isizwur 45

yusf isawl i‑aytmas

1yusf ur‑sul‑iẓḍar a‑yamẓ ġ‑ih̬f‑ns ġ‑wammas n‑willi‑t‑itqasan, yall awal‑ns yamr‑tn ad‑kullu‑ffuġn. ur‑sul‑dids‑iqama abla aytmas lliġ‑asn‑imla ih̬f‑ns. 2ar‑yalla s‑jjhd. sfldn‑as ayt‑miṣr, sfldn‑as ula ayt‑tgmmi n‑firɛawn. 3yini yusf ġakudan i‑aytmas: «yusf ad‑giġ nkki. is‑sul‑iddr baba?» imma aytmas ur‑ẓḍarn ad‑as‑jawbn, ašku ksuḍn bahra.

4izayd yusf yini i‑aytmas: «ġir akmurat‑d s‑dari.» lliġ‑n‑dars‑akmurn yini‑asn: «nkki a‑igan gʷmatun yusf lli‑tzznzam s‑miṣr. 5imma ġilad, a‑ur‑tasim taġuft ula tsshuwwlm ih̬f‑nun f‑mamnk a‑yyi‑tzznzam s‑ġid, ašku rbbi a‑yyi‑d‑yuznn a‑kʷn‑d‑zwurġ baš ad‑jjnjmġ tudrt n‑mddn. 6ašku sin isggʷasn ayd‑s‑illa‑uġʷni ġ‑tmazirt, d‑smmus isggʷasn a‑sul‑iqaman, ur‑ra‑gisn‑tili la tiyrza ula tamgra. 7yazn‑iyi‑d rbbi a‑kʷn‑d‑zwurġ, baš ad‑qamant tasutin‑nun f‑wakal, tnjm tudrt‑nun s‑ujnjm ihiyyan. 8nniġ‑awn han urd kunni a‑yyi‑d‑yuznn s‑ġid, walaynni rbbi a‑yyi‑d‑yuznn, ig‑iyi d‑umšawar i‑firɛawn ar‑tḥkamġ ġ‑tgmmi‑ns, ig‑iyi d‑lḥakm f‑tmazirt n‑miṣr kullutt. 9ḥarrwat ġilad twrrim s‑dar baba tinim‑as: ‹inna‑yak yuk yusf: han iga‑yyi rbbi d‑lḥakm f‑miṣr kullut. ašk‑id dari, a‑ur‑n‑tmaṭlt. 10ra‑tzdġt ġ‑tsgiw n‑gušn, takmurt‑d sri kiyi d‑tarwa‑nk d‑tarwa‑nsn d‑uwlli d‑imugayn ula kullu ma‑dark‑illan. 11ġin a‑ġ‑ra‑ywn‑akkaġ aynna‑kʷn‑ih̬ṣṣan, ašku ra‑sul‑yili‑uġʷni smmus isggʷasn. ur‑ra‑k‑ih̬ṣṣa yat kiyi ula tawjja‑nk wala lksibt‑nk.› » 12izayd yusf yini: «hati ġilad tukʷzm‑iyi, yakʷz‑iyi ula gʷma bnyamin, tissanm izd nkkin ayad srun isawaln. 13inyat i‑baba f‑luqr‑ad dari illan ġ‑miṣr, tɛawdm‑as f‑kullu ma‑tẓram. ḥarrwat tawim‑d baba s‑ġid.» 14yamẓ ilmma yusf gʷmas bnyamin ġ‑gr ifassn‑ns iḥbbl‑t‑id ar‑yalla. iḥbbl‑t‑id bnyamin ula nttan ar‑yalla. 15izayd yusf issudn aytmas kullutn iḥbbl‑tn‑d ar‑yalla. ar‑ilmma‑dids‑sawaln aytmas.

16lliġ sfldn ayt‑tgmmi n‑firɛawn izd aytmas n‑yusf a‑d‑yuškan, ifrḥ firɛawn d‑imġarn‑ns s‑lah̬bar. 17yini firɛawn i‑yusf: «sawl s‑aytmak tinit‑asn: ‹ġmkad a‑ra‑tskrm. asyat i‑lbhaym‑nun twrrim s‑tmazirt n‑kanɛan, 18tawim‑d ilmma babatun d‑tawjja‑nun twrrim‑d s‑dari. rad‑awn‑fkġ akal lli‑kullu‑ifulkin ġ‑miṣr, ar‑tšttam zġ‑ṣṣabt n‑tmazirt.› 19fkiġ‑ak ula awal‑ad a‑ysn‑ti‑tinit: ‹awyat lkrarṣ zġ‑miṣr ma‑f‑a‑di‑ttasim tarwa‑nun d‑tmġarin‑nun, tawim‑d ula babatun twrrim‑d. 20ad‑ur‑tlhum s‑wayda lli‑ra‑n‑tflm, ašku akal lli‑kullu‑ifulkin a‑ra‑ig winun ġ‑tmazirt n‑miṣr.› »

21skrn tarwa n‑israyil ġmkan. ifk‑asn yusf lkrarṣ ġmklli‑t‑yuṣṣa firɛawn, ifk‑asn lɛwin i‑uġaras. 22ifk timlsit n‑ljdid i‑kud yan gisn, imma bnyamin ifka‑yas kraḍ id‑miyya (300) n‑uqarid n‑nnʷqrt d‑smmust‑tmlsa n‑ljdid. 23yazn yusf tiwafkiw‑ad i‑babas, mraw iġʷyal usin timih̬ar n‑miṣr, d‑mrawt‑tġʷyal usint imndi d‑uġrum d‑lɛwin lli‑ra‑iḥtajja babas i‑umuddu. 24isafḍ ilmma aytmas yini‑asn: «a‑ur‑tlamam i‑ngratun ġ‑uġaras.»

25awnn‑d zġ‑miṣr aškin‑d s‑tmazirt n‑kanɛan s‑dar babatsn yaɛqub. 26inin‑as: «han yusf sul iddr, iwrri iga lḥakm f‑tmazirt n‑miṣr kullutt.» imma ntta, itġaša‑uwl‑ns ašku ur‑tn‑yumin. 27walaynni lliġ‑as‑ɛawdn f‑kullu iwaliwn lli‑s‑asn‑inna yusf, iẓr ula lkrarṣ lli‑as‑d‑yuzn yusf baš a‑t‑asin s‑miṣr, twrri‑d ilmma rruḥ babatsn yaɛqub. 28isawl ġakudan israyil yini: «yuwda‑yyi ġir iwi yusf, lliġ sul iddr. rad‑dduġ a‑t‑ẓrġ ur‑ta‑mmutġ.»

Currently Selected:

isizwur 45: SHILOT20

Highlight

Copy