Éxodo 31
31
Oñehenói Bezaleel ha Aholiábpe
1Ñanderuete oñe’ẽ Moiséspe, he’ívo:
2Ema’ẽke, Che ahenói héra rupi Bezaleélpe, Uri ra’y, ha kóva Hur ra’y, Juda tríbugui.
3Che amyenyhẽ ichupe che Pytu Porãitégui, iñarandu ha ikatupyry hag̃ua opaichagua ko’ã tembiapo ko’ãvape,
4ikatupyry ha oikuaa hag̃ua mba’éichapa oñemba’apova’erã óro rehe, pláta rehe ha brónce rehe.
5Oikytĩkuaa hag̃ua avei ita vera, ombojegua ha omboguapy hag̃ua ita vera ha ombojeguaka hag̃ua yvyra; ha’e ningo ikatupyry omba’apo hag̃ua opaichagua ko’ã tembiapópe.
6Ha eikuaa porãke Che amoĩ ipytyvõhára ramo Aholiab, Ahisamac ra’y, Dan tríbugui. Che amoarandu ichupekuéra ojapo porã hag̃ua opaite mba’e ha’eva’ekue guive ndéve:
7Pe óga jojohuha, pe karameg̃ua, pe karameg̃ua ñembotyha, opaite umi tembiporu ojeporúva pende Ruete rógape,
8pe mesa ha hembiporukuéra, pe tataindyenda ha hembiporukuéra, pe kuave’ẽmby renda ojehapy hag̃ua hi’ári mba’e ryakuã porã,
9pe kuave’ẽmby renda ojehapyhápe umi kuave’ẽmby ojehapypáva ha opaite hembiporukuéra reheve, pe yrenda ipykuéra reheve,
10umi ao pa’i Aaron ha ita’yrakuéra omondéta omba’apo hag̃ua, Ñanderuete rogaguasúpe,
11pe acéite omona hag̃ua, pe mba’e ryakuã porãva kuave’ẽmby rendápe g̃uarã; ha’ekuéra tojapopa hekoitépe ha’e haguéicha ndéve.
Pe pytu’uha ára
12Ñanderuete oñe’ẽ Moiséspe, ha he’i:
13Nde reñe’ẽta Israel ñemoñarenguérape, erévo: Añetehápe peẽ pemboareteva’erã che pytu’uha ára; péva ningo techaukaha chéve ha peẽme g̃uarã pene ñemoñarenguéra peve, peikuaa hag̃ua Cheha pende Ruete, penemboheko potĩva.
14Upévare pemboareteva’erã pe jepytu’uha ára, pe ára péva oñemboykégui pende Ruetépe g̃uarã; ha upe omboarete’ỹva pe ára, katuete omanova’erã; oimeraẽva omba’apóva pe ára pévape ojejukava’erã hetãyguakuéra apytégui.
15 Seis ára pemba’apova’erã ha pe ára 7-hápe pepytu’uva’erã, oñemboykégui pende Ruetépe g̃uarã; oime ramo omba’apóva pytu’uha árape, katuete omanova’erã.
16Israel ñemoñarenguéra tapiaite omboareteva’erã pe jepytu’uha ára, pende Ruete oñembopy’apeteĩgui Israelguakuéra ndive.
17Pe jepytu’u ára oikóta techaukaha ramo opaite ára peve Che ha Israel ñemoñarenguéra apytépe; pende Ruete ojapopágui 6 árape opaite mba’e oĩva guive yvagakuérape ha yvy apére, ha pe ára 7-hápe omboarete ha opytu’u hag̃ua.
Tóro ra’yrusu oroguiguáva
18Ha Ñanderuete ome’ẽ Moiséspe, oñe’ẽmba rire hendive pe Sinai cérrope, mokõi ita ipéva tembiapoukapy reheguáva, umi ita ipévare Ñanderuete voi ohaiva’ekue ikuãme umi 10 tembiapoukapy.
Currently Selected:
Éxodo 31: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
