Luka 7
7
Swáasikunndii ó yɛ́ lánanya ó
Matiyu 8.5-13; Yaya 4.46-54
1Ɛnza ŋé wɛ́ɛ kómanla yaman ó yɛ́ mínngɛ, aa táa Kapɛnamu só o kɔ́ɔnnɔn. 2Lomɛn swaasikunndii lɔ tɛ́ɛ yé, o yɛ́ bháalakɛdhye o tɛ́manngɛnnɛn, fɔ́ a tɛ́ɛfɛ kɛ́ sayakɛ. O bháalakɛdhye kó tɛ́ɛ dí a kunndii ó yɛ́ koyoongɛ. 3O cɛ oo Ɛnza ngó myɛ́n mínngɛ, aa Yawudhyaa ó cɛba lɔ́lu cé a man kɛ́ táa a dɛ́li kó aa nan a yɛ́ bháalakɛdhye ŋó lákɛɛnya. 4Ii Ɛnza yé mínngɛ, íi a dɛ́li koyoongɛ kó: «I kákan kɛ́ cɛ míin dhyɛman. 5Kɛ mansɔɔ án ɲɛ́n síya ó kó a dí a yɛ́. Ale lée í lɔ́ án ɲɛ́n sɛ́ɛbho ó lɔ ó bhóobhɔ ó bɛ́ lá.»
6O lɔ, Ɛnza ŋé táa ní ile. Ii sunɲan bhó ŋó la mínngɛ, swaasikunndii ó a táamanɲɔɔn lɔ́lu cé kɛ táa fɔ Ɛnza ɲɛ́n kó: «Kaamɔɔn, i kɛ́nan i yɛ́ɛ sɛɛ, né télenin ndɛ́ ké íi lo né yɛ́ bhó ŋó kɔɔnnɔn, né mánngan ni o le. 7O lé kósɔn, né gbú mán táa i sáala. Wáa kóman kée nvɔ, né yɛ́ bháalakɛdhye ŋó yáa kɛ́ɛnya. 8Kɛ mansɔɔ kunndii lɔ́lu né bhóo, né yɛ́ɛ yé swaasi lɔ́lu kunnan. Ni sé kɛ a fɔ kée ɲɛ́n kó: ‹Táa yánun›, aa táa. Kɛ́ fɔ a lɔ́gbɛɛ yɛ́ kó: ‹Nan yánun›, aa nan. Kɛ́ fɔ ɲɛ́n yɔ ŋó yɛ kó: ‹Míin ngɛ́ tá›, tó aa ó kɛ.»
9Ɛnza ŋé ó kóman ó myɛ́n mínngɛ, aa káwakoya cɛ ó kósɔn. Aa í ɲán yɛ́ɛman kɛ́ fɔ a táamanɲɔɔn ólu yɛ kó: «Tó ní fɔ a yɛ ngó yáanin Izalayɛli mɔɔn olu lɔ, né mán mɔɔn yé bhá mín nanin ŋé né la kɛ tínmin cɛ míin nga.»
10Swáasikunndii o yɛ́ céladhye ŋólu í kwɔ́sɛɛ lúman mínngɛ, ii táa sɔ́ɔ ké bháalakɛdhye ŋó wɛ́ɛ kɛ́ɛnya.
Ɛnza ŋé finɲanmuso lɔ́ dhyé nzu lakuunnan
11O kwɔ, Ɛnza ŋé táa só lɔ lá mín ndɔ́ɔ kó Nayiini. A yɛ́ kaamɔɔndhye ŋólu ni yamanba tɛ́ɛ táa ní ale. 12Ii sunɲan só ó lona ó lá mínngɛ, íi mɔɔn lɔ́lu kunmyɛ i tɛ́ɛ táa sú lɔ lé kábulu só o lá. Finɲanmuso lɔ lé dhyénjɛ kéengboto tɛ́ɛ ó lé. Yamanba tɛ́ɛ táala ikwɔ. 13Mantii ó muso ó yé mínngɛ, a hínnɛn é lo a lɔ koyoongɛ. Aa fɔ a yɛ́ kó i kɛ́nan kasi kɛ́. 14O kwɔ, Ɛnza ŋé i mangbaa kɛ́ í bhóo túu gbasa o la. Su ó tábhaa ólu i lɔ. Ɛnza ŋé fɔ kó: «Káweenin ŋó í wíi.» 15Su ó kúun, aa i wíi kɛ́ i síi aa a lámyaan kɛ́ kóman. Ɛnza ŋé dhyé ŋó dí a wóobhaa man.
16Mɔɔn olu bɛ́ɛ sháan, i tɛ́ɛ Ala tanola kɛ fɔ kó: «Célaba lɔ wɛ́ɛ wíi án njɛ́man, Ala wɛ́ɛ sɔ́n kɛ́ a yɛ́ yamaan ó lɔdhyɛman.»
17O kóman ó búubɛɛ Zude fa ŋó bɛ́ lɔ, óni a lamiin ŋó bɛ́ lɔ.
Yaya Bátizelikɛbhaa yɛ́ ɲáankɛli ó
Matiyu 11.2-19
18Yaya Bátizelikɛbhaa yɛ kaamɔɔndhye ŋólu Ɛnza ɲɛ́n kókɛnin ŋó bɛ́ lákɛɛ a yɛ. O lɔ, Yaya Bátizelikɛbhaa é a yɛ́ kaamɔɔndhye ŋólu mɔɔn fyáa kíi 19kɛ́ í cé Mantii ó mánko íi táa a mánɲaankɛ kó: «Mɔɔn mín ngákan kɛ́nan, íle lée o le á? Wáman án ngákan kɛ́ mɔɔn gbɛ́ɛ le mankɔɔn?»
20Íi sé Ɛnza mán mínngɛ, ii fɔ a yɛ́ kó: «Yaya Bátizelikɛbhaa é án myáashaa kó án ní nan i mánɲaankɛ kó mɔɔn mín ngákan kɛ́nan, íle lée o le á? Wáman án ngákan kɛ́ mɔɔn gbɛ́ɛ le mankɔɔn?» 21O wáati ó yɛ́ɛ lɔ, Ɛnza ŋé yaangalotɔ shɛ́ɛman nákɛɛnya, kɛ́ Lámansa ólu gbɛ́ kɛ́ bhɔ́ mɔɔn ólu fɛ, kɛ́ fyóondɔ shɛ́ɛman ɲán láka. 22O kwɔ, Ɛnza ŋé i yawi kó: «Álee wɛ́ɛ mín ɲé, óni álee wɛ́ɛ mín myɛ́n, aa táa o lákɛɛ Yaya Bátizelikɛbhaa yɛ́, kó fyóondɔ ólu yéli kɛ́la, kuugba ólu táamanla, kwáantɔ ólu bɛ́ wɛ́ɛ sɛ́nnɛnya, tóogbee ŋólu myɛnnin kɛ́la, su ólu kúunnan, sanmankanmɛɛ ó í lásela faannda ŋólu mán. 23Ni ne man kɛ mɔɔn mín ɲɛ́n lánanya ó cáan o sɔ́ɔbu le, o tíi ó yeemanfanin ɲé.»
Ɛnza ŋé Yaya kɛ́ɲan ó fɔ́la
Matiyu 11.7-11
24Yaya bátizelikɛbhaa yɛ́ céladhye ŋólu táanin ŋó kwɔ, Ɛnza ŋé lámyaan kɛ́ kóman yaman o yɛ Yaya tá sháa o fɛ́ kó: «Álee tɛ́ wɛ́ɛ táa mínnɛɛn le mánfɛɛla dhyɛ́ ó kɔɔnnɔn? Fwɛ́ɛn ó támuu mín námanman á? 25Áa táa mínnɛɛn le yé tɔ́ɔ lɔ wɛ́? Cɛ mánsiinin féndiiya faani lɔ́lɔ á? Wáa mín núu féndiiya fáani ólu lónan kɛ́ faanmanlɔmin o kɛ́, ólu kɛ́la mansabho ŋólu le la. 26Áa táa mínnɛɛn lé yé tɔ́ɔ lɔ wɛ́? Céla á? Tínɲan o lée wé; a yɛ́ɛ a bwó céla le! 27Yaya lée céla óle mín ngó é fɔ Kitabu ó lɔ. Ala é fɔ kó:
A mánfɛɛ, ɲáan ɲɛ́n céladhye ŋó cé í ɲɛn,
a yáa i yɛ́ sháa ó lɔ́bhyɛ.»
28Ní fɔ́la a yɛ́ ngó mɔɔn sí mán wóo dínɲan lɔ míin kɛ́ mɔɔnba le kɛ́ tínmin Yaya Bátizelikɛbhaa ka. Wáa Ala yɛ́ mansaya ó lɔ, mɔɔn mín ŋan lɔ́ɔ i bɛ́ le, ó tíi ó á bwó Yaya le.
Yaya ni Ɛnza ngɛ́ ɲán ó
Matiyu 11.16-19
29«Mɔɔn mínnuu Yaya lɔ́myɛn, yáanin nísɔɔnmyaanbhaa ólu, ólu bɛ́ɛ a lɔ ŋóo Ala télenin ɲé. O lé kósɔn íi sɔ́n tó Yaya é í bátize. 30Wáa Falizɛn ŋólu ni sɛliya kaamɔɔn ólu mán sɔ́n Ala yɛ kó látɛɛnin ŋólu mán. O lɔ, í mán sɔ́n ké Yaya a i bátize.»
31Ɛnza ŋé fɔ íkwɔ kó: «Ó lɔ ní sé kɛ bímɔɔn ólu lá yɛ́ɛtii mán? I bhɔ́nin ɲé yɛ́ɛtii la? 32I bhɔ́nin ɲé dhyémuu léelu la mínnu síinin ɲé bháa lɔ kɛ́ í kan nánbhɔ ɲɔɔn mán kó: ‹Án wɛɛ búu o fɔ a yɛ, wáa a mán lɔ ngɛ́. Án ní saan kasi kɛ́, a mán kasi kɛ́.› 33Kɛ mansɔɔ, Yaya Bátizelikɛbhaa é nan, a tɛ tɛ́ lɔ́min kɛ́la, a tɛ tɛ́ lɛ́zɛnnji minnan. Álee kó Lámansayoo ŋé a fɛ́. 34Mɔɔn Dhyénjɛ óo nan, aa lɔ́min kɛ́la kɛ́ mínnin kɛ́, a kó: ‹Cɛ miin ŋé lɔ́minkɛbhaa ni dɔlɔtɔ le lé. Nísɔɔnmyaanbhaa ólu ni yúumukɛbhaa ólu táamanɲɔɔn lée ale.› 35Wáa hákiitiiya ó lɔnan a dhyé ŋó bɛ́ lé fɛ́.»
Muso yúumutɔ ó yɛ kaamɛɛ ó
36 Falizɛn nɔ́ é Ɛnza ngíi kɛ táa lɔ́minkɛ ni ale. Ɛnza ŋé táa o yɛ bhó ŋó la kɛ́ i síi sunman ŋó mán. 37Muso yúumutɔ lɔ tɛ́ɛ o só o la, óo myɛ́n mínngɛ kó Ɛnza ŋé lɔ́min kɛ́ Falizɛn ŋó bhóo lúman, óo nán ni bháanin ngúugbɛɛ nɔ le mín nálaanin ndɛ́ɛ Alibatili o la. O fánin ndɛ́ɛ latikɔlɔ swáandhyaanin nan. 38Aa tó Ɛnza ngwɔ́man kɛ́ i la a se ŋó kɔɔ kɛ kasi kɛ́, fɔ kɛ Ɛnza nzé ŋó láɲiin a ɲánji ó la. O kwɔ aa Ɛnza nzé ŋó jɔsi ní a kúnzhe óle, óni kɛ a susu, tó kɛ latikɔlɔ swáandhyaanin ŋó bwɔ́ a ka. 39Falizɛn min ndɛ́ wɛ́ɛ Ɛnza ngíi lɔ́min kɛ́ ó la, óo o yé mínngɛ, aa fɔ́ i kɔɔnnɔn kó: «Ni cɛ míin ndɛ́ɛ kɛ́ céla le, a tɛ́ɛ nán a lɔ ŋóo muso mín ŋé í túula a lá nín, kó yúumutɔ lée o le.»
40 Ɛnza ŋé fɔ a yɛ kó: «Simɔn, kóman é nvɛ́ kɛ fɔ i yɛ.»
Simɔn é a yawi kó: «Kaamɔɔn, a fɔ.»
41Ɛnza ngó: «Cɛ lɔ́ yɛ yúu tɛ́ɛ mɔɔn fyaa la. Kée ŋó ta yúu ó tɛ́ɛ wɛ́ɛgbannan déniye kɛnmɛn lóo le lé, a tɔ́ kée ŋó tá ó tɛ́ɛ wɛ́ɛgbannan déniye bíloolu le lé. 42I fyaa sí mán sé kɛ i yɛ yúu ó sala mínngɛ, cɛ o kó: ‹Né wɛ́ɛ yafa ŋwɛ́ɛn a yɛ yúu o lábe.› » Ɛnza ŋé Simɔn manɲaankɛ kó: «Ó cɛ ó kó káa dhyáa yuutii o fyaa mínnɛɛn le yɛ kɛ tínmin?»
43Simɔn é a yawi kó: «Né tá miliya ó lɔ, mín ndá yúu tɛ́ɛ sháa.»
Ɛnza ngó: «I wɛ́ɛ tínɲan fɔ.» 44O kwɔ, Ɛnza ŋé i ɲán yɛ́ɛman muso o manshaa fɛ́ kɛ fɔ Simɔn yɛ kó: «I ɲán é muso miin nan kɛ́ɛ? Née lo í yɛ bhó ŋó la, í mán semankwoji dí né mán. Wáa ale wɛ́ɛ né se ŋó kwó ní a ɲánji óle kɛ a jɔsi a kúnzhe o la. 45I mán né twáa kɛ i fínin né mán, wáa ale, kɛ́ tá ne lo ŋó mán ya, a mán né se ŋó susu o lábhyaa. 46I mán túu bwɔ́ né kúnnɔn, wáa ale wɛ́ɛ túu swáandhyaanin bwɔ́ né se ŋó ka. 47O kósɔn, ní fɔ́la i yɛ ngó, a yɛ yúumu óni a sháaya o bɛ́ o bɛ́ wɛ́ɛ yafa a mán, kɛ mansɔɔ a yɛ dhyáaɲɔɔnya o á bwó. Ní yúumu dɔ́ɔnin ngɛ́ yafa mɔɔn mín mán, dhyáaɲɔɔnya dɔ́ɔnin ne káa kɛ́ ó tíi ó yóso ó lɔ.»
48O kwɔ́, Ɛnza ŋé a fɔ muso o yɛ kó: «Í yɛ yúumu ólu wɛ́ɛ yafa i mán.»
49Ɛnza ni mínnu tɛ́ɛ lɔ́minkɛ ó la ɲɔ́ɔn nvɛ́, ólu lamyaan kɛ a fɔ i yɛ́ɛ kɔɔnnɔn kó: «Miin ŋé yɛ́ɛtii le, fɔ aa yúumu ólu yafala mɔɔn mán?»
50Wáa Ɛnza ŋé a fɔ muso o yɛ íkwɔ kó: «I wɛ́ɛ kísi i yɛ lánanya o kósɔn, táa hɛ́lɛ lɔ́.»
Currently Selected:
Luka 7: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
