Génesis 37
37
Jose ryke’ykuéra rembiapo vai
1Ha Jacóbo oiko itúva oiko haguépe, Canaan retãme.
2Ko’ã mba’e ojehu Jacóbo rekovépe: Jose oguereko ramo 17 áño, oñangareko ityke’yrakuéra ndive itúva ovecha ha kavara aty rehe ha pe mitãrusu oiko Bílha ha Sílpa membykuéra ndive, ãva itúva kuñakuéra; ha Jose omombe’u jepi itúvape ityke’ýra rembiapo vaikuerakue.
3Israel (Jacóbo) ohayhuve katu Josépe ambue ita’yrakuéragui, ha’e onace haguére ichupe ituja riréma; upévare ojapouka ichupe g̃uarã peteĩ póncho ipara porãva ha ijyváva.
4Ha ityke’yrakuéra ohechávo itúva ohayhuveha Josépe ichuguikuéragui, ndaija’evéi hikuái hese, ha ndaikatuvéi oñe’ẽ ichupe py’aguapýpe.
5Ha peteĩ árape Jose omombe’u ityke’yrakuérape umi mba’e ohechava’ekue iképe; ha ko’yteve ndaija’éi hese.
6Ha he’i ichupekuéra: Pehendu ko che képe ahechava’ekue:
7Péina ápe jajokua joañaína trígo apesã ñande kokuépe, ha pe apesã che ajokuáva opu’ã ha opyta ñembo’yhápe, ha umi apesã peẽ pejokuáva katu oĩmba joa ijerekue rehe ha oñakãity joa che mba’éva renondépe.
8Upérõ ityke’yrakuéra he’i ichupe: Nde piko ore sãmbyhyhararã térã reñembojarase orerehe. Ha ko’yteve katu ndaija’éi hese hikuái, iképe ohechava’ekue ha iñe’ẽngue he’iva’ekuére.
9Ha ohecha jevy ambue mba’e iképe, ha omombe’u avei ityke’yrakuérape he’ívo: Péina ápe ahecha jevýma ambue mba’e che képe, ha péina ápe pe kuarahy, pe jasy ha 11 jasytata oñakãity che renondépe.
10Péva omombe’u itúva ha ityke’yrakuérape, itúva katu oja’o Josépe, ha he’i: Mba’éiko he’ise ko’ã mba’e rehechava’ekue nde képe. Rojuva’erã piko roñakãity che, nde sy ha nde ryke’ykuéra ne renondépe.
11Upévare, ityke’yrakuéra ou ipy’arasy hendive, itúva katu ojepy’amongeta ko’ã mba’e rehe.
12Upéi, ityke’yrakuéra oho Siquémpe, oñangareko hag̃ua itúva ovechakuéra rehe.
13Ha Israel he’i Josépe: Nde ryke’ykuéra oiméne oñangareko che rymbakuéra rehe Siquem ñúme. Eju, che romondose hendapekuéra. Ha ha’e he’i ichupe: Ápe aĩ.
14Ha Israel he’i ichupe: Tereho ko’ág̃a, ha ehecha mba’éichapa oiko nde ryke’ykuéra ha mba’éichapa oiko che rymbakuéra, ha upéi eju emombe’u chéve. Ha omondo ichupe Hebron ñúgui Siquémpe.
15Ha peteĩ kuimba’e ojohu ichupe ojere oikóvo, okañýgui pe ñu rehe, ha upe kuimba’e oporandu ichupe: Mba’éiko reheka.
16Ha Jose he’i ichupe: Aheka che ryke’ykuérape; ajerure ndéve rehechauka hag̃ua chéve moõpa omongaru hikuái ore rymbakuéra.
17Ha upe kuimba’e he’i ichupe: Ohóma hikuái ko’águi; ha ahendu he’i ramoguare: Jaha Dotánpe. Upéramo Jose oho ityke’yrakuéra rapykuéri, ha ojohu ichupekuéra Dotánpe.
18Ha’ekuéra ohechávo ichupe mombyrymi guive, oñemoĩmbáma hikuái peteĩ ñe’ẽme ojuka hag̃ua ichupe.
19Ha he’i ojupe hikuái: Péina ápe ouhína pe ohecha porãva heta mba’e iképe.
20Peju jajuka ichupe ha jaity ichupe peteĩ pózope ha ja’éta: Mymba ñarõ ho’u hague ichupe; ha upéi jahecháta mba’épa oiko ike peguarégui.
21Ruben katu ohendúvo ko’ã mba’e, oguenohẽse ichupe ipoguikuéra ha he’i: Ani jajukátei ichupe.
22Ha Ruben he’ive ichupekuéra: Ani peñohẽtei tuguy; peity ichupe ko desiérto pegua pózope, anítei pejuka ichupe; péicha he’i osalvaségui ichupe, ha omondo jevy hag̃uáicha ichupe itúva rendápe.
23Ha Jose og̃uahẽvo ityke’yrakuéra rendápe, oipe’a hikuái ichugui ipóncho ipara porãva ha ijyváva.
24Upéi, oity hikuái ichupe peteĩ pózo hypávape.
25Ha oguapy hikuái okaru hag̃ua ha ojesaupívo ohecha peteĩ Ismaelgua aty ouvahína Galaádgui, icamellokuéra oguerúva mba’e ryakuã porã, bálsamo ha mírra, ogueraha hag̃ua Egípto retãme.
26Upéramo Juda he’i ityke’yrakuérape: Mba’épa ñaguenohẽta jajuka ramo ñande ryvýpe ha ñañomi ramo iñemanógui.
27Peju ha ñavende ichupe umi Ismaelguápe, ha ani ñamopu’ã hese ñande po; ha’e ñande ryvy, ñande ro’otee avei ha’e. Ha ityke’yrakuéra iñe’ẽrendu ichupe.
28Ha og̃uahẽvo umi Madiangua ñemuhára oguenohẽ hikuái Josépe pe pózogui ha ogueru ichupe ome’ẽ hag̃ua umi Ismaelguápe 20 pláta akytã pehẽngue rehe. Ha umía ogueraha Josépe Egípto retãme.
29Ha Ruben og̃uahẽ jevývo pe pózope ndojohuvéima Josére, upévare omondoro ijao.
30Ha oho jevy ityvyrakuéra rendápe, ha he’i: Pe mitãrusu ndaiporivéima, moõ piko che ahakuaa ko’ág̃a.
31Upéramo ojapyhy hikuái Jose póncho, ha ojuka hikuái peteĩ kavara ra’y, ha omopytãmba hikuái ipóncho pe kavarara’y ruguykuépe.
32Ha oguerahauka hikuái ipóncho para porãva itúvare, ha he’iuka hikuái: Kóva ningo rojohu; ndaha’éi piko kóva nde ra’y ponchokue.
33Ha’e voi oikuaa ha he’i: Che ra’y ponchokue ningo, oiméne peteĩ mymba ñarõ omondyryrýra’e ichupe.
34Upémaramo Jacóbo omondoro ijao, ha omoĩ ijehe ao vosápe, ha ombyasy ita’ýrape heta ára pukukue.
35Ha opu’ã ita’ýra ha itajyrakuéra maymáva omoangapyhy hag̃ua ichupe; ha’e katu noñemoangapyhyséi, ha he’i: Aguejyva’erã ao vosa reheve che ra’y rendápe, umi omanomava’ekue oĩháme. Ha itúva ojahe’ohína hese.
36Umi Madiangua ovende Josépe Potifárpe, Egípto retãme, ha’e faraon rembiguaiguasu, itahachi ruvicha.
Currently Selected:
Génesis 37: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
