Yuhana 21

Yesuw a pàt aba a gà asiŋ gà ɓəzla mazazama ŋgat təsəla

1I dəba mendze zaakwa ya asa ka, Yesuw a pàt aba a gà asiŋ gà ɓəzla mazazama ŋgat aà gùva duluv Tiberiyas. Araha, i tsik a kurum a bazlam ana a pàt a tar aba ya: 2A pat duwa, gà asiŋ gà ɓəzla mazazama ŋgat a riŋ mandza ŋa i təv ilik ŋa. Gà mburma ata ka, gà Simun Piyer nda gà Tumas, wele ana ŋgat mawusa ya, nda gà Nataniyel ana a dara i Kana, ika ahəɗ Galile ya, nda gà ɓəza Zebede, dite nda gà ɓəzla mazazama ŋgat ŋgiɗ sula asa. 3I fataya ka, Simun Piyer a gwaɗa a tar: «Iye ka, i de a a magàsà kilif.» Ta gwaɗar aaka: «Mər tekeɗe, mìi de a mbaŋa, tàkwa tserdze.» Ta mah ba i fataya, tə da. Tə daha, tə tsala a slə̀làh yam, tì sìweye a dər ika gər yam ndaàvəɗ, nda gà dukw magàsà kilif ŋa aà tar. Ama i huɗ həvəɗ ata ya ka, sìkwèɗ tàa ŋgat kilif ilik tsidze.

4Aləka mbulum a də̀v, are a da aaba ya ka, Yesuw a daha, dzeŋ a hitse aà gùva yam ata. Ama gà ɓəzla mazazama ŋgat ka, tàa sər ka, ŋgat tsa. 5Yesuw a gwaɗa a taraha: «Kàa gasum kilif ŋa ibam a, gà ɓəza gà.» Ta gwaɗar aakara: «Awaŋ, maa gəs ilik tsidze.» 6A gwaɗa a taraha asa: «A za tikwim ndzàràwà kurum aà gùva yam ana ndaka tsèke ahər mezime kurum a kwaŋ, ki geswimiŋa.» Ti tike a fata ka, aha ŋana ta waya aà meŋgile dərraha a təv tar a slə̀làh yam a ka, gwediŋ gwediŋ ta mba ahər tsa, aɗaba kilif ana maràhà ŋa iɗəm fèɗìɗe ya. 7Mala mazazama Yesuw ana mandərkwasla ŋgar hinne ya, a gwaɗa a Piyer: «Naha ka, BATSAH kwa ŋa.»

Piyer a tsaraka kataya tsara ka, a tike akaba petek ŋgar, aɗaba ŋgat ka, mandza ŋa kataya, petek ikəka tsa. I dəba ŋa ya, kàp a yàra ba aka gər yam a, a waya madàra a təv ŋgar a. 8Gà asiŋ gà ɓəzla mazazama Yesuw ŋgiɗ aaha ti zeha aɗəm a, ta pakara slə̀làh yam ata a təv ana Yesuw iɗəm a, nda gà ndzàràwà aaha madànà ŋa ihər, kilif ata maràhà ŋa iɗəm. Tar ka, tə za ba diriŋ aà gùva yam ata ya tsa ibam, a ge a ka, kapakà sik dərməka. 9Aləka tə tarra i slə̀làh yam ata ya tsara ka, ta ŋgat a akwa a riŋ məvə̀tà ŋa i liwit, kilif ikəka mandàzà ŋa, nda ɗaf a riŋ i bəɗ. 10Yesuw a gwaɗa a tar: «Ndzəkumara gà kilif aka kə̀ gasum kinehe ya zaakwa, ka ndazakwa.» 11Simun Piyer a daha, a tsəl a slə̀làh yam ata. A daha ka, a pə̀lara ihər à ndzàràwà ata nda kilif ŋa iɗəm ìdìp bàba ŋa ɗekɗek a. A ŋgəl dərra ihər a kətsah aà gùva yam ata ya zaakwa. Kilif ata iɗəm fit dze ka, dərməka nda dzik ə̀zləm gər a makər. Dite ndzàràwà ŋa aka nəs tsa seyiŋ, ku mege kilif ata aka be aɗəm hinne tekeɗe ya. 12I dəba ŋa ya, Yesuw a gwaɗa a tar: «Dumara, zəmakwa.» Ama ka, wura ilik ika magər gà ɓəzla mazazama ŋgat ata ya, aka mà aba aà arəv, aka gwaɗar ka, kər ana, weke tsidze. Aɗaba tə sər, ŋgat ka, Batsah tar ŋa. 13Yesuw a sìrìkeha a təv tar. A daha, a zla ɗaf ata, a sasa ikaba ya, a dzaya a tar. A ndzək kilif aaha, a dzaya a tar aaka asa mbaŋa.

14Taŋa ka, məpàtà aba məmakər ŋa ana Yesuw a pàtawa aba a gà ɓəzla mazazama ŋgat a, na à gər ana a mbəlara i məməta ya ya.

Gà Yesuw ta fàfəl nda Piyer

15Tə zəm aba ɗaf ata ya lele ka, Yesuw a gwaɗa a Simun Piyer: «Simun, kəla Yuhana, kà waya iye ana, kinehe, a za dər gà asiŋ gà dukw tserdze ya?» A gwaɗar aaka: «Haya, Batsah ga ŋa, kà sər ka, i waya kər.» Yesuw a gwaɗar: «Na kataya ka, ge gər a gà mburma gà ana ti zezem a iye kamala gà ɓəza gà təmaŋ a lele.» 16I dəba ŋa ya, a gwaɗa a Simun Piyer masula ŋa asa: «Simun, kəla Yuhana, kà waya iye ana, ndzer a?» A gwaɗar aaka: «Haya Batsah ga ŋa, kà sər ka, i waya kər ndzer.» Yesuw a gwaɗar: «Taŋa ka, kasla ɗa gà mburma gà ana ti zezem a iye, kamala gà təmaŋ a lele.» 17I dəba ŋa ya asa, a màr dər məmakər ŋa, a gwaɗar: «Simun, kəla Yuhana, wànà kà waya iye ana, ndzer kaɗəŋ a?» Bazlam Yesuw ata a màr dər məmakər ŋa, a gwaɗar: «Wànà kà waya iye yà, kà waya iye yà» ka, a tsəɓ a Piyer hinne. A gwaɗar: «Batsah ga ŋa, kà sər duwa tserdze. Dukw ana i gəzləŋ a tekeɗe ka, kà sər. Kà sər ka, i waya kər ndzer.» Yesuw a gwaɗar: «Ge gər a gà mburma gà ana ti zezem a iye kamala gà təmaŋ a lele. 18Iye ihər i gweɗek a nda ndzer, pàrsa iɗəm tsa: Akahər ana kər i gèlèɓè mba ya ka, kà dànawa ba ŋgewwè nda dukw dəmkul nda ahər yak, ki debe a a təv ana kà waya aà mede ya. Ama i təv ana kàa ge màndawal a ka, mìsle ŋgiɗ à gis a ahər yak a mbulum, à dèneyekehe a medène, dite a de a à kər a təv ana gəzləŋ yak a waya aà mede tsiye.» 19Yesuw a tsik bazlam ata nda təv Piyer kataya ka, a ɗifer à məməta ŋgar ana à mìt a, à zlibe a dər à Mbulum a. I dəba ŋa ya ka, Yesuw a gwaɗar: «Zezem iye.»

Gà Yesuw nda mala mazazama ŋgat ana

mandərkwasla ŋgar a

20Piyer a mbəɗ aba ka, aka ŋgat a mala mazazama Yesuw ŋgiɗ ana mandərkwasla ŋgar, a riŋ a zezem a tar a. Wele ŋa ka, wele ana a sìrìk a təv Yesuw akahər ana ti zim a ɗaf Paska, a gwaɗar ka: «Batsah mər ŋa, weke na a ta ge aà kər a ɗaf ndzer a» ya. 21Piyer a ŋgatar ka, a gwaɗa a Yesuw: «Dite Batsah gà ŋa, dukùla na a ta ge a ba nda wele aaha ya?» 22Yesuw a gwaɗar aaka: «Na i gwa kinehe ka, ma ndza aà bəra haa a pat ana Yàa màra ya ana, əla yak tiye? Kər ka, zezem iye pəra kwaŋ.» 23A mbəɗ ba aà zləm a gà ɓəzla mazazama ŋgat ka, ta gwa: «Mala mazazama Yesuw ata ka, à mìt a asa tsa aà biybiy.» Tsaatsa Yesuw a gwaɗa a Piyer ka, kataya tsa. A gwaɗar ka: «Na i gwa kinehe ka, ma ndza aà bəra haa a pat ana Yàa màra ya ana, i yak là tiye?»

24Tsaatsa mala mazazama Yesuw ata ti tsik ahər kataya ya ka, ŋgat na a ɗif à dukw ana Yesuw a ge tserdze, dite a wetse a wakita aaha ya. Ama kà sərakwa, dukw ana a tsik a ka, ndzer kaɗəŋ.

Mandəvandəv bazlam

25Yesuw aka ge gà dukw pampam hinne asa. Na mege ta wetse gà dukw ŋgar ana a ge ya fit, a gà wakita ilik ilik tserdze ka, sik sik sik təv a sler a tsa, na i dzala ya.

Currently Selected:

Yuhana 21: gnd

Highlight

Copy