Marəke 9
9
1Jeju təl pa ar-je ja cibi na: Tɔgərɔ, m-pa m-ar-si, nje gə kɛm gə d-ar horo-si gə nee d-a kuy ang saar, d-a ko ɓeko̰ lə Luba gə a ɗe gə singamongə gə kəm-je.
Jeju mbəl rɔ-ɛ
Mat 17.1-13; Lug 9.28-36
2Ndɔ misa̰ go-e gə ɗaa, Jeju ɔr Piyɛr, gə Jagə je gə Ja̰, ɗaa aw gə je nganga̰ dɔ ər gə ndə̰w̰ gə kar-je baa. N-mbəl rɔ-ɛ kəm-je gə: 3Kubuje lə-a kara nda kələw-kələw, dəw gə asə togo kubu kar nda to gə be le godo nangə nee. 4Eli je gə Moyiji ꞌce d-ar d-o-je; ngaɓa ꞌto̰ tam gə Jeju. 5Piyɛr un tar pa ar Jeju na: Njenetɔji, to may ya̰ kar j-isije lo gə nee gə; j-a ɗa kəy lo munda, kara a to kar-i, kara a to kar Moyiji, ngaɓa kara a to kar Eli. 6Lo tar igi Piyɛr sɛl, mba ɓəəl unda-je bad gangə-je. 7Kil lə nji ɗe dəbə dɔ-je gə rigim, ɗaa ndu dəw ɓar m-e gə na: ꞌNe gə n-ar nee le n-to Ngon njigi lə-m, oje tar t-ɛ gə. 8Ngan njenendoje ꞌturu kəm-je gə tɔg-ɛ baa d-a lo gə yo gə nee, ɗaa d-o dəw kara ang, Jeju ja gə kar-ɛ baa ngaa ar gə je.
9Logə d-aw ɗisi gə nangə ɗaa, Jeju ɓɛr mbi-je kar ꞌpa tar neje gə d-o nee le d-ar dəw o ang, saar mba kar logə ꞌne gə Ngon lə dəw n-a ndol ne horo nje gə d-uy gə. 10Ngan njenendoje d-ila kuji dɔ tar gə nee le, ngaɓa ꞌma̰y tar horo naa gə na: Ndol horo nje gə d-uy gə cibi ngaa to ɗi ɓa nee wa?
11Ngan njenendoje ꞌdəji-e tar to gə be: Mba ɗi ɓa njekɔr gəl toronduje ꞌpa na: May kar Eli ɗe kede ɓa wa? 12Jeju ila-je kəne na: Eli a ɗe kede ja ɓa gə mba gɔl neje tɔ̰y. Ngaa mba ɗi cibi ɓa ꞌɗa mə mbede gə na ꞌne Ngon lə dəw n-a ko ko̰ ne ya̰ ngaɓa d-a dab-ɛ dasəra le wa? 13Ngaa m-pa m-ar-si to gə Eli ɗe ɗaa, ꞌɗa sə-a ne gə mə-je njigi, gə go tar gə mbede pa ɔji dɔ-ɛ.
Jeju aji ngon gə njil gə kṵra̰y ɗa ɓe m-e gə
Mat 17.14-21; Lug 9.37-43
14Logə ꞌɗe ꞌce dəb gə ngan njenendoje gə kɛm ɗaa, bula dəwje ꞌgugu dɔ-je, ngaɓa njekɔr gəl toronduje kara d-ar d-aw ma̰y gə je tar. 15Logə bula dəwje d-unda kəm-je ta̰y d-o ne Jeju ɗaa, lo tar igi-je sɛl, d-a̰y ngɔdə ꞌcila kəm-e mba kodo ji-je ko-e ne. 16Jeju dəji ngan njenendoje le tar na: ꞌMa̰yje gə je tar dɔ ɗi gə wa? 17Be ɓa dəw kara horo bula dəwje gə ila kəne na: Njenetɔji, m-ɗe gə ngon-m ɓə lə-i, ngon-m gə njil gə kṵra̰y ɗa ɓe m-e gə ɗaa ɔg-ɛ lo pa tar. 18Lo gə njil le uwa-a kəne ja nama, un-e ila-a nangə, ar hug-hug t-ɛ uwa-a ndor-ndor, ngaɓa n-usa ngang-ɛ mɔr-mɔr nəm ɗaa, n-təl tudu kurum. M-oso kul no ngan njenendoje gə lə-i kar ꞌtɔbə njil gə kṵra̰y le, ngaa d-asə ang. 19Jeju ila-je kəne na: ꞌToje dəwje gə nje məkədərəje, m-a ga̰ gə si saar ndɔ ɗa gə ja ɓi wa? M-a kore uru-m dɔ si gə saar ndɔ gə ɗa gə wa? ꞌƊe-je gə ngon le ar-mje. Ɗaa ꞌɗe sə-a d-ar-ɛ tɔ. 20Logə ngon le unda kəm-e ta̰y o Jeju ja ɗaa, njil le uwa-a gə singa; n-ce n-oso ngaɓa n-nduburu nangə, hug-hug t-ɛ uwa-a baa ndor-ndor. 21Jeju dəji bɔ-ɛje na: Un kud-e ndɔ gə ɗa gə wa? N-ila kəne na: Gə kas-ɛ baa ja; 22ngaɓa taar-taar ja njil le uwa-a ila-a pədə nəm ngaɓa ila-a dan man gə mba kar n-tuji gə tuji ja. Ngaa to gə ɓo ꞌi asə mba kaj-ɛ nama, ꞌla gə si, o kəmtondoo lə-si. 23Jeju ila-a kəne na: To gə ɓo m-asə a ꞌpa wa? Ne tɔ̰y dum dɔ dəw gə njetakagə ang. 24Be ɓa gə tɔg-ɛ baa ja bɔ ngon je le uru ꞌkuwi na: M-ta kag-i! Ɗe ta-m ta məkədərə gə lə-m! 25Logə Jeju o to gə bula dəwje d-a̰y ngɔdə dɔ-je gə ɓə lə-a, ɗaa ndangə njil gə kṵra̰y le na: Njil gə nje təl dəwje gɔdə gə mbigi, m-un ndu-m kar-i ꞌce mə ngon gə nee ngaɓa a təl kandə kəne gugu ang gə dɔbo̰ ja. 26Be ɓa n-ce gə ꞌkuwi ngaɓa n-uwa ngon le gə singa ɗaa, ngon le to rəgədə to gə dəw gə uy be, ar dəwje bula ja ꞌpa na n-uy ngaa. 27Ngaa Jeju ɗe uwa ji-a uru-e taar, ɗaa n-ar taar jagəra.
28Logə Jeju təl aw ɓe ɗaa, ngan njenendoje lə-a ꞌdəji-e tar gə kar-ɛ baa na: Mba ɗi ɓa sijee j-asə tɔbə ne njil gə nee ang wa? 29Jeju pa ar-je na: Gar njil gə to gə be le ꞌdəjije Luba ɓa a kasə mba tɔb-ɛje ɓi.
Jeju pa tar kuy lə-a gə tar ndol lə-a
Mat 17.22-23; Lug 9.43-48
30D-ɔdə lo-e gə əng ɗaa, ꞌnday gə ɗəw gə dɔ nangə gə Galile. Jeju njigi kar dəwje gərə ang. 31Mba n-aw n-tɔji ne ngan njenendoje ngaɓa n-pa n-ar-je na: ꞌMa gə Ngon lə dəw le, d-a kuwa-m kula-m ji dəwje gə, kar-je d-a tɔl-m, ndɔ munda go-e gə ɗaa, m-a təl ndol. 32Ngan njenendoje gərə mə tar gə nee le ang, ngaa ꞌɓəəl mba dəji-e.
Na ɓa to dəw gə bo wa?
Mat 18.1-5; Lug 9.46-48
33D-aw ꞌce Kapɛrənom. Logə d-aw d-isi kəy ɗaa, Jeju dəji-je na: Tar gə ɔji dɔ ɗi ɓa aw ma̰yje naa ɗəw boo əng wa? 34Ngaa d-isi ta-je munduru, mba logə d-aw ɗəw boo le, ꞌma̰y naa tar gə mba gərə se na ɓa to dəw gə bo horo-je gə wa? 35Be ɓa Jeju təl isi nangə ɗaa, ɓar nje gə dɔg gə gir-je gə joo le ngaɓa pa ar-je na: To gə dəw njigi kar no mar-ɛje gə kede nama, may kar udu bo̰-je tɔ̰y ngaɓa to ngon njekula lə-je tɔ̰y ɓa. 36Cibi n-un ngon gə njɛ̰ n-ila-a horo-je gə dana, n-un-e n-uwa-a kar-ɛ gə sudu, ngaɓa n-pa n-ar-je na: 37Dəw gə uwa ngon gə be kara horo nganje gə njɛ̰-njɛ̰ gə rɔ-ɛ gə gə ri-m nama, ꞌma ja nj-ɛ uwa-m gə rɔ-ɛ gə əng, ngaɓa dəw gə uwa-m gə rɔ-ɛ gə nama, ꞌma ɓa uwa-m gə rɔ-ɛ gə ang, ngaa dəw gə njekula-m ɓa nj-ɛ uwa-a gə rɔ-ɛ gə.
38Ja̰ pa ar Jeju na: Njenetɔji, j-o dəw kara gə aw gə si naa gə ang ja ngaa aw tɔbə njil gə kṵra̰y gə ri-i, ɗaa jɔg-ɛ mba n-aw gə si naa gə ang. 39Jeju na: Ɔg-ɛje ang, mba dəw gə a kun ri-m ɗa ne nemisi ngaɓa a təl pa tar lə-m kṵra̰y le godo. 40Mba dəw gə tɔsə kəm-si ang nama to nje kar-si ja. 41Ngaɓa dəw gə ɗa-ɗa gə ɔr man gə ngon ngo ar-si ay-je gə ri-m mba to gə ꞌtoje nje kar Kirisi nama, tar gə tɔgərɔ ja m-pa m-ar-si, ne dɔ ji lə-a a koso nangə ɓɛdə ang.
42Ngaa to gə ɓo dəw gə to jigi tuga koso lə ngon gə njɛ̰ kara horo nganje gə njɛ̰-njɛ̰ gə ꞌta kagə ꞌne nama, kar ꞌtɔ ər kusu ne gɔb-e gə, d-ila mə babo gə le to nokarə lə-a ja cibi. 43To gə ɓo ji-i ɓa to ɗəw koso lə-i dan neɗa gə kṵra̰y gə nama ꞌgangə ila kɔrɔ. Mba kaw dara gə ji-i kara may unda ꞌye gə kar ji-i ga̰ joo kɛm ja ɓa d-un-i d-ila-i kəm pər gə a kṵy ang gə. 44Lo gə dongəro̰ gə kəne uy ndɔ kara ang nəm ngaɓa pər gə kəne kara ṵy ndɔ kara ang nəm tɔ. 45To gə ɓo gɔl-i ɓa to ɗəw koso lə-i dan neɗa gə kṵra̰y gə nama ꞌgangə ila kɔrɔ. Mba kaw dara gə gɔl-i kara may unda ꞌye gə kar gɔl-i ga̰ joo kɛm ja ɓa d-un-i d-ila-i kəm pər gə a kṵy ang gə, 46lo gə dongəro̰ gə kəne uy ndɔ kara ang nəm ɓa pər gə kəne kara ṵy ndɔ kara ang nəm tɔ. 47To gə ɓo kəm-i to ɗəw koso dan neɗa gə kṵra̰y gə nama, ɔr-ɛ ila-a kɔrɔ. May ya̰ mba kandə ɓeko̰ gə lə Luba gə kəm-i kara unda kar kəm-i ga̰ joo kɛm ɓa d-un-i d-ila-i dan pər gə a kṵy ang gə. 48Lo gə dongəro̰ gə kəne uy ndɔ kara ang nəm ɓa pər gə kəne kara ṵy ndɔ kara ang nəm tɔ. 49Mba na-na kara d-a nunga kadə. 50Kadə to ne gə may ja; ngaa to gə kadə ləl ang le se d-a ɗa ban ɓa kar a təl ləl wa? Ar-je ta-si ləl to gə kadə be, ngaɓa ar-je ɗɛgɛgɛ to horo-si gə gə yo gə nee.
Currently Selected:
Marəke 9: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
