Luka 14
14
Ɛnza ŋé yaangalotɔ lɔ lákɛɛnya lɔnwɛɛnlilo ó la í kwɔ́
1 Lɔnwɛɛnlilo nɔ la, Ɛnza ŋé táa Falizɛn ŋólu yɛ kunndii ó lɔ yɛ lú ó mán kɛ́ lɔ́minkɛ. Mɔɔn mínnu tɛ́ɛ yé, ólu tɛ́ɛ a lakɔɔsila. 2Cɛ lɔ́ tɛ́ɛ Ɛnza ɲánkɔɔ, fúunnvuu yangalo lé tɛ́ɛ o lá. 3Ɛnza ŋé kóman ó tá kɛ sɛliya kaamɔɔn ólu ní Falizɛn ŋólu mánɲaankɛ kó: «A láanin ɲé kɛ yaangalotɔ ó lákɛɛnya lɔnwɛɛnlilo ŋó la á, wáman a laanin ndɛ́?»
4Wáa i mán a yawi. O wáati ó lɔ, Ɛnza í bhóo túu yaangalotɔ ó la kɛ a lákɛɛnya. O kwɔ́, cɛ mín ndɛ́manngɛnnɛn Ɛnza ŋé fɔ ó yɛ kó: «Ii sé kɛ táa.» 5O kwɔ́ Ɛnza ŋé fɔ i yɛ kó: «Yɛ́ɛtii é a cɛ́man ní a dhyénjɛ, wáman a yɛ nisi o kɛ́ i bé kɔlɔ ŋó kɔ́ɔnnɔn lɔnwɛɛnlilo ŋó la, a táa i lateeya kɛ táa ó lábhɔ jónan?»
6I man sé kɛ ó ɲaankɛli ó yawi.
Yɛ́ɛlɔbwoɲanbhaa ólu yáa i manyii
7Ɛnza ŋé yé mínngɛ óo i wɛɛ mɔɔn mínnu kíi kɛ́nan lɔ́minkɛlaa ó lɔ, ko óluu siilaabhɛɛ ólu lɔtɔnmɔn nan. Áa saanan miin nvɔ́ i yɛ kó: 8«Ní mɔɔn lɔ kɛ́ i kíi fúusiilaa lɔ lɔ́min o mán, í kɛ́nan í síi siilaabhɛɛ ó lɔ. Kɛ́dhyaa, mɔɔn kíinin ŋólu cɛ́man, i wɛ́ɛ mɔɔn gbɛ́ɛ kíi íi mín nvísayala íle lé. 9Mɔɔn mín ŋé a fyáa ó bɛ́ kíi, ní ó kɛ́nan fɔ i yɛ kó íi i wíi kɛ́ siilaa o dí ó tíi ó mán, o lɔ, íle yáa wíi ní maloya lé, kɛ́ táa í síi bɛ́ kwɔ́man. 10Wáa ní i kɛ́ i kíi, táa i síi siilaa lɔ lɔ́ bɛ́ kwɔ́man, mɔɔn mín ŋwɛ́ɛn i kíi ní ó kɛ́nan wáati mínnɔn, o waa a fɔ i yɛ kó: ‹Ndwáanva, nan i síi ɲɛ́n!› O wáati ó lɔ, i yáa kunnanwee nzɔ́ɔ i lɔ́minkɛ ɲɔ́ɔn ŋólu cɛ́man. 11Tínɲan in né, ní mɔɔn óo mɔɔn kɛ́ a yɛ́ɛ lɔ́bwoɲan, ó tíi o yáa i mányii shɔɔ; wáa ní mɔɔn óo mɔɔn kɛ́ a yɛ́ɛ mányii, Ala yáa ó tíi ó bwóɲan.»
12Cɛ mín ndɛ́ wɛ́ɛ Ɛnza ngíi lɔ́min ó mán, áa fɔ o yɛ kó: «Ní i kɛ́ sunmanmba lɔ́bhyɛ mɔɔn ólu yɛ, i kɛ́nan i tɛ́ɛcɛ ólu, wáman i bhádhye ŋólu, wáman kabhyaa ŋólu, wáman i síiɲɔɔn nanfootii ólu kíi. Kɛ mansɔɔ íi sé kɛ́ i kíi lɔ́min mán kɛ i yɛ́ yúu ó saa. 13Wáa, ní i fɛ kɛ sunman dí mɔɔn ólu mán, ii faannda ŋólu óni séngee ŋólu óni nanmaannin ŋólu óni fyóondɔ ólu kíi. 14Ní i kɛ o kɛ́, i yáa lwáau sɔ́ɔ, kɛ mansɔɔ i táa sé kɛ i yɛ yúu ó saa, Wáa Ala yáa í saa o dí síin mɔɔn téenin ŋólu kúunno ŋó lá.»
Saanan míin lá lɔ́min ó ka
Matiyu 22.1-10
15Mɔɔn mínnu tɛ́ɛ ni ale lɔ́min kɛ́ o lá, olu o kóman ó myɛ́n mínngɛ, o kée ŋé Ɛnza mánɲaankɛ kó: «Mɔɔn mínnu káa lɔ́minkɛ Ala yɛ́ mansaya ó lɔ, nisɔdhyaa é ólu yɛ́!»
16Ɛnza ŋé a yawi kó: «Ló nɔ lá cɛ lɔ́ tɛ́wɛɛ sunmanmba lɔ́bhyɛ kɛ́ mɔɔn shɛ́ɛman ngíi. 17Lɔ́minkɛ wáati óo sé mínngɛ, aa a yɛ bháalakɛdhye ŋó bhyáashaa kɛ́ táa mɔɔn kíinin ŋólu kíi kó: ‹Aa nan sísan, sunman ŋó bɛ́ wɛ́ɛ í lɔ́bhyɛ.› 18Wáa lɔ́min kó óo fɔ́ mɔɔn mínnu yɛ ólu bɛ́ɛ yafaman dɛ́li kée ngée. Mɔɔn jónan óo fɔ bháalakɛdhye ŋó yɛ kó: ‹Né wɛ́ɛ sɛɛn lɔ́ sá, né kɛ́ɛ tɛ́ɛ o mánfɛɛ. Ní i dɛ́lila, táa fɔ a yɛ kó aa yafa né mán.› 19Lɔ́gbɛɛ é fɔ a yɛ kó: ‹Né wɛ́ɛ sɛɛnkɛnisi tá nzá, ní táala bháala kɛ́la ólu la kɛ í mánfɛɛ. Ní i dɛ́lila, táa fɔ a yɛ kó aa yafa né mán.› 20Lɔ́gbɛɛ é fɔ a yɛ kó: ‹Né wɛ́ɛ muso fúu kɛ kwáalenin, o lé kósɔn né táa sé kɛ́ táa.›
21Bháalakɛdhye ŋó i kwɔ́sɛɛ kɛ táa o bɛ́ ɲánfɔ a kunndii ó yɛ. A kunndii ó mwɛ́nnɛn kɛ fɔ a yɛ kó: ‹I lateeya kɛ táa só ó yaman ywáa ólu lɔ, óni sháaba ólu la, kɛ́ faannda ŋólu ní nanmaannin ŋólu ní fyóondɔ ólu ní sengee ŋólu kíi kɛ́nan ni íle yánun.› 22Bháalakɛdhye ŋó fɔ a yɛ kó: Mantii ó, ‹Íi mín nvɔ́ né wɛ́ɛ ó kɛ, wáa bhó ŋó mán fá bhá.› 23Bháalakɛdhye ŋó kunndii ó fɔ a yɛ kó: ‹Bhɔ́ kɛ́ táa sháafɛɛ ŋólu lá óni só ó láfɛ tóo ólu la, i kɛ́ mɔɔn mínnu sɔ́ɔ yé, ii kó bɛ́ kɛ ké ii nan, sáan ɲɛ́n bhó ŋó yáa fá. 24Ní fɔ́la a yɛ ngó mɔɔn mínnu tɛ́wɛɛ kíi jónan, ó lɔ táa né yɛ́ lɔ́min ó lɔ lɔ́ɔ.› »
Ɛnza ɲɛ́n kaamɔɔndhye ŋó kákan kɛ kó mínnu kɛ
Matiyu 10.37-38
25Yaman ó táatɔ ó ni Ɛnza né. Ɛnza ŋé i ɲán yɛ́ɛman i lɔ, tó kɛ fɔ i yɛ kó: 26«Ní mɔɔn óo mɔɔn kɛ́nan né mán, ní a lɔ́bhɛnin ndɛ́ kɛ i bá a fá lɔ, óni a wóobhaa lɔ, óni a muso, óni a dhyé ŋólu, óni a bhádhyemannjɛ ólu, óni a bhádhyemusoman ŋólu, óni a gbú ní o lɔ, o tíi ó tɛ́ sé kɛ kɛ́ né yɛ kaamɔɔndhye né. 27Ní mɔɔn mín mán a yɛ gbáanɲii ó tá kɛ bhyáa né kwɔ́, o tíi ó tɛ́ sé kɛ kɛ́ né yɛ kaamɔɔndhye né.
28A cɛ́man ní mɔɔn lɔ é fɛ kɛ sangaso já nɔ, a yáa i sii ó tún kɛ a lɔsaa ó yacesii kɛ a mánfɛɛ ní a yɛ wɛ́ɛ ó yáa sé kɛ ó bháala ó lábha. 29Ni ó tɛ́, ní a kɛ ó sangaso ó zúsii, ní a man sé kɛ́ a lábha, mɔɔn mínnu káa ó yé, ólu yáa yɛ́ɛ bhɔ́ a lɔ, 30kɛ́ fɔ kó: ‹Cɛ míin ŋwɛ́ɛn bhó nɔ́ ó lámyaan, wáa a man sé kɛ a lábha.›
31Ni mansacɛ lɔ kɛ i wíi kó a kɛ́ɛ tɛ́ɛ kɛɛ bé mansacɛ gbɛ́ɛ ka, aa í síila lé ótun kɛ́ í míli kɛ́ mánfɛɛ ni a yáa sé cɛ wáa mwaa (20.000) ŋó kɛlɛla ní a yɛ cɛ wáa tá (10.000) ŋó lé. 32Ní a kɛ́ táa yé kó a tɛ́ sé, aa yáa céla bhyáa kɛ́ táa ɲíin a fɛ kó ii kɛɛ o lábhyaa ké ii ywáaja nɔn. 33O ɲán ó mán álee cɛ́man ní mɔɔn mín mán i bá a bhóofe ŋólu lɔ o tɛ́ sé kɛ́la né yɛ kaamɔɔndhye né.»
Ní Kɔɔ ó tínminya ó kɛ bhɔ́ a lá
Matiyu 5.13; Maki 9.50
34«Kɔɔ ó fémɛɛ le lé, wáa ni kɔɔ ó tínminya ó kɛ́ bhɔ́ a lá, mínnɛɛn lée sé kɛ́ a tínminya bhée? 35O sán ó lɔ, a tɛ́ sé kɛ́la nɔ́ɔn le, a tɛ́ fósi ɲán lúukolo ó mán. Aa í láfii lá kɛ́ɛnman le. Tóo é mín ngún kɛ́ myɛ́nninkɛ, o á myɛ́nninkɛ.»
Currently Selected:
Luka 14: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
