MARKƏ 14

Kaŋ de ku kumsi wəra cəərə Yeesu

(Mat. 26.1-5; Liki 22.1-2; Zaŋ 11.47, 49, 53)

1A yaakaŋ haa hiti ɓasi bə minti *kəɗwəy gə Pakiŋ daana gə *mappa bə bay siipəŋ sə a jiŋ. Kəya kəkamna kə *kaa kə keere Pepeŋ daana *kaa kə hate ku gili nuutuŋ əsəŋ bə golde hela minti té doo Yeesu la warna dəgaaya-dəgaaya bə ɗe a əwu wəra. 2Gud maa mo yə bə waate minti: «Áŋ a daw dər kəɗwəya ba, kaa kə ablaw piti də wáŋ də áŋ ɗawmay.»

Həlgə kəman ge son bə siisi pisi cəərə Yeesu

(Mat. 26.6-13; Zaŋ 12.1-8; Liki 7.36-38)

3Bə minti Yeesu a kəm Betani daŋ, wə ɗeŋ ger Simoŋ bə minti yə məntu «Simoŋ bə fə̃ya.». Bə minti yə bə hameŋ, həlgə kəman tuluŋ də tərnə dayga pərki kaasa, yə mante pərki toŋ minti «albaater#14.3 «Albaater» haa gidiirə pərki kəman bə minti pokte bay gəəli.». Son bə siisi pisi bə gusi awəy-awəy bə kəbaŋ kəman yə məntəy «nar» bə seelə-seele giidə bay cuuru faɗi. A pokoŋ kuurə dayga wəra, a əsəŋ bə gawa cəərə Yeesu faɗi. 4Sərdə kaa ada humuŋ kuy anə yak-yak-yaki bə waate aduubə də kumsi minti: «A ɓalkaŋ son toŋ wəra haa bə maa mo? 5Wə sə a gusə la wəra kəna gusiŋ, wə sə a fele soloy dəŋaŋ karmə soloy kəs-kəsi soope#14.5 Karmə soloy kəs-kəsi soope haa werke bə joŋre kə hulum giidə akaŋa kir hiti kəs-kəsi soope gəm. bə aye a kaa kə caacaŋ ɗaw!» Yə jəŋ gəbaŋ wəra a həlgə taŋ anə kaŋkaŋ.

6Səma Yeesu wəətənəy minti: «Aŋ yaakə həlgə taŋ la ɗeketi! Aŋ ɓalke ɗiki də haa səm mo? Kel gə minti a jiiniy hebkəna sarənaŋ, haa joŋre pisi faɗi. 7Kaa kə caacaŋ ha'aŋ, teŋ bə ji sarəŋa kəna saksaki. Pisi bə minti aŋ a ɗəkəŋ ne bə jəy diŋ, aŋ neke yaŋ bə jəy di. Səma ten toŋ ha'aŋ, ten bə ji paapa sarəŋa saksaki ba. 8A jəŋ haa karman bə minti a a də nakə-neke bə jəw. A bəŋ wəra ajew-ajew də son bə siisiŋ haa bə bi a ɗompon kusrən bə mi ge dən a tələŋkəŋ. 9Gəəzi, ten waataŋ, a ko muntu muntu mo cəərə seŋkaŋa keɗe bə minti *Kel pəsaŋ kəmarwaŋ bə waate yaŋ wəra adaŋ, yə tope bəlam də karman bə minti həlgə taŋ a juunuŋ yaŋ wəra gəm. Bədoona ana cəərə kaŋ hare yaŋ bə ɗiki cəərə saksaki.»

Zudasi ji akoloki cəərə Yeesu

(Mat. 26.14-16; Liki 22.3-6)

10Adordə teŋa kəyaŋ, Zudasi Iskariyoti, hulum bə aduubə də *kaa hor ciiri ɓasi gə gud Yeesuŋ, kooroŋ sar kəkamna kə *kaa kə keere Pepeŋ bə ɗe a wəətəy minti tó əyəy Yeesu wəra. 11Bə minti yə əskəŋ kel teŋ kəyaŋ, waale jiiniy ablaw daana yə wəətunu ada gəm minti té bə əyu soloy yaŋ. Də ko toŋ kay daŋ, wə yaakaŋ máŋ bə mi haa minti tó fele dər tó pisi bə əyəy Yeesu wəraŋ haa kotnə mo.

Yeesu hame so bə kəɗwəy gə Pakiŋ də kaa gə guuduŋ

(Mat. 26.17-25; Liki 22.7-14; Zaŋ 13.21-30)

12Ateŋa haa hi bə ajew bə *kəɗwəy gə minti yə hame mappa də bay siipəŋ daana yə awe karmə kaamaŋ gə *Pakiŋ duruŋ gəm. *Kaa gə gud Yeesuŋ wəətunu minti: «Tam bə balə-bele minti are ɗee la a ɗampam hame bə Pakiŋ haa a ko muntu mo?» 13Kəya wə vaŋ kaa gə guudu ɓasi ajew na, wə wəətənəy ada gəm minti: «Aŋ ɗee na giidə vil na. Aŋ ŋefe yaŋ də hulum bə hale hodi bə kana, aŋ haw bəlam du la faɗi. 14Bə minti wə kəlaŋ ne giidə kuli kəmanaŋ, aŋ waatə bərdə kuli toŋ la minti: ‹Hulum bə hateŋ minti ba: giidə kuli bə minti tó hamə Pakiŋ la ada də kaa gə gud toŋ haa muntu mo?› 15Kəya wə gaŋ dərəŋ yaŋ cəərə kuli bə hərsə-hərsi cəərə kumsu na apəy na. Giidu wəra boblo anə vər, kar wəra gə ɗampə-ɗampe ada keɗe. Aŋ ɗampə kar kə hameŋ la a áŋ ada.» 16Kaa gə guudu teŋ kooroŋ kəyaŋ, yə tuluŋ giidə vila, yə fəlaŋ kel haa damdi Yeesu a wəətənəy di warnaŋ ana. Kəya yə ɗampaŋ hame bə Pakiŋ ada faɗi.

17Bə minti koŋ ziɓiŋ kəyaŋ, Yeesu tuluŋ ada na də kaa gə guuduŋ hor ciiri ɓasiŋ. 18Bə minti yə bə hame də kumsiŋ, wə wəətənəy minti: «Gəəzi ten waataŋ, hulum gud aŋ gə minti bə hame dəərən laki kənaŋ, bə ji akoloki yaŋ cəərəna.» 19Bə minti yə əskəŋ kel teŋ kəyaŋ, tərməyi jilniy ablaw. Mindi mindi mo əsəŋ bə wəətu minti: «Haa paapa ten bə ba!» 20Kəya wə wəətənəy minti: «Haa hulum gud aŋ hor cəərəŋ ɓasiŋa laka, bə minti bə cepte kəsawa dəərən.» 21*Kormə Hulúm me yaŋ palpal damdi Kefter kə Pepeŋ a waataŋ cuuru wəra ha'aŋ ana. Səma gəəli ablaw kə hulum bə minti jəŋ akolokiŋ cuuruŋ. Hulum toŋ a waa la wəra baŋ, a marya ɗaw!

Hame kə Barkaŋ

(Mat. 26.26-29; Liki 22.15-20; I Kor. 11.23-26)

22Bə minti yə bə hameŋ, Yeesu haŋ mappaŋ kəəsu, wə jəŋ suuse cəərə, wə ɗoklona dərə, wə ayna a *kaa gə guuduŋ. Wə wəətənəy minti: «Aŋ doorə la, haa kəya kusrən.» 23Adoro, wə haŋ kopi bə seŋ, wə jəŋ suuse a Pepeŋ cuuru, wə əynu a kaa gə guuduŋ, yə jugtunu a kumsi bə se wəra ada keɗe. 24Wə wəətənəy minti: «Haa kor dən bə minti Pepeŋ doŋ *jaa təmarwaŋ də kaŋ duuruŋ. Wə bə ge yaŋ wəra gud kaa kə ablawa. 25Gəəzi ten waataŋ, ten se kumuy bə atələələm hõy pəda hãã bə minti ten ɗe a se kimirwiŋ a *Kumna kə Pepeŋaŋ.» 26Yə gaŋ gudul bə Pakiŋ#14.26 Dər hi bə Pakiŋ yə kaate gudul bə giidə Ps. 113—118 gaa kəyaŋ, yə vaŋ warda bə koore cəərə *pərki bə Oliviyeŋ.

Yeesu waate minti Piyer malte ku yaŋ wəra cəərə tó

(Mat. 26.30-35; Liki 22.33-34; Zaŋ 13.37-38)

27Yeesu waataŋ *kaa gə guuduŋ minti: «Aŋ bə ji yaŋ gə gajgə-gajge dər de nəətiŋa. Gud maa mo Pepeŋ waataŋ wəra giidə kefter nuutuŋa minti: ‹Ten bə awe hulum bə gole cəərə kaamaŋ wəra, yə bə meere yaŋ wəra də tara gəm#14.27 Zach. 13.7.› 28Səma bə minti ten bə haraŋ ne wəra dədərgə adordə meŋaŋ, ten bə ji yaŋ tiiniŋ na Galile na.» 29Kəya Piyer wəətunu faɗi minti: «Jəəne nuutu minti kaayaŋ keɗe gajgaŋ ne ɗawmay, paapa ten toŋ ba.» 30Yeesu hərnu kel minti: «Gəəzi ten waatam, dayna-dayna, duugŋ kəna derra faɗi, ajew də minti goglokiŋ hõõde bə ɓasiŋ, tam bə malte kum yaŋ wəra cəərəna kampa soope ɗaw.» 31Səma Piyer nuutu anə pal-pal bə waate minti: «Jəəne nuutu minti ten mee la wəra dəərəm, ten malte kun wəra cəərəma ba!» Kaa kaayaŋ keɗe əsəŋ bə waate bədoona faɗi gəm.

Yeesu toose giidə ko bə minti yə məntu Getsemane

(Mat. 26.36-46; Liki 22.40-46)

32Kəya Yeesu də *kaa gə guuduŋ tuluŋ a ko kəmana, yə məntu minti Getsemane. Kəya wə wəətənəy minti: «Aŋ əsə la kəna cin-cin, ten ɗe kəm a toose.» 33Wə humuŋ anə Piyer, Zaki, daana Zaŋ guudu, wə kooroŋ warna diiri hal. Kəya walka əsəŋ bə jəmu daana wə dəraŋ laawe wəra faɗi gəm. 34Wə wəətənəy minti: «Laaweŋ kalnan cəərən, golde ko bə me. Aŋ əsə la kəna gə gunə-guni.»

35Wə yəəkənəy, wə zeŋ warna kas anə ɗawəwa kəyaŋ, wə kuɓuŋ də didiki du adawra, wə əsəŋ bə toose Pepeŋa minti, a jəə la kəna minti kəkəy yaŋ, ko bə gəəli-gəəli bə tiinə toŋ, wə rəəwu la wəra kəm cəərə tó. 36Wə minti: «Aba, barən, tam bə nakə-neke cəərə kara keɗe. Zenə kopi bə lasi toŋ la wəra sarəna. Səma kel teŋ jəə la paapa damdi giidən bəlaŋ ana ba, yə jəə la damdi giidim bəlaŋ ana.»

37Wə haraŋ sar kaa gə guudu soope'iŋ da, wə bəŋ a fələy wəra a kina. Wə mantaŋ Piyer faɗi minti: «Simoŋ, tam kəlaŋ kin ne ɗaw? Koo ler məna tam nəkaŋ bə ji dədərgə ba anə ceki? 38Aŋ əsə la wəra gə gunə-guni, aŋ toosə la kir minti aŋ əsə la ŋəŋ tiinə ke bə kuŋa. Hulum kisirkiŋ wəra bə ɗampə-ɗampe dər ɗiki du bə ji pisiŋ, səma a kusukiŋa, wə wəra bə dawə-dewe, wə neke bə jəw ba.»

39Wə haraŋ bə ze na warna kas anə ɗawəwa pa, wə ɗeŋ a isi bə toose Pepeŋa də kel gə ajew toki pa. 40Adoro wə haraŋ siri da, wə bəŋ a fələy a kina pa, gud bə minti diri bə jəy kina wəra hasi. Koɗ kel gə minti yə həru du la anəkay, paapa də diri pəda.

41Wə haraŋ da bə soopeŋ minti tooseŋ, wə wəətənəy minti: «Aŋ kəm a kina daana aŋ bə faake bə pə mo? Təwaŋ ne! Cəwaŋ nəkaŋ ne bə minti yə aye ten *Kormə Hulúm wəra kasi kaa kə bayməlaŋaŋ. 42Aŋ pətə la! Hulum bə minti ayan wəraŋ day cawa. Áŋ jəmu duru la.»

43Ku bay awe adawra cekiŋ, ɗe a goleŋa, Zudasi kəna caw. Wə haa hulum bə gud kaayaŋ hor ciiri ɓasi gə gud Yeesuŋ. Wə tuluŋ də kaa gə minti kəkamna kə *kaa kə keere Pepeŋ, *kaa kə hate ku gili kə Pepeŋ daana kaa kəmtəŋ gə tiinə kaanə Ziwifiŋ a vəənəy daŋ. Yə gə ganə-gene hənjəm də caafay, də gədəwa gəm. 44Zudasi bə minti əyu wəraŋ a waataŋ kaŋ warda cəərə kel gə minti tó bə jəy yaŋ. Wə minti: «Hulum bə minti ten ɗeŋ ne a suɓu gəbyu bə mirkuŋ, haa tó faɗi. Aŋ daw la, a kəkəy bə kooreŋa duuruŋ, aŋ jəə la wəra anə kaŋkaŋ!» 45Bə minti yə tuluŋ na anəkay, wə kooroŋ anə ɗeker cəərə Yeesu na faɗi. Wə wəətunu minti: «Hulum bə hateŋ!», kəya wə suɓnu gəbyu faɗi gəm. 46Kaayaŋ gə minti a bəŋ guudu daŋ duunu faɗi. 47Kəya hulum gud kaayaŋ gə gud Yeesuŋa pəŋ macəlam nuutuŋ wəra, wə ŋeŋ kosnə hulum bə joŋre kə *kumna boblo bə keere Pepeŋ warna nalaŋ. 48Yeesu wəətənəy minti: «Aŋ gene da də caafay, də gədəwa bə bi a don ha'aŋ, aŋ ɗiki haa minti ten hulum bə feke agum a kaŋ mo? 49Ten jaataŋ jaate dəərəŋ giidə tiilim də *Kuli kə Pepeŋa bə hatete kaŋa, aŋ doonon ba. Kel jəŋ ne hebkəna bədoonaŋ, haa minti jeere bə giidə Kefter kə Pepeŋ doo ku la wəra.» 50Kəya kaa gə guuduŋ gadtaŋ wəra də tara, yə yəəkunu. 51Kəya puranul kəman həənu bəlam du da bə hayɗə-hayɗe ladəra pas-pasa kuuyu. Yə a ɗəlaŋ daw, 52səma wə yəəkənəy ladəraŋ giidə kəəsi kay təwa, wə gədaŋ warna də tara gəlaana.

Yeesu tiinə kaa kəmtəŋ gə jeme kəəti kə kaanə Ziwifiŋa

(Mat. 26.57-68; Liki 22.54-55, 63-71; Zaŋ 18.12-18)

53Yə kooroŋ də Yeesu tiinə *kumna boblo bə keere Pepeŋ. Kəya kəkamna kə *kaa kə keere Pepeŋ, kaa kəmtəŋ gə tiinə kaanə Ziwifiŋ, daana *kaa kə hate ku gili kə Pepeŋ əsəŋ bə tulti da bə bi a tepe wəra ada.

54Kəya Piyer adoro da anə tooto caw bə ɗe da gud Yeesu da. Wə ɗeŋ a kele warna guudu na giidə tiilim də kuli kə kumna boblo bə keereŋ na. Wə əsəŋ cin sə kaa kə joŋre kə kumnaŋa bə hoole cəwa.

55Kəkamna kə kaa kə keereŋ də *kaa kəmtəŋ gə jeme kəəti kə kaanə Ziwifiŋ keɗe əsəŋ bə golde kaa gə minti gaa Yeesu la də kel kir minti kəətiŋ daw la haa bə əwu wəra faɗi. Yə fəlaŋ ba 56gud bə minti kaa ablaw kəənu də kel kə ŋetə-ŋete, səma kel anə məna təpaŋ də kumsi ba. 57Kəya sərdə kaa kəman pətəŋ, yə gəənu də kel kə ŋee-ŋe minti: 58«Are əskəŋ ku minti: *Kuli kə Pepeŋ bə minti kaŋ a hursunu gilaŋ, tó puktu wəra. Dər hiti soope tó hərsi baalaŋ, hərsi toŋ paapa kaa kəsarkaŋ ba#14.58 Kel neeteŋ giidi ada haa minti wə waataŋ haa kel kə bayməlaŋ cəərə Pepeŋa. Gud maa mo, bə minti wə waataŋ minti «hərsi toŋ paapa kaa kəsarkaŋ ba», ge dər haa minti tó bəŋ sar Pepeŋ da gadi faɗiŋ..» 59Səma, də teŋ keɗe, ku kaa teŋ jəŋ hal-hal pa.

60Kəya kumna boblo bə keere Pepeŋ faŋ aduubə də kaŋa bə le ku Yeesu minti: «Kaŋ kaanam də kel ha'aŋ, tam paapa bə nakə-neke bə hare kel ciiri ba anə faɗi?» 61Yeesu nuutu ba'-ba'i, wə haraŋ kel ba. Kəya kumna bobloŋ haraŋ bə law ku pa minti: «Tam haa *Hulum bə minti Pepeŋ ŋəmnuŋ mo, tam haa Kormə Pep bə minti pisiŋ bə gaa-ge cuuruŋ mo?» 62Yeesu hərnu kel minti: «Ten haa tó. Aŋ bə ase *Kormə Hulúm yaŋ bə əsə-isi a kasi kemer kə Pep Bar Səɓakiŋa, aŋ bə əsu yaŋ bə bi da apəy da dər kamraŋ da gəm#14.62 Ps. 110.1.» 63Kəya kumna bobloŋ caaraŋ dəməəmə nuutuŋ wəra kas waŋ, wə waataŋ faɗi minti: «Áŋ də caadə bərdə kəkəy muntu pə mo? 64Aŋ əskəŋ kel gə minti wə sartaŋ Pepeŋ diiriŋ. Aŋ ɗəkəŋ haa minti harmə mo?» Kəya kaŋ keɗe əsəŋ bə waate faɗi minti: «Wə kirka awe wəra haa awe.» 65Sirdiŋ əsəŋ bə tuftu kiɗikiŋa suru, yə guɓnu duru wəra, yə əsəŋ bə lətu də kəəsi bə wəətu minti: «Tam hulum bə ase kar tə kəm, waatə la, laanam haa mindi mo?» Kəya kaa kə joŋre kə kumna bobloŋ kooroŋ duuru, yə ɗeŋ a lətu də kəəsi gəm.

Piyer malte ku wəra cəərə Yeesu

(Mat. 26.69-75; Liki 22.56-62; Zaŋ 18.17, 25-27)

66Də ko toŋ ha'aŋ, Piyer giidə tiilim də kuliŋa ada. Kəya həlgə də joŋre kə *kumna boblo bə keere Pepeŋ tuluŋ a ko toŋa ada gəm. 67A asaŋ Piyer bə hoole cəwaŋa, a gulnu wəra anə karɗaɗi, a wəətunu faɗi minti: «Tam ha'aŋ, tam a də Yeesu, hulum tó bə Nazaretiŋ gəm bə mo?» 68Səma Piyer maltaŋ ku wəra minti: «Karman bə minti te wəətuŋ paapa də dərən ba, ten paapa bə usku guudu bə gəm.» Kəya wə zeŋ warna anə turra ku ku kuli bə taakaw na faɗi. 69Həlgə də joŋreŋ haraŋ bə əsu pa, a əsəŋ bə waate kaa gə minti a jəŋ laki adaŋ minti: «Hulum toŋ kəla haa hulum bə gud kaa teŋ faɗi.» 70Piyer dogoŋ malte kuŋ pa. Əsəŋ anə sawəwa kəyaŋ, kaa gə minti a jəŋ adaŋ waataŋ Piyer pa minti: «Gəəzi tam hulum bə gud kaa teŋ, gud bə minti tam hulum bə Galile gəm!» 71Kəya wə əsəŋ bə waate faɗi minti: «Jəəne minti ten ŋeŋ haa kel, Pepeŋ gan la daŋgay! Ten waataŋ wəra haa waateŋ faɗi: hulum bə minti aŋ wəətu səmu ha'aŋ, wə paapa də dərən ba.» 72Də ko toŋ anə derra goglokiŋ hõõdoŋ bə ɓasiŋ faɗi. Cəərə Piyer haraŋ bə ɗiki kel gə minti Yeesu a wəətunu duŋ minti: «Ajew də bə minti goglokiŋ hõõde bə ɓasiŋ, tam malte kum yaŋ wəra cəərəna kampa soope.» Kəya wə gədaŋ tara warna, wə tuukuŋ hage puf faɗi.

Currently Selected:

MARKƏ 14: KERNT05

Highlight

Copy