isizwur 22

asattuy n‑isḥaq

1izri ma‑izrin iqṣad rbbi a‑yarm ibrahim, isawl srs yini: «ibrahim.» yini‑as: «ha nkki.» 2yini: «nkr tawit yuk lli‑dark‑igan yan, iga‑t isḥaq da‑dark‑iɛzzan, tddut s‑uwrir lli‑rad‑ak‑mlġ ġ‑tmazirt n‑muriyah, tssattuyt‑t ġin a‑d‑yattuy.» 3lliġ ifaw‑wass inkr ibrahim, ig aḥlas i‑uġyul‑ns, yawi dids sin iɛyyaln‑ns, yawi ula yus isḥaq. ibbi ikššuḍn ma‑s‑a‑ijddr tiġrṣi, inkr iftu s‑illi‑s‑as‑inna rbbi. 4wis kraḍ‑uwssan yall ibrahim alln‑ns, iẓr‑n awrir ġ‑tuggugt. 5yini ibrahim i‑iɛyyaln‑ns: «qamat ġid d‑uġyul. nkki d‑uḥšmi ra‑nddu ar‑ntsjad, nwrri‑d ilmma s‑darun.» 6yasi ibrahim ikššuḍn ma‑s‑a‑ijddr tiġrṣi, isrs‑tn‑in f‑tġʷraḍ n‑yus isḥaq, yasi ġ‑ufus‑ns asafu d‑tuzzalt, ftun ntni s‑sin. 7yini isḥaq i‑babas ibrahim: «wa baba.» yini‑as: «ha nkki.» yini‑as‑d: «hay‑asafu d‑ikššuḍn, walaynni manza alqqaġ ma‑ittattuyn?» 8yini‑as ibrahim: «rbbi a‑ra‑d‑ifk alqqaġ ma‑ittattuyn a‑iwi.» zaydn s‑sin ftun.

9lliġ ruḥn adġar lli‑s‑as‑inna rbbi, ibnu ibrahim yan‑ukrkur, issasstwa fllas ikššuḍn, ikrf yus isḥaq isrs‑t‑in f‑ukrkur ġ‑iggi n‑ikššuḍn. 10yasi ibrahim tuzzalt, imdi‑n afus‑ns a‑iġrṣ i‑yus. 11iġr‑d lmalak n‑sidi rbbi ġakudan zġ‑ignna yini‑as: «ibrahim ibrahim.» yini‑as: «ha nkki.» 12yini‑as‑d: «ad‑ur‑n‑tgt afus s‑uḥšmi ula tskrt‑as kra. ssnġ ġilad is‑a‑yyi‑ttuqqart bahra, ašku ur‑flla‑tḥḍit yuk lli‑dark‑igan yan.» 13yall ibrahim alln‑ns, iẓr‑n ġ‑tġurdin‑ns yan‑izimmr, ityamaẓ ġ‑waskawn ġ‑tzggʷart. iddu ibrahim yamẓ izimmr, iġrṣ‑as issattuy‑t a‑n‑yattuy ġ‑usnfl n‑yus. 14ig ibrahim ism i‑udġar‑an ‹yahwah‑yirah› [tga lmɛna‑ns ‹sidi rbbi ra‑d‑yawi›], ġmklli‑s‑a‑ttinin mddn sul s‑ġassad: «f‑uwrir n‑sidi rbbi a‑f‑ra‑d‑yawi.»

15iġr‑d lmalak n‑sidi rbbi i‑ibrahim tis snat‑twal zġ‑ignna yini‑as: 16«ha‑yyi ggulliġ‑ak ġilad s‑ism‑inu da‑igan ‹wad bdda illan›, iniġ‑ak f‑ssibt n‑mayd tskrt, lliġ ur‑flla‑tḥḍit yuk lli‑dark‑igan yan, 17ra‑k‑barkġ s‑lbaraka iggutn, ssigtġ amud‑nk zund itran n‑ignwan, ula zund amlal n‑tama n‑umda. ra‑inru‑wamud‑nk kullu inuwwašn‑ns. 18amud‑nk a‑s‑rad‑barkġ kullu iqbiln n‑ddunit, ašku tskrt s‑wawal‑inu.» 19iwrri‑d ilmma ibrahim s‑dar iɛyyaln‑ns, nkrn ddun kullu s‑bir‑šibaɛ. igawr ibrahim ġ‑bir‑šibaɛ.

20izri ma izrin isfld ibrahim f‑gʷmas naḥur is‑as‑turu milka tarwa. 21ifh̬ddi iga ism‑ns ɛuṣ, ig gʷmas buz. yili ula qamwil lli‑iwrrin ig babas n‑aram. 22yili kasad d‑ḥazu d‑fildaš d‑idlaf d‑batwil. 23iwrri batwil yaru rifqa. tam tarwa‑yad a‑turu milka i‑naḥur gʷmas n‑ibrahim. 24ula tismgt lli‑itahl naḥur, iga ism‑ns rawma, turu‑as ṭabaḥ d‑jaḥam d‑taḥaš d‑maɛka.

Currently Selected:

isizwur 22: SHILOT20

Highlight

Copy