Éxodo 20
20
10 tembiapoukapy
1Ha oñe’ẽ Ñanderuete mayma ko’ã ñe’ẽ Israel retãyguakuérape he’ívo:
2Che ningo Jahve, pende Ruete, poguenohẽva’ekue Egípto retãgui, tembiguái reko poguýgui.
3Ndereguerekoiva’erã ambue jára che ykére.
4Nderejapoiva’erã ndejupe g̃uarã ta’ãnga, ha mba’eve joguaha, umi mba’e oĩva yvágape, térã yvýpe, térã ykuéra oĩva yvy guypeguágui,
5ha nereñesũiva’erã henondepekuéra, ha neremomba’eguasuiva’erã; che ha’égui Jahve, nde Ruete, imbaretéva, hakate’ỹ rekóva ha amyengoviáva tuvakuéra reko vai ita’yrakuéra ári, heminenonguéra ári, ha avei heminenonguéra ra’ykuéra ári, irundy ñemoñare rekove peve, umi cherehe ija’e’ỹvape.
6Che katu aiporiahuverekóta umi cherayhúvape ha ojapóva che rembiapoukapykuéra 1.000 iñemoñare rekove (generaciónes) peve.
7Ani reiporu rei Jahve, nde Jára réra rembotavy hag̃ua nde rapichápe; katuete ahaviráta upe oiporu reívape che réra.
8Nemandu’áke pe pytu’uha árare, remboete (remboarete) hag̃ua nde Ruetépe.
9 Seis ára remba’apova’erã ha umía aja rejapova’erã opaite ne rembiapo;
10ha pe ára 7-ha katu pytu’uha arava’erã nde Ruetépe g̃uarã; anítei rejapo pe ára pévape mba’eveichagua tembiapo, nde térã nde ra’y, térã nde rajy, térã ne rembiguái, térã ne remimongakuaa kuñáva, térã ne rymba, térã tetã ambueygua oĩva guive nde rogapýpe.
11Nde Ruete ojapo rire yvagakuéra ha yvy, pe yguasu ha opaite mba’e ipype oĩva guive, opytu’u avei pe ára 7-hápe; upévagui nde Ruete ohovasa ha omboarete pe pytu’uha ára (sábado).
12Emboetéke (ehayhúke) nde ru ha nde sýpe, nde reikove puku hag̃ua pe tetãme nde Ruete, nde Jára, ome’ẽtava ndéve.
13Ani reporojukáreítei.
14Ani reikótei ne mena’ỹ térã ne rembireko’ỹva ndive, (menateéva ha ne rembirekoteéva ndivénte oikova’erã).
15Ani remondátei.
16Ani erétei japu nde rapicháre.
17Ani reipota nde rapicha róga; ani reipota nde rapicha rembireko, ni hembiguái, ni hemimongakuaa kuñáva, ni hymba guéi, ni ibúrro, ni mba’evete nde rapicha mba’éva.
Tetãyguakuéra kyhyje
18Tetãygua maymáva oma’ẽ mombyry joa arasunu ha aratiri rehe, ha trompéta pu ha pe cérro hatatĩva rehe; ha tetãyguakuéra ohechávo upéva oryryipa ha oñemomombyry.
19Ha he’i hikuái Moiséspe: Eñe’ẽ nde orendive ha ore rohendúta; anínte Ñanderuete oñe’ẽtei oréve, ani hag̃ua romanomba.
20Ha Moises ombohovái hetãyguakuérape: Ani pekyhyjétei; penera’ã hag̃uánte Ha’e ou, pekyhyje katu peñemboheko vaisévo ko’águi rire.
21Upéramo tetãyguakuéra opyta mombyry ha Moises oñemboja pe arai anambusu rehe, Ñanderuete oĩgui upépe.
22Ha Ñanderuete he’i Moiséspe: Péicha eréta Israel ñemoñarenguérape: Peẽ pehecha añe’ẽ hague penendive yvága guive.
23Aníke pejapo che ykére ambue pende jararã, ndapejapoiva’erã pende jararã plataguiguáva ni oroguiguáva (ni mba’eveichaguágui).
24Kuave’ẽmby renda yvyguiguáva rejapova’erã chéve g̃uarã ha reikuave’ẽva’erã hi’ári nde ovecha ha nde torokuéra ne kuave’ẽmby ojehapypáva ha kuave’ẽmby py’aguapy reheguáva. Opa rupi Che ha’e hag̃uáicha peẽme chemomba’eguasuva’erã, upepete Che aĩta penendive ha pohovasáta opaite árape.
25Ha rejapo ramo chéve g̃uarã kuave’ẽmby renda itaguiguáva, ani reiporu herramienta remba’apo hag̃ua ita rehe, ỹrõ nde remongy’áta pe kuave’ẽmby renda.
26Nderejupiriva’erã escaléra rupi che kuave’ẽmby rendápe, ani hag̃ua ojehecha nde rete ijopivoha.
Currently Selected:
Éxodo 20: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
