Yaya 10
10
Sáa ólu mangbɛngbɛmaabhɛɛ ó
1Ɛnza ngó: «Tínɲan in ne ní fɔ́la a yɛ́ ngó, ni mɔɔn min mán lo wɛ́ɛ ó lá ó fɛ́, fɔ kɛ́ í gbán kɛ́ lo Fán gbɛ́ɛ fɛ́, o tíi óo so ne lé, so née wé. 2Waa min ŋé lónan wɛ́ɛ o lá ó fɛ́, ó tíi o lée saa ólu mangbɛngbɛmaa ó lé. 3Lá ó kunnansiibhaa óo lá ó láka a lé le yɛ́. Saa ólu a kómankan ŋó myɛ́nnan, min núu a tá lé, aa ólu kíila í tɔ́ɔla kée ngée kɛ́ bhɔ́ ni íle kɛ́ɛnman. 4Ní a kɛ́ bhɔ́ ni a tá ólu bɛ́ lé kɛ́ɛnman kɛ́ bhá, aa i bhyáa i ɲɛ́n, tó saa ólu i bhyáa a kwɔ́, kɛ mansɔɔ íi a kómankan ŋó lɔ. 5I mánfaa bhyáa mɔɔn gbɛ́ɛ kwɔ́ fɛ́sɛ fɛ́sɛ, waa i káa bwée o tíi o ɲɛ́n ne, kɛ mansɔɔ i man a kómankan ŋó lɔ́.»
6 Ɛnza ŋé ó saanan ó lá í yɛ́. Waa, i mán bhɔ́ o ɲánle.
Ɛnza née saa ólu mangbɛngbɛmaabhɛɛ ó lé
7 Ɛnza ŋé fɔ ikwɔ kó: «Tínɲan in ne ní fɔ́la a yɛ́ ngó, saa ólu lónan lá min nvɛ́ wɛ́ɛ ó kɔ́ɔnnɔn, né lée o la o le. 8Mínnuu nán né ɲɛ́n, olu bɛ́ɛ so, óni bénganikɛbhaa lé le. Waa saa ólu man a lɔ́myɛn. 9Né lée lonaa ó lé. Ní mɔɔn min ngɛ́ tínmin né fɛ́ kɛ lo, ó tíi o yáa kísi. O yáa lo, kɛ́ bhɔ́, ó lo yáa a yɛ́ súnman ó sɔ́ɔ. 10So ŋó kwɛ́nnin ndɛ́ nánla fósi kósɔn ní soɲan ní mɔɔn fáa ni cáanni kɛ tɛ. Née nan lé ké mɔɔn ólu a ɲáanmanɲan o sɔ́ɔ fɔ kɛ́ wasa.
11Né lée saa ólu mangbɛngbɛmaabhɛɛ ó lé. Sáa ólu mangbɛngbɛmaa bhɛ́ɛ oo a ní ó dila a yɛ́ saa ólu kósɔn. 12Wáa bháalakɛdhye míin bháala o kɛ́la wɛ́ɛ o kósɔn tó a tá tɛ́ sáa ólu lé, ni ó kɛ wála ó nantɔ o yé, aa saa ólu tóla yénɔn lé, kɛ́ bwée. Tó wála óo saa olu láman láman myaan, tó kɛ saa ólu ɲɛ́nnzɛn. 13Bháalakɛdhye ŋo bwéela le, kɛ mansɔɔ wɛ́ɛɲiinmaa lée o lé, saa ólu hánmin ndɛ́ a lá. 14Né lée saa ólu mangbɛngbɛmaa bhɛ́ɛbhɛɛ ó lé. Ní ɲɛ́n saa ólu lɔ, ɲɛ́n saa ólu a nɔ. 15O lɔ́, ní Nvá lɔ, Nvá lo ŋan nɔ. Ni ní ó dila ɲɛ́n saa ólu kósɔn. 16Saa gbɛ́ɛlu móo mínnu tɛ́ wɛ́ɛ míin ngɔ́ɔnnɔn. Fɔ ní nan ólu lé le. I yáa ngómankan ŋó myɛ́n. I bɛ́ yáa kɛ́ sɛ́ɛ kée nɔn, óni mangbɛngbɛmaa kée ngwɔ́.
17Ní dí Nvá yɛ́, kɛ mansɔɔ, née ní ó díla kɛ sayakɛ tó kɛ́ a sɔ́ɔ kokwaakɛ. 18Mɔɔn sí tɛ́ se né ní ó bhɔ́la, né gbú lée a dila. Sé é né yɛ́ kɛ́ a dí, sé lo ŋé né yɛ́ kɛ́ a tá í kwɔ́. Ni o sɛliya o sɔɔ Nvá Ala lé fɛ.»
19O kóman ólu nan Yawudhyaa ólu Fála ɲɔɔn nan í kwɔ́. 20Í shɛ́ɛman ndɛ́ɛ fɔ́la kó: «Lámansatɔ lée wé, Fá lée a lɔ́, an ni a lɔ́myɛnnan mínnɛɛn le kósɔn?» 21Lɔ́lu kó: «A yɛ́ kóman ólu tɛ́ Lámansatɔ kóman lé lɛ́! Lámansatɔ ó sé kɛ́ fyóondɔ ó ɲán o láka a?»
Yawudhyaa ólu í bá Ɛnza nɔn
22Ala bhatobhomba ó ɲánlagbɛ ó tɛ́ɛ kɛ́la Yeluzalɛmu sa ŋóo sa, nɛ́nnɛnba ko wáati ó lɔ́. 23Ala bhatobhomba o lona ó ywáa míin kíila kó Swɛmannan yɛ́ gbáta ó Ɛnza ndɛ́ɛ yáala yáala lá yé. 24Yawudhyaa ólu táa a lámiin tó kɛ́ a mánɲaankɛ kó: «Ii wáati mínnɛɛn lé mánkɔɔnnan tó kɛ́ tínɲan o fɔ án ɲɛ́n? Ni kɛ́ kɛ́ óyoo ile lée Kílisi o lé, o fɔ án ɲɛ́n kɛ́ á gbɛ́.» 25Ɛnza ŋé í yawi kó: «Né wɛ́ɛ ó fɔ a yɛ́ kɛ́ bhá, waa a tɛ́ lála né lá. O bɛ́ kwɔ́, ní ko mínnu kɛ́la Nvá tɔ́ɔla, o bɛ́ɛ né sɛ́ɛya ládila. 26A tɛ́ lála né lá kɛ mansɔɔ ále tɛ́ ɲɛ́n saa sɛ́ɛ ó lɔ́. 27Ní ɲɛ́n saa ólu lɔ́, ólu ngómankan ŋó myɛ́nnan, olu bhyáala ne kwɔ́. 28Né lo ŋé ɲáanmanɲan wɛ́ɛbhɛɛ ó dila í mán. Í táa hálaki fɛ́sɛ fɛ́sɛ, mɔɔn sí tɛ́ sé kɛ́ í bwási móo lɔ. 29Nvá é mín dí né mán, o a bwó fé ŋó bɛ́ lé. Mɔɔn si lo ndɛ́ yé míin sé kɛ́ fé nɔ bwási Fá o bhóolɔ. 30Né ni Nvá é kéene lé.»
31Yawudhyaa ólu i wíi íkwɔ kɛ́ káwaguun ŋólu cɛ ko í káa a bwó. 32O lɔ, Ɛnza ŋé fɔ í yɛ́ kó: «Né wɛ́ɛ kóbhɛɛ shɛ́ɛman ngɛ Nvá bháaka lɔ, áa ólu yé. Áa fɛ́ kɛ́ né bwó o mínnɛɛn le kósɔn?» 33Yawudhyaa ólu a yawi kó: «Án mán fɔ ngo án ngáa i bwó kóbhɛɛ kɛnin ŋó léelu kósɔn nɛ, waa án ní fɛ́ kɛ́ í bwó i kɛ́ko kée ne kósɔn, kɛ mansɔɔ i wɛ́ɛ Ala tɔ́ɔ o cáan. Kɛ mansɔɔ ile Adamandhye ŋo, í lée i yɛ́ɛkɛla Ala lé!»
34Ɛnza ŋé í yawi kó: «A sɛ́wɛnin yé a yɛ́ sɛliya o Kitabu ó kɔ́ɔnnɔn ko Ala ko: Áa bhátofe néelu lé. 35Ala yɛ́ kóman o tɛ́ɛ fɔ́la mínnu yɛ́ a tɛ́ɛ olu kíila ko bhátofe. Án ni lɔ ŋóo min ŋwɛ́ɛn sɛ́wɛ Ala yɛ́ Kitabu o kɔɔnnɔn o tɛ́ sé kɛ yɛ́ɛman, 36Nvá é mɔɔn mín bhɔ́ kɛ́ a cé dínɲan ó kɔ́ɔnnɔn, a kó ó mánko: ‹I wɛ́ɛ Ala tɔ́ɔ o cáan.› Kɛ mansɔɔ né wɛ́ɛ fɔ ngó ní Ala Dhyénjɛ le. 37Ni á kɛ́ kɛ́ ké ndɛ́ Nvá tá kó olu kɛ́la, a kɛ́nan lá né lá. 38Wáa ní ó kɛ́la, o bɛ́ kwɔ́, a tɛ́ lála né lá. Sísan, ní bháala mínnu kɛ́la, áa lá olu lá, ké áa sé kɛ́ lɔ ŋóo né ni Nvá é kéene.»
39O lɔ́, í tɛ́ɛ fɛ́ kɛ́ a myáan íkwɔ wáa aa i yɛ́ɛ bwɔ́si í bhóo.
40Yaya tɛ́ wɛ́ɛ mɔɔn bátize ó lámyaan Zuludɛn bháji ó kwɔ́man ywáa min nɔn, Ɛnza ŋé i kwɔ́sɛɛ íkwɔ kɛ́ táa tó o ywáa ó lɔ́. 41Mɔɔn shɛ́ɛman ŋé táa a sáala. Í tɛ́ɛ fɔ́la kó: «Yaya kwɛ́nnin mán káwako fósi kɛ́, wáa aa min nvɔ cɛ miin ŋan kó ó lɔ́, o bɛ́ wɛ́ɛ kɛ́ tínɲan lé.» 42Mɔɔn shɛ́ɛman ŋé lá Ɛnza nan o ywáa ó lɔ́.
Currently Selected:
Yaya 10: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
