Yahiya 19

Si Isa llagpiꞌ sampay binuwat kalabbiyan

(Matiyu 27.15-31; Malkus 15.6-20; Lukas 23.13-25)

1Pag-anu siꞌ, lay na sohoꞌ Gubnul Pilatu llagpiꞌ si Isa ni siga sundalu na. 2Pag lupus, bbuwatan siga sundalu looy siꞌ, lay ngalubid bahan itingan pinabuwat meꞌ hantangan karuna, boꞌ pinapatuk taꞌ kōk si Isa. Maka lay gi ya papatukan da juba tawuk bahasa juba sultan. 3Pag lupus, salin-sunuꞌ na sila pasōng pa mman si Isa buwat iya kalabbiyan, yuk da, “Kamura-murahan lanjut du umu nu, Ampun Sultan bangsa Yahudi.” Pag-anu, lay gi ya sinuntuk meꞌ da.

4Yaꞌ hallom, lay na baw pōꞌ Gubnul Pilatu balik maan siga Yahudi ndooy, yuk na, “Sohoꞌ ku na lalla looy binoo pitu mari takita bi lay na ya bay sohoꞌ ku llagpiꞌ. Sugaꞌ pahamun bi paayad, basta yaꞌ baw tu luu tatammu ku kasaan na.” 5Pag pōꞌ si Isa ddas ka karuna itingan ka juba tawuk na, yuk Gubnul ninsila, “Ndaun bi na lalla tuu.”

6Takita jaꞌ siꞌ si Isa meꞌ siga imam langkaw ka ga tukang jaga, ilooy ma maghowapan na baw sila, yuk da, “Lansangun na ba! Lansangun na taꞌ tehang!”

Sugaꞌ yuk Gubnul Pilatu, “Boonun bi na ba bbeleng. Kaam sa ngalansang. Boꞌ aku itu, basta yaꞌ luu tatammu ku kasaan na.”

7Pag tampung baanan ga Yahudi looy, “Bong baw bina saraꞌ kami binean, subay ya pinapatoy sabap mangaku ya Anak Tuhan.”

8Lay jaꞌ siꞌ takale Gubnul Pilatu meꞌ looy, tud bay takkahan tawu ya. 9Dari lay na baw boo na si Isa pa jawom astanaꞌ na pabalik. Lay jaꞌ siꞌ ndooy, yuk na ni si Isa, “Lakka maninggai doꞌ ko itu?” Sugaꞌ si Isa siꞌ tu, yaꞌ san nampung. 10Dari yuk Gubnul Pilatu niiya, “Yaꞌ hati ko doman nampungan aku, hāꞌ? Yaꞌ mareꞌ tabista nu aku ngantanan kapatut maddusan kau atawa nohoꞌ kau llansang taꞌ tehang.”

11Pag tampung si Isa, “Yaꞌ bina luu tapabuwat nu oy maka oy na niyaku bong siꞌ saꞌ Tuhan bay muwanan kau kapatut. Ni hāl aku pinakaat batnaa, saꞌ du kau bay bagaraꞌ. Sangkon siga jama ma bay ma-ntan aku pa mman nu, mas mehe gi dusa da man ningkau.”

12Pag takale meꞌ Gubnul Pilatu meꞌ looy, adak na paddusan na si Isa, sugaꞌ maghowapan na pin siga Yahudi, yuk da, “Bong ina lalla naa paddusan nu, nguntra ko Sultan Sisal.#(19.12) Sultan Sisal ilay panghuluꞌ bangsa Rom. Iya bay ngagaw jinisan kalahat-lahatan sampay Israil, lahat bangsa Yahudi. Kuwan Gubnul Pilatu, lay inuwakilan leꞌ Sultan Sisal maggubnul ni bangsa Yahudi. Dari iya ilay tawu lliksad meꞌ Sultan Sisal bong ya madari sultan sarī ni lahat ma pinarintahan meꞌ na. Yaꞌ sina dari batan soysoy ina matangge dī na sultan, mastiꞌ banta Sultan Sisal.”

13Lay jaꞌ siꞌ takale Gubnul Pilatu bay halling da meꞌ looy, lay na boo na si Isa pa poan. Ndooy siꞌ, lai na gubnul ningkōꞌ taꞌ tingkoan man ngahukum ni lugar pinag-awnan Haman Batu Pepan; bong ni pallun Hibrani, Gabbata. 14Na waktu looy ilay siꞌ, agaꞌ tangngaꞌ llaw ni llaw man bangsa Yahudi manyap halliꞌ ni paballangan Ngalingkaꞌ. Pag-anu, yuk Gubnul ni siga Yahudi, “Atu na sultan bi.”

15Sugaꞌ maghowapan na baw sila, yuk da, “Papatoyun na! Papatoyun na! Lansangun na taꞌ tehang!”

Tilaw Gubnul Pilatu baw siꞌ tu, “Hati, sultan bi sohoꞌ bi na baw kina llansang niyaku taꞌ tehang?”

Iya tampung siga imam langkaw baw siꞌ tu, “Yaꞌ baw bitu la luu sultan kami sarī man Sultan Sisal.”

16Dari siꞌ, lay na si Isa pa-ntan Gubnul pa mman ga sundalu na nohoꞌ llansang taꞌ tehang.

Si Isa llansang taꞌ tehang

(Matiyu 27.23-44; Malkus 15.21-32; Lukas 23.26-43)

17Lān da lakka, lay gi nohoꞌ pinanangkit ni si Isa tehang halliꞌ man na llansang. Pag-anu siꞌ, lay na sila pōꞌ man daira song pa buntuꞌ ma inawnan Lugar Baung Kōk, bong ni pallun Hibrani, Golgota. 18Pag takka da pilay, lay na si Isa llansang taꞌ tehang na meꞌ siga sundalu looy. Magsabtan du baw, luu gi ndooy duwa lalla lay du llansang taꞌ tehang. Kuwan disu, huwin pa kawnan man si Isa, kuwan ilooy disu, huwin pa kayli. 19Maka luu gi suwat Gubnul Pilatu ni papan lay nohoꞌ llansang ni tehang si Isa pa jataꞌ man kōk na. Batsahan na, “Si Isa, lalla man Nasaret, Sultan bangsa Yahudi.” 20Bitsala looy siꞌ bay sinuwatan ni pallun Hibrani ka ni pallun Latin, maka ni pallun Greek. Boꞌ meka Yahudi bay kabatsa suwat looy sabap tampat man si Isa bay llansang taꞌ tehang tapit pa daira da. 21Pag takita meꞌ siga imam langkaw meꞌ looy, yuk da ni Gubnul Pilatu, “Subay siꞌ daa ko bay nuwat ‘Sultan bangsa Yahudi,’ arapun meꞌ nu nuwat subay meꞌ tuu, ‘Jama tuu bay mangaku iya sultan bangsa Yahudi.’ ”

22Pag tampung Gubnul Pilatu, “Ma lay na suwatan ku, yaꞌ na dari binaluba.”

23Lay jaꞌ siꞌ llansang si Isa meꞌ siga sundalu, kuwan pamakoy na, lay binahagiꞌ mpat meꞌ da. Dari siꞌ, sika-mpat ga sundalu looy lay na ngaddoꞌ sabahagiꞌ mpat padadangan. Pag-anu siꞌ, luu gi disu pamakoy na maglabi, yana juba na. Yaꞌ luu limpaꞌ tahiꞌ na man jataꞌ pa diyoꞌ. 24Dari yuk dangan pa dangan, “Ituu ba, daa na salik tabi. Pagkimbuan tabi na jaꞌ. Soysoy bay katuwaꞌ, iya na dapu.” Dari sabap meꞌ looy meꞌ da bay buwat, lay na bana binakbul ilooy ma bay tinunaꞌ jawom kitab, ilooy ma yuk na,

“Lay pagbahagiꞌ-bahagian da pamakoy ku, sampay lay gi pinagkimbuan meꞌ da juba ku.”#(19.24) Kitab Jabul 22.18.

25Na ndooy siꞌ ni bihing tehang man si Isa bay llansang, luu nangge baanan karandahan, yana nneꞌ si Isa ka danganakan nneꞌ na ka si Mariyam yana nda si Klopas maka si Mariyam man Magdala. 26Maka luu du ndooy nangge ni bihing nneꞌ si Isa mulit na ma kaasean na. Pag ndaꞌ si Isa meꞌ looy, yuk na, “Inaa na Neꞌ anak nu.” 27Maka yuk na ni mulit na, “Kau pun Nges, inaa na du nneꞌ nu.” Dari labba mandooy na siꞌ, lay na binoo nneꞌ si Isa meꞌ mulit na ilooy siꞌ pa lumaꞌ na sampay ndooy na ya tamban.

Kapatoy si Isa

(Matiyu 27.45-56; Malkus 15.33-41; Lukas 23.44-49)

28-29Na si Isa siꞌ tu, katoonan na lupus na mimon pabuwatan ma bay sinukuꞌ niiya. Pag-anu yuk na, “Tohoꞌ la kallong ku.” Pag takale meꞌ siga sundalu halling na, lay sila ngingkotan sammek ni tōng kayu-kayu boꞌ tinalloban pa jawom pangannaan pannoꞌ leꞌ tubaꞌ anggul bahal. Pag-anu, boꞌ inangkat pa behe si Isa. Dari sabap meꞌ looy, lay na binakbul tunaꞌ njawom kitab pasal tubaꞌ anggul bahal ndean iya taabut na katohoan kallong.#(19.28) Ndaun Kitab Jabul 69.21. 30Lay jaꞌ siꞌ ya nassop, yuk na, “Lupus na.” Pag-anu, ilooy ma lay na palonyok kōk na sampay lay na ya makkat.

31Na si Isa siꞌ tu bay llansang taꞌ tehang, magsabtan ka llaw siga Yahudi manyap ni paballangan Ngalingkaꞌ. Maka pag meꞌ sumawung yana Llaw Pahali magsabtan na du baw ka paballangan Ngalingkaꞌ.

Na kuwan siga pa-mmean Yahudi, yaꞌ sila doman luu gi mayat taꞌ tehang taabut Llaw Pahali. Dari lay sila pilay pa mman Gubnul Pilatu muhun bong dari sohoꞌ na pinōng towang buwaꞌ battis ga lalla looy sikatallu mari sila siglaꞌ matoy. Maka lay du puhunan da siga mayat looy nohoꞌ kinaddoan mandooy. 32Dari lay na du sohoꞌ Gubnul siga sundalu na pilay, sampay lay na pōng da towang buwaꞌ battis siga lalla looy ma bay llansang haboy ka si Isa. 33Sugaꞌ pag song da pa mman si Isa, pag ndaꞌ da, ndang lay na matoy. Dari yaꞌ na sila bay mōng towang buwaꞌ battis na. 34Sugaꞌ kuwan disu sundalu ndooy, lay gi nugsuk saddi si Isa ka budjak sampay magti pōꞌ lahaꞌ haboyan boheꞌ.

35Na mimon pakaradjaan tuu siꞌ, makibana ku batan aku mismu bay kasakup. Sampay itu na tuntut ku ningkaam supaya pitsayaꞌ na du kam. 36Na sabapan bay kahalan si Isa meꞌ looy siꞌ, lay na binakbul tunaꞌ njawom kitab, ilooy ma yuk na,

“Yaꞌ luu pōng san disu towang na.”#(19.36) Kitab Tawrat, Kalakka 12.46 maka Kitab Jabul 34.20.

37Maka luu gi disu tunaꞌ njawom kitab lay na du binakbul, ilooy ma yuk na,

“Paimanan da sina mintu jama looy ma bay binudjak meꞌ da.”#(19.37) Kitab Nabi Zekaraya 12.10.

Si Isa kinubu

(Matiyu 27.57-61; Malkus 15.42-47; Lukas 23.50-56)

38Pag-anu, luu disu lalla man Aramatiya inawnan si Yusup lay pa mman Gubnul Pilatu muhun bong dari kaddoꞌ na mayat si Isa kinubu. Si Yusup ilay siꞌ, mulit si Isa du, sugaꞌ yaꞌ baw bay magpasayu sabap tawu ya ni siga pa-mmean Yahudi. Dari lay du ya pinadari meꞌ Gubnul Pilatu, sampay lay na ya pilay maduwai mayat si Isa. 39Maka luu gi soheꞌ na yana si Nikodimus, lalla looy ma bay pingkaꞌ nammuhan si Isa sangom. Ga si Nikodimus ilay siꞌ bay moo duwan jinis baddak hamut bay pinagsakot inawnan mira ka alos. Eka na, gantaꞌ ga tallumpūꞌ kilu man da ngintu mayat si Isa. 40Lay jaꞌ siꞌ paduwai da mayat si Isa, lay na llibod ka kuku poteꞌ sambayan da mudburan baddak looy meꞌ ndang tabiat bangsa Yahudi malihalaꞌ mayat.

41Na ndooy tagan man si Isa bay nilansang, luu huma. Maka ni huma looy, luu tapit pampang bahau bay llowangan halliꞌ man ngubu. 42Dari pagka pipit na waktu man Llaw Pahali nagnaꞌ, boꞌ ndang tapit du lowang pampang looy siꞌ, ndooy na man da bay nampat mayat si Isa.

Currently Selected:

Yahiya 19: sjm

Highlight

Copy