John 15

Aḵ Jesus Puun Ni De Grape

1Pinagatupan os Jesus we nantuttudu woḵ ḵananae nangipani, “Saḵon tuttuwae puun ni muḻae grape#15:1 Atte dadaane tuḻag, mipani da Judyu baḵon nu da ganaḵ Israel atte waḵaḻe grape Psalm 80:8-18; Isaiah 5:1-2, 7. Yaḵon lawweng imbungana te nan-awidanda'ḵ Apudyus, pun daḵampun ḵan dida gattoḵe mipani'tte waḵaḻe grape. ya aḵ Amaḵ angayyuwan. 2Ḵaanona da pangae adipun amunga. Ḵad da amungae panga, daḻusana dida ta amo umadu ambubungada. 3Pummoḻḵas ḵayu te tinuttuwayu ugude imbagaḵ ḵan diḵayu. 4Iinggaw ḵayu ḵan saḵon ya iinggawaḵ os ḵan diḵayu. Sa pangae nisina si puunna, adipun amunga nu adi misusugtup si puunna. Isuna bos nu misina ḵayu ḵan saḵon, adiḵayupun os amunga.

5“Saḵon puun ni waḵaḻ ya diḵayu pangana. Ngaimane iinggaw ḵan saḵon ya iinggawaḵ os ḵan siya, aduadu ibungana. Te nu misina ḵan saḵon, ippun lamogna ḵoon. 6Ngaimane adipun iinggaw ḵan saḵon, isuna pangae miballu ya maḻangu. Mauppun da panga ḵad miballuda'tte apuy ya masgobda. 7Nu iinggaw ḵayu ḵan saḵon ya nimuḻa ugudḵu'tta somsomoḵyu, ngaimane ḵodawonyu maatod ḵan diḵayu. 8Nu amunga ḵayu'ḵ adu, sana midayawan Amaḵ ya sana amanoḵnoḵe diḵayu da disipuluḵ.

9“Ayatoḵ diḵayu we isun ni an-aayat Amaḵ ḵan saḵon. Pun iinggaw ḵayu ḵan saḵon ta padasonyu ayatḵu. 10Nu tuttuwaonyu da bilinḵu ya iinggaw ḵayu si ayatḵu, isun ni nanuttuwaaḵ atta bilin Amaḵ ya iinggawaḵ si ayatna. 11Imbagaḵ ḵan diḵayu da sana ta sa layadḵu awad ḵan diḵayu ya ippun angkurangan ni layadyu.

12“Annaya bilinḵu ḵan diḵayu, an-asiayat ḵayu we isun ni nan-aayatḵu ḵan diḵayu. 13Sa ḵadaḵoḻane ayat ni tagu, ittona long-agna'ḵ matoy gapu'tta buḻbuḻunna. 14Diḵayu da buḻbuḻunḵu nu tuttuwaonyu da bilinḵu. 15Adiḵpun ogon diḵayu ngadanon aḵ sammilu te sa sammilu naippun igammuna'tte ḵoon ni apuna. Yaḵon ngadanoḵ diḵayu buḻbuḻunḵu te da losane dingngoḻḵu ḵan Amaḵ impaigammuḵ ḵan diḵayu. 16Daḵampun aḵ diḵayu namili ḵan saḵon yaḵon saḵon namili ḵan diḵayu. Ḵad dinutuḵaḵ diḵayu'ḵ umoy amunga'ḵ adu ya annanayun oḵyan bungayu. Ta ngaimane ḵodawonyu ḵan Amaḵ mipagapu'tte ḵaḻabbongaḵ, ittona. 17Pun sa bilinḵu ḵan diḵayu, an-asiayat ḵayu.”

Sa Anasangngaan Da Adipun Amati Ḵan Ditaḵu

18Ḵanan os Jesus atta disipuluna, “Nu sasangngaan diḵayu'tta tagu we adipun amati, iḵagasmoḵyu oḵyane ummunae sasangngaanaḵ. 19Nu isuyu da tagu we adipun amati, ayatonda diḵayu. Yaḵon gapu ta piniliḵ diḵayu'ḵ amati, sadi gapunae sasangngaan diḵayu. 20Sosomḵonyu da imbagaḵ ḵan diḵayu, naippun sammilu'ḵ nangatngatu nu sa apuna.#15:20 John 13:16. Nu nampaḵaḻamonaḵ, ampaḵaḻamonda bos diḵayu. Ḵad nu tuttuwaonda da ugudḵu, tuttuwaonda bos da ugudonyu. 21Yaḵon ḵoonda da anna ḵan diḵayu gapu ḵan saḵon te naippun igammuda si nangibuun ḵan saḵon. 22Naippun oḵyan maḵabasuḻanda nu adiyaḵ ummali ya naḵaugud ḵan dida. Yaḵon sinsadi, ippun ogon allasunda'tta basuḻda. 23Ngaimane anasanga ḵan saḵon, sasangngaana bos aḵ Amaḵ. 24Naippun oḵyan maḵabasuḻanda nu adiḵ ḵingwa da nakaskasdaawe naippun maḵaḵwa. Yaḵon sinsadi ye innilada, sasangngaanda diḵani ḵan Amaḵ. 25Maḵwa sana ta mituttuwa nigili si lintogdae ḵanana, ‘Sasangngaanda saḵone ippun gapuna.’ ”#15:25 Da Psalm 35:19; 69:4.

26Ḵanan Jesus atta disipuluna, “Ibuunḵu Ispiritu Santu we siya Bumadang ḵan diḵayu we maḻpu ḵan Apudyus we Ama. Sa Ispiritu Santu angituttudu'tte ḵatuttuwaan ya taḵdoḻana mipanggob ḵan saḵon. 27Diḵayu ḵad os taḵdoḻanyu te inninggaw ḵayu ḵan saḵon si inggan ni laplapu.”

Currently Selected:

John 15: kml

Highlight

Copy