isizwur 39

yusf ġ‑tgmmi n‑fuṭifar

1lliġ ityattay yusf s‑miṣr, isġ‑t fuṭifar gu‑miṣr zġ‑ayt‑ismaɛil lli‑t‑isshuwwdn s‑ġin. iga nttan anmġur n‑waḍafn n‑lqṣr n‑firɛawn. 2imma yusf, illa dids sidi rbbi, iwrri iga wad injḥn, ih̬dm ġ‑tgmmi n‑sidis gu‑miṣr. 3iẓr sidis is‑dids‑illa sidi rbbi, iẓr kullu ma‑iskar ar‑as‑t‑ijjnjaḥ sidi rbbi. 4yusf ar‑itqasa sidis, yaf rrḍa ġ‑iẓri‑ns, ig‑t ilmma d‑ungabal f‑tgmmi‑ns, ifl kullu ma‑dars‑illan ġ‑ddu‑ufus‑ns. 5zġ‑wass lli‑ġ‑t‑iga d‑ungabal f‑tgmmi‑ns ula f‑kullu ma‑dars‑illan, ha sidi rbbi ibark tigmmi n‑gu‑miṣr‑an f‑ssibt n‑yusf. tlla lbaraka n‑sidi rbbi ġ‑kullu ma‑iṭṭaf, la ġ‑tgmmi ula ġ‑igran. 6ġmkan a‑s‑ifl kullu ma‑dars‑illan ġ‑ddu‑ufus n‑yusf. ur‑sul‑a‑itlhu s‑yat abla tiram lli‑ištta.

yusf iga wad ifulkin ġ‑tiddi‑ns d‑uwdm‑ns. 7zrin kra n‑uwssan s‑trẓm‑ṭiṭṭ n‑tmġart n‑sidis ġ‑yusf tini‑as: «ašk‑id tgnt didi.» 8imma nttan yagʷi, irar i‑tmġart n‑sidis: «han sidi ur‑sul‑yusi lhmm i‑yat ġ‑tgmmi ġilad ġ‑gis‑lliġ nkki. ifl kullu ma‑dars‑illan ġ‑ddu‑ufus‑inu. 9awal‑inu ġ‑tgmmi‑ad iga zund awal‑ns. ur‑iyi‑ikks yat abla kmmi, ašku tgit tamġart‑ns. taggug flla lh̬ʷšant‑ad imqqurn iḥrmn ġ‑iẓri n‑rbbi.» 10tzayd nttat ass f‑wass ar‑ti‑ttini i‑yusf, imma ntta ur‑jji‑iqbil a‑dids‑ign ula a‑dids‑yili.

11yan‑wass ġ‑uwssan‑an ikšm yusf s‑tgmmi a‑isala tawuri‑ns, ttaġ‑d ḥtta yan ġ‑ih̬ddamn ur‑illi ġ‑tgmmi. 12tġwi‑t‑id zġ‑tmlsit‑ns tini‑as: «gn didi.» imma ntta irwl‑as, ifl timlsit ġ‑ufus‑ns iffuġ s‑brra. 13lliġ‑t‑tẓra ifl‑as timlsit ġ‑ufus irwl s‑brra, 14tġr i‑imqasan n‑tgmmi tini‑asn: «ẓrat, yiwi‑d gu‑ɛibr‑an s‑wammas‑nġ a‑ginġ‑iḍṣṣa. ikšm‑d dari a‑didi‑ign, utġ ġakudan s‑tġuyit. 15lliġ‑iyi‑isfld ar‑ssġuyyuġ, ifl timlsit‑ns irwl iffuġ s‑brra.»

16tḥḍu timlsit ġ‑dars aylliġ‑d‑yuška sidis n‑yusf. 17tɛawd‑as zund iwaliwn‑an tini‑as: «ismg‑an gu‑ɛibr lli‑di‑tiwit, ikšm‑d dari a‑gigi‑iḍṣṣa. 18utġ ukan s‑tġuyit, ifl timlsit‑ns irwl s‑brra.» 19lliġ isfld sidis n‑yusf i‑tmġart‑ns ar‑ttini «ha ma‑gigi‑iskr ismg‑nk», ṭiyr‑as bahra. 20inkr ġakudan yamẓ yusf, ig‑t‑in ġ‑lḥbs ġ‑illiġ a‑ttilin iḥbbasn n‑ugllid. d‑ġin a‑ġ‑iqama.

21walaynni sidi rbbi illa d‑yusf, issafu‑as lḥnant‑ns izgan, ifk‑as rrḍa ġ‑dar‑ungabal n‑lḥbs. 22izri ma‑izrin s‑ifl‑ungabal kullu iḥbbasn yaḍni ġ‑ddu‑ufus n‑yusf. hati kullu ma‑ityawskarn ġ‑lḥbs, nttan a‑t‑iskarn. 23ur‑sul‑a‑itlhu‑ungabal n‑lḥbs s‑aynna illan ġ‑ddu‑ufus n‑yusf, ašku illa dids sidi rbbi, d‑kullu ma‑iskar ar‑as‑t‑ijjnjaḥ.

Currently Selected:

isizwur 39: SHILOT20

Highlight

Copy