Roka 11

1Yama one‑ya Deoso‑ya Yeso hiyari hawa tohe, hika mai da‑daba owa ati yanane,

“Ayo, Deoso oda hiyarabone, oda tikanawatohi. I‑di Yowaho Batita hika mai da‑daba mai‑ya kanawatomari‑nima oda‑ya tikanawatohi.” Ati nematane.

2“Deoso‑ya dai hiyarabone, eya dai atiyahi.

‘Abi, amosabote amatini. Tiwati ihi oda nafi‑ka hidi kitabote tihawahaboneni.

3Mahi‑nima oda tefe‑ba daatiyahi.

4Oda ene towe tohamaro, oda ene manakone haatinamariyahi. Mai ihi manakone oda haanamaharirani. Tiwa ene yama amosara oda nokotoniriyahi.’ Dai atiyahi, Deoso‑ya dai hiyararo.” Yeso ati nematane.

5-6Mai‑ya hiyaramatase,

“Yama soki bai‑ya tiwa tabaro‑ya tika owa koboneya, tika yama kaba wadara, tika naki‑ka yobe‑ya tikaba awineni, yamata tikanikabonehe.

‘Naki, oka baho‑ba 3 kana daatinahi. Owa tabaro‑ya oka owa kobone, tefe‑ba wadarene.’ Dai ati naba awineni.

7Yobe doro‑ya ati yananeba awane,

‘Naki, madehe eyehe owinineni. Yobe barikawame yama daani awirini, hibayata baho owati daa nofarini.’ Tika naki ati neba awane.

8Tika naki tiwa‑ya nofi nafire, baho‑ya ati daa nofare, haatini dameya, yama tinofa‑ya tiwa‑ya daanebonane.” Yeso ati nematane.

9“Owati dai mitamakihi. Deoso‑ya yama dai haanahi, yama‑ya daanebonane. Deoso dai sibaniya, dai wasibonane. Deoso sawi‑kaya dai ati tokiya, nokobi‑ya dai haaniya, nokobi‑ya seekanebonane.

10Yama‑ya mai haana mai‑ka yama‑bone mai‑ya koboteni. Yama‑ya mai sibana, yama‑ya mai wasiteni. Nokobi‑ya mai haana, nokobi‑ya mai seekiteni.

11Aba‑ya tika dao haaneya, bataromaka daatiterani.

12Arakawa hife‑ya tika dao haaneya, yomasa daatiterani.

13Dai ene kote towe toha, dai‑ka ewe‑ka yama amosa‑bone dai daateni. Deoso ene amose hinama tohe, Deoso‑ka Doni dai‑ya sawibona dai ati na, Deoso dai haaniya, yama‑ya daanebonane, ai‑ka Abi neme‑ke toheri.” Yeso ati nematane.

Yeso tamine‑ya keyehe‑ya mai hirina

14Madi towe ai owa‑ya foye, madi towe ene maki ati wadamarematane. Yeso ati ene madi towe kanane, maki ati yananawahematane. Yeso ene mai dama mai awa, mai ya‑yaina, mai atibodi yama‑ya kadikameteni.

15Mai one ya‑yaira,

“Madi towe mai‑ka hidi i‑di Beosibo ati ene mai kananineni.” Mai ati nameteni.

16“Yeso, Deoso‑ka tihamone tina, neme‑ya tiwa ene kitabote oda awaboneni.” Mai one ati nameteni, Yeso‑ya mai weenabonehe.

17Mai atibodi ati‑ya Yeso wato, mai‑ya hiyare,

“Hidi webote hika mai dama mai ibi bisiniya, kiti fawanebonane. Tabora ohare‑ka mai ibi toka toweya, mai nafi awimaraboneni.

18Beosibo ene madi towe kananane dai ati na, i‑di Satanasi‑ka mai ibi toka towe‑mani, Satanasi kiti fawane nane.

19Beosibo ene madi towe mai kana·onihemone dai ati na, dai one madi towe mai‑ya mai kanana, ebeni‑ke ene tohati? Satanasi ene amane dai ati niya, dai one dai‑ya mai weenaboneni.

20Deoso ati ene madi towe mai kana·onihe, Deoso ai nafi‑ka hidi kitabote tohawahebona dai‑ya sawine.

21Owati dai mitahi. Ai owa kite yima‑ya damane, hini tabaro‑ya wai, yehe honene mai hiyabaterene.

22Ai owa kiti ba‑basi ne kamaki, yobe hidi‑ya wateya, hika yima‑ya kayafe, bora kita‑ya tanikanisa ne, fai yehe honene‑ya mai one‑ya daanane.

23Owa‑ya mai nofara owa‑ya mai kakoteni. Owa‑ya mai ati sawira,

‘Yeso‑ya dai sawiriyahi.’ Mai ati teni.

24Madi towe ai owa‑ya sawimari, tokawahe, tabora one‑ya sibane, tabora one‑ya wasi awire, hini‑ya hiyare,

‘Hibati‑ya osawimaro‑kaya wini·onamaboneni.’ Madi towe ati ne,

25fa‑fai‑ya kamatase, hibati‑ya sawimari‑ke doro amosawame‑ya awe,

26tokomatase, hika mai one 7 kana mai‑ya himanane, mai towe ba‑basi naro. Hini sa‑sawi‑kaya mai nafi sawiwahaboneni. Ai owa kiyani nafiwahebonane.” Yeso ati nematane.

27Yeso hiyareya, fana one ati yanana,

“Tika ami ya‑yainaba awini.” Ati nameteni.

28“Okomi ya‑yaini bi‑bidi nineni. Deoso ati‑ya mai mita, ati mai hikadabe, mai ya‑yaini nafineni.” Yeso ati nematane.

29Yeso‑ya mai dama mai naho‑ya mai one kamake, mai dama mai‑ya Yeso hiyare,

“Towe dai amani. Deoso ati dai tokadabara, hiniya owa ene kitabote dai awabone dai ati na, dai ati‑nima oteraboneni. Yama dai awabone dai ati na, i‑di Yona ene‑mata‑nima yama na dai awabisaboneni.

30 # 11:30 Hibati‑ya aba nabadi‑ya Yona amoni 3 kane, makobote aba saahinamematamonane. Fara‑nima, Yeso abe, amoni 3 kane‑ya abo foyematamonane, yati hodi‑ya. Yona ene‑nima owa ene naboneni. Dai‑ka Ayo neme‑ke ama·oni. Owa ene dai awawahaboneni.

Mai ihi towe manakone nafebone

31Ai nafi ene‑ya Deoso kadikeya, bato‑kaya mai wi‑wina‑mete mai‑ka hidi fana dai‑ya weenaboneni. Hibati‑ya Saromaho hasineya, yama yaki‑ya kakemeteni, Saromaho ati‑ya mitabonehe. Saromaho yama‑ya wato bi‑bidi nematane. Dai‑ya da‑daba yama‑ya watobisane.

32Ai nafi ene‑ya Deoso kadikeya, Ninifa‑ya mai wi‑wina‑mete dai‑ya mai weenaboneni, owati‑ya dai nofararo. Fara Ninifa‑ya mai wi‑wina i‑di Yona ati‑ya mai mita, mai ihi‑maro‑nima mai ihi namarameteni. Yona kiti bi‑bidi nemata, dai‑ya da‑daba kiti nafibisane. Owa ene dai nofara, dai ene towe manakone nafeboneni.

33Nabarina ai botokana, wahi ai barikiterani. Nabarina ai kanawaarikosateni, mai kiiyomama yama‑ya mai awabonehe.

34 # 11:34 Ai atibodi tamine amani. Yama towe ai atibodi nokotonihe, Deoso ati ai watoraboneni. Ai nokobodi ene yama ai awateni. Dai nokobodi amosa, yama nafi‑ya dai awateni. Dai nokobodi towe toha, yama‑ya dai awaterani.

35Yama bara‑ya dai nokotoniriyahi, yama bara‑ya dai nokotonihe, dai noko towe toha‑nima dai nineni. Deoso ati dai watoraboneni.

36Yama amosa hinama dai nokotoniya, yama bara dai nokotoni awiriya, yama tehe‑ya dai sawe‑nima dai na, yama dai wataboneni.” Yeso ati nematane.

Fariseo mai tamine

37Yeso hiyari hawa toheya, fariseo mai‑ka owa Yeso‑ya himanematane, fai tabaro‑ya mai tafabonehe. Yeso tokomaki, itarimatane, tafebonaha.

38Yeso yehe‑ya sorokarire, tafebona‑ya fariseo awe, atibodi yama‑ya kadikematane.

39Yeso ati yanane,

“Fariseo dai toha, keneko mese dai sorona, mai noki‑ya dai ene amosa, hiniya dai atibodi towebisa amani. Yama dai bote, dai ene towe damateni.

40Yama‑ya dai watotera awineni. Deoso ai mese‑ya wamane, ai atibodi‑ya wamanahari nematane.

41Dai atibodi amosawamahi. Dai atibodi ati ene mai‑ka yama kaba‑ba dai daaniya, yama sibareni. Dai‑ka yama wiye nafi amosa‑nima dai teboneni.” Yeso ati nematane.

42Ka! Fariseo dai toha, dai ene manakone wadani. Dai‑ka yamata ke‑ketehe‑ya dai kadika, kote Deoso‑ya dai daateni. Deoso ati kote dai tokadabara,

‘Mai ihi‑nima mai manakone daatinahi. Deoso tinofiyahi.’ Deoso ati nematane.

Ati dai tokadabaterene. Dai ene amosa, Deoso dai nofa dai ni‑ya, makobote Deoso‑ka yama‑bone dai daaniya, dai sibarineni.

43Ka! Fariseo dai toha, dai ene manakone wadani. Deoso‑ya mai hi‑hiyara‑ke yobe‑ya dai sawe, kadera amosa‑ya dai nahoteni. Dai‑ya mai kahiyarabone, mai‑ya dai nokotoniteni.

44Ka! Mai‑ya dai kanawato amosara, yama‑ya mai watora ihi mai ihi towe tohama, hini dai ene amani. Dai ene manakone wadani.” Yeso ati nematane.

45Mose‑ka yama hani ati‑ya mai ka‑kanawato mai‑ka owa ati yanane,

“Ayo, haa‑nima tiwati riyahi. Haa‑nima tiwati niya, oda‑ya weetinaharineni.” Ati nematane.

46“Ka! Mose‑ka yama hani ati‑ya dai ka‑kanawato dai toha, dai ene manakone wadaharineni. Yamasi kiba, kanaha‑ya dai daateni, mai weyehinabonehe. Dai‑ta yama‑ya dai weyeterani. Fara‑nima dai ati damiya, mai tokadababone dai ati na, hini dai ati ohare‑ya dai tokadabi awirani.

47Ka! Dai ene manakone wadani. Deoso ati‑ya mai mi‑mita‑mete mai tame‑ka yobe dai wamateni. Deoso ati‑ya mai mi‑mita‑mete mai‑ya dai‑ka idi mai nanahabameteni.

48Dai‑ka idi mai ihi‑nima dai ene nineni. Dai‑ka idi mai mai hinahabamete mai tame‑ka yobe‑ya dai wamateni.

49Deoso yama‑ya watone. Hibati‑ya dai tamine‑ya hiyare,

‘Owati‑ya mai mi‑mita mai toha, oka yo‑yose mai toha, mai na, mai oyoseboneni. Mai one‑ya mai nanahaba, mai one‑ya mai kananihi naboneni.’ Deoso ati nematane.

50Deoso ati‑ya mai mi‑mita‑mete mai‑ya mai nanahabamete, mai ihi yorotokana manakone‑nima dai ene manakone naboneni.

51Abeo‑ya nanahabi bahe, mai one dami‑ya mai nanahabamake, i‑di Sakariya‑ya nanahabamake, Deoso‑ka yobe‑ya i‑di Sakariya‑ya mai nanahabamakemeteni. Owati dai mitahi. Mai ihi yorotokana manakone‑nima dai ene manakone naboneni.

52Ka! Mose‑ka yama hani ati‑ya dai ka‑kanawato dai toha, dai ene manakone wadani. Nokobi ai barikana‑nima Deoso ati yokana dai barikana, mai watorabonehe. Deoso‑ka yama dai watora, mai one yama‑ya watabone mai ati na, mai‑ya dai ati barinineni.” Yeso ati nematane.

53Yeso hiyari hawa toheya, toke, Mose‑ka yama hani ati‑ya mai ka‑kamina mai toha, fariseo mai toha, mai na, mai ati yawa, Yeso‑ya mai weenabone, Yeso‑ya mai haanamarimanameteni.

54“Yeso ati tosawariya, ati oda mitiya, ati oda kamineya, Yeso oda wataboneni.” Mai atibodi ati nameteni.

Currently Selected:

Roka 11: jaaNT

Highlight

Copy