Marəke 1

JEJU ƊA KULA DƆ NANGƏ GƏ GALILE

Mbərə kila lə Ja̰ Njeɗabatɛm

Mat 3.1-6; Lug 3.1-18

1 Tar gə May lə Kirisi Jeju, Ngon lə Luba le uma kud-e to gə be. 2To gə mbede lə pajambərə Ejay pa nena:

A o, m-a kula njekula lə-m no-i gə

Mba gɔl ɗew kar-i a nja kəne;

3 ꞌGɔlje ɗew lə Mbayɓe,

ꞌNdujije kila ɗəwje lə-a ar-je to rad.

Ye ɓa to ndu ꞌkuwi lə dəw gə ɓar ndag lo gə.

4Ja̰ ce ɗa batɛm ndag lo gə, ngaɓa ila mbərə batɛm kar turu kəji mba kar ɔr tar neɗa gə kṵra̰y dɔ dəwje gə. 5Dəwje gə dɔ nangə gə Jude tɔ̰y, ngaɓa dəw mə ɓeje gə Jerujalɛm ɗe rɔ-ɛ gə, ɗaa ꞌce gəl rɔ-je dɔ neɗa gə kṵra̰y gə lə-je gə ɗaga, ngaɓa Ja̰ ɗa-je batɛm mə babo gə Jurədɛ̰. 6Ja̰ ula kubu gə to bḭ jambal, gagəra tɔ ur-e to ndaar. ꞌKulije gə ubu təji ɓa to nekusa t-ɛ 7N-ila mbərə n-ar dewje na: Dəw gə aw ɗe go-m gə əng le to ɓəəl ya̰ unda-m ꞌma, m-asə ɗugu nangə mba tudu kula sabɔgɔ lə-a ang. 8ꞌMa, m-ɗa-si batɛm mə man gə, ngaa ꞌne le ɗaa n-a ɗa si batɛm lə Njil Njerɔsangə.

Ja̰ a ɗa Jeju batɛm. ꞌSu na Jeju

Mat 3.13-17; Lug 3.21-22; 4.1-13

9Dɔ ndɔ-ɛje gə əng le, Jeju ḭ Najarɛd, ngon ɓe gə Galile, ɗaa Ja̰ ɗ-ɛ batɛm mə babo gə Jurədɛ̰. 10Logə Jeju aw ce mə man gə gə ɗaga ɗaa, kəm dara cɛ̰ bərərə ar n-o Njil Luba ɗisi to to gə dər kuul be ɗe isi dɔ-ɛ gə. 11Cibi, ndu ḭ dara pa tar na: ꞋI to Ngon njigi lə-m, ngira rɔləl lə-m.

12Go-e gə ɗaa, Njil lə Luba ɔsə Jeju aw sə-a ndag lo gə. 13Jeju ɗa ndɔ dɔg sɔɔ ndag lo, ɗaa ꞌSu n-ɛ. N-ga̰ horo daje gə muu, ngaɓa anjije ɗe la sə-a.

Jeju ɓar mbawje sɔɔ mə ɓe gə Kapɛrənom

Mat 4.12-17; Lug 4.14-15

14Logə d-uwa Ja̰ d-ila kəy kula gə ɗaa, Jeju aw dɔ nangə gə Galile; n-aw n-ila mbərə Tar gə May lə Luba. 15N-pa na: Dɔ kar asə nam, ɓeko̰ lə Luba le nay əw ang baa. ꞌTuruje kəji lə-si, ɓo ꞌtaje kagə Tar gə May.

16Logə Jeju aw nja mbo kar babo gə Galile, ɗaa o Simo je gə ngon ko̰-ɛ Andəre gə d-aw d-ila bura man mba ꞌto mbawje. 17Jeju pa ar-je na: ꞌUwaje go-m, m-a turu-si kar a toje njendo̰ dəwje. 18Lo-e gə nee ja, ꞌtusu buraje lə-je d-ḭya̰ ɗaa d-uwa go Jeju. 19Logə Jeju ɔdə nja gə kede njɛ̰ ɗaa, o Jagə je gə Ja̰, ngan lə Jebede d-isi mə to gə d-aw gɔl kəm buraje. 20Lo-e gə nee ja, Jeju ɓar-je ɗaa, d-ḭya̰ bɔ-jeje Jebede gə ngan njekulaje lə-a mə to gə, d-uwa go Jeju.

Jeju aji dəwje bula

Lug 4.31-44

21Jeju je gə ngan njenendoje lə-a ꞌce mə ɓe gə Kapɛrənom. Logə Jeju andə mə kəy nendo gə, gə ndɔ kuwa kɔr ɗaa, tɔji dewje tar lə Luba. 22Netɔji lə-a uwa-je gə singa mba n-tɔji ne gə dəw gə inga singamongə ɓo to gə njekɔr gəl toronduje be ang. 23Dəw kara gə njil gə kṵra̰y ɗa ɓe m-e gə ga̰ kəy nendo gə le tɔ. Dəw le uru ꞌkuwi na: 24Jeju gə Najarɛd, ɗi ɓa ꞋI njigi wa? Se ꞌi ɗe mba tuji-si ngaa wa? M-gərə to gə ꞌto Njerɔsangə lə Luba. 25Jeju ndang-ɛ na: Udu ta-i ɓo ꞌce mə dəw gə nee le! 26Njil gə kṵra̰y le sore dəw le ar-ɛ isa pig-pig, ngaɓa ɔsə lo ce gə ꞌkuwi t-ɛ gə ɓolong. 27Dəwje tɔ̰y ja njil-je ce ar-je ꞌdəji naa tar gə yo gə nee na: Ne gə ban ɓa to gə be wa? To netɔji gə sigi gə gə singamong-ɛ wa? N-un ndu n-ar njilje gə kṵra̰y ja kara, d-ila kuji kəne səmə! 28To gə be ɓa, ri-a ɓar ula lo wur-wur gə tɔg-ɛ baa ja dɔ nangə gə Galile gə tɔ̰y.

29Logə Jeju ɔsə lo ce mə kəy nendo gə ɗaa, aw kəy lə Simo je gə Andəre, Jagə je gə Ja̰ d-aw gə je tɔ. 30Mum Simo-je gə jene to nangə, ngaɓa rɔ-ɛ ta pər lam-lam; ɗaa ꞌpa tar lə-a gə tɔg-ɛ baa d-ar Jeju. 31Jeju uwa ji-a uru-e taar, ɗaa rɔ-ɛ le təl kul mbɔ̰y, ar n-ar-je nekusa. 32Kar kumatagə, logə kar andə sɔlɔgə ɗaa, ꞌɗe gə njerɔtoje tɔ̰y ngaɓa nje gə njilje gə kṵra̰y ꞌɗa ɓe mə-je gə d-ar Jeju. 33Dəwje gə mə ɓe gə tɔ̰y ja ꞌmbo̰ naa ta ɗəw gə. 34Jeju aji dəwje bula gə rɔko̰je dang-dang ɗa-je, ngaɓa n-tɔbə njilje gə kṵra̰y bula ja ngaa n-ḭya̰ ɗəw n-ar ꞌpa tar ang mba ꞌgər-e som.

35Gə ndɔɔ-sḭ baa ja, logə lo to pi baa ɓi ja, Jeju ḭ taar ngaɓa ce aw ndag lo gə mba dəji Luba kəne. 36Simo je gə njeba-ɛje lə-a d-ɔdə ꞌsang-ɛ pḭ-pḭ, 37logə d-inga-a ɗaa, ꞌpa d-ar-ɛ na: Dəwje tɔ̰y ja d-aw sang-i. 38N-ila-je kəne na: J-awje gə ɗangə, gə ɓeje gə to mbɔr ye gə nee gə, mba kar m-aw m-ila mbərə tar lə Luba kəne tɔ ɓa na ye ja m-ce mb-ɛ. 39Be ɓa, n-ula dɔ nangə gə Galile wur-wur, n-ila mbərə tar lə Luba mə kəy nendoje gə ngaɓa n-tɔbə ne njilje gə kṵra̰y nəm tɔ.

Jeju aji njebənji

Mat 8.1-4; Lug 5.12-16

40Dəw gə njebənji kara ɗe inga Jeju, um məkəji-e no-ɛ gə, ngaɓa ɗ-ɛ kɔgərɔ na: To gə ɓo mə-i njigi nama ar rɔ-m arə ngadə. 41Jeju o kəmtondoo lə-a, ula ji-a ɔr ne rɔ-ɛ ngaɓa pa na: M-njigi ja, may kar rɔ-i arə ngadə! 42Ji naa gə nee ja, bənji le ɔr ndəs ar n-arə ngadə. 43Jeju un ndu gə lo-e gə əng ja gə mong-e ar-ɛ, 44ngaɓa pa ar-ɛ na: ꞌNgom ta-i ɓo ꞌpa ar dəw ang, ɗaa ɔdə aw ar njekapolo o-i, ngaɓa aw gə ne gə Moyiji un ndu kəne le, mba kar to tar naji ar-je ꞌgərə to gə rɔ-i arə ngadə. 45Ngaa, dəw nee le, logə ɔdə aw ɗaa, ila mbərə tar le gadəmagay gə ɓolong-ɓolong ngaɓa aw ne gə kede-kede, ar logə Jeju a kandə ne mə ɓe gə nda̰-nda̰ godo. Be ɓa Jeju ar gir ɓe gə ɗaga, ndag lo gə, d-ḭ gə loje dang-dang ꞌɗe d-inga-a.

Currently Selected:

Marəke 1: lap

Highlight

Copy