लूका 14
14
आराम का दन हव करणो
1एक दाण आराम का दन फरीसियाँ मूँ कणी खास फरीसी का घरे ईसू खाणो खाबा का वाते ग्या अन वीं मनक वाँने पकड़बा का मोका की वाट नाळरिया हा। 2अन देको, एक मनक वाँकी आक्याँ का हामे हो, जिंके हात-पग पाणी भरबाऊँ हूजी रिया हा। 3ईंपे ईसू यहूदी सास्तरी अन फरीसियाऊँ क्यो, “सबत का दन किंने ठीक करणो नेमा का हस्याबूँ हव हे के, ने?” 4पण, वीं छानारिया। ईसू वींके हात लगान वींने हव किदो अन जाबा दिदो। 5#मत्ती 12:11ईंका केड़े वणी क्यो, “थाँकामूँ किंको बेटो कन बळद कूण्ड़ा में पड़ जावे तो थाँकाऊँ कूण अस्यो हे के, ज्यो वींने सबद का दन तरत बारणे ने काड़े?”
6पण वी अणी बात को जवाब ने दे सक्या।
आपणाँ वाते मान-समान पाबा की आस
7जद्याँ ईसू देक्यो के, मेमान आपणाँ वाते कणी तरिया ऊँची जगाँ होदरिया हे, तो वो वणाऊँ एक केणीऊँ केबा लागो के, 8#नि.व 25:6,7“जद्याँ कुई थाँने ब्याव को नुतो देवे, तो ऊँची जगाँ में मती बेटज्यो, कटे अस्यान ने वे जावे के, वणी थाँकाऊँ भी कणी मोटा मनक ने नुत्यो वे। 9अन जणी थाँने अन वींने दुयाँ ने ब्याव में नुत्या वे। वो आवे अन थने केवे के, ‘आपणी या जगाँ ईंने दिदो’ तो थने लाजा मरन हाराऊँ रेटे बेटणो पड़ी। 10ईं वाते कुई थाँने नुतो देवे तो थाँ हाराऊँ रेटे जान बेटज्यो ताँके ज्यो थाँने नुतो देवे वो आन थाँने केई, ‘भई उटो वे अन ऊपरे बेट’ अणीऊँ वटे हाराई मेमाना में थाँको मान बड़ी। 11#मत्ती 23:12; लूका 18:14काँके हरेक ज्यो आपणाँ खुद ने ऊसो करी, वींने रेटे किदो जाई अन ज्यो आपणाँ खुद ने रेटे करी वींने ऊसो किदो जाई।”
12पसे ईसू वीं जीमणवाळाऊँ क्यो, “जद्याँ थूँ दने कन राते जीमणो राके, तो आपणाँ हण्डाळ्याँ, भायाँ, परवारवाळा कन रिप्यावाळा पड़ोस्याँ ने मती बुलाज्ये, कटे अस्यान ने वे के, वीं भी आपणाँ जीमण में थने बलान ईंको बदलो पाछो उतार देई। 13पण जद्याँ थूँ जीमणो राके तो गरीबा, लंगड़ा, लकवा मारिया तका अन आंदा ने बलाज्ये। 14तद्याँ थूँ धन्न वेई, काँके वाँका नके थने देबा का वाते कई ने हे। ईंको फळ थाँने परमेसर वीं दन देई जद्याँ थाँ धरमी मनक का हाते पाच्छा जी उटी।”
मोटा जीमणा की केणी
(मत्ती 22:1–10)
15पसे ईसू का हाते खाणो खारिया मनकाँ मूँ एक मनक यो हुणन ईसुऊँ क्यो, “हरेक वो मनक धन्न हे, ज्यो परमेसर का राज में खाणो खावे हे।”
16तद्याँ ईसू वणीऊँ क्यो, “एक दाण एक मनक एक मोटा जीमणा की त्यारी कररियो हो, वणी नरई मनकाँ ने नुता दिदा। 17जद्याँ खाणो त्यार वेग्यो तो वणी आपणाँ दास ने खन्दान हाराई नुत्याँ तका मनकाँ ने नुत्या के, ‘आवो, अबे खाणो त्यार वेग्यो हे।’ 18पण वीं हाराई आगा-पाछा वेबा लागा, एक जणे क्यो, ‘में एक खेत मोल लिदो हे, मने वो देकवा जाणो हे। करपा करन मने माप कर दे।’ 19पसे दूजे जणे क्यो, ‘में पाँच जोड़ी बळद मोल लिदा हे, मूँ वाँने परकबा जारियो हूँ। करपा करन मने माप कर।’ 20एक जणे क्यो, ‘में ब्याव किदो हे, ईं वाते मूँ ने आ सकूँ हूँ।’ 21अस्यान जद्याँ वींको दास पाछो आन वींने हारी बाताँ बतई तो ईंपे घर का मालिक ने घणो गुस्सो आयो अन वणी आपणाँ दासऊँ क्यो, ‘फटा-फट जा अन नगर की हरेक गळ्याँ मूँ गरीबा, लंगड़ा, लकवा मारिया तका अन आंदा मनकाँ ने अटे बला ला।’ 22वणी दास पाछो आन वणीऊँ क्यो, ‘हो मालिक, थाँकी आग्या पुरी कर दिदी हे पण अबे भी जगाँ खाली पड़ी तकी हे।’ 23पसे वणी मालिक क्यो, ‘नगर में अन खेता में बाड़ा-वुड़ी हारी जगाँ में जावो अन हरेक मनक ने हाता-जोड़ी करन अटे लावो ताँके मारो घर पूरो भर जावे। 24अन मूँ थाँकाऊँ कूँ हूँ के, ज्यो पेल्याँ नुत्या ग्या हा, वाँका मूँ एक भी जीमण में जीम ने सकी।’”
चेला बणबा को मोल
(मत्ती 10:37–38)
25जद्याँ लोगाँ की भीड़ ईसू का पाच्छे जारी ही तो ईसू पाच्छा फरन वाँने क्यो, 26#मत्ती 10:37“यद्याँ कुई मारा पाच्छे आवे अन आपणाँ बई-बापू, लुगई अन छोरा-छोरी अन भई-बेन अन अटा तईं आपणाँ जीव ने भी माराऊँ प्यारो माने, तो वो मारो चेलो ने बण सके हे। 27#मत्ती 10:38; 16:24; मर 8:34; लूका 9:23अन ज्यो आपणी हूळी ने ने तोके अन मारा पाच्छे ने आवे, वो मारो चेलो ने वे सके हे।”
28“थाँकामूँ कूण अस्यो हे ज्यो मेल बणाणो छावे अन पेली बेटन वींके खरचा को हस्याबूँ ने लगावे के, वींने बणाबा में कतरो खरचो लागी वो ‘मारा नके हे के ने हे?’ 29कटे अस्यान ने वे के, वो नीम भर दे अन वींने पूरो ने कर सके तो, जणा वींने ओ करतो तको देक्यो हे, ओ हारोई देकन वींकी रोळ करी अन केई के, 30‘अरे देको अणी मनक ईंने बणाणो सरू तो किदो पण ईंने पूरो ने कर सक्यो।’
31“अस्यो कुई राजो वेई ज्यो कणी दूजाँ राजा का विरोद में लड़ई करबा ने जावे अन पेल्याँ ओ बेटन बच्यार ने करे के कई, आपणाँ दस हजार सपई लेन वणा बीस हजार सपई को आपाँ सामनो कर सका के ने? 32ने तो वो राजा थोड़ाक छेटी रेता तकाई, आपणाँ दुताँ ने खन्दान मेल-मिलाप करणो छाई। 33अणी तरियाँ थाँकामूँ कुई भी ज्यो आपणी हारी चिजाँ ने ने छोड़ देवे, मारो चेला ने वे सके हे।
लूण की केणी
(मत्ती 5:13; मरकुस 9:50)
34“लूण तो हव हे पण, यद्याँ लूण को हवाद बगड़ जावे, तो वींको हवाद पाछो कस्यान लायो जा सके हे। 35वो ने तो धुळा का वाते अन ने खात का वाते काम आवे हे, पण, वींने लोग-बाग बारणे फेंक देवे हे।”
“जिंके हुणबा का वाते कान्दड़ा हे, वीं हुणे।”
Currently Selected:
लूका 14: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
