Éxodo 23
23
Tembiapoukapy ñembojovake reheguáva
1Ani remyasãi ne mbytépe ñe’ẽguata japu. Ndereikeiva’erã ñe’ẽ joajúpe heko vaíva ndive, reiko hag̃ua techahare japu ramo.
2Ndereikoiva’erã mba’evai apohára rapykuéri rejapo hag̃ua avei mba’e ivaíva, ha pe ñembojovakehápe ani remoirũ ijapuvévape,
3ni remoirũ avei imboriahúvape ijapúpe.
4Rejohu ramo nderehe ija’e’ỹva guéi térã ibúrro okañýva, egueraha jevy ijárape.
5Rehecha ramo pe nderehe ija’e’ỹva búrro ho’áva mba’e pohýi ijaperegua guýpe, eipytyvõ opu’ã jevy hag̃ua pe búrro.
6Nderejapoiva’erã heko pegua’ỹva mboriahu rehe iñembojovakehápe.
7Ñe’ẽ japúgui reñemomombyryva’erã, ha nderejukaukaiva’erã heko potĩva ni hekojojávape, Che voi ahavirágui avei upe heko vaívape.
8Nde rehejaiva’erã oñeme’ẽ ndéve jopói ndejapu hag̃ua; pe jopói ombohesa ypytũ ohechávape, ha omboheko vai hekojojáva ñe’ẽ.
9Neremyangekõiriva’erã tetã ambueyguápe, peẽ voi peikuaágui mba’éichapa ha’e oñeñandu, peẽ voi peiko haguére Egípto retãme tetã ambueygua ramo.
10 Seis áño pukukue reñemitỹva’erã nde kokue yvýpe ha remono’õva’erã hi’akue;
11ha peáño 7-hápe katu remombytu’úta pe yvy, ne retãygua mboriahukuéra okaru hag̃ua hese ha hembýva rehe okarúne mymba ñu rupigua; péicha rejapóta nde parralty rehe ha nde olivoty (yvyra ome’ẽva acéite) rehe.
12 Seis ára remba’apova’erã ha pe ára 7-hápe emboareteva’erã, opytu’u hag̃ua nde guéi ha nde búrro ha ipiro’y hag̃ua ne rembiguái memby ha tetã ambueygua.
13Ejapóke opaite mba’e Che ha’éva guive ndéve. Ambue jára réra napehenoiriva’erã ha noñehenduiva’erã pende jurúgui.
Israel aretekuéra
14Peteĩáñope, mbohapy jevy pemboarete chéve.
15Pemboarete pan ñembovupyre’ỹva. Siéte ára pe’uva’erã pan ñembovupyre’ỹva Che ha’e haguéicha peẽme, abril jasýpe pesẽgui Egíptogui; ha avave noñembojaiva’erã che renondépe po nandi.
16Pemboarete ñemitỹngue ñemono’õ tenondere ha avei pe arete ñemono’õáño paha pegua remono’õmba rire nde koga’a.
17Peteĩáñope, mbohapy jevy ouva’erã mayma kuimba’e pende Ruete rogaguasúpe.
18Ndereikuave’ẽiva’erã chéve pan ñembovupyréva che kuave’ẽmby ruguykue reheve ha pe kyrakue oñekuave’ẽva chéve ndopytaiva’erã ko’ẽ meve.
19Nde kóga’a ypykue regueruva’erã pende Ruete rógape. Nerembojyiva’erã kavara ra’y isy kambykuépe.
Ñanderuete ombou yvága rembiguái (ángel) oisãmbyhy hag̃ua Israélpe
20Eikuaa porãke, Che amondóta che ángel ne renonderãme, oñangareko hag̃ua nde raperã rehe ha nemoinge hag̃ua pe tetã ambosako’iva’ekuépe pene mba’erãvape.
21Eñeñangareko porãke ndejehe henondépe ha ehendúke iñe’ẽ; aníke naneñe’ẽrendúi ichupe; Ha’e ndoheja reimo’ãi ndéve jehavira’ỹre pepu’ã ramo hese, che réra oĩgui ipype.
22Ha añetehápe rehendu ramo iñe’ẽ ha rejapo ramo opaite mba’e Che ha’éva guive ndéve, Che voi apu’ãta nderehe ija’e’ỹva rehe, ha amyangekõita umi ndéve nemyangekõivape.
23Che yvága rembiguái (ángel) ohóta ne renonderãme ndegueraha hag̃ua pe tape ohóva Amorgua, Hetgua, Ferezgua, Canaangua, Hevgua ha Jebusguakuéra retãme, ichupekuéra katu che ahundiukapátagui.
24Nereñesũiva’erã ijara ra’ãngakuéra renondépe ha ndereikoiva’erã hembiguái ramo ha nderejapoiva’erã ha’ekuéra ojapo háicha; rembyaiva’erã uvei ichupekuéra ha rejokapava’erã ijára rete ra’ãngakuéra rejohúva guive.
25Jahve, pende Ruetépe katu pemomba’eguasu, Ha’e ohovasa hag̃ua ne pan ha nde ykuéra; ha oipe’apa hag̃ua opaichagua mba’asy pende apytégui.
26Ne retãme ndaiporimo’ãi kuña imembykuáva ni ikatu’ỹva imemby; ha che ambopukuvéta nde rekove ára.
27Che amondóta kyhyje ne renonderãme, amongyhyjéta opaite tetãyguakuéra mamo nde reikehápe ha nderehe ija’e’ỹva okañymbáta hikuái.
28Ne renonderãme amondóta káva pytã oguenohẽva’erã okápe Hevgua, Canaangua ha Hetguakuérape hetãgui.
29Namosẽmbamo’ãi ne renonderãgui peteĩáñope, ani hag̃ua pe yvy opyta nandi ha oñembohetátei ndéve mymba ñarõ ka’aguy peguáva.
30Sa’i sa’ípe amosẽmbáta ne renonderãgui, reñembohetave peve ha reñemomba’epa hag̃ua ijyvykuéra rehe.
31Ha amoĩta pene retã rembe’y (apýra) Yguasu Pytã guive Filisteayguakuéra Yguasu peve, ha pe desiérto guive ysyry Éufrates peve; amoĩmbáta nde pópe umi tetãygua oikóva guive nde yvyrãme ha nde remosẽta ichupekuéra ne renonderãgui.
32Ani reñembopy’apeteĩ hendivekuéra, térã itupãnguéra ndive.
33Ne retãrãme ndoikoiva’erã hikuái, anítei ág̃a nemohembiapo vai ha repu’ã cherehe, remomba’eguasúvo itupãnguérape, ha upéicha oikokuaa ndeveg̃uarã ñepysãngaha ramo umi mba’e.
Currently Selected:
Éxodo 23: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
