ufuġ 2

talalit n‑musa

1ġ‑uwssan‑an inkr yan zġ‑tqbilt n‑ayt‑lawi, yawi taslit zġ‑ist‑lawi. 2tffuġ nttat ar‑trbbu, taru yan‑warraw. lliġ‑ti‑tẓra ifulki, tssrgs‑t kraḍ‑iyrn, 3aylliġ ur‑sul‑tẓḍar a‑ti‑tḥḍu. tasi‑d yat‑tryalt ttyawskar zġ‑waẓẓmay, tġm‑as zzft d‑tfiẓẓa, tg gis arraw, tsrs‑tt‑in ġ‑gr‑waẓẓmay n‑wasif. 4ulltmas n‑warraw tbidd‑n ġ‑tuggugt a‑tẓr ma‑rad‑as‑ijru.

5imikk s‑di‑thuwwd illis n‑firɛawn s‑wasif a‑tsird, ar‑fttunt‑tmqasatin‑ns ġ‑tama n‑wasif. tẓr‑n taryalt ġ‑gr‑waẓẓmay, tazn tamqasat‑ns a‑stti‑di‑tawi. 6trẓm‑tt s‑a‑gis‑ttmnad arraw, d‑ntta hati ar‑yalla. tḥnnu gis tini: «yan ġ‑tarwa n‑ayt‑ɛibr ayad.» 7tsawl‑d‑uwlltmas n‑warraw ġakudan i‑illis n‑firɛawn tini: «is‑ad‑dduġ ad‑am‑d‑ġrġ i‑yat ġ‑ist‑ɛibr ma‑ym‑issngayn arraw‑ad?» 8tini‑as illis n‑firɛawn: «zayd.» tddu‑tfruh̬t tġr‑d i‑innas n‑warraw. 9tsawl‑as illis n‑firɛawn tini‑as: «awi arraw‑ad ar‑iyi‑ti‑tssngayt. ra‑ym‑akkaġ tiġrad‑nm.» tawi‑d‑tmġart arraw ar‑ti‑tssngay. 10lliġ imqqur‑uḥšmi, tawi‑t s‑dar illis n‑firɛawn, tg‑t nttat d‑yus. tg‑as ism musa [tga lmɛna‑ns ‹ityawldday‑d›], ašku tnna d‑ih̬f‑ns: «ldiġ‑t‑id zġ‑waman.»

irwl musa s‑midyan

11lliġ imqqur musa, iffuġ yan‑wass s‑dar mddn‑ns, iẓr anhataf iẓẓayn lli‑fllasn‑illan. imnad yan gu‑miṣr ar‑ikkat yan gu‑ɛibr lli‑igan zġ‑mddn‑ns. 12igrawl ġmk d‑ġmk, ur‑iẓri yan, yut gu‑miṣr‑an iḥḍu‑t ġ‑umlal. 13ndid azkka iffuġ daġ, yaf‑n sin ġ‑ayt‑ɛibr mmaġn i‑ngratsn. isawl musa i‑walli itɛddan f‑wayya yini‑as: «mah̬ a‑tkkatt gʷmak?» 14irar‑as‑d nttan: «ma‑k‑igan d‑uriyas ula lḥakm fllanġ? is‑trit a‑yyi‑tnġt ġmklli tnġit gu‑miṣr‑an?» yiksaḍ musa ġakudan, yini d‑ih̬f‑ns: «aḥḥ, wrrin ssnn mddn mad‑skrġ.» 15lliġ isfld firɛawn i‑ma ijran, iskr f‑a‑inġ musa. walaynni musa irwl zġ‑dar firɛawn, iddu igawr ġ‑tmazirt n‑midyan. iskiws musa ġ‑tama n‑yan‑wanu.

16ġwalli igan amsakmur ġ‑gr mddn d‑rbbi ġ‑tmazirt n‑midyan, hati iṭṭaf ssa n‑istis. aškint‑d ntnti ar‑tagʷmnt, ɛmmrnt ifraḍn ad‑ssunt‑uwlli n‑babatsnt. 17aškin‑d kra n‑imksawn ṭṭayn‑tnt. inkr musa ġakudan ifukku‑tnt, izayd issu ulli‑nsnt. 18lliġ‑n‑kšmnt s‑dar babatsnt raɛwil, isqsa‑tnt: «ma‑ijran aylliġ ur‑n‑tmaṭlmt ġassad?» 19inint‑as: «ifukka‑yaġ yan gu‑miṣr zġ‑imksawn, yagʷm issu ulli‑nġ.» 20yini raɛwil i‑istis: «maniġ illa? mah̬ aylliġ‑t‑in‑tflmt? ġramt‑as‑d a‑didnġ‑išš.» 21irḍu musa a‑igawr ġ‑dar‑urgaz‑an. ifk ilmma i‑musa illis ṣifura, 22taru‑as yan‑warraw. ig‑as ism giršum [tga lmɛna‑ns ‹abrrani›], ašku inna: «giġ abrrani ġ‑tmazirt n‑iġribn.»

isfld rbbi i‑twaġra n‑mddn‑ns

23zrin isggʷasn immt‑ugllid n‑miṣr. imma ayt‑israyil ar‑ukan‑sul‑nddrn s‑tkrrayt n‑tsmugit, ar‑ssmummuyn ar‑aqran i‑ma‑tn‑itɛawan, tlkm‑twaġra‑nsn rbbi. 24isfld rbbi i‑tndra‑nsn, iswangm lɛhd lli‑iskr d‑ibrahim d‑isḥaq d‑yaɛqub. 25imnad rbbi ġ‑ayt‑israyil, yissan mad‑darsn‑illan.

Currently Selected:

ufuġ 2: SHILOT20

Highlight

Copy