Arimateŋ tuukuŋ ada. Səmu minti Zosefi, wə haa *hulum bə gud Yeesu gəm. 58Wə kooroŋ ger *Pilati a mante titi də Yeesu. Kəya Pilati ayaŋ kəkəy minti yə əyu du la. 59Zosefi haŋ titiŋ, wə hayɗəna də ladəra də gusi də awəy-awəy, 60wə ɗeŋ a gaara giidə tələŋkə təmarwa də ceɗə-ceɗe kəəyə pərkiŋa. Adoro wə laktaŋ pərki boblo bə ceɗə-ceɗe bə gisə kuŋ, wə kooroŋ faɗi. 61Anə Mari də wəlasi də Magdala də Mari naaya taŋ a jəŋ gə əstə-əsti tiinə teɗkera ada anə laki.

62A dibiiniŋa, dər *hi bə faake kə Pepeŋaŋ, kəkamna kə *kaa kə keere Pepeŋ də kaanə *Farisiyeŋ kooroŋ ger Pilati bə ɗe a wəətu minti: 63«Hulum bobloŋ, cəərə are haraŋ bə ɗiki cəərə hulum bə ŋetə-ŋete kel toŋa. Wə a waataŋ də ko bə minti wə a kəm caw minti, dər hiti soopeŋa, tó hare yaŋ wəra dədərgə adordə meŋa. 64Gud teŋa ta, vaa kəsootoŋ la bə gole cəərə teɗkera hãã a hi tó bə soopeŋa. Jəəne paapa kaa gə guuduŋ bi a bəw titi du wəra dəgaaya-dəgaaya, yə bə ŋete kel máŋ haa minti wə haraŋ ne wəra dədərgə adordə meŋa. Kəya ha'aŋ, ŋete bə kel teŋ bə deŋe kaayaŋ gə minti hulum toŋ a ŋitniy wəra hasi pə ɗaw.» 65Pilati wəətənəy minti: «Aŋ ɗee la a humi kəsootoŋ, aŋ golə cəərə teɗker la damdi giidiŋ bəlaŋ ana.» 66Kəya yə kooroŋ ku teɗker, yə larpaŋ pərki bə minti a kuŋ wəra larpa kəyaŋ, yə vaŋ kaa bə gola cəərə.

Currently Selected:

MATIYE 27: KERNT05

Highlight

Copy