Luka 15
15
Saanan míin la saa túunnin ŋó ka
Matiyu 18.12-14
1Nísɔɔnmyaanbhaa ólu ní kóyoongɛbhaa ólu bɛ́ tɛ́ɛ i mangbaala Ɛnza nan kɛ a yɛ kóman ó lɔ́myɛn. 2Falizɛn ŋólu ní Sɛliya kaamɔɔn ólu tɛ́ɛ i mánkomankomanla. I tɛ́ɛ fɔ́la kó: «Cɛ míin ŋé yúumukɛbhaa ólu myaanla cɛ́ɛne kɛ lɔ́minkɛ ní íle.»
3Wáa Ɛnza ŋé saanan lɔ lá i yɛ́ kó:
4«Mɔɔn mínnɛɛn lée á sɛ́ɛ lɔ, tó saa kɛnmɛn é a bhóo, ni o kée ngɛ́ túun, a táa a tɔ bíkɔɔnndɔ ni kɔɔnndɔ ŋólu bhyáanin ndó la dhyɛ́ ó ka kɛ́ táa kée ŋó ɲíinnaa lɔ fɔ kɛ́ a yé a? 5Ni a kɛ a yé wáati mínnɔn, aa a tá kɛ a lá i kanman ni nisɔdhyaa lé. 6Ni a kɛ í kwɔ́sɛɛ kɛ sé lúman wáati mínnɔn, aa a tɛ́ɛcɛ ólu ní a siiɲɔɔn ólu kíi kɛ fɔ i yɛ kó: ‹Án ni án nisɔdhyaa ɲɔ́ɔn nvɛ́, kɛ mansɔɔ ŋwɛ́ɛn ɲɛ́n saa túunnin ŋó yé.› 7O ɲán ó mán ní fɔ́la a yɛ ngó ní yúumutɔ ó kée ngɛ́ díminsa kɛ fála a yɛ kóyoo ŋólu la kɛ a yóo ó yɛ́ɛman, nisɔdhyaa yáa kɛ́ sángboo ó lɔ o tíi ó kósɔn, kɛ tínmin mɔɔnteenin bíkɔɔnndɔ ni kɔɔnndɔ mínnu mánko tɛ́ díminsali ó lá.»
Saanan míin lá wɛ́ɛgbɛ túunnin ŋó ka
8«Wáman ní wɛ́ɛgbɛ dhyé ndá ngɛ́ kɛ muso lɔ́ bhóo, ní ó kée ngɛ́ túun, a tɛ́ laman ŋó lamaan kɛ bhó ŋó máncɛ kɛ ɲíin cɛ́ɛne fɔ kɛ a yé a? 9Ní a kɛ yé wáati mínnɔn, a yáa a táamanɲɔɔn ólu ní a siiɲɔɔn ólu kíi kɛ fɔ i yɛ kó: ‹Án ni án nisɔdhyaa ɲɔ́ɔn nvɛ́, kɛ mansɔɔ né yɛ wɛ́ɛgbɛ dhyé ngée mín ndɛ́ wɛ́ɛ túun, né wɛ́ɛ ó yé.› 10O ɲán ó mán, ní fɔ́la a yɛ ngó ní yúumutɔ kée ngɛ́ díminsa kɛ́ fála a yɛ kóyoo ŋólu la kɛ a yóo ó yɛ́ɛman, o ɲán ó mán nisɔdhyaa ó yáa kɛ́ Ala yɛ malɛɛka ólu cɛ́man o tíi ó kósɔn.»
Saanan míin lá dhyé ndúunnin ŋó ka tó a wɛɛ yé
11Ɛnza ŋé fɔ íkwɔ kó: «Dhyénjɛ fyáa tɛ́ɛ cɛ lɔ bhóo. 12Lɔ́ɔcɛ man ŋóo fɔ a fácɛ yɛ kó: ‹Nvá, né káa wɛ́ɛ mín nzɔ́ɔ í cɛ́n ó lɔ, o dí né mán.› Oo kɛ́ mínngɛ a fá é a yɛ nanfoo ó lɔ́taa i cɛ. 13Tée dáman tínminnin ŋó kwɔ́, lɔ́ɔcɛ man ŋóo fé mínnu sɔ́ɔ cɛ́n ó lɔ, aa ólu fele kɛ táa ní ó wɛ́ɛ ó lé yamaan já nɔ lɔ, kɛ o bɛ́ lɔ cáan kakaaya ó lɔ. 14A yɛ wɛ́ɛ óo wɛɛ wáati mínnɔn, kɔ́ɔnba é ló o yamaan ó lɔ, a yɛ lɔ́min ŋóo dɛ́sɛ. 15A táa kɛ́ ó yamaan ó lúudhye ŋó lɔ́ yɛ́ bháalakɛ dhyé né, óo a tá kɛ a yɛ́ gbóyoonin ŋólu kúnnansii. 16A tɛ́ɛfɛ kɛ gbóyoonin ŋólu yɛ lɔ́min ó lɔ lɔ́ɔ kɔ́ɔn ó bhóo, wáa mɔɔn sí tɛ tɛ́ ó dila a mán. 17Aa i míli o wáati ó lɔ́ kɛ́ fɔ i kɔɔnnɔn kó: ‹Bháalakɛdhye nzhɛ́ɛman ŋé né fá bhóo, óluu lɔ́minkɛla fɔ kɛ́ a tɔ́ tó, né káa fáa kɔ́ɔn lá ya.› 18Né káa ŋwíi kɛ táa nvá fɛ yé kɛ fɔ a yɛ ngó: ‹Nvá, né wɛ́ɛ Ala yáacɛ tá, kɛ íle yáacɛ tá. 19Né mánngan kɛ kíi bhée kó í dhyé. Ii né myaan óyoo í yɛ bháalakɛdhye.› 20Aa i wíi kɛ́ sháa ó tá kɛ́ táa a fácɛ saala.
Kɛ a tó ywáaja nɔn, a fácɛ é a yé, a hínnɛn é ló a lɔ. Aa bwée kɛ́ táa í fínin a dhyénjɛ mán. 21Aa fɔ a fácɛ yɛ kó: ‹Nva, né wɛ́ɛ Ala yáacɛ tá kɛ íle yáacɛ tá. Né mánngan kɛ kíi bhée kó i dhyénjɛ.› 22Wáa a fá é fɔ a yɛ bháalakɛdhye ŋólu yɛ kó: ‹Aa í lateeya kɛ́nan ni deeke ó bɛ́ lɔ cɛ́ɛ ŋó le, kɛ́ a bhyaa a kannan. Aa bhóolanɛɛ bhyáa a bhóo ó la kɛ sawaa ló a sénan. 23Aa nan ní nisidhye nvánin yɛ́ɛla óle kɛ́ a fáa. Án ní lɔ́ɔ kɛ án ɲáanli, 24kɛ mansɔɔ né dhyé míin mánfɛɛ nín, a tɛ́ wɛ́ɛ sayakɛ, a wɛ́ɛ kúun. A tɛ́wɛɛ túun, ŋwɛ́ɛn a yé.› Ii i ɲáanli kɛ i nisɔdhyaa.
25O wáati o lɔ, dhyénjɛ jónan ó tɛ́ɛ sɛɛn mán. A kwɔ́sɛɛtɔ ó, aa sunɲan lú ó lá mínngɛ, aa lɔnakan ŋó myɛ́n, óni lɔngɛkan ŋó. 26Aa bháalakɛdhye ŋólu kée ngíi kɛ́ o mánɲaankɛ kó mínnɛɛn lée wɛ́ɛ kɛ́ lúman. 27Bháalakɛdhye ŋó a yawi kó: ‹I lɔ́ɔcɛ wɛ́ɛ í kwɔ́sɛɛ kɛ́ nán, i fá wɛ́ɛ nisidhye nvánin yɛ́ɛla o kée nváa, kɛ mansɔɔ a wɛ́ɛ í kwɔ́sɛɛ kɛ́ɛnya lɔ.›
28Oo kɛ́ mínngɛ dhyénjɛ jónan óo mwɛ́nnɛn, a tɛ́ tɛfɛ kɛ́ ló lú ó mán. A fá é bhɔ́ kɛ táa a dɛ́li kó aa ló. 29Wáa áa fɔ a fá yɛ kó: ‹A mánfɛɛ, né sánɲin shɛ́ɛman née nín, née bháala kɛ́la i yɛ. Né mán mbá i yɛ kóman o kée mán bha. Yáanin i mán bhamuso kée ndí né mán bhá, ké né ni ndwáanva ólu a án ɲáanli ɲɔ́ɔn nvɛ́. 30Wáa í dhyé míin mánfɛɛ nín, a wɛ́ɛ táa i yɛ nanfoo ó bɛ́ cáan ní sínngbiiba ólu le. Ale kósɔn íi nisidhye nvánin yɛ́ɛla ó fáa a yɛ.› 31Wáa a fá é fɔ a yɛ kó: ‹Nyé ŋó, íi né tɔ́ɔfɛ wáati bɛ́, fé mínnuu né bhóo, ó bɛ́ é í tá lé le. 32Wáa án ngákan kɛ án nisɔdhyaa kɛ́ án ɲáanli, kɛ mansɔɔ í lɔ́ɔcɛ mín ŋé nín, a tɛ wɛ́ɛ túun, wáa a wɛɛ yé, a wɛɛ kɛ óyoo a wɛɛ sayakɛ kɛ kúun.› »
Currently Selected:
Luka 15: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
