Yaya 9

Ɛnza ŋé cɛfyoondɔ lɔ́ ɲán lákala

1Ɛnza ndíminndɔ óo cɛ lɔ́ yé min ŋe wóo fyóo ne. 2Kaamɔɔndhye ŋólu Ɛnza mánɲaankɛ kó: «Kaamɔɔn, mínnɛɛn le kósɔn cɛ míin ŋe wóo fyóoɲan lɔ́? Ale gbú ta yúumu ó kósɔn ŋan, wáman a mwɛ́ɛnbhaa ólu ta o?»

3 Ɛnza ŋé í yawi kó: «Ale ta yáacɛ o tɛ́, a mwɛ́ɛnbhaa ólu ta yáacɛ o tɛ́. Wáa óo kɛ́ lé, ké Ala tá sébhaaya o waa yáa ale sɔ́ɔbu lá. 4Tée óo máannan wáati min nɔn, án ngákan kɛ án njébhaa o yɛ bháala ó kɛ́ o wáati o le lɔ́. Ni sú o kɛ́ kwó, mɔɔn si tɛ́ sé kɛ bháala kɛ́ bhée. 5Kɛ́ né tó dínɲan lɔ́, né lée dínɲan tá kɛ́ɛnɲan ó lé.»

6Ɛnza ŋé ó kóman ólu fɔ kɛ́ wɛ́ɛ mínngɛ, aa í láji bwɔ́ lúuman kɛ́ ó bhɔɔ dɔ́ɔnin ŋó lwée kɛ́ o gbóo cɛfyoondɔ ó ɲán o man 7kɛ́ fɔ a yɛ́ kó: «Táa i ɲán o kwó Silowe jí jáan ó lɔ́.» Silowe kɔ́ɔ ó tɔ́ɔ kó céladhye. Fyóondɔ ó táa i ɲán o kwó yé, a kwɔ́sɛɛtɔ ó, a tɛ́ɛ yéli kɛ́la.

8A siiɲɔɔn olu óni a lɔmaa mínnu tɛ́ɛ a lɔ kɔ́ɔ fáanlɛɛ kófɔ ó man, ólu nan a yé, íi fɔ kó: «Cɛ min ndɛ́ɛ í síila yánun kɛ́ dɛ́lili kɛ́, ó tɛ́ míin ne a?» 9Lɔ́lu kó ale lée wé. Lɔ́lu kó ale tɛ́ o le, ko i bhɔ́nin ŋé ɲɔ́ɔnnan lé. Wáa cɛ ó kó: «Né lée wé.» 10Íi a mánɲaankɛ kó: «Tó, i ɲán óo í láka dí lé?» 11Aa i yawi kó: «Íi cɛ min ngíila kó Ɛnza, ó lée bhɔɔ o lwée kɛ́ ó gbóo ɲán ó man kó ndáa ɲán o kwó Silowe jí ó lɔ́. Ní táa ɲán o kwó, né ɲán óo í láka.» 12Íi a mánɲaankɛ kó: «Aa mín?» Aa í yawi kó mán lɔ.

Falizɛn ŋólu fyóonjɛ o kɛ́ɛnyanin ŋo manɲaankɛ lá

13Cɛ min ndɛ́ɛ fyóo né, íi ó myáan kɛ́ táa ó lé Falizɛn ŋólu saala. 14Waa Yawudhyaa olu yɛ́ lɔnwɛɛnlilo ŋo lé tɛ́ɛ wé Ɛnza ŋé bhɔɔ ó lwée kɛ́ cɛ ó ɲán o láka ó lo ŋo lé lá. 15Falizɛn ŋólu cɛ ó mánɲaankɛ kó i ɲán oo i láka dí lé. Aa í yawi kó: «Aa bhɔɔ o lé gbóo ɲán ó man, ní ɲán o kwó, ní yéli kɛ́la sísan.»

16Falizɛn ŋó lɔ́lu a fɔ kó: «O cɛ ó tɛ́ lɔnwɛɛnlilo ŋó bhátola. O sán ó lɔ́, a mán bhɔ́ Ala fɛ́ yé.» Waa lɔ́lu kó: «Yuumutɔ é sé kɛ́ káwako míin ɲɔ́ɔn ngɛ́ a?» O ywáa ó lɔ́, í yɛ́ kóman óo fwɔ́ ɲɔ́ɔn ngwɔ́ tó íi i lɔtaa.

17Íi cɛ ó mánɲaankɛ i kwɔ́ kó: «Cɛ míin i ɲán ó lákanin, í lée mínnɛɛn lé fɔ́la a yɛ́ kó o lɔ́?» Aa í yawi kó: «Cɛ ó Céla lé lé.» 18O bɛ́ kwɔ́, Yawudhyaa ólu mán sɔ́n kɛ́ la a lá kó cɛ ó tɛ́ɛ fyóo né le kɔ́ɔ, fɔ íi a mwɛ́ɛnbhaa ólu kíi 19kɛ í mánɲaankɛ kó: «A wóodhye née cɛ míin né a? Áa wóo fyóo né le a? Aa kɛ́ díi tó aa yéli kɛ́la sísan?» 20A mwɛ́ɛnbhaa ólu í yawi kó: «Án ngwɛ́nnin a lɔ́ ŋóo án dhyé née wé, a fyóondɔ lée wóo. 21Waa a ɲán ó lákako ó, án ndɛ́ fósi lɔ́ o lɔ́. Mɔɔn míin a ɲán o láka án ndɛ́ o lɔ, áa a gbú mánɲaankɛ o lá, dhyémuu tɛ́ a lé bhée, aa sé kɛ́ ó ɲánfɔ a yɛ́.» 22A mwɛ́ɛnbhaa ólu ó fɔ kɛ mansɔɔ i tɛ́ɛ sháannan Yawudhyaa ólu ɲɛ́n. I tɛ́ wɛ́ɛ bhyɛ lɔ́ kó ni mɔɔn óo mɔɔn kɛ́ fɔ kó Ɛnza née Kílisi o lé, kó ó tíi o táa lo kaangɛbho ŋó kɔ́ɔnnɔn bhée. 23O kósɔn, a mwɛ́ɛnbhaa ólu fɔ́ ko íi a gbú mánɲaankɛ, kó dhyémuu tɛ́ a lé bhée.

24Cɛ min ndɛ́ɛ fyóo ne Falizɛn ŋólu cɛ ó kíi i kwɔ́ kɛ́ fɔ a yɛ́ kó áa Ala kunnanwee: «Án ni a lɔ ŋóo i ɲán ó lákabhaa óo yúumutɔ lé lé. Tínɲan o fɔ án ɲɛ́n Ala ɲánkɔɔ.» 25Aa í yawi kó: «Né kwɛ́nnin mán lɔ ni yúumutɔ lée a lé lɛ́! Ní kó kéene lɔ, né tɛ́ɛ fyóo né lé, waa sísan ní yéli kɛla.»

26Íi a mánɲaankɛ kó: «Aa mínnɛɛn lé kɛ́ í lá? Aa i ɲán ó láka dí lé?» 27Cɛ óo i yawi kó: «Ŋwɛ́ɛn ó ɲánfɔ a yɛ́ kɔ́ɔ, a mán í tóomanlɔ nɔ́n. Mínnɛɛn le kósɔn áa fɛ́ kɛ́ ó kóman kée ŋó lɔ́myɛn í kwɔ́? Bháanin á lée fɛ́ kɛ́ kɛ́ a yɛ́ kaamɔɔndhye ne a?»

28Falizɛn ŋólu a lámyaan kɛ́ cɛ ó nɛɛn, íi fɔ a yɛ́ kó: «Ile lée a yɛ́ kaamɔɔndhye ne. Án née kwɛnnin ŋé Musa ta kaamɔɔndhye ne lé. 29Án ni a lɔ ŋóo Ala é kóman Musa yɛ́. Waa míin ni, án mán ó bhɔ́laa lɔ́.»

30Cɛ óo fɔ i yɛ́ kó: «Aa, ó lée káwako ó lé. A mán a bhɔ́laa o lɔ waa a wɛ́ɛ né ɲán ó láka. 31Án ngwɛ́nnin ŋan lɔ ŋóo Ala tɛ́ yúumutɔ ó yɛ́ bhátoli ó yawila. Wáa mɔɔn míin sháannan Ala ɲɛ́n tó aa a sao ó kɛ́la, aa ó lé yawila. 32Án mán myɛ́n bhá kó mɔɔn míin wóo fyóoɲan lɔ́, kó lɔ́ wɛ́ɛ ó ɲán o láka. 33Ni cɛ míin ndɛ́man bhɔ́ Ala fɛ́ yé, a tɛ mánfaa sé fósi kɛla.» 34Íi fɔ a yɛ́ kó: «Ile kɛ́ tá i wóowaati ó mán ile gbútuu o bɛ́ɛ wóo yúumu o lé lɔ, tó ii nán i lɔ́ yánun kó ii án ngálanan!» Ii a gbɛ́ kɛ́ a lábhɔ kɛ́ɛnman.

Yɛ́ɛtii lú é fyóondɔ gbú o lé?

35 Ɛnza ŋé a myɛ́n ko í wɛ́ɛ a gbɛ́ mínngɛ, aa nan a labhyɛ. Aa a mánɲaankɛ kó: «I wɛ́ɛ lá mɔɔn Dhyénjɛ ó lá a?» 36Cɛ ó a yawi kó: «Mantii ó, yɛ́ɛtii é wé, ké ní lá a lá?» 37Ɛnza ngó: «I wɛ́ɛ a yé kɛ́ bhá. Ale lée kómanla i yɛ́ nín.» 38Cɛ ó kó: «Né o. Wɛ́ɛ lá i lá Mantii ó.» Aa i kúnmɛɛn nɔ́kɛɛ Ɛnza ngɔ́ɔ.

39O kwɔ́, Ɛnza ngó: «Née nan dínɲan míin nɔn kíti o le kósɔn. O lɔ, mínnu ɲán tɛ́ yéli kɛ́la, ké olu ɲán o a í láka. Min núu yéli kɛ́la, ké olu a kɛ fyóo ne.» 40Falizɛn mínnu tɛ́ɛ ni a lé o ywáa ó lɔ́ ólu a yɛ́ kóman ó myɛ́n, íi a mánɲaankɛ kó: «Án née fyóo né lé a?» 41Ɛnza ŋé í yawi kó: «Ní a tɛ́ɛ kɛ́ fyóo né, yúumu tɛ́ táa kɛ́ a man. Waa áa fɔ́la mínngɛ kó aa yéli kɛ́la, o kósɔn, a hálakinin ɲé wáati o bɛ́.»

Currently Selected:

Yaya 9: MXX

Highlight

Copy