MARKƏ 11

Yeesu kele giidə vil də Zeruzalema

(Mat. 21.1-11; Liki 19.28-40; Zaŋ 12.12-16)

1Bə minti Yeesu də kaa gə guuduŋ wəra maŋ sar Zeruzalemaŋ, yə tuluŋ giidə wəlasi də Betaniŋa də minti kampar *pərki bə minti yə məntu Oliviyeŋaŋ, sar Betfaje ada anə ta'i gəm. Kəya wə vaŋ kaa warna ɓasi gud *kaa gə guuduŋa, 2wə wəətənəy minti: «Aŋ ɗee la giidə wəlasi də tiiniŋ na haa naŋ. Bə minti aŋ ve na anəkay faɗiŋ, aŋ fele kormə agerhẽ bə minti hulum a luunu kəm hõy baŋ bə əntə-ənti gil. Aŋ fuku da, aŋ hare da duuru. 3Hulum laanaŋ kuŋ ne minti aŋ fuku haa səm moŋ, aŋ həru kel la minti: ‹Barkaŋ də caadu, wə həru yaŋ da nuutu cəlam.›»

4Yə kooroŋ faɗi, yə ɗeŋ a tuli kəyaŋ, yə asaŋ kormə agerhẽ bə əntə-ənti wəra taakawa gil agəjaŋ də kəkəya maŋ sar ku kuli kəmana. Kəya yə əsəŋ bə fuku faɗi. 5Sərdə kaa gə minti a ko toŋa adaŋ əsəŋ bə wəətiya minti: «Aŋ foke kormə agerhẽŋ haa səm mo?» 6Yə hərnəy kel damdi Yeesu a wəətənəy di daŋ ana, té yəəkənəy bə fuku faɗi gəm. 7Yə haraŋ da də kormə agerhẽ a Yeesu, yə pəŋ dəməəmə neete də cəərə kumsəŋ wəra, yə baartəna kirku. Kəya wə luunu faɗi. 8Kaa ablaw baartaŋ dəməəmə neete də cəərə kumsəŋ a kəkəya. Sərdə kaa baartaŋ neeteŋ haa kosnə kəbaŋ gə vaa-ve gələf-gələfi gə minti yə a hitniy giidə akaŋ daŋ#11.8 Kel teŋ ge dər haa kəna cəərə waale bə minti kaanə Ziwifiŋ de irku də kumna neeteŋ duuruŋ.. 9Kaa gə minti tiinu na daana guudu daŋ əsəŋ bə naakte kuya minti: «Osana! Tokɗeŋ a Pepeŋ! Wə gaa pisi la cəərə hulum bə minti bəŋ a sam Barkaŋaŋ#11.9 Ps. 118.25-26! 10Wə gaa pisi la cəərə hame bə kumna bə minti yaŋ bə biŋ, kumna kə moomo də áŋ *Davidi bə minti bə hare yaŋ bə hameŋ. Ko bə apəyaŋ keɗe tokɗə Pepeŋ la!»

11Bə minti wə tuluŋ warna Zeruzalem naŋ, wə kəlaŋ giidə tiilim də *Kuli kə Pepeŋa. Wə əsəŋ bə gole kel gə minti bə ji adaŋ anə ɗeketi. Adoro, cəwaŋ wəra bə dere tə bə moŋ, yə yaakaŋ vil də kaa gə guudu hor ciiri ɓasiŋ, yə haraŋ Betani.

Yeesu ge guɗbusi a gum

(Mat. 21.18-19)

12Ɗeŋ a deye dibiini, bə minti anə Yeesu də *kaa gə guuduŋ bə yaakə vil də Betaniŋaŋ, tay əsəŋ bə ɗəmu. 13Wə ɗeŋ a gole ha'aŋ, gum kəman yaŋ warna anə tooto gil bə vaa-ve. Wə jeleŋ cuuru na bə ɗe a gulu minti tó fele we du yaŋ ada mo? Bə minti wə tuluŋ suru maŋ, wə fəlaŋ haa wə bə vaa-ve gil təwa, gud bə minti a haa paapa ko bə minti gum we duruŋ ba. 14Kəya Yeesu waataŋ gum minti: «Tam we hõy minti hulum hamə we dəm la pəda anə ceki faɗi!» Kaa gə guuduŋ əskəŋ kel teŋ gəm.

Yeesu sarme kaa kə celeereŋ wəra giidə Kuli kə Pepeŋa

(Mat. 21.10-17; Liki 19.45-48; Zaŋ 2.13-16)

15Anə Yeesu tuluŋ Zeruzalema. Wə kəlaŋ giidə tiilim də *Kuli kə Pepeŋa. Wə fəlaŋ ha'aŋ kaa kə celeereŋ də kaa kə gusi kar gə əsə-isi ada. Kəya wə əsəŋ bə sərməya wəra. Wə puktuŋ tabul kə kaa kə məɗti suŋku bə irkuŋ daana kəbaŋ gə əsti kə kaa kə celeere gə abaakuŋ wəra gəm. 16Kaa gə minti cakɗete tiilim də Kuli kə Pepeŋ də kar ciiri damdi a koloŋ kəkəy anaŋ, wə həənəy kuy wəra keɗe gəm. 17Kəya wə əsəŋ bə hətəya minti: «Pepeŋ waataŋ giidə kefter nuutuŋa minti: ‹Kuli katən, yə bə məntu minti kuli bə minti gidiirə kaŋ neke bə toose ada keɗeŋ#11.17 Es. 56.7.› Səma aŋ teŋ, aŋ kulnu ‹ko bə əsti kə kaa gə minti tope kar kasi kaŋa də wáŋ#11.17 Jér. 7.11.›»

18Bə minti kəkamna kə *kaa kə keere Pepeŋ daana *kaa kə hate ku gili nuutuŋ əskəŋ kel gə minti wə jiiniy kəyaŋ, yə əsəŋ bə golde kəkəya faɗi minti té əwu la wəra. Səma yə də walka kəəsu gud bə minti hate nuutuŋ wəra bə doo-de dər kaa kə ablaw kaŋkaŋ. 19Bə minti cəwaŋ wəra bə dereŋ, anə Yeesu də *kaa gə guuduŋ yaakaŋ vil taŋ, yə kooroŋ faɗi.

Aŋ doo la gud Pepeŋa

(Mat. 21.20-22)

20Ɗeŋ a deye dibiini bəbəgiŋ, bə minti yə lam bə raaweŋ, yə ɗeŋ a gole ha'aŋ gum wəra bə hẽŋə-hẽŋe kəsar du da adawra da anə hãã warna cuuru na. 21Kəya Piyer haraŋ bə ɗiki kel gə minti a jəŋ, wə waataŋ Yeesu faɗi minti: «Hulum bə hateŋ, gosə gole gum bə minti tam a gəənu guɗbusi la kəm, wə wəra bə hẽŋə-hẽŋe gara!» 22Yeesu wəətənəy minti: «Aŋ doo la gud Pepeŋa. 23Gəəzi ten waataŋ, hulum bə minti jəəne bə doo-de guuduŋ, karman bə minti wə məntunuŋ ne kəəsuŋ, ɗiki du jəŋ ɓas-ɓasi gud mante nuutuŋa baŋ, Pepeŋ jəw karman toŋ yaŋ wəra gəəzi. Hulum toŋ waatə la nuutuŋa pərkiŋ gila minti: ‹Bəə la wəra, ɗee la a awe warna dər kan kəmtəŋ na!›, Pepeŋ jəy yaŋ faɗi. 24Gud teŋa ta ten waataŋ: karman muntu muntu mo bə minti aŋ məntu kasi Pepeŋa dər toose nəətiŋaŋ, aŋ doo haa la faɗi minti wə wəra kaasəŋa, kəya wə ayaŋ dəŋ yaŋ.

25«Bə minti aŋ əsəŋ ne bə tooseŋ, aŋ asaŋ karman kəman ne minti hulum a juunu sarəŋa baymeleŋ, aŋ əyu vəəgi bə giiduŋ la cuuru kir minti Bəraŋ bə minti apəy daŋ ayaŋ vəəgi bə giiduŋ la cəərə baymele nəətiŋa gəm. [ 26Səma jəəne minti aŋ aye vəəgi bə giidu baŋ, Bəraŋ bə minti apəy daŋ ayaŋ vəəgi bə giidu cəərə baymele nəətiŋa bə gəm.]»

Mindi ayaŋ abay a Yeesu mo?

(Mat. 21.23-27; Liki 20.1-8)

27Anə Yeesu də *kaa gə guuduŋ haraŋ Zeruzalem da. Bə minti wə bə gəryi kəna kəna giidə tiilim də *Kuli kə Pepeŋaŋ, kəkamna kə *kaa kə keere Pepeŋ, *kaa kə hate ku gili nuutuŋ daana kaa kəmtəŋ gə tiinə kaanə Ziwifiŋ zeŋ suru da. 28Yə əsəŋ bə wəətu minti: «Kel gə minti tam jəy, aynam kəkəy diŋ haa mindi mo? Aynam abay bə jəy haa mindi mo?» 29Yeesu hərnəy kel minti: «Ten də le ku a nəənəŋ məna gəm. Aŋ harnan kel ne cuuruŋ, aynan abay bə ji kel teŋ haa mindi moŋ, ten waataŋ yaŋ gəm. 30Gaŋ Zaŋ da bə bi a ji batem haa mindi mo? Pepeŋ mo, kaa kəsarkaŋ mo? Aŋ haran kel da!» 31Yə əsəŋ bə ke awəya aduubə də kumsi minti: «Áŋ waataŋ ne kəna minti gəənu da haa Pepeŋ, wə bə waate áŋ haa minti áŋ bə doŋ guudu ba haa səm mo? 32Áŋ waataŋ ne kəna minti gəənu da haa kaa kəsarkaŋ, kaŋ waate minti harmə mo?» A gəəziŋaŋ, yə də walka kas kaa kə ablaw, gud maa mo kaŋ neŋneŋ keɗe wəra gə ɗəkə-ɗiki minti Zaŋ haa *hulum bə jogte ku mini kə Pepeŋ gəəzə-gəəzi. 33Gud teŋa ta, yə hərnu kel minti: «Are ase ba.» Tó hərnəy kel gəm minti: «Jəəne bədoona anaŋ, aynan abay bə ji kel teŋ haa mindi moŋ, ten waataŋ bə gəm.»

Currently Selected:

MARKƏ 11: KERNT05

Highlight

Copy