Marəke 8
8
Ɗa mbə kar bula gə njekum gə joo
Mat 15.32-39; Mrk 6.35-44
1Dɔ ndɔ-ɛje gə əng le, dəwje ꞌtəl mbo̰ naa ya̰ to gə ɗangə ja cibi, ngaɓa ne gə d-a kusa godo, Jeju ɓar ngan njenendoje lə-a ɗaa pa ar-je na: 2M-o kəmtondoo lə bula dəwje nee; mba ndɔ munda ja ngaa d-isi sə-m, ngaa d-inga ne d-usa ang. 3To gə ɓo m-arə-je d-aw ɓe mə-je ɓo baa nama, d-a kaw koso labə ɗəw boo, mba nje gə kɛm d-ḭ ɗəw əw ɓa ɗe nee. 4Ngan njenendoje lə-a d-ila-a kəne na: J-a ɗa ban ɓa j-a kinga mbə ndag lo gə nee kar d-usa d-ar mə-je ci wa? 5Jeju dəji-je na: Mbə kandə ɓa to ji-si gə əng wa? D-ila-a kəne na mbə siri. 6Be ɓa n-un ɗəw n-ar bula dəwje le d-isi nangə, ngaɓa n-odo mbə gə siri le n-tɔ ndu dɔ-ɛ gə, ngaɓa n-cɛdə dana n-ar ngan njenendoje lə-a mba kar ꞌkay ɗaa, ꞌkay dəw bulaje ja tɔ. 7Ngan kənjije ga̰ ji-je ɓəəl ja tɔ. Jeju tɔr ndu-e kəne ɗaa pa na ꞌkay ja tɔ. 8Dəwje d-usa ne d-ar mə-je ci, ɗaa d-odo dɔ dum-e karɛ siri. 9Dəwje nee le d-asə tɔl-tɔl dɔg lo sɔɔ; go-e ngaɓa Jeju ar-je d-aw ɓe ɓi. 10Waga baa ja tɔ ɗaa, Jeju je gə ngan njenendoje lə-a d-al to d-ɔdə d-aw dɔ nangə gə Daləmanuta.
Netɔji gə ḭ dara
Mat 16.1-12; Mat 12.38,39; Lug 11.16,29
11 Parijiyɛ̰je ꞌɗe, ɗaa d-un kudu ma̰y tar gə Jeju, ngaɓa mba n-ɛ ne ɗaa, ꞌdəji-e netɔji gə ḭ dara. 12Jeju ila m-e po̰o̰ ngaɓa pa na: Mba ɗi ɓa gəl kuji gə ɓogəne dəji netɔji wa? Tar gə tɔgərɔ ja, m-pa m-ar-si, netɔji gə kara ja gə d-a ɗa kar dəwje gə ɓogəne le godo. 13Be ɓa n-ḭya̰-je, n-ɔdə n-al to n-təl n-aw tura əər kara gə.
14Mə ngan njenendoje uy dɔ mbə gə. Mbə kara ja baa d-uwa ji-je gə d-isi ne mə to gə. 15Jeju ɓɛr mbi-je na: Aje rɔ-si dɔ guway kodo gə lə Parijiyɛ̰je gə dɔ guway kodo gə lə Erɔdə. 16Ngan njenendoje ꞌwɛdə tar horo naa gə mba mbə gə godo ji-je gə. 17Jeju gərə tar kəji lə-je ɗaa pa ar-je na: Mba ɗi ɓa ꞌwɛdə-je tar horo naa gə mba mbə gə godo ji-si gə le wa? Oje tar ɗaa unja-si ang ja dɔro ɓi wa? Ose ꞌgərəje m-e ang ja dɔro ɓi wa? Mə-si kədərə wa? 18Kəm-si ga̰ ja ngaa oje ne lo ang wa? Mbi-si ga̰ ja ngaa oje ne tar ang wa? Mə-si ole dɔ-ɛ gə ang ja saar wa? 19Logə m-cɛdə mbə gə mi m-ar jingawje tɔl-tɔl dɔg lo mi le, odoje kɛs-ɛ karɛ kandə wa? Ngan njenendoje d-ila kəne na: Dɔg gə gir-e gə joo. 20Ngaɓa logə m-cɛdə mbə siri m-ar jingawje tɔl-tɔl dɔg lo sɔɔ le, odoje bur-e karɛ kandə wa? D-ila-a kəne na: Siri. 21Ɗaa n-təl n-ila-je kəne na: Unja-si ang ja dɔro ɓi wa?
Nje kəm tɔ o lo
Mrk 10.46-52; Ja̰ 9.1-11
22Go-e gə ɗaa d-ɔdə d-aw Bɛdəsayida; ꞌɗe gə nje kəm tɔ d-ar Jeju, ngaɓa ꞌɗ-ɛ kɔgərɔ gə mba kar n-ɔr rɔ-ɛ. 23N-uwa ji nje kəm tɔ le, n-aw sə-a gir ɓe gə ɗaga; ngaɓa n-cibi yoro n-ɗa ne kəm-e, ɗaa n-ila ji-a dɔ-ɛ gə ngaɓa dəji-e na: O ne kara wa? 24Nje kəm tɔ le cɛ̰ kəm-e ɗaa pa na: M-o dəwje ja ngaa ꞌto to gə kagəje ɓa d-aw nja be. 25Jeju təl ila ji-a kəm-e gə to gə ɗangə; cibi, logə nje kəm tɔ le a lo jii ɗaa kəm-e unja ar-ɛ o neje tɔ̰y gə maj-ɛ. 26Be ɓa Jeju ɔs-ɛ ar-ɛ n-aw kəy lə-a, ngaɓa pa ar-ɛ na: Aw mə ɓe gə ang.
Piyɛr kila dɔ Jeju gə ɗaga
Mat 16.13-20; Lug 9.18-27
27Jeju ɔdə aw gə ngan njenendoje lə-a gə mə ngan ɓeje gə Sejare gə Pilibi, logə d-aw ɗəw boo ɗaa n-dəji-je na: Dəwje ꞌpa na m-to na ja wa? 28ꞌPa na: Dəwje na Ja̰ Njeɗabatɛm, nje gə kɛm na ꞌto Eli; nje gə ɗangə na ꞌto kara lə pajambərəje. 29N-təl dəji-je na: Ngaa ɗaa sisəy ja le, ꞌpaje na m-to na wa? Piyɛr ila-a kəne na: ꞌI ꞌto Kirisi. 30Jeju un ndu gə mong-e ar-je mba kar ꞌpa tar gə ɔji dɔ-ɛ d-ar dəw o ang.
31Ɗaa n-un kudu kila mbi-je gə to gə kəm kar ꞌma gə Ngon lə dəw, m-o ꞌməsərə ya̰. Buba ɓeje, buba njekapoloje je gə njekɔr gəl toronduje d-a mbadə-m, ngaɓa d-a tɔl-m ɗaa ndɔ gə njekum gə munda nama m-a təl ndol. 32N-pa tarje nee le təsərə ja. Be ɓa Piyɛr uwa Jeju ar sə-a nganga̰ ɗaa un kudu kḭ sə-a. 33Ngaa Jeju turu kəm-e, a ngan njenendoje lə-a, ɗaa ndangə Piyɛr ngaɓa pa ar-ɛ na: ꞌSu, ɔdə ta-m gə gə ɗangə, mba kəji tarje lə-i to kar Luba ang, ngaa to kar dəwje baa. 34Cibi, n-ɓar bula dəwje gə ngan njenendoje lə-a ɗaa n-pa n-ar-je na: To gə dəw gə njigi kuwa go-m nama, to may kar mbadə darɔ-ɛ, odo kagə dəsə lə-a, ɗaa uwa ne go-m. 35Dəw gə njigi ngom təbə lə-a nama a kila-a kɔrɔ, ngaa dəw gə ila təbə lə-a kɔrɔ mba-m ngaɓa mba Tar gə May nama a kaj-ɛ. 36To gə dəw inga neje tɔ̰y dɔ nangə nee ja, ngaa ila təbə lə-a kɔrɔ le, may lə-a to ɗi cibi wa? 37Ɗi ja ɓa dəw a kuwa mbəl ne təbə lə-a wa? 38Be ɓa, dəw gə ɗa rɔ kul mba-m ngaɓa gə mba tarje lə-m horo dəwje gə ɓogəne gə ꞌto nje ɓogo lo toje gə njeneɗaje gə kṵra̰y nee le, ꞌma gə Ngon lə dəw kara logə m-a ɗe dan rɔnduba gə lə Bɔ-mje naa gə kara gə anjije gə njerɔsangəje nama, m-a ɗa rɔ kul mba tar lə-a tɔ.
Currently Selected:
Marəke 8: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
