MARKƏ 10

Yeesu waate kel cəərə buusiŋa

(Mat. 19.1-9; Liki 16.18)

1Yeesu yaakaŋ ko toŋ, wə kooroŋ giidə seŋka də Zudeŋ warna cakaɗi cəərə vor bə Zurdeŋ na. Kaa ablaw taaraŋ suru ada pa, wə əsəŋ bə hətəya akas bə diidədaya ana. 2Kəya sərdə kaanə *Farisiyeŋ kəman zeŋ suru da, yə a goldoŋ haa minti té law kəmpuru la də kel. Yə wəətunu minti: «Kəkəy yaŋ bə ayə-aye minti hulum buusə muruŋ la wəra mo?» 3Wə hərnəy kel də le ku gəm minti: «*Moyisi aynaŋ ku giliŋ cəərə kel teŋa minti harmə mo?» 4Yə minti: «Kəkəy bə minti Moyisi əynuŋ, haa minti hulum bəlaŋ buusi muru ne wəraŋ, wə ayə kefter bə ge dər la kaasa minti tó buusənə wəra#10.4 Deut. 24.1ə.» 5Wə hərnəy kel gəm minti: «Moyisi jeereneŋ ku gili toŋ haa gud bə minti ku tarməyaŋ wəra də hẽŋə-hẽŋe cəərə kel kə Pepeŋaŋ. 6Gud maa mo, kefter wəra bə waatə-waate minti, hãã a mele bə gud koŋ daŋ, Pepeŋ ‹jəŋ hulum kisirkiŋ ha'aŋ, hulum koŋkor də həlgəŋ faɗi#10.6 Gen. 1.27. 7Gud teŋa ta, hulum koŋkor yaake buru wəra də nuru bə ɗe a ve kuli neeteŋ də muruŋ. 8Kəya yə ɓasi keɗe, yə kole haa hulum bə məna'i#10.8 Gen. 2.24.› Bədoona ana ta, yə paapa kaa ɓasi pəda, yə koloŋ haa hulum məna faɗi. 9Bədoona ana gəm, karman bə minti Pepeŋ a təpnu wəraŋ, hulum kisirkiŋ a ɓərsu duru wəra pəda.»

10Bə minti yə haraŋ warna aker naŋ, *kaa gə guudu ɗeŋ a isi bə law ku cəərə kel teŋa pa. 11Wə wəətənəy minti: «Hulum bə minti buusuŋ muruŋ ne wəra, wə ɗeŋ ne a de daalaŋ, wə jəŋ haa piwpiw sar muru də ajewa faɗi. 12Həlgə də minti buusuŋ ne wəra gud gedraŋaŋ, a ɗeŋ ne a de baalaŋ, a jəŋ haa piwpiw gəm.»

Yeesu ge pisiŋ cəərə kəmar koncoŋa

(Mat. 9.13-15; Liki 18.15-17)

13Kaa kəman bəŋ da də kəmar koncoŋ a Yeesu minti wə maltə kəəsu la siri bə gay pisiŋ ciiri. Səma *kaa gə guuduŋ wəətənəy minti yə a bi da diiri ba. 14Yeesu asaŋ kel teŋ kəyaŋ, tərmuyu ɗəmnu wəra ablaw, wə wəətənəy faɗi minti: «Aŋ yaakə kəmar koncoŋ la, yə bəəda səran da, aŋ a hay kuy warda ba. Gud maa mo, ɗe a ve a *Kumna kə Pepeŋa haa kaa gə minti ji kusri damdi té ana'iŋ. 15Gəəzi, ten waataŋ, hulum bə minti doŋ haa minti Pepeŋ jəə la kumna cəərə tó damdi beebe konce de haa ana baŋ, wə kele a Kumna kə Pepeŋa ba anə ceki.» 16Kəya wə humuŋ kəmar koncoŋ, wə gərgənəy ku tərmuyu da anəkayya, wə maltaŋ kəəsu siri wəra məna-məna keɗe, wə gəənəy pisiŋ ciiri.

Yeesu də hulum bə begeŋ

(Mat. 19.16-30; Liki 18.18-30)

17Bə minti anə Yeesu ɗəlaŋ kooreŋ, hulum kəman gədaŋ tara da, wə bəŋ a haɓe tiinu anə haɓi, wə wəətunu minti: «Hulum bə hate bə minti jəəti pisiŋ, ten kirka ji maa minti ten falə dədərgə də bay tewe la mo?» 18Yeesu hərnu kel minti: «Tam minti ten hulum pisi. Asə la minti hulum pisi anə məna paapa; Pepeŋ pisi haa tó ŋel məna faɗi. 19Ku gili kə Pepeŋ wəra də dərəm minti: ‹A awe titi ba, a ji piwpiw ba, a ji dəgaaya ba, a ŋete kel sar kumsuma ba, a ji tiniini də kumsum bə daw karman nuutu wəra ba, haa cəərə bəram la apəya də nərəm#10.19 Ex. 20.12-16.›» 20Hulum hərnu kel minti: «Hulum bə hateŋ, ten humuŋ kosoŋ cəərə ku gili toŋa ha'aŋ, hãã a puranul dən da faɗi.» 21Yeesu goloŋ hulum, wə bəlnu wəra ablaw. Wə wəətunu minti: «Karman yaakaŋ wəra sarəma məna: ɗee la, gusə kar nəmtiŋ la wəra keɗe, ayə soloy diŋ la wəra a kaa kə caacaŋ, kəya tam ɗe a fele bege nəmti bə gəəzə-gəəziŋ yaŋ apəy na. Adoro bəəda, tapə la guudəna nuutu ta.» 22Bə minti hulum əskəŋ kel teŋ kəyaŋ, wə ŋorɓoŋ a ko toŋa ada gil faɗi. Wə kooroŋ máŋ kəya bə doo-de kosõõye, gud maa mo wə də bege ablaw.

23Kəya Yeesu goloŋ duru anə kəla'-kəla'i cəərə *kaa gə guuduŋa, wə wəətənəy minti: «Bə kele a *Kumna kə Pepeŋaŋ, gəəliŋ nuutu gil tiinə kaa kə begeŋa faɗi!» 24Kel teŋ kəya ŋələŋ kaa gə guuduŋ. Səma Yeesu dugnuy waateŋ pa minti: «Gəəzi gədaarənti, bə kele a Kumna kə Pepeŋaŋ, gəəliŋ nuutu gil! 25Joŋjoŋ neke nuutu bə kele a tələŋkə də paatala mo? Ãhãã! Bə minti hulum bə begeŋ kele a Kumna kə Pepeŋ naŋ, gəəli dəŋaŋ toŋ kəm pə ɗaw.» 26Kəya kaa gə guuduŋ zeŋ gud ŋiliŋ máŋ kəm pisi ze ɗaw. Yə əsəŋ bə le ku kumsi aduubə də kumsi minti: «Bə jəəne bədoonaŋ, bə neke bə fele seereŋ haa mindi tó pə mo?» 27Yeesu gulnuy, wə wəətənəy minti: «Kaa kəsarkaŋ paapa gə nakə-neke bə seere kusri ba, Pepeŋ toŋ bə nakə-neke bə siiriy wəra. Gud maa mo, karman anə məna minti Pepeŋ nəkaŋ bə ji toŋ baŋ, paapa.»

28Kəya Piyer waataŋ Yeesu minti: «Kə are kaayaŋ teŋ gəm mo? Are yaakaŋ kar naareŋ warda neŋneŋ keɗe bə ham bəlam dəm.» 29Yeesu hərnəy kel minti: «Gəəzi ten waataŋ, hulum mundu mundu mo bə minti yaakaŋ kuli nuutuŋ, kəsəənu kaŋkar də kəram, nuru, buru, kərmuyuŋ, kumundu ba anə taakaw nuutuŋ ne wəra gud kel dəna də *Kel pəsaŋ kəmarwaŋa gəm, 30də ko bə hebkənaŋ, hulum toŋ ɗe a fele haa dəŋaŋ kəsi ɗaw. Anə kuliŋ, kəsəənu kaŋkar də kəram, kəmnu kəram də kaŋkar, kərmuyuŋ, taakaw, wə fələy yaŋ keɗe, səma kaŋ ləsu yaŋ ada. Dər ko bə minti bə bi adoroŋ, wə bə fele dədərgə də bay teweŋ gəm. 31Səma ablaw də kaa gə minti teŋ hebkəna kaa kə ajew bə ɗe a kole yaŋ kaa kə adoro. Ablaw də kaa gə minti hebkəna kaa kə adoroŋ, bə ɗe a kole yaŋ kaa kə ajew haa teŋ gəm.»

Yeesu waate haa bə kampa soopeŋ cəərə me du daana hare du wəra dədərgəŋ

(Mat. 20.17-19; Liki 18.31-34)

32Anə Yeesu də *kaa gə guuduŋ haŋ kəkəy bə koore Zeruzalem, Yeesu tiini haa tó. Kəya yə əsəŋ bə hoye wəra dər ɗiki di daana walka jəmaŋ kaayaŋ gə minti a gə tapə-tepe guudiŋ wəra gəm. Wə haraŋ bə humi kaa nuutu hor ciiri ɓasiŋa, wə zeŋ warna anə halaŋ diiri, wə əsəŋ bə wəətiya cəərə kel gə minti bə ɗe yaŋ a ji tó naŋ. 33Wə minti: «Aŋ bə ase, áŋ koore haa Zeruzalem, yə bə ɗe a aye ten *Kormə Hulúm yaŋ wəra a kəkamna kə *kaa kə keere Pepeŋ daana a *kaa kə hate ku gili nuutuŋ. Kəətiŋ bə don yaŋ minti ten kir awe wəra, kəya yə yaakan yaŋ warna a kaa gə minti Pepeŋ paapa də diri baŋ. 34Kaa teŋ bə awte hin yaŋ cəərəna, yə tuftun kiɗikiŋ yaŋ dərəna, yə bə bəran yaŋ bere də kelekiŋ, daana yə bə awan yaŋ wəra. Kəya dər hi bə soopeŋaŋ, ten hare yaŋ wəra dədərgə adordə meŋa.»

Anə Zaki də Zaŋ le ku Yeesu

(Mat. 20.20-28; Liki 22.25-27)

35Anə Zaki də Zaŋ, karmə Zebedeŋ, zeŋ sar Yeesu, yə wəətunu minti: «Hulum bə hateŋ, kel gə minti are waatam dəm ha'aŋ, are də caadə minti jəy la a are.» 36Wə hərnəy kel minti: «Aŋ də caadə minti ten jəŋ maa la mo?» 37Yə minti: «Bə minti tam əsəŋ ne bə hame məyan də kumna nəmtiŋaŋ, yaakə are la ajaŋ dəma, məna agal dəm kemera, məna agal dəm guluŋa gəm.» 38Tó minti: «Karman bə minti aŋ məntunuŋ, guudu paapa də dərəŋ ba. Kopi bə lasi bə minti ten saara yaŋ, aŋ neke yaŋ bə saara gəm mo? Batem bə minti yə bə jən dən yaŋ, aŋ neke yaŋ minti yə jəŋ dəŋ la gəm mo#10.38 Batem waate haa sam lasi də minti yə luɓi cəərə Yeesu dərəŋ; sərdə kaŋ minti wə waate cəərə me du faɗi.?» 39Yə minti: «Are neke yaŋ.» Tó minti: «Gəəzi, aŋ bə se kopi də lasi bə minti ten saara yaŋ. Yə bə jəŋ batem bə minti yə bə jən dən yaŋ gəm. 40Səma ŋeme ɗiki bə minti mindi mo ɗe a isi agal dən kemera kumundu ba agal dən guluŋaŋ paapa ten ba. Ko toŋ bə ɗe ji haa a kaa gə minti Pepeŋ a ɗumpunu wəra a niiniŋ.»

41Bə minti kaa kaayaŋ horiŋ əskəŋ kel teŋ kəyaŋ, yə humuŋ kuy yak-yak-yaki cəərə anə Zaki daana Zaŋ faɗi. 42Kəya Yeesu məntənəy suru da keɗe, wə əsəŋ bə wəətiya minti: «Aŋ gə asə-ase kel gə minti bə ji cəərə seŋkaŋaŋ. Kaa kə dəməəməŋ ji daŋgay də kaa gə minti yə ciiriŋ. Kaa kə samsam ji abay də kaa teŋ gəm. 43Aŋ teŋ a paapa kir ji bədoona aduubə də kumsəŋa ba. Hulum bəlaŋ ne minti tó jəə la ku boblo aduubə dəŋaŋ, wə jəə la haa hulum bə minti ji joŋreŋ a nəənəŋ ɗaw. 44Hulum bəlaŋ ne minti tó jəə la hulum bə ajew aduubə dəŋaŋ, wə jəə la haa kafkam kə mindi mindi mo guudəŋa ɗaw. 45Gud maa mo, *Kormə Hulúm bəŋ haa paapa minti kaa jəw joŋre la ba. Wə bəŋ haa minti wə jəə joŋre la a kaŋ ɗaw daana bə aye dədərgə du wəra bə miɗi kaa ablaw.»

Yeesu biŋi dər hulum bə bəwə-bəwi wəra

(Mat. 20.29-34; Liki 18.35-43)

46Anə Yeesu də *kaa gə guuduŋ tuluŋ Zeriko. Bə minti yə bə yaaka wəraŋ, kaa kə ablaw a jəŋ ada guudi gəm. Hulum bə bəwə-bəwi kəman, yə məntu Bartime, wə kormə Time, a bə əsə-isi agəjaŋ də kəkəya bə laare kara kasi kaŋa. 47Bə minti wə əskəŋ minti Yeesu bə Nazaretiŋ yaŋ bə kele kənaŋ, wə əsəŋ bə naakte ku minti: «Yeesu, *Kormə Davidiŋ, asan caadən la kəm mo!» 48Kəya kaa ablaw əsəŋ bə jəw gəbaŋa minti wə zenə la. Tó ha'aŋ, wə zeŋ gud naakte kuŋ pisi ze ɗaw minti: «Kormə Davidiŋ, asan caadən la kəm mo!»

49Yeesu əsəŋ gil, wə minti: «Aŋ wəətu la, wə bəəda.» Kəya yə ɗeŋ suru, yə wəətunu faɗi minti: «Coɓə la nəmti ta, faa la, wə mantənam ne.» 50Wə əskəŋ kel teŋ kəyaŋ, wə rəyaŋ dəməəmə nuutu də cəərə kumsəŋ warna anə waryak faɗi, wə faŋ anə kaɓəraw cəərə kəmpuru, wə kooroŋ sar Yeesu. 51Yeesu wəətunu minti: «Tam bele minti ten jəm maa la mo?» Wə hərnu kel minti: «Hulum bə hateŋ, jən la kir minti dərən ase la.» 52Yeesu wəətunu minti: «De nəmtiŋ seerenem ne wəra, ɗee la nəmti ta.» Hebkən-hebkəna faɗi, duru əsəŋ bə ase, kəya wə haŋ kəkəy gud Yeesu faɗi gəm.

Currently Selected:

MARKƏ 10: KERNT05

Highlight

Copy