Éxodo 16
16
Ñanderuete ome’ẽ mana ha so’o
1Oho rire Elímgui Israel atykuéra og̃uahẽ Sin desiértope, opytáva Elim ha Sinai pa’ũme, péva ojehu pe ára 15-hápe, pe jasy mokõiháme, osẽ rire Egípto retãgui.
2Ha mayma Israel ñemoñare aty oñe’ẽguyguy Moises ha Aaron rehe pe desiérto pévape.
3Ha Israel ñemoñarenguéra he’i ichupekuéra: Romanombanteva’erãmo’ã Ñanderuete po rupi Egípto retãme, upépe roguapy japepo (ólla) iso’óva jerekuévo, ha ro’u ramoguare pan oreryg̃uatã meve; nde katu oreguenohẽ ko desiérto kóvape orejuka hag̃ua ñembyahýi rupi.
4Ha Ñanderuete he’i Moiséspe: Péina ápe, Che amongýta peẽme pan yvágagui; ha peẽ pesẽta ko’ẽ ko’ẽ rehe pembyaty hag̃ua pe’útava pe árape, che aha’ã hag̃ua ichupekuéra iñe’ẽrendúpa che rembiapoukapýpe térãpa nahániri.
5Ha pe ára 6-hápe katu omono’õta hikuái oñongatu hag̃ua mokõi árape g̃uarã.
6Upéramo Moises ha Aaron he’i mayma Israel ñemoñarenguérape: Ko ka’arúpe peikuaáta Ñanderuete peneguenohẽ hague Egípto retãgui,
7ha pyhareve pehecháta Ñanderuete reko jajaipa, Ha’e ohendúgui pekaguaiha hese, ha orerehe mba’e piko ore, pekaguái avei orerehe.
8Moises he’i avei: Ñanderuete ome’ẽta peẽme ko ka’arúpe so’o pe’uva’erãva ha pyharevekue pan peneryg̃uatã hag̃ua; Ñanderuete ohendúgui, mba’éichapa peñe’ẽguyguýkuri hese; ha ore piko mba’e mba’e. Pene ñe’ẽguyguy ndaha’éi orerehe, Ñanderuete rehe uvei.
9Ha Moises he’i Aarónpe: Ere mayma Israel ñemoñarépe taijaty ha toñemboja Ñanderuete rendápe, Ha’e ohendúgui iñe’ẽguyguykuéra.
10Ha Aaron oñe’ẽ jave mayma Israel ñemoñarenguéra atýpe, oma’ẽ hikuái desiérto rehe, ha péina ojekuaa Ñanderuete reko jajaipa arai rehe.
11Ha Ñanderuete oñe’ẽ Moiséspe, he’ívo:
12Che ahendúma Israel ñemoñarenguéra ñe’ẽguyguy; eñe’ẽ ichupekuéra, erévo: Ko ka’aru kóvape pe’u joáta so’o, ha pyhareve peñemohyg̃uatãta pángui ha peikuaáta Che, pende Ruete, pende Jaraha.
13Ha og̃uahẽvo pe ka’aru, ou ynambueta oñu’ãmbáva hekoha renda; ha pyhareve ho’a ysapy hekoha jere rehe.
14Ha pe ysapy ho’apa rire, péina ápe pe desiértore iñasãima peteĩ mba’e michĩva, ijapu’áva ha ojoguáva ysapy rypy’ápe (niéve) ho’áva yvy apére.
15Ha Israel ñemoñarenguéra ohechávo kóva he’i ojupe hikuái: Mba’e piko kóva, ndoikuaáigui umi mba’e jahecharamóva. Upéramo Moises he’i ichupekuéra: Péva ningo Ñanderuete pan Ha’e ome’ẽva peẽme pe’u hag̃ua.
16Ñanderuete he’iuka peẽme peteteĩ tombyaty ikatúva ho’u; peteĩme g̃uarã peikotevẽ 2,2 lítro ha pembyatýta heta háicha pende rogayguakuéra.
17Ha Israel ñemoñarenguéra ojapo péicha; peteĩ omono’õ hetave ha ambue sa’ive;
18ha oha’ã rire nahembýi pe omono’õ hetaveva’ekuépe ha naipokãi (ndofaltái) omono’õ sa’iveva’ekuépe; ha peteĩteĩva omono’õ ikatúva guive ho’u.
19Ha Moises he’i ichupekuéra: Anítei avave omohemby ichugui ko’ẽrõ g̃uarã.
20Ha’ekuéra katu ndojapói Moises he’i haguéicha ha oĩ umi omohembýva ambue árape g̃uarã, upévare ou omoñemoña yso ha inemba; ha Moises ipochy hendivekuéra.
21Ha omono’õ hikuái ko’ẽ ko’ẽ rehe, peteĩteĩva ho’umiva’erãvante; ha pe kuarahy ojopévo ombohykupa pe mana (pan yvagaguiguáva).
22Ha pe ára 6-hápe ombyaty hikuái mokõi árape g̃uarã, 4,4 lítro peteĩteĩvape g̃uarã; ha umi karai ancianokuéra ou ha oikuaauka ko’ã mba’e Moiséspe.
23Ha ha’e he’i ichupekuéra: Péicha Ñanderuete he’iva’ekue: Ko’ẽrõ hína pytu’uha ára, oñemboykéta Ñanderuetépe g̃uarã; oime ramo ombojyséva tombojy ko árape, ha upe omomimoiséva tomomimói avei ko árape; ha umi mba’e hembýva guive peẽme, peñongatukuaa ko’ẽrõg̃uarã.
24Ha ha’ekuéra oñongatu pyhareve peve, Moises he’i haguéicha, ha ndahasói ni nainéi ambue ára ramoguaréicha.
25Ha Moises he’i: Pe’upa ko pytu’uha árape, ndapejohumo’ãigui mba’eve ñúme.
26 Seis ára javeve pemono’õta, ha pe ára 7-hápe katu pytu’uha ára; pe árape ndapejohumo’ãi mba’eve.
27Oĩmimi katu hetãyguakuéra apytégui, osẽva pe ára 7-hápe omono’õ hag̃uáicha, ha ndojohúi mba’eve.
28Ha Ñanderuete he’i Moiséspe: Araka’e pevépa ndapejapomo’ãi che rembiapoukapy ha che rekombo’ekuéra.
29Pema’ẽke, pende Ruete ome’ẽ peẽme ko ára kóva pytu’u upévagui pe ára 6-hápe ome’ẽ peẽme mana mokõi árape g̃uarã, peteĩteĩva opytakuaa hóga tymba pirekueguiguaguasúpe, ani hag̃ua avave osẽ oheka hembi’urã pe ára 7-hápe.
30Upéicha Israelguakuéra opytu’u pe ára 7-hápe.
31Ha Israel rogayguakuéra ombohéra pe pan yvagaguigua oúva mana, ojoguágui kuratũ ra’ỹime ha he’ẽ porã pan dúlceicha, ojejapóva eíra reheve.
32Ha Moises he’i, Ñanderuete he’iuka: Pemyenyhẽ ichugui peteĩ mba’yru oguerekóva 2,2 lítro ha peñongatu pene ñemoñarenguérape g̃uarã, ikatu hag̃uáicha ohecha hikuái pe mana Che ha’ukava’ekue peẽme desiértope, poguenohẽ ramoguare Egípto retãgui.
33Ha Moises he’i Aarónpe: Ejapyhy peteĩ mba’yru ha emoĩ ipype 2,2 lítro mana ha emoĩ Ñanderuete renondépe, oñeñongatu hag̃ua pene ñemoñarenguérape g̃uarã.
34Ha Aaron oñongatu pe mba’yru peteĩ karameg̃uáme, Ñanderuete he’i haguéicha Moiséspe.
35Péicha Israel ñemoñarenguéra ho’u mana 40áño pukukue, og̃uahẽ meve pe yvy ojeiko hag̃uáme; mana ho’u hikuái og̃uahẽ meve Canaan retã rembe’ýpe.
36Ha peteĩ efa (22 lítro) oguereko 10 gomer.
Currently Selected:
Éxodo 16: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
