Marcos 9

1Dewara mawũãsia: Mʉã wãrĩnu marãã jaraya, ʉ̃kʉrʉ nama kꞌobꞌebara beudꞌai nawedꞌa ũdudꞌaya Daizezeta Nokꞌodꞌebema zesita zarea bara.

Jesús awuaradꞌa

(Mateo 17:1-13; Lucas 9:28-36)

2Maʉ̃ tẽã ewari seis babʉrʉdꞌera Jesúsbara edesia Pedrota, Jacobota, Juanta, maʉ̃rãta ãzhi dobꞌa jʉre edesia kꞌatuma ʉ̃tʉ nʉmʉĩnu. Mama awuarasia ãzhi kĩrãbita. 3Izhi wuara totroa ʉ̃nasia, druadꞌera wua tõbaribara mawũã totroa o bꞌe ẽã. 4Maʉ̃nerã ũdusidꞌa Moiséta, Elíata, bedꞌea kꞌopanasia Jesús bawara. 5Mawũẽ Pedrobara Jesúa mawũãsia: Miã Ũrãgꞌabari, biga dazhirã nama kꞌobꞌera, mawũẽ de kꞌãĩdeta ũbea odꞌaya abꞌa bʉita, abꞌa Moiséita, abꞌa Elíaita.

6Pedrobara sãwũãta kꞌawua ẽãta mawũã bedꞌeasia ãzhira pera kꞌobꞌeba. 7Maʉ̃ne ãzhi ʉ̃rʉ̃ zesia jãrãrãta, maʉ̃ jãrãrãneba Daizezeta bedꞌeabʉrʉta mawũãsia: Naʉ̃ mʉ Warra mʉãrã kʉãgꞌa, izhi bedꞌeara ũrĩũdua. 8Audre ẽãne akʉbʉdadꞌera ãzhi bawara miõta ũdudꞌa ẽbasia, awuarabʉrʉ ũdusidꞌa Jesústa abꞌabai.

9Kꞌatumaneba yedꞌa ãzhi urudꞌe Jesúsbara jarasia ãzha ũdubʉdara miõã jaradꞌa ẽbamarẽã, izhi Beubari Bape bꞌʉta beudꞌata piradrʉyeedꞌa. 10Mawũẽ maʉ̃ bedꞌeara ãzhi bitabai kꞌawua duanebʉdata bedꞌea duanesia sãwũã mawũã beudꞌata piradrʉita. 11Mawũẽ widꞌi mawũãsidꞌa: ¿Ũrãgꞌa Moisédꞌe jarabadabara kꞌãrẽã jarabada zhãrã Ẽdrʉbiita zei nawedꞌa Elíata naara zeita?

12Mawũãnaĩ Jesúsbara panaʉ̃ mawũãsia: Elíara wãrĩnu naara zeya, mobe ne jõma araa oya. ¿Zhi bꞌʉma ẽka mʉ Beubari Bape bꞌʉra biodꞌe zuburiai barata, seribidꞌa ẽbaita? 13Mawũãmina mʉã marãã jaraya, Elíara ya zesia, maʉ̃ta ãzha krĩñane osidꞌa izhi sãwũã odꞌaita zhi bꞌʉmane.

Jesúsba bꞌebidꞌa kũrã wawa bꞌʉta

(Mateo 17:14-21; Lucas 9:37-43)

14Kꞌatumaneba Pedrota, Jacobota, Juanta Jesús bawara zebʉdata dewaraurã izha jʉrʉkuadꞌata kꞌobꞌe maẽ zebʉrʉdꞌera, ũdusia maʉ̃rã kꞌabanaba bʉredrʉ nʉmʉta, ũrãgꞌa Moisédꞌe jarabadata bĩ ẽã bedꞌea kꞌobꞌeasia ãzhi bawara. 15Zhãrã jõmaʉ̃ba ũdudꞌai bia akʉdrua izhima wãẽbadꞌape: ¡Kʉa! asidꞌa.

16Mawũẽ izhara widꞌi mawũãsia: ¿Marã kꞌãrẽta jara bĩ ẽã bedꞌea kꞌobꞌe ãzhi bawara?

17Mawũãĩ kꞌabananebemaba abꞌaʉba panaʉ̃ mawũãsia: Miã Ũrãgꞌabari, mʉãrã mʉ warrata bʉma wesia, jaita abꞌʉba bedꞌeabi ẽã. 18Maʉ̃ jaibara baridu maẽ jidabʉrʉdꞌera bꞌaebi bꞌʉa, ibꞌa kꞌopepeabaria, kidꞌa kꞌõseseabaria, ʉ̃bꞌʉa tabꞌebaria. Mʉãrã bʉa jʉrʉkuadꞌaa jarasia ãĩ jʉretadꞌamarẽã, mawũãmina bꞌedꞌa ẽbasia.

19Mawũãĩ Jesúsbara panaʉ̃ mawũãsia: ¡Marã soidꞌu duanu ẽã! ¿Mʉrã sõmbeedꞌa marã bawara bꞌaipe? ¿Mʉãrã sõmbeedꞌa zrogꞌa nʉmaĩpe? Kũrã yaya weudua.

20Mawũãĩ webʉdadꞌera jaiba Jesústa ũdui kũrã abꞌaedꞌa wawabibʉrʉba egorodꞌe bꞌaepe burabꞌarisia ibꞌa kꞌopepea. 21Jesúsbara zhi zezea widꞌi mawũãsia: ¿Dããrã babʉrʉka kꞌãwũã bꞌʉra?

Mawũãĩ izhara mawũãsia: Wĩña wedꞌauba kꞌãwũã bꞌʉa. 22Jaibara bꞌaebima bio bꞌaebi bꞌʉa tebʉdꞌe o doedꞌa, aramaʉ̃ne beaita. Mawũãmina bʉa kꞌãrẽ oibʉrʉ daira sozuburiape kꞌarebarua.

23Mawũãĩ Jesúsbara mawũãsia: Soidꞌu kꞌobꞌa bꞌeibʉrʉ soidꞌu kꞌobꞌʉitara jõma borekea.

24Mawũãĩ aramaʉ̃ta kũrã zezebara nemi jĩgua mawũãsia: Mʉrã soidꞌu kꞌobꞌʉa. Mʉrã wuaabʉrʉ soidꞌu kꞌobꞌaita kꞌarebarua.

25Kꞌabana bʉredrʉbʉdata Jesúsba ũdui jaira kẽãbʉrʉta mawũãsia: Jai zhãrã bedꞌeabi ẽãrã ne ũrĩbi ẽãrã mʉã bʉaa jaraya, kꞌãʉ̃nebara ãĩ wãrũã, mobe wueta edꞌa wãrãrũã kꞌãʉ̃ne.

26Mawũãĩ jaira bꞌiape kũrã abꞌaedꞌa wawabipe ãĩ wãsia. Mawũẽ kũrã beudꞌa kĩrãkꞌa tabꞌebʉrʉba biobara beusia asidꞌa.

27Mawũãmina Jesúsbara juwuadꞌe jidape jiraedabʉrʉba piradrʉsia. 28Jesús deidꞌu zebʉrʉdꞌera izha jʉrʉkuadꞌabara dobꞌaʉa widꞌi mawũãsidꞌa: ¿Daibara kꞌãrẽneba ãĩ jʉreta bꞌedꞌa ẽbasi?

29Mawũãnaĩ Jesúsbara mawũãsia: Jai kꞌãwũã bꞌʉra arakꞌãwũãrã ãĩ wã ẽã, awuarabʉrʉ ãĩ wã bꞌʉa nekꞌo ẽã zhiwidꞌi.

Jesúsba wakusa jaradꞌa izhi beadꞌaita

(Mateo 17:22-23; Lucas 9:44-45)

30Mamaʉ̃ba wãbʉrʉdꞌera berabꞌari wãsidꞌa Galilea druadꞌe. Jesúsbara krĩña ẽbasia izhi sãma kꞌobꞌʉta zhãrãba kꞌawuadꞌaira. 31Maʉ̃ẽnabema izhara ũrãgꞌa nʉmasia izha jʉrʉkuadꞌata, maʉ̃nerã mawũãsia: Mʉ Beubari Bape bꞌʉra zhãrã juwuadꞌe chãbꞌaridꞌaya, maʉ̃nerã beadꞌaya. Mawũãmina beudꞌata piradrʉya ewari ũbeadꞌe.

32Maʉ̃ta jarabʉrʉra ãzhara sãwũãta kꞌawuadꞌa ẽãta perasidꞌa widꞌidꞌaita.

¿Kꞌaita audre zhi zromape?

(Mateo 10:42; 18:1-9; Lucas 9:46-50; 17:1-2)

33Capernaúm pʉwʉrʉedꞌa zepe dedꞌa kꞌobꞌʉdꞌe izha jʉrʉkuadꞌaa widꞌi mawũãsia: ¿Mazhirãĩnurã marã kꞌãrẽã bĩ ẽã bedꞌeasidꞌa odꞌera?

34Mawũãĩ ãzhira chupeasidꞌa, odꞌe ãzhirãĩnu bĩ ẽã bedꞌeasidꞌa baera kꞌaita audre zhi zroma ʉ̃rʉ̃. 35Mawũẽ Jesús jewedꞌape izha jʉrʉkuadꞌa doceta trʉ̃pe mawũãsia: Iabꞌa zhi zromata bꞌa krĩña bꞌʉbʉrʉ, jõmaʉ̃ kꞌãñabara zhi zroma ẽãne bꞌaibara, aramaʉ̃ne dewaraurãta jõma aribꞌaebarita bꞌaibara. 36Mawũãpe wũãwũãta ãzhi ẽsadra kꞌobꞌʉpe juwuadꞌe edape mawũãsia: 37Mʉnebemata ĩjã bꞌʉdꞌeba iabꞌaʉba naʉ̃ wũãwũã kĩrãkꞌa bꞌʉta bia edabʉrʉra mʉta bia edabʉrʉa, mʉta bia edabʉrʉra bari mʉta bia edabʉrʉ ẽã, awuarabʉrʉ bia edabʉrʉa mʉ zokꞌadꞌata.

Dazhi jura ẽãrã dazhi bawarabema

(Lucas 9:49-50)

38Juanbara mawũãsia: Miã Ũrãgꞌabari, daibara iabꞌa ũdusidꞌa bʉ trʉ̃neba jai ãĩ jʉrekua nʉmʉta, mawũãmina izhara dazhirã pẽwã bꞌʉ ẽã, mawũẽ daibara jarasidꞌa maʉ̃ kꞌaudꞌa bꞌa ẽbamarẽã.

39Mawũãĩ Jesúsbara mawũãsia: Maʉ̃ kꞌaudꞌa bꞌa ẽbamarẽã jararãũdua, mʉ trʉ̃neba ũdudꞌakꞌata obꞌʉbara tẽãne mʉrã bĩ ẽã jara ẽã. 40Dazhi jura ẽãrã dazhi bawarabema. 41Bariduba marã baniã diabʉrʉta marã mʉrẽ baera mawũã diara, mʉã wãrĩnu marãã jaraya, Daizezebara maʉ̃barira kꞌãrẽ diaya.

Zhãrãta bꞌaebibʉrʉdꞌebema

(Mateo 18:6-9; Lucas 17:1-2)

42Bariduba abꞌa kꞌazhiruadꞌe bꞌaebibʉrʉta za zhi zromarã ẽãta mʉnebema ĩjã bꞌeta mawũã ora, maʉ̃ Daizezebara pua kꞌawua oya. Mawũẽ biga bakꞌausia osidaudꞌe yuta tãjʉ̃nape bꞌaribuedꞌaita pusadꞌe. 43Bʉ juwuaba bʉta kꞌazhiruadꞌe bꞌaebiidꞌebema orãrũã, aramaʉ̃ne bʉ juwuara bꞌʉatubʉrʉkarua. Audre biga Daizeze ũme bꞌai jõ ẽã maẽ edꞌa wãĩta juwua abꞌa bꞌʉta, juwua ũme bꞌʉta wãĩ kꞌãñabara tebʉ kikꞌadꞌe. 44Mama bꞌeta zuburia onʉmʉrã kira beu ẽã, tebʉsidꞌa kikꞌata nʉmʉã. 45Bʉ jẽrũba bʉta kꞌazhiruadꞌe bꞌaebiidꞌebema orãrũã, aramaʉ̃ne bʉ jẽrũrã bꞌʉatubʉrʉkarua. Audre biga Daizeze ũme bꞌai jõ ẽã maẽ edꞌa wãĩta jẽrũ abꞌa bꞌʉta, jẽrũ ũme bꞌʉta bꞌaribuedꞌai kꞌãñabara tebʉ kikꞌadꞌe. 46Mama bꞌeta zuburia onʉmʉrã kira beu ẽã, tebʉsidꞌa kikꞌata nʉmʉã. 47Bʉ dabʉba bʉta kꞌazhiruadꞌe bꞌaebiidꞌebema orãrũã, aramaʉ̃ne bʉ dabʉra ẽũtabʉrʉkarua. Audre biga Daizezeta Nokꞌota bꞌʉ maẽ edꞌa wãĩta dabʉ abꞌa bꞌʉta, dabʉ ũme bꞌʉta bꞌaribuedꞌai kꞌãñabara tebʉdꞌe. 48Mama bꞌeta zuburia onʉmʉrã kira beu ẽã, tebʉsidꞌa kikꞌata nʉmʉã. 49Marã Daizezebara jõma mitia ne ẽã okuaya. Aramaʉ̃nerã ne adua ẽbamarẽã ne jõma tebʉba ba bada kĩrãkꞌa tãba serabada kĩrãkꞌa okuaya. 50Tãrã biga, mawũãmina kʉya ẽbʉrʉ, ¿kꞌãrẽba kʉyabidꞌaipe? Tã biga kĩrãkꞌa bꞌeba zhiya adu-a bꞌeaudua.

Currently Selected:

Marcos 9: cto

Highlight

Copy