uLuuka 16
16
Ishiholanyo isha mwimiilizi umushevu
1UYeesu ahavhavhuuzya avhasundikwa vhaakwe ahati, “Kwáli udumbwe wumo, we áamile nu mwimiilizi uwa vwuma vwakwe. Udumbwe uyo ahiivwa kuuti umwimiilizi waakwe uyo akunanganya ivwuma vwakwe. 2Pe ahamwita ahamuvhuuzya ahati, ‘Nongwa vhuli izi zye nkwivwa ku mbombo yaaho? Lolesya uvhusimbe vhwe vhukulolesya vwe uvhombeeye ivwuma vwane, mwe pe utakwanzilwa kuvha we mwimiilizi havhili!’
3“Umwimiilizi uyo ahayivhuziilizya mu mwoyo ahati, ‘Umupiti waane akuneefwa pa mbombo, ishi imbombe ishooni? Kulima, ntali na maha. Havhili kulaavha, nkulola insoni. 4Ishi, naamanya she kuuti mbombe, inga lwe aneefwa pa mbombo ino, avhantu vhahamposheele mu nyumba zyavho.’
5“Pe umwimiilizi uyo ahavhiita vhonti vhe vhápavile kwa mupiti waakwe. Ahamuvhuziilizya umutanzi ahati, ‘Umupiti waane akupavhiiye ishooni?’ 6Ahamwamula ahati, ‘Ampavhiiye ivipimilo 100#16:6 Ivipimilo 100: Ishipimilo shooka shihavhanga ni liita 30 lumo 40 ishi. ivwa mafuta aga mazayituuni.’ Umwimiilizi uyo ahamuvhuuzya ahati, ‘Nyatuula italataasi ili ilya vhusimbe uvhwa vwe akupavhiiye, simba luvhiilo uti, ivipimilo 50.’ 7Pe ahamuvhuziilizya uwa vhuvhili ahati, ‘Iwe akupavhiiye ishooni?’ Ahamwamula ahati, ‘Amagunila 100 aga ngana.’ Umwimiilizi uyo ahati, ‘Nyatuula italataasi ili ilya vhusimbe uvhwa vwe akupavhiiye, simba uti, amagunila 80.’
8“Pe udumbwe ula ahamutiima umwimiilizi we te mutungamu uyo, vwe ávhomvile ku njeele. Navhavhuuzya ishiholanyo ishi, mwe pe avhantu avha mu nsi umu, vhakuvhomba imbombo zyavho na vhamwavho ku njeele kuluusya vhe vhamwitisile uMulungu. 9Ishi ine nkuvhavhuuzya kuuti, muvhavwaje avhamwinyu ni vwuma vwinyu ivwa mu nsi umu, inga lwe vwasila, muhaposheelwe mu vhuyo uvhwa shiima shiima.
10“Umuntu wonti we mutungamu ku vintu ivinsi, akuvha mutungamu na ku vintu ivwinji. Woope we te mutungamu ku vintu ivinsi, atakuvha mutungamu na ku vintu ivwinji. 11Ishi, inga te mwe vhatungamu ku vwuma ivwa mu nsi umu,#16:11 Ivwuma ivwa mu nsi umu vintu vwe uMulungu avhapiiye avhantu mu nsi umu. Ivwuma ivwa nalyoli vhulanzi uvhwa shiima shiima. wu naanu we angaavhapa ivwuma ivwa nalyoli! 12Havhili inga te mwe vhatungamu ku vwuma ivwa wunji, wu naanu we angaavhapa ivwuma ivwa kuvha vwinyu mweneemwe? 13Ataliipo umuzya we angavhavhombela avhamwene vhavhili ku havhaliilizyo hooka. Yeenya, lwe akumukunda umwene wooka, akuvha akumuviitilwa uwamwavho, havhili lwe akuyifumwa nkaani kumuvhombela umwene wooka akuvha akumusuufwa uwamwavho. Inga ivwuma vikuvhakonzya, mutangamuvhombela uMulungu.”
14AVhafalisaayi lwe vhiivwa amazwi igo, vhahanda kumusuufwa uYeesu, mwe pe vházisungwilwe nkaani impiiya. 15UYeesu ahavhavhuuzya ahati, “Imwe mukuyivhiiha mwe vhagolosu pilongolela ilya vhantu, ileelo uMulungu azimanyile zye zili mu mooyo giinyu. Ivintu vwe avhantu vhakuvimwamiha, uMulungu akuviviitilwa!”
Insambiilizyo izya ndajizyo izya Moose
(uMataayi 11:12-13; 5:31-32; uMaaliko 10:11-12)
16“Indajizyo izya Moose nu vhusimbe uvhwa vhakuvhwi vwávhalongooye avhantu kufishila ahavhaliilizyo aha Yoohani uMwozyi. Kufuma ahavhaliilizyo iho, Izwi iLyinza ilya vhumwene uvhwa Mulungu likulumbiililwa, avhantu avhinji vhakuyifumwa nkaani kwinjila mu vhumwene uvhwo. 17Ileelo shipupuusu nkaani imwanya ni nsi kwepa, kuluusya kwepa poosye ahandona inga hooka aha ndajizyo izya Moose.
18“Umuntu wonti we akumutavhula umushi waakwe nu kunyatula umwantanda uwunji, akuvhomba uvhuvhembu. Woope we akumwimala umwantanda we umulume waakwe amutavhuuye, akuvhomba uvhuvhembu.”
Udumbwe nu mupiina uLaazalo
19“Kwáli udumbwe wumo, we ahazwalaga amenda aminza aga nsavho impiti aga muhoola uwa mafwomfwo. Insiku zyonti, ahalyanga ishaakulya isha nsavho impiti. 20Pa mulyango uwa dumbwe uyo, insiku zyonti vhahamuvhiihaga umupiina wumo, we vhahatinji uLaazalo. ULaazalo áamile na malonda umuvhili wonti, 21ni mbwa zihamumwantaga genego. Inzala yihamulumaga nkaani, pe ahanyonywaga kulya utulagala twe tuhalagalaga kufuma pa meeza pe ahalyanga udumbwe uyo.
22“Pisinda, umupiina uLaazalo ahafwa. Avhahavhizya vhahamunyatula, vhahamuvhiiha papiipi nu Aabulahamu ku mwanya. Udumbwe ula, woope ahafwa, vhahamusyila. 23Pe udumbwe uyo lwe akuyimba nkaani ku vhuzimu,#16:23 Ku vhuzimu: Vhaazya mu Ntantiho izya Mazwi aMajeni. ahavhuusya itwe, ahamulola uAabulahamu ukutali ali nu Laazalo. 24Ahamwita ahati, ‘We taata Aabulahamu, umfwile uvhwila! Nkuyimba nkaani mu mwoto uno! Nkukulaavha umusonteelezye uLaazalo, atumpishe ahafingwi mu minzi, ayinze anzwilizye pa lumili lwane, inga luhatale.’
25“Ileelo uAabulahamu ahamwamula ahati, ‘Mwana waane, ukumbushe kuuti ahavhaliilizyo he wáamile we mupuuma, wáamile ni vintu ivwinza vwe uhavisuvhilaga, ileelo uLaazalo áamile mu mayimba. Ishi, uweene akusuvhalizilwa ipa, iwe ukuyimba. 26Pooka niizyo, pahati yiitu niimwe, pali ilivha ipiti nkaani. Ilivha ilyo livhisiilwe, inga avha uku vhe vhakwanza kwinza kuli imwe, vhapotwaje kufumiila, poosye avha ukwo vhapotwaje kwinza kuli iswe.’
27“Udumbwe uyo ahamuvhuuzya ahati, ‘Ishi taata, nkukulaavha umusonteelezye uLaazalo kuuti asogole kuhaaya kwa taata waane. 28Ukwo indi na vhanine vhaane vhasaano. Asogole avhasoshe kuuti vhazileshe imbiivhi zyavho, inga vhoope vhatahinze ku mayimba amapiti uku.’ 29UAabulahamu ahamwamula ahati, ‘Avhanine vhaaho vhali nu vhusimbe vhwe vhwásimviilwe nu Moose na vhakuvhwi, vhavhutejelezyaje vhwenevhwo!’
30“Udumbwe uyo havhili ahati, ‘Ndaali, taata Aabulahamu! Ileelo inga umuntu aafuma ku vhafwe, asogola ku kwavho, pe kwe vhatonte imbiivhi zyavho.’ 31UAabulahamu ahamwamula ahati, ‘Inga vhatakuzyitiha zye zisimviilwe nu Moose na vhakuvhwi, poosye umuntu azyushe kufuma ku vhafwe, vhatangamwitiha.’”
Currently Selected:
uLuuka 16: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
