Kula ɗa Njeka̰ykulaje 7
7
Tarje gə Etiyɛn pa
1 Buba njekapolo pa na: To gə be ja wa?
2Etiyɛn ila kəne na: Sisəy ngan ko̰-mje gə bɔ-sijee, oje tar gə nee! Logə ka sijee Abəraham isi ne dɔ nangə gə Mejopotami nam ɓa kar-ɛ aw ɗa ɓe Hara̰ le, Luba gə njerɔnduba kila rɔ-ɛ ar Abəraham, 3cibi n-pa n-ar-ɛ na: Ɔdə dɔ nangə gə lə-i gə horo njenujije gə lə-i ɓo aw mə ɓe gə m-a tɔji. 4Be ɓa n-ɔdə dɔ nangə gə lə nje gə Kaləde n-aw n-ɗa ɓe gə Hara̰. Lo-e gə nee le ɓa logə bɔb-ɛje uy ɗaa Luba un ɗəw ar-ɛ n-ɗe mə ɓe gə isije kəne ɓisine nee le. 5Dɔ kar-ɛ gə nee le Luba ar-ɛ nenduba kəne kara ang nəm dəbə lo ja njɛ̰ ang nəm tɔ. Ngaa Luba uwa dɔ gɔl ɓe gə mba kar-ɛ ngaɓa mba kar gəl kuji lə-a tor-e gə nəm, ngaa n-uji ngon ang. 6Luba pa to gə be na: Gəl kuji lə-i a kaw ɗa ɓe gə ɗangə, d-a kuwa ɓərə gə ngaɓa d-a kula kəm-e ndoo ɓal tɔl-tɔl sɔɔ. 7Ngaa Luba pa na: ꞌMa ja m-a gangə tar dɔ ɓe gə njekuwa-je ɓərə gə le, go-e gə ɗaa d-a ce-je ɓe ɓərə gə le mba ɗe polo-m lo gə nee gə. 8Cibi Luba riya sə-a kone ɗəw kunja bərə gə, be ɓa logə d-uji Ijagə ɗa ndɔ ji nay joo ɗaa Abəraham unja bər-e, Ijagə kara unja bərə Jakobo ngaɓa Jakobo kara unja bərə ngan-ɛ gə dɔg gə gir-je gə joo, gə to ka-sijee le.
9Ka-sijee le ꞌɗa mə gə Jəjəb, d-uwa ndog-e d-ar d-aw sə-a mə ɓe gə Ejipətə. Ngaa Luba nay sə-a. 10Ɗaa ɔr-ɛ dan neməko̰je gə tɔ̰y, ɗaa ar-ɛ mənuji gə kəm karə ar-ɛ n-ta kəm Parawo̰ gə to mbay gə Ejipətə, ar Parawo̰ unda dɔ ɓeko̰ gə Ejipətə gə dɔ kəy gə lə-a tɔ̰y.
11Ɓo bo oso mə ɓeko̰ gə Ejipətə ja tɔ̰y ngaɓa dɔ nangə gə Kana tɔ. Ne ur ti gə boy oso ngaɓa ka ka-sijee d-inga ne gə d-a kusa ang. 12Be ɓa Jakobo o tar nekusa gə to Ejipətə ɗaa ula ka-sijee gə dɔngɔr-ɛ kar d-aw ndogo. 13Logə ꞌtəl d-aw gɔl joo lə-a ɗaa Jəjəb tɔji rɔ-ɛ ar ngan ko̰-ɛje ꞌgərə ngaɓa mbay Parawo̰ gərə ne gəl Jəjəb. 14Be ɓa Jəjəb ula ɗe gə bɔ-ɛje Jakobo gə njeməkəyje lə-a tɔ̰y gə kɔr-je to dɔg gə siri gir-je gə mi. 15Jakobo aw Ejipətə ɗaa uy kəne ngaɓa ka ka-sijee kara d-uy nəm tɔ. 16D-odo nin-je d-aw ne d-aw dubu Sisɛm, lo gə Abəraham ndogo gə lar ji ngan lə Amɔr, gə to bɔ Sisɛm-je.
17Mba dɔ kar ne gə Luba uwa dɔ gɔl-ɛ gə naji ar Abəraham le aw asə ɗaa nje gə d-isi Ejipətə le kɔr-je to ɓəəl ngaɓa d-ɔsə dɔ mar-ɛ gə kede-kede, 18saar kar mbay gə ɗangə gə gərə Jəjəb ang ɗe o̰ ne ɓe gə Ejipətə. 19Mbay nee le unda buguru ɗa ne gəl kuji-si məyɛr cibi ɓa n-uwa ka ka-sijee gə singa mba kar ꞌmbadə nganje d-ar d-uy.
20Dɔ ndɔ-ɛ gə le ja d-uji Moyiji, gə May ngaw kəm Luba gə. D-od-e nay munda mə kəy gə lə bɔ-ɛje. 21Ngaɓa logə ko̰-ɛje uba ḭya̰ gə go ji-a ngaa ngon lə Parawo̰ gə jene aw un-e ɗaa od-e gə ngon-e. 22ꞌSiri Moyiji ɗəw kəm karə lə dəwje gə Ejipətə ja tɔ̰y, n-pa tar gə n-ɗa kula gə singa nəm.
23Logə ɓal-ɛ udu dɔg sɔɔ ja bugum ɗaa kəji nja ko ngan ko̰-ɛ gə to ngan Ijirayɛlje le uwa m-e. 24N-a lo n-o mar-ɛ kara gə d-aw ꞌɗ-ɛ məyɛr ɗaa n-ɗe n-ta dɔ-ɛ ngaɓa n-uwa dəw Ejipətə le n-unda n-ndal ne ba̰a̰ lə ye gə ɗ-ɛ məyɛr le. 25N-əji to gə Luba a kar ngan ko̰-ɛ kaji ɗəw gə lə ꞌne ngaa gərə ɓa ꞌgərə-je ang. 26Ndɔ gə ɗangə cibi dəwje joo horo nje gə kɛm gə d-aw kunda naa ɗaa n-sangə mba gɔl-je kar ɗɛgɛgɛ to horo-je gə ngaɓa təl n-pa na: Sisəy, ꞌtoje ngan ko̰ naa ngaa mba ɗi ɓa ꞌɗa-je naa məyɛr wa? 27Ngaa dəw gə nje ɗa njemar-ɛ məyɛr le təl ɔs-ɛ gə tar na: Na ɓa unda-i mbay gə nje gangə tar dɔ si gə wa? 28Njigi mba tɔl-m to gə ꞌtɔl ne dəw gə Ejipətə tagəne be tɔ wa? 29Gə go tar gə nee le Moyiji a̰y ne ngaɓa aw isi ne ɓe mba gə Madiya̰, gə uji nganje gə jingaw joo kəne.
30Ɓal dɔg sɔɔ nday go-e gə ɗaa anji kara ce dɔ-ɛ gə mə ndag lo gə dɔ ər gə Sinayi, mə pər gə o̰ mə ko bul gə. 31Logə Moyiji o ɗaa lo tar ig-e sɛl ɗaa ɗəm gə kede mba tən ko ngaa ndu Mbayɓe ce mə pər gə nee le ar-ɛ n-o na: 32To ꞌma Luba lə ka-sijee, Luba lə Abəraham, Luba lə Ijagə, gə Luba lə Jakobo. Moyiji isa ɗɛgə-ɗɛgə ɗaa asə mba tən ko ang. 33Mbayɓe pa ar-ɛ na: ꞌTɔr sabɔgɔ lə-i gɔl-i gə mba lo gə ar kəne nee le to dɔ nangə gə to gə losang-ɛ. 34M-o nekəmandoo gə ɗa dəwje nəm mə ɓe gə Ejipətə le gə maj-ɛ ja. M-o ndu suum lə-je ɗaa m-ɗisi mba ta-je. Ɗaa ɓisine ꞌɗe ar-m m-ula-i ɓe gə Ejipətə.
35Moyiji gə nee le ja ɓa ꞌmbad-ɛje ꞌpa-je ne tar na: Na ɓa unda-i mbay gə nje gangə tar dɔ-si gə wa? ꞌNe ja Luba ula gə mbay gə njekɔr-je kila-je tar ɗəw gə lə anji gə ce bus mə ko bul gə. 36ꞌNe ja n-ɗa neje dang-dang gə kəm dəw o ndɔ kara ang gə netɔjije ɓa n-ar ꞌce ne Ejipətə, gə nday ne mə babo kadə gə kasə gə, gə mə ndag lo gə ɓal dɔg sɔɔ. 37Moyiji gə nee le ja pa ar ngan Ijirayɛlje na: Luba a kɔr pajambərə gə to gə ꞌma be kara horo ngan ko̰-si gə. 38Logə ꞌmbo̰ naa mə ndag lo gə le, ꞌne nee ja anji pa sə-a tar dɔ ər gə Sinayi, ngaɓa gə ka ka-sijee, ꞌne gə n-ta tarje uji dɔ təbə n-ar-si. 39Ka ka-sijee njigi kila kuji dɔ-ɛ gə ang ngaa d-ɔs-ɛ ngərəng ɗaa mə-je təl to gə Ejipətə, 40ɗaa ꞌpa-je d-ar Aro̰ na: ꞌɗa magəje gə d-a nja no-si gə, mba Moyiji gə nee gə nje kar j-a ce dɔ nangə gə Ejipətə le j-a gərə ne gə ce dɔ-ɛ gə ang. 41Ɗaa dɔ kar-ɛ gə əng le d-uba-je ngon mangə ngaɓa d-un-je nepolo d-ar-je magəje le cibi ꞌtəl-je ꞌɗa-je rɔləl no ne gə sijee ja ꞌɗa gə ji-je le. 42Be ɓa Luba turu gir-e ar-je ngaɓa uba-je ḭya̰-je ar-je ꞌpolo nekundaje gə ndogo mə dara gə to to gə pajambərəje pa ne mə mbede na:
Ngan Ijirayɛlje, logə nja-je ɓal dɔg sɔɔ mə ndag lo gə le
Unjaje ne məsə ose unje nepolo gə ɗangə ar-mje wa?
43Odo-je kəy lo lə magə gə ꞌɓar-ɛ Molok
Ngaɓa ndɛ̰ndərɛ̰ndɛ̰ gə ndogo mə dara gə lə magə gə ꞌɓar-ɛ Roməpa.
To neje gə ꞌɗa-je mba ꞌpolo-je
Gəl-e gə nee ɓa ꞌma kara m-a kuwa-si ngon njekula kaw gə si əw nday ne Babilon ja tɔ.
44Ka-sijee le kəy lo tar naji ɓa to kar-jeje mə ndag lo gə. To gə dəw gə nje pa tar gə Moyiji pa le ɗaa Moyiji kara ɗa gə go nekɔji mar-ɛ gə o le ja tɔ. 45Logə je ka-sijee ꞌta ɗaa d-ar Josuye ɔr ne no-je aw ne gə je mə ɓe gə ꞌta ji gəl kujije gə Luba tɔbə-je no-je gə, nay gə kəne əng saar ce ne dɔ ndɔje gə lə Dabidi, 46gə inga mənuji lə Luba, dəji mba kar gəl kuji Jakobo inga lo ula dɔ-ɛ kəne. 47Ngaa Salomo ɓa ɗa kəy kara ar-ɛ.
48Be ja kara Nje kisi sam dara gə le a kisi mə kəy gə dəw ɗa gə ji-a ang, to to gə pajambərə pa nena:
49Dara to ngəndəng mbay lə-m,
Ngaɓa nangə to lo kum gɔl-m
Kəy gə ban ɓa a kundaje kar-mje wa? Mbayɓe pa be.
Ose lo gə ɗa ɓa a to lo kuwa kɔr lə-m wa?
50Se ji-m ꞌma ja ɓa ɗa neje nee tɔ̰y ang wa?
51Etiyɛn təl pa ar nje gə no ngɔ gangə tar le na: ꞌtoje dəwje gə nje dɔ ngangəje, mə-si kədərə nəm ɓa mbi-si kara uduje jigi dɔ tar gə lə Luba. Ngaɓa ilaje karəw gə Njil Njerɔsangə ja jaga-jaga to to gə ka ka-sijee le ja ɓi. 52Pajambərə lə Luba gə ɗa ɓa ka-sijee d-ula kəm-e ndoo ang wa? ꞌTɔlje nje gə d-ila mbərə ɗe lə dəw gə gadə-gadə kede nam ngaɓa sisəy gə ɓogəne ilaje tar dɔ-ɛ gə ɓa ar-je ꞌtɔl-ɛ le. 53Luba ar-si torondu ɗəw gə lə anji ngaa ilaje kuji kəne ang.
ꞌTila Etiyɛn ꞌtɔl-ɛ
54Logə d-o tar gə Etiyɛn pa le ɗaa mə-je o̰-je ar d-usa ngangə-je mɔr-mɔr dɔ-ɛ gə. 55Ngaa Njil Njerɔsangə ɗusu mə Etiyɛn ɗaa un kəm-e a lo gə dara, o rɔnduba lə Luba cibi o Jeju ar taar dɔ ji kɔl Luba gə. 56N-təl pa na: O-je, m-o kəm dara cɛ̰ ɗaa m-a lo m-o, Ngon lə dəw ar taar dɔ ji kɔl Luba gə. 57Dəwje tɔ̰y gə d-o tar gə nee le d-udu mbi-je jigi ngaɓa d-uru ꞌkuwi gə singa-je cibi ɓa d-ɔdə ꞌɓugu naa dɔ-ɛ gə tɔ̰y, 58d-ɔs-ɛ d-ila gir ɓe gə ɗaga ngaɓa ꞌtila-a gə kɔr ər. Njetar naj-ɛje le ꞌtɔr kubuje lə-je d-um ngira gɔl ngon basa̰ kara gə ri-a na Sɔl. 59Logə d-aw ɗɔ Etiyɛn gə kɔr ər ɗaa, dəji Luba na: Mbayɓe Jeju ꞌta njil-im. 60Cibi, n-um məkəji ngaɓa n-uru ꞌkuwi gə ndu-a gə boy ɓolong na: Mbayɓe, ila tar neɗa gə kṵra̰y nee le dɔ-je gə ang. Logə n-pa to gə be ɗaa n-uy tɔ.
Currently Selected:
Kula ɗa Njeka̰ykulaje 7: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
Kula ɗa Njeka̰ykulaje 7
7
Tarje gə Etiyɛn pa
1 Buba njekapolo pa na: To gə be ja wa?
2Etiyɛn ila kəne na: Sisəy ngan ko̰-mje gə bɔ-sijee, oje tar gə nee! Logə ka sijee Abəraham isi ne dɔ nangə gə Mejopotami nam ɓa kar-ɛ aw ɗa ɓe Hara̰ le, Luba gə njerɔnduba kila rɔ-ɛ ar Abəraham, 3cibi n-pa n-ar-ɛ na: Ɔdə dɔ nangə gə lə-i gə horo njenujije gə lə-i ɓo aw mə ɓe gə m-a tɔji. 4Be ɓa n-ɔdə dɔ nangə gə lə nje gə Kaləde n-aw n-ɗa ɓe gə Hara̰. Lo-e gə nee le ɓa logə bɔb-ɛje uy ɗaa Luba un ɗəw ar-ɛ n-ɗe mə ɓe gə isije kəne ɓisine nee le. 5Dɔ kar-ɛ gə nee le Luba ar-ɛ nenduba kəne kara ang nəm dəbə lo ja njɛ̰ ang nəm tɔ. Ngaa Luba uwa dɔ gɔl ɓe gə mba kar-ɛ ngaɓa mba kar gəl kuji lə-a tor-e gə nəm, ngaa n-uji ngon ang. 6Luba pa to gə be na: Gəl kuji lə-i a kaw ɗa ɓe gə ɗangə, d-a kuwa ɓərə gə ngaɓa d-a kula kəm-e ndoo ɓal tɔl-tɔl sɔɔ. 7Ngaa Luba pa na: ꞌMa ja m-a gangə tar dɔ ɓe gə njekuwa-je ɓərə gə le, go-e gə ɗaa d-a ce-je ɓe ɓərə gə le mba ɗe polo-m lo gə nee gə. 8Cibi Luba riya sə-a kone ɗəw kunja bərə gə, be ɓa logə d-uji Ijagə ɗa ndɔ ji nay joo ɗaa Abəraham unja bər-e, Ijagə kara unja bərə Jakobo ngaɓa Jakobo kara unja bərə ngan-ɛ gə dɔg gə gir-je gə joo, gə to ka-sijee le.
9Ka-sijee le ꞌɗa mə gə Jəjəb, d-uwa ndog-e d-ar d-aw sə-a mə ɓe gə Ejipətə. Ngaa Luba nay sə-a. 10Ɗaa ɔr-ɛ dan neməko̰je gə tɔ̰y, ɗaa ar-ɛ mənuji gə kəm karə ar-ɛ n-ta kəm Parawo̰ gə to mbay gə Ejipətə, ar Parawo̰ unda dɔ ɓeko̰ gə Ejipətə gə dɔ kəy gə lə-a tɔ̰y.
11Ɓo bo oso mə ɓeko̰ gə Ejipətə ja tɔ̰y ngaɓa dɔ nangə gə Kana tɔ. Ne ur ti gə boy oso ngaɓa ka ka-sijee d-inga ne gə d-a kusa ang. 12Be ɓa Jakobo o tar nekusa gə to Ejipətə ɗaa ula ka-sijee gə dɔngɔr-ɛ kar d-aw ndogo. 13Logə ꞌtəl d-aw gɔl joo lə-a ɗaa Jəjəb tɔji rɔ-ɛ ar ngan ko̰-ɛje ꞌgərə ngaɓa mbay Parawo̰ gərə ne gəl Jəjəb. 14Be ɓa Jəjəb ula ɗe gə bɔ-ɛje Jakobo gə njeməkəyje lə-a tɔ̰y gə kɔr-je to dɔg gə siri gir-je gə mi. 15Jakobo aw Ejipətə ɗaa uy kəne ngaɓa ka ka-sijee kara d-uy nəm tɔ. 16D-odo nin-je d-aw ne d-aw dubu Sisɛm, lo gə Abəraham ndogo gə lar ji ngan lə Amɔr, gə to bɔ Sisɛm-je.
17Mba dɔ kar ne gə Luba uwa dɔ gɔl-ɛ gə naji ar Abəraham le aw asə ɗaa nje gə d-isi Ejipətə le kɔr-je to ɓəəl ngaɓa d-ɔsə dɔ mar-ɛ gə kede-kede, 18saar kar mbay gə ɗangə gə gərə Jəjəb ang ɗe o̰ ne ɓe gə Ejipətə. 19Mbay nee le unda buguru ɗa ne gəl kuji-si məyɛr cibi ɓa n-uwa ka ka-sijee gə singa mba kar ꞌmbadə nganje d-ar d-uy.
20Dɔ ndɔ-ɛ gə le ja d-uji Moyiji, gə May ngaw kəm Luba gə. D-od-e nay munda mə kəy gə lə bɔ-ɛje. 21Ngaɓa logə ko̰-ɛje uba ḭya̰ gə go ji-a ngaa ngon lə Parawo̰ gə jene aw un-e ɗaa od-e gə ngon-e. 22ꞌSiri Moyiji ɗəw kəm karə lə dəwje gə Ejipətə ja tɔ̰y, n-pa tar gə n-ɗa kula gə singa nəm.
23Logə ɓal-ɛ udu dɔg sɔɔ ja bugum ɗaa kəji nja ko ngan ko̰-ɛ gə to ngan Ijirayɛlje le uwa m-e. 24N-a lo n-o mar-ɛ kara gə d-aw ꞌɗ-ɛ məyɛr ɗaa n-ɗe n-ta dɔ-ɛ ngaɓa n-uwa dəw Ejipətə le n-unda n-ndal ne ba̰a̰ lə ye gə ɗ-ɛ məyɛr le. 25N-əji to gə Luba a kar ngan ko̰-ɛ kaji ɗəw gə lə ꞌne ngaa gərə ɓa ꞌgərə-je ang. 26Ndɔ gə ɗangə cibi dəwje joo horo nje gə kɛm gə d-aw kunda naa ɗaa n-sangə mba gɔl-je kar ɗɛgɛgɛ to horo-je gə ngaɓa təl n-pa na: Sisəy, ꞌtoje ngan ko̰ naa ngaa mba ɗi ɓa ꞌɗa-je naa məyɛr wa? 27Ngaa dəw gə nje ɗa njemar-ɛ məyɛr le təl ɔs-ɛ gə tar na: Na ɓa unda-i mbay gə nje gangə tar dɔ si gə wa? 28Njigi mba tɔl-m to gə ꞌtɔl ne dəw gə Ejipətə tagəne be tɔ wa? 29Gə go tar gə nee le Moyiji a̰y ne ngaɓa aw isi ne ɓe mba gə Madiya̰, gə uji nganje gə jingaw joo kəne.
30Ɓal dɔg sɔɔ nday go-e gə ɗaa anji kara ce dɔ-ɛ gə mə ndag lo gə dɔ ər gə Sinayi, mə pər gə o̰ mə ko bul gə. 31Logə Moyiji o ɗaa lo tar ig-e sɛl ɗaa ɗəm gə kede mba tən ko ngaa ndu Mbayɓe ce mə pər gə nee le ar-ɛ n-o na: 32To ꞌma Luba lə ka-sijee, Luba lə Abəraham, Luba lə Ijagə, gə Luba lə Jakobo. Moyiji isa ɗɛgə-ɗɛgə ɗaa asə mba tən ko ang. 33Mbayɓe pa ar-ɛ na: ꞌTɔr sabɔgɔ lə-i gɔl-i gə mba lo gə ar kəne nee le to dɔ nangə gə to gə losang-ɛ. 34M-o nekəmandoo gə ɗa dəwje nəm mə ɓe gə Ejipətə le gə maj-ɛ ja. M-o ndu suum lə-je ɗaa m-ɗisi mba ta-je. Ɗaa ɓisine ꞌɗe ar-m m-ula-i ɓe gə Ejipətə.
35Moyiji gə nee le ja ɓa ꞌmbad-ɛje ꞌpa-je ne tar na: Na ɓa unda-i mbay gə nje gangə tar dɔ-si gə wa? ꞌNe ja Luba ula gə mbay gə njekɔr-je kila-je tar ɗəw gə lə anji gə ce bus mə ko bul gə. 36ꞌNe ja n-ɗa neje dang-dang gə kəm dəw o ndɔ kara ang gə netɔjije ɓa n-ar ꞌce ne Ejipətə, gə nday ne mə babo kadə gə kasə gə, gə mə ndag lo gə ɓal dɔg sɔɔ. 37Moyiji gə nee le ja pa ar ngan Ijirayɛlje na: Luba a kɔr pajambərə gə to gə ꞌma be kara horo ngan ko̰-si gə. 38Logə ꞌmbo̰ naa mə ndag lo gə le, ꞌne nee ja anji pa sə-a tar dɔ ər gə Sinayi, ngaɓa gə ka ka-sijee, ꞌne gə n-ta tarje uji dɔ təbə n-ar-si. 39Ka ka-sijee njigi kila kuji dɔ-ɛ gə ang ngaa d-ɔs-ɛ ngərəng ɗaa mə-je təl to gə Ejipətə, 40ɗaa ꞌpa-je d-ar Aro̰ na: ꞌɗa magəje gə d-a nja no-si gə, mba Moyiji gə nee gə nje kar j-a ce dɔ nangə gə Ejipətə le j-a gərə ne gə ce dɔ-ɛ gə ang. 41Ɗaa dɔ kar-ɛ gə əng le d-uba-je ngon mangə ngaɓa d-un-je nepolo d-ar-je magəje le cibi ꞌtəl-je ꞌɗa-je rɔləl no ne gə sijee ja ꞌɗa gə ji-je le. 42Be ɓa Luba turu gir-e ar-je ngaɓa uba-je ḭya̰-je ar-je ꞌpolo nekundaje gə ndogo mə dara gə to to gə pajambərəje pa ne mə mbede na:
Ngan Ijirayɛlje, logə nja-je ɓal dɔg sɔɔ mə ndag lo gə le
Unjaje ne məsə ose unje nepolo gə ɗangə ar-mje wa?
43Odo-je kəy lo lə magə gə ꞌɓar-ɛ Molok
Ngaɓa ndɛ̰ndərɛ̰ndɛ̰ gə ndogo mə dara gə lə magə gə ꞌɓar-ɛ Roməpa.
To neje gə ꞌɗa-je mba ꞌpolo-je
Gəl-e gə nee ɓa ꞌma kara m-a kuwa-si ngon njekula kaw gə si əw nday ne Babilon ja tɔ.
44Ka-sijee le kəy lo tar naji ɓa to kar-jeje mə ndag lo gə. To gə dəw gə nje pa tar gə Moyiji pa le ɗaa Moyiji kara ɗa gə go nekɔji mar-ɛ gə o le ja tɔ. 45Logə je ka-sijee ꞌta ɗaa d-ar Josuye ɔr ne no-je aw ne gə je mə ɓe gə ꞌta ji gəl kujije gə Luba tɔbə-je no-je gə, nay gə kəne əng saar ce ne dɔ ndɔje gə lə Dabidi, 46gə inga mənuji lə Luba, dəji mba kar gəl kuji Jakobo inga lo ula dɔ-ɛ kəne. 47Ngaa Salomo ɓa ɗa kəy kara ar-ɛ.
48Be ja kara Nje kisi sam dara gə le a kisi mə kəy gə dəw ɗa gə ji-a ang, to to gə pajambərə pa nena:
49Dara to ngəndəng mbay lə-m,
Ngaɓa nangə to lo kum gɔl-m
Kəy gə ban ɓa a kundaje kar-mje wa? Mbayɓe pa be.
Ose lo gə ɗa ɓa a to lo kuwa kɔr lə-m wa?
50Se ji-m ꞌma ja ɓa ɗa neje nee tɔ̰y ang wa?
51Etiyɛn təl pa ar nje gə no ngɔ gangə tar le na: ꞌtoje dəwje gə nje dɔ ngangəje, mə-si kədərə nəm ɓa mbi-si kara uduje jigi dɔ tar gə lə Luba. Ngaɓa ilaje karəw gə Njil Njerɔsangə ja jaga-jaga to to gə ka ka-sijee le ja ɓi. 52Pajambərə lə Luba gə ɗa ɓa ka-sijee d-ula kəm-e ndoo ang wa? ꞌTɔlje nje gə d-ila mbərə ɗe lə dəw gə gadə-gadə kede nam ngaɓa sisəy gə ɓogəne ilaje tar dɔ-ɛ gə ɓa ar-je ꞌtɔl-ɛ le. 53Luba ar-si torondu ɗəw gə lə anji ngaa ilaje kuji kəne ang.
ꞌTila Etiyɛn ꞌtɔl-ɛ
54Logə d-o tar gə Etiyɛn pa le ɗaa mə-je o̰-je ar d-usa ngangə-je mɔr-mɔr dɔ-ɛ gə. 55Ngaa Njil Njerɔsangə ɗusu mə Etiyɛn ɗaa un kəm-e a lo gə dara, o rɔnduba lə Luba cibi o Jeju ar taar dɔ ji kɔl Luba gə. 56N-təl pa na: O-je, m-o kəm dara cɛ̰ ɗaa m-a lo m-o, Ngon lə dəw ar taar dɔ ji kɔl Luba gə. 57Dəwje tɔ̰y gə d-o tar gə nee le d-udu mbi-je jigi ngaɓa d-uru ꞌkuwi gə singa-je cibi ɓa d-ɔdə ꞌɓugu naa dɔ-ɛ gə tɔ̰y, 58d-ɔs-ɛ d-ila gir ɓe gə ɗaga ngaɓa ꞌtila-a gə kɔr ər. Njetar naj-ɛje le ꞌtɔr kubuje lə-je d-um ngira gɔl ngon basa̰ kara gə ri-a na Sɔl. 59Logə d-aw ɗɔ Etiyɛn gə kɔr ər ɗaa, dəji Luba na: Mbayɓe Jeju ꞌta njil-im. 60Cibi, n-um məkəji ngaɓa n-uru ꞌkuwi gə ndu-a gə boy ɓolong na: Mbayɓe, ila tar neɗa gə kṵra̰y nee le dɔ-je gə ang. Logə n-pa to gə be ɗaa n-uy tɔ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved