ufuġ 3

tazggʷart lli‑iɛmmrn s‑lɛafiyt

1yan‑wass ikssa musa ulli n‑uḍggʷal‑ns yatru [raɛwil] lli‑igan amsakmur ġ‑dar ayt‑midyan. yawi tawrut s‑lh̬la ġ‑tsga lli‑iwalan amṭar n‑tafukt, ilkm adrar n‑rbbi lli‑mi‑ttinin ‹ḥurib› [ar‑as‑ttinin ula ‹sinay›]. 2iban‑as‑d lmalak n‑sidi rbbi ġ‑wammas n‑yat‑tzggʷart s‑ufdaddu n‑lɛafiyt. ar‑n‑itmnad tazggʷart, tɛmmr s‑lɛafiyt walaynni ur‑tjdir. 3yini musa: «a‑n‑akmurġ ad‑mnadġ ġ‑lɛjb‑an, ẓrġ mah̬ aylliġ ur‑tjdir‑tzggʷart‑an.» 4sidi rbbi, lliġ iẓra musa yakmur‑n a‑gis‑imnad, iġr‑as‑d zġ‑tuẓẓunt n‑tzggʷart yini‑as‑d: «musa, musa.» yini musa: «ha nkki.» 5yini‑as‑d sidi rbbi: «a‑ur‑di‑tlkmt ġid. kkis turẓiyin zġ‑iḍarn‑nk. han ġin ġ‑tbiddt iga akal ityawẓlayn i‑rbbi‑nk.» 6izayd yini: «nkki a‑igan rbbi n‑babak, gġ rbbi n‑ibrahim d‑isḥaq d‑yaɛqub.» idl musa udm‑ns ġakudan, ašku iksuḍ ur‑iẓḍar a‑n‑imnad ġ‑rbbi.

7yini‑as sidi rbbi: «ha‑yyi ẓriġ tadallit išqan lli‑ġ‑llan mddn‑inu ġ‑miṣr, sfldġ‑asn ar‑ssmummuyn s‑willi‑tn‑dḥḥinin, ssnġ takrrayt iggutn lli‑ġ‑llan. 8gguzġ‑d ġilad a‑tn‑fukkuġ zġ‑ifassn n‑ayt‑miṣr, ssawnġ‑tn zġ‑wakal‑an, awiġ‑tn s‑yat‑tmazirt yusɛan ifulkin, ingi‑gis‑ugʷfay d‑tammnt. iga‑t‑wakal n‑ayt‑kanɛan d‑ayt‑ḥit d‑ayt‑amur d‑ayt‑fariz d‑ayt‑ḥiwi d‑ayt‑yabus. 9hati ġilad ilkm‑iyi‑d‑usmammi n‑ayt‑israyil, ẓrġ arfufn lli‑s‑a‑tn‑ssrfufunn ayt‑miṣr. 10nkr ġilad ra‑k‑aznġ s‑dar firɛawn baš a‑di‑tssufġt mddn‑inu n‑ayt‑israyil zġ‑miṣr.»

11imma musa inna i‑rbbi: «mad‑giġ nkki aylliġ‑iyi‑tuṣṣat ad‑dduġ s‑firɛawn ssufġġ‑d ayt‑israyil zġ‑miṣr?» 12yini‑as rbbi: «ha‑yyi rad‑dik‑iliġ. d‑ġmkad a‑rad‑ak‑ig tamatart n‑izd nkkin a‑k‑yuznn, ašku tigira n‑ma‑di‑tssufġt mddn‑nk zġ‑miṣr, adrar‑ad a‑ġ‑ra‑ttqasat rbbi‑nk.»

13yini ilmma musa i‑rbbi: «iġ‑n‑lkmġ dar ayt‑israyil iniġ‑asn ‹rbbi n‑imzwura‑nun a‑yyi‑d‑srun‑yuznn,› sqsan‑iyi ‹ma‑iga ism‑ns?› ma‑s‑rad‑asn‑jawbġ?» 14yini rbbi ġakudan i‑musa: «nkki giġ wad bdda illan. ini i‑ayt‑israyil ‹yuzn‑iyi‑d wad bdda illan.› » 15izayd sidi rbbi yini i‑musa: «ini i‑ayt‑israyil ‹rbbi da‑bdda‑illan, iga‑t rbbi n‑id‑babatun, ig rbbi n‑ibrahim, ig rbbi n‑isḥaq, ig rbbi n‑yaɛqub, nttan a‑yyi‑d‑srun‑yuznn.› ġmkan ad‑bdda‑iga ism‑inu, issann‑iyi srs mddn n‑kraygatt tasut n‑tasutin. 16zayd ġilad tssmunt‑d imġarn n‑ayt‑israyil tinit‑asn: ‹hati iban‑iyi‑d rbbi da‑bdda‑illan, iga‑t rbbi n‑id‑babatun, ig rbbi n‑ibrahim d‑isḥaq d‑yaɛqub, yini‑yyi: ha‑yyi uggʷiġ‑d srun, ẓrġ mad‑awn‑ityawskarn ġ‑miṣr. 17nniġ‑awn ġilad, ra‑kʷn‑ssawnġ zġ‑tdallit n‑miṣr s‑wakal n‑ayt‑kanɛan d‑ayt‑ḥit d‑ayt‑amur d‑ayt‑fariz d‑ayt‑ḥiwi d‑ayt‑yabus, s‑yat‑tmazirt ingi‑gis‑ugʷfay d‑tammnt.› 18rad‑sfldn s‑wawal‑nk, tkšmt ilmma kiyi d‑imġarn n‑ayt‑israyil s‑dar‑ugllid n‑miṣr, tinim‑as: ‹rbbi da‑bdda‑illan, iga‑t rbbi n‑ayt‑ɛibr, hati iban‑d srnġ. nḍalb‑ak ġilad, adj‑aġ a‑nmuddu tawada n‑kraḍ‑uwssan ġ‑lh̬la, baš a‑nġrṣ ġ‑umnid n‑rbbi da‑bdda‑illan ig rbbi‑nġ.› 19walaynni ssnġ nkki is‑ur‑rad‑awn‑irẓm‑ugllid n‑miṣr a‑tddum, abla iġ‑n‑fllas‑igguz yan‑ufus itjhhdn. 20ha‑yyi ra‑n‑mdiġ afus‑inu ar‑kkatġ ayt‑miṣr s‑kullu lɛjayb lli‑rad‑skrġ ġ‑wammas‑nsn. tigira n‑ġayan a‑rad‑awn‑irẓm. 21rad‑fkġ rrḍa i‑mddn‑nk ġ‑dar ayt‑miṣr, d‑ur‑ra‑di‑tffuġm s‑ifassn h̬wanin. 22ašku kraygatt tamġart ra‑tḍalb zġ‑tadjart‑ns ullt‑miṣr ula tanna igawrn ġ‑tgmmi‑ns, tḍalb zġ‑gis irukutn n‑nnʷqrt ula win‑uwrġ, tḍalb timlsa tsslsm‑tnt i‑tarwa‑nun d‑istitun. ġmkan a‑s‑ra‑tššm ayt‑miṣr.»

Currently Selected:

ufuġ 3: SHILOT20

Highlight

Copy