MARKƏ 12

Ku kumti cəərə kaa kə keɗe gə sərkəŋa

(Mat. 21.33-46; Liki 20.9-19)

1Kəya wə əsəŋ bə wəətəy kela də *ku kumti minti: «Hulum kəman kəɗaŋ aka də atələələma. Wə ɓəknə cəərə wəra, wə holkoŋ giidə pərki bə peete we diŋ giidə ada, wə gəraŋ gadlay kempeleŋ ada anə hələŋ bə gole cəərə pa. Adoro kəyaŋ, wə ayna a kaa minti yə golə cəərə la, tó bə əyəy we də kəbaŋ gəm, wə kooroŋ a gəryi nuutu faɗi. 2Ko bə teke we də kəbaŋ teŋ nəkaŋ kəyaŋ, bərdə akaŋ gaŋ hulum bə joŋre nuutuŋ sar kaa kə keɗeŋ na minti yə ayə agal kə toŋ da. 3Səma kaa teŋ duunu, yə lətnu wəra anə pasyak-pasyaki, yə sərmunu warda kəəsu wiiɗiw-wiiɗiw. 4Kəya wə gəənəy hulum bə ɓasi na pa. Yə ɗeŋ a daw, yə lətnu wəra cuuru, yə sərtunu anə peletpeleti gəm. 5Wə haraŋ bə gay hulum bə soope na pa. Yə ɗeŋ a de toŋ kəyaŋ, yə əwnu wəra pampəraŋ. Kəya wə raawaŋ nuutu bə feke kaa kə joŋre gaalaŋ na a niini. Yə lətaŋ sirdiŋ lete, yə awtaŋ sirdiŋ wəra awte gəm. 6Hulum yaakaŋ máŋ haa məna bə minti wə gaw, haa kurmuyu bə minti giidu bəlu ablaw faɗi gəm. Kəya wə gəənəy di na də ɗikiŋ minti: ‹Máŋ haa kormon tə kəm, yə humi kosoŋ yaŋ cəərə toŋa.› 7Kəya wə gəənu faɗi. Səma bə minti kaa kə gole cəərə akaŋ əsnu bə ɗe da kay daŋ, yə minti: ‹Caw daŋ haa pur bə minti bə ɗe a he akaŋ a gubliŋaŋ. Aŋ bəəda, áŋ əwu la wəra, akaŋ bə yaakə la máŋ kir kasi áŋ!› 8Kəya yə duunu, yə əwnu wəra, yə gəənu titi du warna kerkə laɓiŋ na.

9A ɗiki nəətiŋaŋ, bərdə akaŋ ji naanaanə mo? Wə bə bi haa tó də kusru gadi faɗi, wə awe kaa teŋ wəra, wə aye aka nuutuŋ máŋ kasi kaa gaalaŋa bə gole cəərə. 10Kel lami gə jeerə-jeere giidə kefter kə Pepeŋaŋ, aŋ gə aŋkə-aŋke diiri bə mo? ‹Pərki tó bə minti kaa kə hərsiŋ a gəənu warna ha'aŋ, wə koloŋ pərki pisi bə deŋe kumsuŋ a hərsi bə kuliŋa haa tó ɗaw. 11Jəŋ teŋ bədoona haa Barkaŋ, yə dər áŋa kel kəmtəŋ gə ŋili áŋ gəm#12.11 Ps. 118.22-23.›»

12Kaa gə minti Yeesu a bə wəətəy kelaŋ asaŋ minti wə waataŋ də ku kumti haa cəərə teŋ, yə əsəŋ bə golde kəkəya minti té daw la, səma yə də walka kasi kaa kə ablaw. Kəya yə yəəkunu, té də kusri haraŋ wəra də digni faɗi gəm.

Awəy cəərə lamba kə kumna boblo Sezara

(Mat. 22.15-22; Liki 20.20-26)

13Kəya yə vəənu sərdə kaanə *Farisiyeŋ də sərdə *kaa gə gud *Erodi da minti yə bəə la a law ku bə law kəmpuru də kel kə kuŋ toki. 14Yə wəətunu minti: «Hulum bə hateŋ, are gə asə-ase minti tam waate kel wəra bay kan dərəma. Jəəne nuutu hulum mundu mundu mo, tam kole kel nəmtiŋ kəəsu ba, gud maa mo tam paapa bə gole agal də minti kəna mindi moŋ ba. Pepeŋ bele minti áŋ ɗee la haa naanaanə moŋ, tam hate anə ɗeker ciiri faɗi. Are bele lam kum: áŋ ayaŋ lambaŋ ne a kumna boblo Sezar, haa akəsa mo? Áŋ kirka aya mo, paapa mo?»

15Səma Yeesu wəra bə asə-ase minti yə laka haa kaa gə minti jəm dərəm də kel kəna kuya anəkayya təwaŋ, wə hərnəy kel minti: «Aŋ golde minti aŋ lan kamparən haa səm mo? Aŋ goldon soloy kooso-kooso da, ten bi a gulu.» 16Kəya yə əynu kumundu məna. Tó minti: «Cəərə hulum daana jeere toŋ haa adaŋ, kə mindi mo?» Té minti: «Kə Sezar.» 17Kəya wə wəətənəy minti: «Karman kə Sezar, aŋ həru la a Sezar. Karman kə Pepeŋ, aŋ həru la a Pepeŋ gəm.» Kəya kel gə minti wə wəətənəy ŋilniy kətəŋ.

Awəy cəərə hare bə dədərgəŋa adordə meŋaŋ

(Mat. 22.23-33; Liki 20.27-38)

18Kəya sərdə kaanə *Saduseyeŋ bəŋ sar Yeesu. Teŋ haa kaa gə minti waate minti kaa kə mee-meŋ hare wəra dədərgə adordə meŋa baŋ. Yə əsəŋ bə law ku minti: 19«Hulum bə hateŋ, *Moyisi jeereŋ giidə kefter nuutuŋa a are minti: hulum bə həlgə meŋ ne wəra bay we dəərəŋ, siinu harə la bə doora guudu muru kir minti wə waa beebe la bə ge kaasaw də siinu bə mee-meŋ#12.19 Deut. 25.5. 20Golə laŋ, kəsaanə kumsi a jəŋ seeɗa. Boblo diŋ doŋ həlgəŋ, wə meŋ wəra bay we dəərə. 21Bə cuuruŋ haraŋ bə doora guudu, wə meŋ haa bay we dəərə faɗi pa. Siinu bə cuuru bə ɓasiŋ jəŋ haa bədoona ana gəm. 22Kəya kəsaanə kumsi seeɗa'iŋ koltoŋ wəra dəərə keɗe, yə meeteŋ wəra bay we dəərə neŋneŋ keɗe gəm. A yaakaŋ kay adoroŋ, a bə meŋ warna faɗi gəm. 23Bə minti kaa kə mee-meŋ haraŋ ne wəra dədərgə adordə meŋaŋ, a a jəŋ wəra mar kəsaanə kumsiŋ seeɗa keɗe tə gəm, a bə ɗe a ji mar mundu mo?»

24Yeesu wəətənəy minti: «Aŋ ləŋaŋ ne ta! Aŋ doloy lakaŋ, gud kel kə jeerə-jeereŋ daana səɓaki kə Pepeŋ naanaanə moŋ, paapa də dərəŋ ba. 25Gud maa mo, kaa kə mee-meŋ haraŋ ne wəra dədərgə adordə meŋaŋ, tope bə kəram mo, tope bə kaŋkar mo, pa pəda. Áŋ ji yaŋ máŋ lam damdi *kaa kə digi kə Pepeŋ apəy naŋ ana. 26Cəərə kel də hare bə dədərgəŋa wəra adordə meŋaŋ, aŋ gə aŋkə-aŋke kefter kə Moyisi bə minti waataŋ sam karmə kəbaŋ naɓiŋ gə do'ə-do'eŋ bə mo? Pepeŋ wəətunu da ada minti: ‹Ten haa Pep kə *Abraham, Pep kə *Izakiŋ, Pep kə *Zakopiŋ#12.26 Ex. 3.6. Kaa té soope'iŋ laki kənaŋ a meŋ warda haa ajew də minti Pepeŋ bə waataŋ kel a Moyisiŋ..› 27Jəəne minti Pepeŋ haa Pep kə hulum kəman ŋaanaanə moŋ, ge dər minti hulum toŋ yaŋ dədərgə, gud bə minti Pepeŋ paapa Pep kə kaa kə mee-meŋ ba. Gud teŋa ta, aŋ wəra dər leŋeŋa taltal cəərə hare bə dədərgəŋa.»

Ku gili bə daŋə-deŋe kumsuŋ

(Mat. 22.34-40; Liki 10.25-28; 20.39-40)

28Kəya hulum gud *kaa kə hate ku gili kə Pepeŋa zeŋ suru da faɗi. Wə a əskəŋ awəy də minti a jəŋ bə ceŋ daana minti Yeesu haraŋ kel wəra a kuɗiŋa a kaanə *Saduseyeŋ gəm. Wə əsəŋ bə law ku minti: «*Ku gili bə minti dəŋaŋ kumsuŋ wəra keɗeŋ, haa muntu mo?» 29Yeesu hərnu kel minti: «Ku gili bə daŋə-deŋe kumsuŋ haa kənaŋ: ‹Aŋ jeɓrə la, aŋ kaanə *Israyel! Barkaŋ Pep náŋ, wə Barkaŋ haa tó məna'i faɗi. 30Tam balə Barkaŋ Pep nəmti la də ku tarməyam keɗe, də dədərgə dəm keɗe, də ɗiki dəm keɗe daana də səɓaki dəm keɗe gəm#12.30 Deut. 6.5.› 31Haa kənaŋ nayto bə ɓasiŋ: ‹Tam balə kumsum la damdi kusrum ana faɗi#12.31 Lév. 19.18.› Ku gili baalaŋ bə deŋe té lakiŋ pa pəda.» 32Hulum wəətunu minti: «Hulum bə hateŋ, suuse ablaw, tam waataŋ haa gəəzi. Pepeŋ məna faɗi, Pep baalaŋ pa pəda. 33Bədoona ana, áŋ bəlu la də ku tarmə áŋ keɗe, də ɗiki də áŋ keɗe, də səɓaki də áŋ keɗe, daana áŋ balə kumsə áŋ la damdi kusrə áŋ ana faɗi. Áŋ jəŋ té neŋ, yə hare də keere bə minti yə kəw wəra ki a Pepeŋ daana keere bə ablaw bə minti yə jəw duŋ ba.» 34Yeesu asaŋ kay minti wə də cuuru a kəkəy bə hare kela ŋaanaanə moŋ, wə wəətunu minti: «Tam wəra maŋ sar *Kumna kə Pepeŋa.» Adordə teŋa kəyaŋ, yə jəŋ walka bə law ku cəərə kel gaalaŋa.

Hulum bə minti Pepeŋ ŋəmnuŋ, wə bə daŋə-deŋe Davidi

(Mat. 22.41-46; 23.1-12; Liki 20.41-47)

35Bə minti Yeesu bə hate giidə tiilim də *Kuli kə Pepeŋaŋ, wə laŋ ku kaŋ minti: «*Kaa kə hate ku gili kə Pepeŋ hate minti Kristu, *Hulum bə minti Pepeŋ ŋəmnuŋ, bi a kaasaw də kumna *Davidi haa naanaanə mo? 36Gud maa mo, Davidi də kusru, Tiiru Cetcetaŋ kəlnu kel ku minti: ‹Pep Barkaŋ waataŋ Barkaŋ katən minti: əsə la cin a kaasən kemera hãã bə minti ten kolə kaa kə acukur nəmtiŋ la wəra kəm kar gə minti tam təytəy wəra kuuri#12.36 Ps. 110.1.› 37Jəəne bədoona ana minti Davidi məntu minti ‹Barkaŋ›, wə bə ji naanaanə kaasaw du təwa faɗi mo?» Kaa kə ablaw gə minti a ko toŋa adaŋ, bə jiɓru ku də waale ablaw.

38Bə minti wə bə hateŋ, wə minti: «Aŋ amə kusrəŋ la pisi, aŋ a ji damdi kaa kə hate ku gili kə Pepeŋ ana ba. Yə tere haa jamba də sam də hagə-hageŋ, yə golde haa minti kaŋ mirki té la wəra anə pasyak-pasyaki a ko bə anə alumaŋa. 39Bə minti yə giidə *kuli bə toose kə kaanə Ziwifiŋaŋ, yə golde haa ko bə əsti bə minti yə ji yaŋ wəra kəkər lakiŋ. A ko bə anə kəɗwəyaŋ, yə golde haa anə ko bə əsti kə kaa kəmtəŋ gəm. 40Kaa teŋ tope kar kə kəram gə bay, səma yə əsəŋ ne bə tooseŋ, yə toose anə taa-taa-taa minti té haa kaa pəsaŋ ŋaanaanə mo. Pepeŋ bə ɗe a jəy daŋgay di yaŋ ablaw dəŋaŋ kə kaa kaayaŋ gud kel teŋa kəya.»

Aye kə həlgə də bay də caaca-caacaŋ

(Liki 21.1-4)

41Adoro kəyaŋ, Yeesu ɗeŋ a isi cin tiinə ko bə minti kaŋ feke soloy ada a Pepeŋ. Wə bə gole kaa gə minti bə ve soloya adaŋ. Ablaw də kaa kə begeŋ fəkaŋ soloy haa nuutu fekeŋ faɗi. 42Kəya həlgə də bay də caaca-caaca koloŋ bə ve gəm, a vaŋ naataŋ karmə soloy ɓasi, paapa kir karman ba. 43Kəya Yeesu mantaŋ *kaa gə guudu da, wə əsəŋ bə wəətiya minti: «Gəəzi ten waataŋ, aye kə həlgə də bay tá də caaca-caacaŋ dəŋaŋ kə kaa gə minti ayaŋ gil kənaŋ keɗe. 44Gud maa mo, kaa kaayaŋ ayaŋ soloy nuutu ablaw, səma yaakaŋ kəəsi ablaw gəm. Həlgəŋ də caaca naataŋ nuutu anə keɗeŋ, a ayaŋ karman bə minti a jəŋ kaasaŋ warna neŋneŋ keɗe faɗi, karman bə minti a a sə a fele hameŋ duuruŋ.»

Currently Selected:

MARKƏ 12: KERNT05

Highlight

Copy