ufuġ 4

timitar lli‑imla sidi rbbi i‑musa

1irar‑as ilmma musa: «walaynni ur‑ra‑sri‑sfldn mddn ula qbln awal‑inu. rad‑iyi‑inin: ‹ur‑ak‑d‑iban rbbi da‑bdda‑illan.› » 2isqsa‑t sidi rbbi: «ma‑illan ġ‑ufus‑nk?» yini‑as: «aɛmud». 3yini‑as: «gr‑t‑in f‑wakal.» igr‑t‑in ġakudan f‑wakal, s‑iwrri iga algʷmaḍ, irwl musa zġ‑gis. 4izayd sidi rbbi yini i‑musa: «mdi‑n afus‑nk tamẓt‑t ġ‑tmġilt‑ns.» imdi‑n afus‑ns ġakudan yamẓ‑t, s‑iwrri iga aɛmud ġ‑ufus‑ns. 5yini‑as sidi rbbi: «ġmkan a‑s‑ra‑k‑amnn is‑ak‑d‑iban rbbi da‑bdda‑illan, iga‑t rbbi n‑id‑babatsn ibrahim d‑isḥaq d‑yaɛqub.»

6isawl‑d daġ sidi rbbi yini‑as: «šškšm afus‑nk s‑uḥbiš n‑tmlsit‑nk.» išškšm musa ġakudan afus‑ns s‑uḥbiš‑ns. lliġ‑t‑id‑issufġ, hati ijdm, iwrri imllul zund adfl. 7izayd rbbi yini‑as: «rar afus‑nk s‑uḥbiš‑nk.» irar afus‑ns s‑uḥbiš. lliġ‑t‑id‑daġ‑issufġ, hati iwrri ilm ig ġmklli yadlli iga. 8yini‑as rbbi: «iġ‑ur‑srk‑sfldn ula umnn‑k s‑tmatart tamzwarut, a‑ur‑imil amnn‑k s‑tis snat. 9walaynni iġ‑ur‑uminn s‑snat‑tmitar‑ad ula sfldn s‑wawal‑nk, tasit‑d imikk n‑waman zġ‑wasif n‑nnil tffit‑tn f‑wakal iqqurn, s‑rad‑wrrin‑waman lli‑di‑tusit zġ‑wasif gn idammn f‑taġart.»

10irar musa i‑sidi rbbi: «wa rbbi‑nu, ur‑giġ bu‑wawal, la ġayd izrin ula ġilad ġ‑tsawlt s‑uh̬ddam‑nk. hati iẓẓay ils‑inu, išqu flla ad‑sawlġ.» 11yini‑as sidi rbbi: «ma‑iskrn imi n‑bnadm? ma‑iskrn bnadm a‑ig aẓnẓum nġd aḍrḍur? ma‑t‑iskrn a‑yisfiw nġd a‑ibukḍ? is‑urd nkki a‑t‑iskrn, nkki‑ad igan wad bdda illan? 12zayd ġilad, nkki a‑ra‑iɛawn imi‑nk, mlġ‑ak ma‑ra‑tinit.»

13imma ntta irur‑as: «wa rbbi‑nu, ġir azn kra n‑yan yaḍni.» 14iġḍb sidi rbbi f‑musa yini‑as: «imma gʷmak harun gu‑lawi, ssnġ is‑issn a‑isawal. hatin ġilad ikka‑d aġaras a‑k‑id‑imnaggar. iġ‑k‑iẓra, ra‑srk‑ifrḥ. 15zayd ar‑srs‑tsawalt kiyi, ar‑as‑tmalat iwaliwn ma‑ittini. rad‑tɛawanġ imi‑nk ula imi‑ns, ar‑awn‑malaġ ma‑ra‑tskarm. 16ra‑isslkam iwaliwn‑nk i‑mddn, ig zund imi‑nk, tgt zund rbbi‑ns. 17ra‑tasit aɛmud‑an ġ‑ufus‑nk ar‑srs‑tskart timitar.»

iwrri musa s‑tmazirt n‑miṣr

18iddu musa ġakudan iwrri s‑dar‑uḍggʷal‑ns yatru yini‑as: «ġir adj‑iyi ad‑wrriġ s‑dar aytma ġ‑miṣr ad‑ẓrġ is‑sul‑ddrn.» yini‑as yatru: «zayd, a‑dik‑tmun sslamt.» 19isawl‑d sidi rbbi s‑musa ġ‑tmazirt‑an n‑midyan yini‑as: «zayd twrrit s‑miṣr, ašku willi‑k‑isiggiln a‑k‑nġn, hatni mmutn.» 20yawi musa tamġart‑ns d‑tarwa‑ns issni‑tn f‑yan‑uġyul, iwrri s‑tmazirt n‑miṣr. yasi dids aɛmud n‑rbbi ġ‑ufus‑ns. 21yini daġ sidi rbbi i‑musa: «iġ‑n‑truḥt s‑miṣr, trart lɛaql a‑tskart ġ‑lgddam n‑firɛawn kullu lɛjayb lli‑giġ ġ‑ufus‑nk. walaynni hatin rad‑ssiqarġ ul‑ns. ur‑ra‑yadj mddn ad‑ddun. 22zayd tinit i‑firɛawn: ‹ha ma‑inna rbbi da‑bdda‑illan. israyil iga iwi ifh̬ddi. 23nniġ‑ak, rẓm i‑iwi a‑yyi‑itqasa. iġ‑tagʷit ad‑as‑trẓmt, ha‑yyi rad‑nġġ ifh̬ddi‑nk.› »

24lliġ nsan ġ‑yan‑udġar ġ‑uġaras, imnaggar‑t sidi rbbi iskr f‑a‑t‑inġ. 25taf ṣifura yan‑uẓru n‑uznad, tbbi ilmš i‑yus, tggr‑n srs i‑iwurzan n‑musa tini‑as: «s‑ṣṣaḥt, asli n‑idammn ad‑iyi‑tgit.» 26yadj‑t ġakudan a‑iddr. f‑ssibt n‑tẓallit‑an a‑f‑as‑tnna ‹asli n‑idammn›.

27inna‑yad sidi rbbi i‑harun: «ddu s‑lh̬la a‑n‑tmnaggart d‑musa.» iftu imnaggar‑t‑in ġ‑dar‑udrar n‑rbbi insallam dids. 28isawl musa i‑harun f‑kullu iwaliwn lli‑f‑t‑id‑yuzn sidi rbbi ula timitar lli‑f‑t‑yuṣṣa a‑tnt‑iskar. 29iddu ilmma musa d‑harun, ssmunn‑d kullu imġarn n‑ayt‑israyil. 30yini‑asn harun kullu iwaliwn lli‑s‑inna sidi rbbi i‑musa, iskr timitar ġ‑umnid‑nsn. 31amnn mddn‑an. lliġ sfldn is‑d‑yuggʷa sidi rbbi s‑ayt‑israyil iẓr tadallit lli‑ġ‑llan, ssknun ih̬fawn‑nsn sjdn‑as.

Currently Selected:

ufuġ 4: SHILOT20

Highlight

Copy