Juan 13

Hesu ombojepyhéi hemimbo’e kuérape

1Pe páscua arete ára mboyvemi ningohína ha Hesu oikuaa og̃uahẽmaha hi’ára oho hag̃ua ko yvy árigui Ñanderuete rekohápe. Hesu ohayhuete haguéicha umi ojeroviaitévape ñepyrũ guive, peichaite Ha’e ohayhuetéta avei ichupekuéra ipaha peve.

2Ha ocena jave hikuái, aña omoingéma Júdas Iscarióte, Simon ra’y py’apýpe otraiciona hag̃ua Hesúpe.

3Ha Hesu oikuaávo Ñanderuete omoĩmba hague opaite mba’e ipópe, ha Ha’e ou hague Ñanderuetégui ha hendápe oho jevytamaha,

4opu’ã meságui, oipe’a ijao jo’aha, ha omoĩ peteĩ toálla iku’a rehe,

5omoĩ y peteĩ ña’ẽmbeguasúpe ha oñepyrũ ombojepyhéi hemimbo’ekuérape, ha omokã pe toállape omoĩva’ekue iku’áre.

6Ha og̃uahẽvo Simon Pédro rendápe, ha’e he’i Hesúpe: Che Jára, Nde piko chembojepyhéita.

7Ha Hesu ombohovái ichupe: Pédro, ko Che ajapóva ko’ág̃a nahesakã porãi ndéve, hesakã porãta uperire.

8Pédro katu he’i ichupe: Nde nachembojepyheimo’ãi máramo. Upérõ Hesu ombohovái ichupe: Che norombojepyhéirõ, mba’eve ndereguerekomo’ãvéima chendive.

9Upérõ Simon Pédro he’i ichupe: Che Jára, péicharõ ndachepy añói, ejohéi che akã ha che pokuéra avei.

10Hesu katu he’i ichupe: Pe ojahuramova’ekue ningo noikotevevẽima ojahu jevy, ojepyheintemava’erã katu. Peẽ penepotĩmbáma, ndaopavavéi ramojepe.

11Hesu ningo oikuaa porã voi pe otraicionátava ichupe, upévare he’i: Ndaopavavéi penepotĩ.

12Hesu ombojepyheipa rire ichupekuéra omonde jevy ijao, ha oguapy mesápe, ha oporandu ichupekuéra: Peikuaa piko mba’épa ajaporamóva penderehe.

13Peẽ ningo peje Che ha’eha pene mbo’ehára ha pende Jára, ha peje porã, Che ha’égui voi.

14Che pene mbo’ehára ha pende Jára, pombojepyhéi ramo, peẽ avei peñombojepyheiva’erã ojupekuéra.

15Che ahechaukáma peẽme mba’éichapa peẽ peikova’erã oñondive.

16Añetehápe, añetehápe, Che ha’e peẽme: Pe tembiguái ndaituichavéi Ijáragui, ha pe Oñembouva’ekue ndaituichavéi avei pe Ombouva’ekuégui.

17Peikuaa ramo ko mba’e kóva, pevy’aitepeína pejapo ramo avei.

18Penderehe ningo Che nañe’ẽi’aína, Che ningo aikuaa porã voi umi aiporavova’ekuépe, oikopa hag̃ua katu Ñanderuete kuatiañe’ẽme ojehaíva ojehu opaite ko’ã mba’e: Pe ho’úva chendive pe pan, omopu’ã ipy opyvoi hag̃ua cherehe, (Salmokuéra 41,9).

19Che ha’éma ko’ã mba’e ko’ãva peẽme ojehu mboyve, ha ojehu rire peikuaa hag̃ua Che ha’eha ha peẽ pejerovia hag̃ua cherehe.

20Añetehápe, añetehápe, ha’e peẽme: Upe omog̃uahẽva Che amondova’ekuépe, chéve chemog̃uahẽ. Ha ha’e omog̃uahẽ pe Chembouva’ekuépe.

21Hesu he’ipávo ko’ã mba’e, iñangekõi ipytu porãme, ha he’i: Añetehápe, añetehápe, ha’e peẽme: Peteĩva, pende apytégui, chetraicionáta.

22Hemimbo’ekuéra oma’ẽ joa ojuehe, ndoikuaáigui mávarehepa Hesu he’i ko mba’e kóva.

23Peteĩ hemimbo’e Hesu ohayhuetéva, oguapýva Hesu ykére,

24Simon Pédro oñembyesavi ichupe oporandu hag̃ua Hesúpe mavarehépa Ha’e he’iva’ekue ko mba’e kóva.

25Ha ha’e ojeko rire Hesu pyti’a rehe oporandu ichupe: Ore Jára, máva piko upéva.

26Ha Hesu ombohovái ichupe: Che amyakỹta ko pan pehẽnguemi, ha upe ame’ẽtavape, péva ha’e. Ha omyakỹ rire pe pan pehẽnguemi, Hesu ome’ẽ Júdas Iscarióte, Simon ra’ýpe.

27Ha Júdas ho’u rire pe pan pehẽnguemi, Satana oike Júdas py’apýpe. Upérõ Hesu he’i ichupe: Umi mba’e rejapótava, ejapo pya’e.

28Avave katu, oguapýva guive pe mesa jerekuévo ndoikuaái mba’érehepa Hesu he’i Júdaspe ko ñe’ẽ kóva.

29Ijapytépe oĩ umi oimo’ãva Júdas oñangarekógui pirapire rehe, Hesu he’i hague ichupe: Ejogua ñaikotevẽva pe areterãme g̃uarã, térã ome’ẽ hag̃ua pirapiremi imboriahúvape g̃uarã.

30Ha Júdas ho’upa rire pe pan pehẽnguemi, osẽ pya’ete, upérõ pyharéma.

31Ha Júdas osẽ rire, Hesu he’i: Ko’ág̃a oñembotuicha pe yvyarigua Ra’y, ha Ha’érupi Ñanderuetépe.

32Ñanderuete ombotuicha ramo Hesúpe, upérõ Ñanderuete voi oñembotuichava’erãavei Hesu rupi.

33Che ra’ykuéra ndachearemo’ãvéi penendive, peẽ cherekáta avei, Che ha’e haguéicha ambue Judayguakuérape: Che ahatahápe peẽ ndaikatúi peho chendive, ko ñe’ẽ kóva ambohasáta ko’ág̃a avei peẽme.

34Peteĩ tembiapoukapy pyahu ame’ẽ peẽme: Pejohayhúke Che pohayhu háicha, péicha pejohayhu avei peẽ.

35Upéicharamo opavave oikuaava’erã peẽ che remimbo’eha, pejohayhúrõ.

36Upérõ, Simon Pédro oporandu ichupe: Ore Jára, moõ piko rehóta. Hesu ombohovái ichupe: Che ahatahápe ndaikatúi nde chemoirũ ko’ág̃a, uperire katu nde avei chemoirũta.

37Simon Pédro katu he’i Hesúpe: Che Jára, mba’érehepa ko’ág̃a ndaikatúi che romoirũ, nderehehápe ame’ẽta che rekove jepe.

38Hesu katu ombohovái ichupe: Nde rekove piko cherehehápe reme’ẽse. Añetehápe, añetehápe, Che ha’e ndéve: Pe gállo osapukái mboyve, nde chembotovéta (chenegáta) mbohapy jevy.

Currently Selected:

Juan 13: ÑÑP2015

Highlight

Copy