Yaya 11

Laza ta sáyako ó

1Cɛ lɔ́ yangalotɔ tɛ́ɛ Betani a tɔ́ɔ kó Laza, Mwɛnyamu ni a bhádhyemuso Mati yɛ só ó lá. 2Ale Mwɛnyamu lée látikɔlɔ o bwó Mantii Ɛnza nzé ŋo ka tó kɛ́ a kúnzhe ó ta kɛ́ a jɔsi, óle bhádhyemannjɛ Laza lé tɛ́manngɛnnɛn. 3A bhádhyemuso fyáa olu mɔɔn bhyáa kɛ́ táa fɔ Ɛnza ɲɛ́n kó: «Mantii ó, i twáanva mánngɛnnɛn.»

4 Ɛnza ŋé í yɛ́ kóman ó myɛ́n mínngɛ, aa fɔ kó: «Yangalo míin ndɛ́ a sáta lé, waa óo kɛ́ le ké Ala a i kunnanwee óni Ala Dhyénjɛ o á tando.»

5Mati, ni a bhádhyemuso o, óni Laza ko tɛ́ɛ dí Ɛnza ɲɛ́n. 6Waa aa Laza yɛ yangalo kó ó myɛ́n mínngɛ, a tɛ́ɛ ywáa min nɔn, aa tée fyáa kɛ́ yénɔn íkwɔ. 7O kwɔ́, aa fɔ a yɛ́ kaamɔɔndhye ŋólu yɛ́ ko: «Án ni án ngwɔ́sɛɛ Zude mala ó lɔ́.» 8A yɛ́ kaamɔɔndhye ŋólu fɔ a yɛ́ kó: «Kaamɔɔn, Yawudhyaa ólu tɛ́ɛ fɛ́ kɛ́ í bwó káwaguun nan yénɔn o mán myɛ́n bhá, ii fɛ́ ké án ní án ngwɔ́sɛɛ yénɔn a?» 9Ɛnza ŋé í yawi kó: «Lɛ́ɛlɛ tá ni fyáa le tɛ́ tée kée ŋó kɔ́ɔnnɔn a? Mɔɔn min ngɛ́ kɛ́ táaman kɛ́la tée lɔ́, o tɛ́ i sénanta la, kɛ mansɔɔ aa yéli kɛ́la tée ó bháaka lɔ́, 10wáa, ni mɔɔn lɔ́ kɛ́ kɛ́ táaman kɛ́la sú o lɔ́, óo í sénanta la le, kɛ mansɔɔ a tɛ́ yéli kɛ́la.»

11O kóman ó bɛ́ fɔnin ŋo kwɔ́, aa fɔ í yɛ́ kó: «Án ndwáanva Laza wɛ́ɛ sunnɔɔnkɛ, waa né kɛ́ɛ tɛ́ɛ a lákuun.» 12Kaamɔɔndhye ŋolu fɔ a yɛ́ kó: «Mantii ó, ni a wɛ́ɛ sunnɔɔnkɛ, ó kɔɔ ó tɔ́ɔ kó a yáa kɛ́ɛnya.» 13Ɛnza ndɛ́ɛ Laza yɛ sáyako ó lé fɔ́la, waa kaamɔɔndhye ŋólu tɛ́ɛ i milila kó a tɛ́ɛ kómanla sunnɔɔn gbú lé ka. 14O kwɔ, Ɛnza ŋé fɔ kɛ́ gbɛ́ i yɛ́ kó: «Laza wɛ́ɛ sayakɛ, 15né kɛ kɛ́bhɛɛya o yénɔn, ó lée dhyáa né yɛ́, óle kósɔn, ké aa sé kɛ́ í yéesii ne lá. Án ndáa a fɛ́ yé.» 16O lɔ́, Tomasi min ndɔ́ɔ kó Fyaanin, óo fɔ kaamɔɔndhye ŋó tɔ́ ólu yɛ́ ko: «Án ndáa yénɔn ké án bɛ́ a sayakɛ ɲɔ́ɔn nvɛ́.»

Ɛnza née ɲáanmanɲan o lé

17 Ɛnza ŋé nan mínngɛ Betani, oo kɛ́ ké Laza sú ó tɛ wɛ́ɛ tée náannin kɛ́ kábulu ó kɔɔnnɔn. 18Betani ni Yeluzalɛmu cɛ ó tɛ́ tɛ tínminnan kilo sawa ka. 19Yawudhyaa shɛ́ɛman ndɛ́ wɛ́ɛ táa Betani ké íi Mati ni Mwɛnyamu yéesii i bhádhyemannjɛ o yɛ sáyako ó lɔ́.

20Mati o a myɛ́n mínngɛ kó Ɛnza ŋé nánla, aa táa a labhyɛ. Oo kɛ́ ké Mwɛnyamu síinin ŋé bhó ŋó kɔ́ɔnnɔn. 21Mati é fɔ Ɛnza ɲɛ́n kó: «Mantii ó, ní i tɛ́ɛ kɛ́ yánun, né bhádhyemannjɛ o tɛ́ mánfaa sayakɛ. 22Wáa yáanin ní né lánin ŋé a lá kó ile kɛ fé ŋóo fé ngófɔ Ala yɛ́, a yáa o dí i man.» 23Ɛnza ŋé a yawi kó: «I bhádhyemannjɛ ó yáa kúun.» 24Mati é fɔ a yɛ́ íkwɔ kó: «Ní a lɔ ŋóo a yáa kúun dínɲan labhalo ŋó la.»

25Ɛnza ŋé fɔ a yɛ́ kó: «Né lée su ólu lákuunnan, ni ní ó dila, ni mɔɔn min ngɛ́ lá né lá yáanin o tíi o kɛ́ sayakɛ, o yáa ɲáanmanɲan. 26Óni mɔɔn óo mɔɔn kɛ́ kɛ́ í ɲánla, ni a lánin ŋé né lá, a táa sayakɛ fɛ́sɛ fɛ́sɛ. I lánin yé o lá a?» 27Mati é a yawi kó: «Ɔɔn Mantii ó, né lánin yé o lá kó ile lée Kílisi o lé, Ala Dhyénjɛ, min ngákan kɛ́nan dínɲan lɔ́.»

Ɛnza ŋé kasi lá Laza yɛ saya o kósɔn

28Aa ó kóman ólu fɔ kɛ́ wɛ́ɛ mínngɛ, aa táa a lɔ́ɔmuso Mwɛnyamu kíi lóonɔn kɛ́ fɔ a yɛ́ kó: «Kaamɔɔn ó wɛ́ɛ nan, áa i kíila.» 29Mwɛnyamu é ó myɛ́n mínngɛ, aa í lateeya kɛ́ í wíi kɛ́ táa Ɛnza nzáala. 30O wáati ó lɔ Ɛnza ndɛ́man lo só ó kɔ́ɔnnɔn bhá. Mati é a labhyɛ ywáa min nɔn, a tɛ́ɛ ó ywáa o le lɔ́. 31Yawudhyaa mínnu tɛ́ɛ ni Mwɛnyamu lé bhó ŋó kɔ́ɔnnɔn kɛ́ a yéesii, ólu a yé mínngɛ ké a wɛ́ɛ í lateeya kɛ i wíi kɛ́ bhɔ́, ólu i bhyáa a kwɔ́. I tɛ́ɛ í milila kó a kɛɛ tɛ́ɛ kábulu ywáa o le lɔ́ kɛ́ kásikɛ.

32Ɛnza ndɛ́ɛ ywáa min nɔn Mwɛnyamu é nan sé o ywáa o lɔ mínngɛ kɛ a yé, aa í kúnmɛɛn nɔ́kɛɛ a kɔɔ kɛ́ fɔ a yɛ́ kó: «Mantii ó, ni ile tɛ́ɛkɛ yánun, né bhádhyemannjɛ o tɛ́ mánfaa sayakɛ.» 33Ɛnza ŋé ale ni Yawudhyaa ólu kasitɔ o yé mínngɛ, oo a nílafin, kɛ́ a hákii o ɲáanmin. 34Aa í mánɲaankɛ kó: «Áa a su lo ywáa mínnɛɛn lé lɔ́?» I kó: «Mantii ó, nan ii táa a ywáa ó mánfɛɛ.»

35Ɛnza ŋé kásikɛ. 36O lɔ, Yawudhyaa mínnu tɛ́ɛ yé, ólu fɔ kó a twáanva gbú lé tɛ́ɛ a lé lɛ́. 37Waa lɔ́lu fɔ kó: «Ale min wɛ́ɛ fyóo ŋó ɲán olu láka, a tɛ tɛ́ sé kɛ́ a kɛ́ ké Laza kɛ́nan sayakɛ a?»

Ɛnza ŋé Laza lakuunnan

38 Ɛnza níla é fín íkwɔ, aa táa kábulu ywáa ó lɔ. Kábulu ó tɛ́ɛ káwa jáan lɔ lé lɔ́, íi káwagbuba lɔ́ lé ta kɛ́ a latuun. 39Ɛnza ŋé fɔ kó íi káwagbuba ó bhɔ́ kábulu ó lá lá. Cɛ min wɛ́ɛ sayakɛ, ó bhádhyemuso Mati é fɔ a yɛ́ kó: «Mantii ó, a swáan wɛɛ bhɔ́ sísan, kɛ mansɔɔ a sú ó lonin ŋwɛ́ɛn tée náannin bhɔ.»

40Ɛnza ŋé fɔ a yɛ́ kó: «Né mán a fɔ i yɛ́ ngó ni lánanya é í lɔ́, ngó í yáa Ala ta sébhaaya ó yé a?»

41Íi káwagbuba ó bhɔ́ yé, o kwɔ́ Ɛnza ŋé í ɲán láyɛɛ sáman kɛ́ fɔ kó: «Nvá, ní bálika bhɔ́la i yɛ́ kɛ mansɔɔ i wɛ́ɛ né yawi. 42Ní lɔ ŋóo ii né yawila wáati ó bɛ́, wáa ní ó fɔ́la le ké mɔɔn mínnu né lámiin nan, olu a lá a lá kó íle lée né cé.»

43Aa ó kóman o fɔ kɛ́ wɛ́ɛ mínngɛ, áa í kánnanwii kɛ fɔ kó: «Laza, í wíi kɛ́ bhɔ́!»

44Laza min ndɛ́ wɛ́ɛ sayakɛ, óo kúun kɛ́ bhɔ́ kábulu ó lɔ́. Féngbɛ tɛ́ɛn ŋo míninminin ndɛ́ɛ a bhóo óni a se ŋo man, óni kɛ féngbɛ lɔ́ tá kɛ a kún ŋo mánsili o lá. Ɛnza ŋé fɔ mɔɔn olu yɛ́ kó: «Áa a fwée ké aa táa.»

Mɔɔn olu fɛ́ kɛ́ Ɛnza nváa

Matiyu 26.1-5; Maki 14.1-2; Luka 22.1-2

45Yawudhyaa mínnu tɛ́ wɛ́ɛ nan Mwɛnyamu fɛ́ yé, olu Ɛnza ɲɛn kókɛnin ŋó yé mínngɛ, olu shɛ́ɛman ŋé lá a lá. 46Wáa lɔ́lu táa Falizɛn ŋólu fɛ́ yé, Ɛnza ŋé kó min ngɛ́, kɛ ó lɔ́sɔɔ í yɛ́. 47Faanlɛɛɲansebhaa olu kúnndii ólu ni Falizɛn ŋólu ɲɔ́ɔnɲe kɛ, kɛ́ fɔ kó: «Án ngáa mínnɛɛn lé kɛ́? Kɛ mansɔɔ cɛ míin ŋé káwako shɛ́ɛman ngɛ́la. 48Ni án ngɛ́ a tó yé ni a kɛ́ táa ɲɛ́n, mɔɔn bɛ́ yáa la a lá, o bhóo ó mán, Lomɛnka ólu yáa nan kɛ́ án ɲɛ́n ywáa sɛ́nnɛnyanin ŋó cé óni kɛ́ án síya o lábe.»

49Mɔɔn kée ndɛ́ɛ í cɛ́man min ndɔ́ɔ ko Kayife ó lé tɛ́ɛ faanlɛɛɲansebhaa olu kúnndiiba o lé o sá ŋó la, óo fɔ í yɛ́ kó: «Ále man fósi lɔ. 50Ale mán lɔ kó mɔɔn kée ngákan kɛ sayakɛ yamaan ó kósɔn ké án ndá síya o bɛ́ kɛ́nan hálaki, kó o waa físaa a?» 51O kóman ó mán bhɔ́ a gbú lɔ, o sá ŋó la, ale lé tɛ́ɛ faanlɛɛɲansebhaa olu kúnndiiba ó lé, a tɛ́ɛ célayakoman lé fɔ́la kó Ɛnza ngákan kɛ́ sayakɛ Yawudhyaa ólu síya o kósɔn. 52O tɛ́ tɛ kɛ́la i yɛ́ síya gbɛ́ɛgbɛɛ ó kósɔn, waa Ala dhyé ŋólu mínnu ɲɛ́nnzɛnnin yé, ké aa sé kɛ́ ólu ládhyɛ.

53Kɛ a ta o lo ŋo man, Yawudhyaa kúnndii olu bhyɛ a mán ko í káa a Fáa. 54A tɛ tɛ́ sɔ́nnan kɛ́ táa Yawudhyaa ólu cɛ́man bhée. O lé kósɔn Ɛnza ŋé táa dhyɛ́ ó Fán nɔ́ fɛ́ só lɔ́ lá min ndɔ́ɔ kó Efalayimu. Ale ni a yɛ́ kaamɔɔndhye ŋólu tó o ywáa ó lɔ́.

55O wáati ó lɔ́, Yawudhyaa ólu ta Hɔ́lɔɲanli o ɲánlagbɛ ló ŋó tɛ́ wɛ́ɛ sé. Mɔɔn shɛ́ɛman ndɛ́ɛ bhɔ́la sódhyenin ŋólu la kɛ́nan Yeluzalɛmu kɛ́ i yɛ́ɛ sɛ́nnɛnya kɛ́ kéeɲan ní í yɛ́ laanan óle. 56Mɔɔn olu tɛ́ɛ Ɛnza ywáa ɲíinnan. Kɛ í tó Ala bhatobhomba ó kɔ́ɔnnɔn, íi fɔ ɲɔ́ɔn ɲɛ́n kó mínnɛɛn wɛ́ɛ kɛ, bháa a mánfaa nan fɛ́ti míin man an? 57Faanlɛɛɲansebhaa olu kúnndii ólu ni Falizɛn ŋólu tɛ́ wɛ́ɛ tɔ́ nɔ síi kó ni mɔɔn mínngɛ Ɛnza ywáa lɔ, ko íi a ywáa yáa í lá, ké íi táa a myáan.

Currently Selected:

Yaya 11: MXX

Highlight

Copy