isizwur 37
37
tiwargiwin n‑yusf
1izdġ yaɛqub ġ‑tmazirt lli‑ġ‑ttin‑ikka ar‑itlulliy babas, a‑stt‑igan d‑tmazirt n‑kanɛan. 2ġmkad a‑iga‑warra n‑tasut n‑yaɛqub.
yusf, lliġ dars ssa d‑mraw (17) n‑usggʷas ar‑ikssa ulli d‑aytmas, ar‑itɛawan tarwa n‑bilha d‑zilfa timġarin n‑babas. imma yusf ar‑d‑ittaški ar‑isawal i‑babas f‑lh̬ʷšant lli‑skarn aytmas. 3israyil, iɛzza dars yusf uggʷar n‑tarwa‑ns yaḍni, ašku ilul dars ġ‑tuwssrt‑ns. iskr‑as yan‑uqššab ikʷlan. 4imma aytmas, lliġ‑t‑ẓran iɛzza dar babas uggʷar‑nsn, krhun‑t bahra aylliġ ur‑sul‑ẓḍarn a‑ys‑ttinin awal iɛdln.
5ha yan‑wass iwarga yusf yat‑twargit, yini fllas i‑aytmas, wrrin ġakudan krhun‑t s‑uggʷar. 6ašku inna: «ġir sfldat i‑twargit lli‑wargaġ. 7ha nkkʷni ar‑ntass tadliwin ġ‑igr, s‑tnkr tadla‑nu tbidd, munnt‑d tadliwin‑nun ssutlnt‑as, knunt kullutnt ġ‑lgddam n‑tadla‑nu.» 8rarn‑as‑d aytmas: «wah is‑ra‑fllanġ‑tgt agllid? is‑ra‑fllanġ‑ttḥkamt?» krhun‑t bahra f‑ssibt n‑twargiwin‑ns ula iwaliwn‑ns. 9iwarga daġ yat‑twargit yaḍni, yini fllas i‑aytmas: «wargaġ tawargit yaḍni. ẓriġ tafukt d‑wayyur d‑yan d‑mraw (11) n‑itri ar‑knnun ġ‑lgddam‑inu.» 10lliġ fllas inna i‑babas d‑aytmas, yakʷi gis babas yini‑as: «matta tawargit‑ad twargat? is‑ra‑n‑našk, nkki d‑innak d‑aytmak, nknu‑ak ar akal?» 11ḥsadn‑t aytmas bahra, imma babas iḥḍa mayan ġ‑uwl‑ns.
inza yusf f‑ufus n‑aytmas
12yan‑wass ddun aytmas ksn‑in lksibt n‑babatsn ġ‑tsga n‑tmdint n‑šakim. 13isawl israyil s‑yusf yini‑as: «tssnt is‑n‑ksan aytmak ġ‑šakim. nkr a‑k‑aznġ s‑darsn.» yini‑as yusf: «ha nkki». 14yini‑as babas: «ġir zayd tẓrt‑n is‑ihnna lḥal dar aytmak d‑uwlli, tawit‑iyi‑d lah̬bar.» yazn‑t zġ‑talat n‑ḥabrun s‑tsgiw n‑šakim. 15ijlu yusf ġakudan ġ‑lh̬la, imnaggar d‑yan‑urgaz. isqsa‑t‑urgaz: «ma‑s‑a‑tsiggilt?» 16yini‑as: «ar‑siggilġ s‑aytma. ġir ini‑yyi maniġ ksan?» 17yini‑as‑urgaz: «han rḥln zġ‑ġid. sfldġ nnan i‑ngratsn: ‹rwaḥat a‑nddu s‑dutan.› » iftu yusf ġakudan iḍfur aytmas, yaf‑tn‑in ġ‑uzaġar n‑dutan.
18lliġ‑t‑in‑ẓran aytmas ġ‑tuggugt, ur‑ta‑tn‑in‑ilkim, mšawarn i‑ngratsn mamnk a‑s‑ra‑t‑nġn, 19inin: «han bu‑twargiwin yuška‑d. 20hiya a‑t‑nnġ ġilad, nluḥ‑t‑in ġ‑kra n‑tnuḍfi, nini ‹išša‑t kra n‑luḥš›, a‑nẓr mani rad‑lkmnt‑twargiwin‑ns.» 21walaynni lliġ isfld rawbin i‑ma‑ttinin wiyyaḍ, yiri a‑t‑zġ‑gisn‑ifukku, yini‑asn: «ad‑ur‑nnġ rruḥ.» 22yini‑asn daġ: «ad‑ur‑tffim idammn n‑bnadm. luḥat‑t‑in ġ‑tnuḍfi‑ad ġ‑lh̬la, walaynni a‑ur‑ti‑tḍrrum.» illa ġ‑uwl n‑rawbin a‑t‑zġ‑gisn‑ifukku irar‑t i‑babas. 23lliġ‑d‑ilkm yusf s‑dar aytmas, kksn‑as aqššab ikʷlan lli‑ilsa, 24amẓn‑t luḥn‑t‑in ġ‑tnuḍfi ih̬wan, ur gis aman.
25skiwsn ġakudan ad‑ššn, alln ilmma alln‑nsn s‑n‑ẓran yan‑ukabar n‑ayt‑ismaɛil ġ‑tuggugt. kkan‑d tamazirt n‑gilɛad, asin‑d tujjutin d‑isafarn d‑lmurr f‑irɛman‑nsn, irin a‑tn‑awin s‑miṣr. 26yini yahuda ġakudan i‑aytmas: «iġ‑nnġa gʷmatnġ nḥḍu idammn‑ns, man lfaytt a‑rad‑aġ‑yili? 27arayat a‑t‑nzznz i‑ayt‑ismaɛil‑an. a‑ur‑fllas‑yili‑ufus‑nġ, ašku iga gʷmatnġ, ig zġ‑ih̬ṣan‑nġ.» rḍun aytmas s‑wawal‑ns. 28lliġ‑tn‑d‑lkmn isbbabn‑lli n‑ayt‑midyan, ssġlin‑d yusf zġ‑tnuḍfi, zznzn‑asn‑t s‑sin id‑mraw (20) n‑uqarid n‑nnʷqrt. awin‑t s‑miṣr. 29imma rawbin, ġ‑lliġ idda s‑tnuḍfi, ur‑n‑gis‑yufi yusf, ṭiyr‑as bahra ibbi timlsit‑ns. 30iwrri‑d dar aytmas yini‑asn: «laḥ afruh̬, aḥḥ‑inu ma‑rad‑skrġ?»
31asin‑d aqššab n‑yusf, ġrṣn i‑yan‑ubukir, ssglan aqššab ġ‑idammn‑ns. 32awin aqššab‑an ikʷlan i‑babas inin‑as: «hati nufa ġwad. ẓr izd aqššab n‑yuk ayad nġd uhu?» 33yakʷz‑t yini‑asn: «aqššab n‑iwi ayad. kra n‑luḥš yʷh̬šnn a‑t‑yuzan. aḥḥ‑inu, yusf iga igzman. yusf iga igzman.» 34ibbi yaɛqub malssa‑ns ibkis s‑lh̬iš, ar‑yalla f‑yus kigan d‑uwssan. 35aškin‑d kullu tarwa‑ns d‑istis a‑ti‑tṣbbarn, walaynni yagʷi a‑iṣbr. yini‑asn: «uhu, rad‑sul‑allaġ ard lkmġ iwi s‑tdrut n‑wakal.» ġmkan a‑iqama ar‑fllas‑yalla.
36imma yusf, iwin‑t ayt‑midyan s‑miṣr. zznzn‑t i‑fuṭifar lli‑igan anmġur n‑waḍafn n‑lqṣr n‑firɛawn agllid n‑miṣr.
Currently Selected:
isizwur 37: SHILOT20
Highlight
Share
Copy
Want to have your highlights saved across all your devices? Sign up or sign in
Selected Old Testament in Tashelhayt (Latin script) © United Bible Societies, 2020.
Robert Bernard Dann.
