Luka 8

Muso mínnu tɛ́ɛ Ɛnza dhyɛmanla

1O kwɔ, Ɛnza ndɛ́ɛ yáala lá sóba óni só dhyénin ŋólu la kɛ́ lakawanin kɛ́, kɛ́ Ala yɛ́ mansaya ó sanmankanmɛɛ o láse. A yɛ́ kaamɔɔndhye ndá ni fyaa ó tɛ́ɛ ni a le, 2óni muso láman láman, Ɛnza ndɛ́ wɛ́ɛ Lámansa gbɛ kɛ́ bhɔ́ mínnu fɛ, kɛ́ lɔ́lu kɛ́ɛnya. Olu tɔ́ɔ ó lée nin: Mwɛnyamu Magidalaka, Ɛnza ndɛ́ wɛ́ɛ Lámansayoo wóonvyaa gbɛ́ kɛ́ bhɔ́ min nvɛ́, 3óni Zaani min ŋé Elɔdi yɛ́ nanfoo ó kúnnansiibhaa Shuza muso le, óni Suzani, óni muso gbɛ́ɛlu, mínnu tɛ́ɛ Ɛnza ni a yɛ́ kaamɔɔndhye ŋólu dhyɛmanla ní í bhóofe ŋólu lé.

Sɛɛnkɛbhaa o yɛ saanan ó

Matiyu 13.1-9; Maki 4.1-9

4Yaman é bhɔ́ só ólu bɛ́ lá kɛ́ nán í mínnin Ɛnza nán. Aa saanan míin ná kó:

5«Sɛɛnkɛbhaa o bhɔ́ kɛ́ táa a yɛ́ sí ó fíi a bhóo sɛɛn man. Kɛ́ tó sí fíi ó la, a koo ó lɔ́lu táa bé sháa ó lafɛ. Tínminmaa ólu o dɔ́, tó sámankɔɔn ólu í lakuun. 6Á fán nɔ́lu bé fáa ó ka. Olu i fɛ́ɛ mínngɛ, íi fáa kɛ mansɔɔ swáan tɛ tɛ́ i kɔɔ. 7A lɔ́lu é táa bé ŋwɛ́ɛn ŋólu cɛ́man, ólu i fɛ́ɛ, óni ŋwɛ́ɛn ŋó wili ɲɔɔn nvɛ́, ŋwɛ́ɛn ŋólu í sɔ́ɔsii olu ka. 8A lɔ gbɛ́ɛlu táa bé lúu dhyáanin ŋó ka. Olu i fɛ́ɛ kɛ́ wili kɛ́ dhyé nzhɛ́ɛman ngɛ́. Ólu í ɲɔɔn ngɛnmɛn kɛnmɛn sɔɔ.»

O kóman ó fɔnin ngwɔ, Ɛnza ŋé gbáa kó: «Tóo é min ngúnman kɛ́ myɛnnin kɛ́, o á myɛnnin kɛ.»

Mínnɛɛn le kósɔn Ɛnza ŋé saanan lá lá?

Matiyu 13.10-13; Maki 4.10-12

9Ɛnza ŋé saanan min ná, a yɛ́ kaamɔɔndhye ŋólu a manɲaankɛ o kɔɔ ó mán. 10Aa i yawi kó: «Ala yɛ́ mansaya ó gbondo ó lɔninya ó wɛ́ɛ dí ále léelu man. Wáa mɔɔn tɔ́ ólu tá o fɔ í yɛ́ saanan bhóo le man, kó óo kó e kɛ́ ke íi mánfɛɛli kɛ́ wáa ke i kɛ́nan fósi yé, ké íi myɛnnin kɛ́ wáa ke i kɛ́nan bhɔ fósi ɲánle.»

Ɛnza ŋé sɛɛnkɛbhaa o yɛ saanan ó kɔɔ o fɔ́la

Matiyu 13.18-23; Maki 4.13-20

11«Ni saanan min na, o kɔɔ ó lée nín: Ala saaninkan ŋó lée sí o lé. 12Sháa ó lafɛ láa óo mɔɔn lɔ́ léelu lé mín núu Ala sáaninkan ŋo myɛ́nnan, wáa Sɔtaannan é nan o bhɔ́ i yóso lɔ, kó óo kó é kɛ́ ke i kɛ́nan lá a lá kɛ́ kísi. 13Sí mín núu bé gbófaa ywáa o lɔ, óo mɔɔn lɔ́ léelu lé, ní ólu kɛ́ ó kóman ó myɛ́n, íi sɔ́n a mán ni nisɔdhyaa le. Wáa Ala saaninkan ŋó díin gbáannin ndɛ́ kɛ́la o tíi ólu yóso o lɔ, íi lá lá o kóman ó la wáati dɔ́ɔnin ngɔ́ɔnnɔn, ní lɔ́swaannin ó kɛ́nan wáati min nɔn, íi i íkwɔ lo. 14Sí míin bé ŋwɛ́ɛn ŋólu cɛ́man, óo mɔɔn lɔ́ léelu lé, mínnu wɛɛ Ala saaninkan ŋó myɛ́n, hánminnanngo ólu, ní nanfoo kó ólu, ní dínɲankɛdhyaa óo o kóman ó gbɛ́nnɛn fɔ́ i tɛ dhyé ngɛ́. 15Sí mín núu bé Lúudhyaanin ŋó ka óo mɔɔn lɔ́ léelu lé, mín núu Ala saaninkan ŋó myɛ́nnan, íi a myaanla ni yósobhɛɛ lé kɛ́ í lɔ́ja tó kɛ́ dhyé ngɛ.»

Laman ŋó tá sáanan ó

Maki 4.21-25

16Ɛnza ŋé fɔ íkwɔ kó: «Mɔɔn sí tɛ́ laman ŋó lamaannan kɛ́ a bhyáa pála ŋó kɔ́ɔ, wáman láfe ŋó kɔ́ɔ. Wáa aa síilaa lamannziife ne ka ké mɔɔn mínnu kɛ kɛ́ lónan bhó ŋó kɔɔnnɔn, olu a yéli kɛ́.»

17«Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman.»

18«Áa a yɛ́ myɛnnin kɛ́ɲan ó lákɔɔsi, kɛ mansɔɔ aa céne, lɔ́ kɛ́ kɛ́ mɔɔn mín móo, lɔ yáa bhyáa o tíi ó tá ó ka; Waa fé ndɛ́ mín móo, yáanin a í milila kó míin a bhóo, o yáa bwási a lá.»

Ɛnza ŋwóobhaa ní a bhádhye ŋólu

Matiyu 12.46-50; Maki 3.31-35

19Ɛnza ndɛ́ɛ ywáa min nɔn, a wóobhaa ní a lɔ́ɔcɛ ólu nan. Wáa i tɛ tɛ́ sé kɛ́ í mángbaa a lá yaman ó kósɔn, 20lɔ é fɔ a yɛ kó: «Í wóobhaa ní í lɔ́ɔcɛ ólu lɔ́nin ɲé kɛ́ɛnman íi fɛ́ kɛ́ í yé.»

21Wáa aa i yawi kó: «Mɔɔn mínnu é i tóo manlɔla Ala saaninkan ŋó lɔ kɛ́ a sháa ó táaman, o lée lúu né wóobhaa óni nɔ́ɔcɛ lú lé.»

Ɛnza ŋé fwɛ́ɛnba ó lalɔla

Matiyu 8.23-27; Maki 4.35-41

22Ló nɔ́ la, Ɛnza ŋé ló kúun ŋó kɔɔnnɔn ní a yɛ́ kaamɔɔndhye ŋólu le. Aa fɔ i yɛ kó: «Án ndáa bhá ó kwɔ́man.» 23Kɛ́ i tó bhá ó cɛ́man kúunnanbwee ó la, Ɛnza ŋé sunnɔɔnkɛ. Fwɛ́ɛnba lɔ é bhyáa, fɔ kúun ŋó tɛ́ɛ fɛ́ kɛ́ fá jí ó la. Tɔnin njɛ́lɛlɛ tɔnin njóun ké íi tó ji ó lɔ. 24O lɔ, íi i mangbaa Ɛnza nan kɛ́ a lá kúun kɛ́ fɔ a yɛ́ kó: «Kaamɔɔn, kaamɔɔn, án ngáa fáa.»

Ɛnza ŋé kúun kɛ́ jámanngɛ fwɛ́ɛn óni jí ó kunnan. Fwɛ́ɛn ó i lɔ́, jí óo í mánla, ywáa ó í mánla. 25O kwɔ, Ɛnza ŋé fɔ a yɛ́ kaamɔɔndhye ŋólu yɛ kó: «A yɛ́ lánanya óo mín?»

Kaamɔɔndhye ŋólu káwakoya, fɔ sháanɲan é lo i yóso lɔ tó í tɛ́ɛ ɲɔ́ɔn mánɲaankɛla Ɛnza ndá fa ŋo fɛ kó: «Cɛ míin ŋé yɛ́ɛtii le? Yáanin fwɛ́ɛn óni bháji óo a bwóɲanla?»

Ɛnza ŋé Lámansatɔ lɔ́ lákɛɛnyala

Matiyu 8.28-34; Maki 5.1-20

26Ɛnza ní a yɛ́ kaamɔɔndhye ŋólu sé Zelaza mala ó lɔ, bhá ó ɲán dɔ́ o mán o min ŋé Galile mala ó ɲán ó lɔ. 27Ɛnza ŋé í yíi kɛ́ bhɔ́ kúun ó kɔɔnnɔn kɛ í bhyáa lúu mán tɛ́nmɛn! Cɛ lɔ́ tɛ́ɛ o só ó lá, oo nán a kunmyɛ. Lámansayoo néelu tɛ́ɛ o cɛ ó fɛ́. Kabiini wáatija, a tɛ tɛ́ faani lónan bhée. A tɛ tɛ́ síla bhó ngɔɔnnɔn bhée fɔ kábulu só ó la. 28Cɛ o Ɛnza ɲé mínngɛ, a gbáa fáanla kɛ́ táa i kúnmɛɛn nɔkɛɛ Ɛnza ngɔɔ kɛ́ fɔ kó: «Mínnɛɛn lée án njɛ, Ala kɔɔtaninmba o dhyénjɛ Ɛnza? Née i dɛ́lila, í kɛ́nan né tɔ́lɔ.» 29Cɛ óo ó fɔ lé, kɛ mansɔɔ Ɛnza ndɛ́ɛ a fɔ́la kó Lámansa o á bhɔ́ a fɛ. Lámansa ó tɛ́ɛ a tɔ́lɔla wáati shɛ́ɛman, mɔɔn ólu tɛ́ɛ a bhóo óni a se ŋólu silila ní nɛɛnyɔlɔkɔ óle lé kɛ́ a bhyáa. Wáa a tɛ́ɛ tóla kɛ́ ólu tɛ́ɛtɛɛ, Lámansa ó tɛ́ɛ táala ní ale wúla ó kɔɔnnɔn.

30O kwɔ, Ɛnza ŋé a mánɲaankɛ kó: «Í tɔ́ɔ díi?»

Lámansa ó Ɛnza ɲawi kó: «Ndɔ́ɔ kó yaman.» Aa ó fɔ lé kɛ mansɔɔ Lámansa shɛ́ɛman né tɛ́ɛ a fɛ. 31Lámansa ólu é Ɛnza dɛ́li kó a kɛ́nan i gbɛ́ kɛ́ táa ile ɲangbanywaa lɔ.

32O wáati ó lɔ gbóyoonin nzɛ́ɛ lɔ́lu tɛ́ɛ lɔ́minkɛla tii ó mán. Lámansa ólu Ɛnza dɛ́li kó aa sɔ́n ké íi táa lo ó gbóyoonin ŋólu lɔ. Ɛnza ŋé sɔ́n. 33Lámansayoo ŋólu bhɔ́ o lé lɔ cɛ ó fɛ́, kɛ táa lo gbóyoonin ŋólu lɔ. Gbóyoonin nzɛ́ɛ ó í cɛ kɛ́ yɛ́ɛ tíi ó ka kɛ́ táa í bé bháji ó lɔ kɛ́ fáa.

34Gbóyoonin ngunnansiibhaa olu bɛ́ɛ bwée kɛ táa o kó ó búubhɛɛ só o kɔɔnnɔn, óni kanman ŋolu la. 35Kó míin kɛ́, mɔɔn ólu bhɔ́ kɛ́ táa ó mánfɛɛ. Ii sé Ɛnza mán. Ii a yé kó Lámansa ó wɛ́ɛ bhɔ́ cɛ ó fɛ, a síinin ŋé Ɛnza nzé ngɔ́ɔ, fáani é a kannan, a wɛ́ɛ í ɲánmanlɔ. Ii sháan gbútuukɛ. 36O kó ólu kɛ́ mɔɔn mínnu ɲánla, lámansayoo ŋólu bhɔ́ ɲanmin mán tó aa bwási í tɛ́ɛ o ɲánfɔla mɔɔn tɔ́ ólu yɛ. 37O lɔ, Zelazaka ólu Ɛnza dɛ́li kó aa bhɔ́ í yɛ́ mala ó lɔ, kɛ mansɔɔ a sháanɲan ó wɛ́ɛ bwóɲan i mán. Ɛnza ŋé lo kúun ŋó kɔɔnnɔn tó kɛ táa, 38Lámansayoo ŋolu bhɔ́ cɛ min nvɛ́, óo Ɛnza ndɛ́li kó ní aa sé kɛ́ táa ni ale.

Wáa Ɛnza ŋé a yawi kó: 39«Í kwɔ́sɛɛ kɛ́ táa i bhóo lúman, Ala wɛ́ɛ kóba mínngɛ i yɛ, ii ó bɛ́ lɔ́sɔɔ.»

Ɛnza ŋé kó óo kó kɛ́ a yɛ, aa táa o lɔsɔɔ só ó kɔɔnnɔn.

Ɛnza ŋé muso lɔ́ lákɛɛnya kɛ́ sínngbiinin nɔ sú lákuun

Matiyu 9.18-26; Maki 5.21-43

40 Ɛnza ŋé í kwɔ́sɛɛ kɛ́ bhɔ́ bhá ó kwɔ́man wáati min nɔn, yamanba é a kunmyɛ ni nisɔdhyaa le, kɛ mansɔɔ i bɛ́ tɛ́ɛ a mankɔɔnnan. 41O wáati ó lɔ, cɛ lɔ́ é nan min ndɔ́ɔ kó Zayilusi. Sɛ́ɛbho ó kunndii lé tɛ́ɛ ále. Aa táa i kúnmɛɛn nɔkɛɛ Ɛnza ngɔɔ, kɛ́ a dɛ́li kó aa a mankoto ké áa táa a bhóo lúman, 42kɛ mansɔɔ a dhyémuso mánngɛnnɛn, kó aa fɛ́ kɛ́ sayakɛ, kó ó dhyémuso kée ŋó lée a dhyé ne. Dhyé ŋó sísa ó tɛ́ɛ sanɲin tá ni fyáa si bhɔ́la.

Ɛnza ndáatɔ ó o ywáa ó lɔ, mɔɔn ólu tɛ́ɛ a díinndiinnan fɔ kɛ́ a gbɛ́nnɛn. 43O wáati ó lɔ, muso lɔ tɛ́ɛ i cɛ́man, mín ɲɛ́n káakwo tɛ́wɛɛ kɛ́ a la yangalo lé sanɲin tá ni fyáa kɔ́ɔnnɔn. A bhóota ŋó bɛ́ wɛ́ɛ wɛɛ, kɛ mansɔɔ a tɛ́wɛɛ táa bhwɛ́ɛkɛbhaa shɛ́ɛman nvɛ́ yé. Wáa a yɛ́ yangalo ó mán kɛ́ɛnya. 44Aa í mángbaa Ɛnza nán a kwɔ́man kɛ í bhóo túu o yɛ́ deeke ó lágboo o lá. O ywáanin ŋó lɔ, a yɛ́ káakwo yangalo óo í lɔ́. 45Ɛnza ŋé ɲaankɛli kɛ́ kó: «Yɛ́ne wɛɛ i bhóo túunan?»

Mɔɔn sí man sɔ́ɔ kɛ́ fɔ kó ale. Piyɛli é kóman ó tá kɛ́ fɔ kó: «Kaamɔɔn, i ɲán é a lá kó mɔɔn ólu í díinndiinnan fɔ́ kɛ í gbɛ́nnɛn.»

46Wáa Ɛnza ngó: «Mɔɔn lɔ wɛ́ɛ í bhóo túunan, kɛ mansɔɔ né wɛ́ɛ a lɔgbɛ kó faan lɔ́ wɛ́ɛ bhɔ́ ne lɔ.» 47Muso o a lɔ kó ó kó ó tɛ́ sé kɛ́ í lóonaankɛ mínngɛ, a yaayaatɔ ó táa i kúnmɛɛn nɔkɛɛ Ɛnza nzé ngɔɔ. Aa í túu a lá kún mínnan, óni a kɛ́ɛnya ywáaninngee nɔn ɲán mín mán, aa ó bɛ́ lɔsɔɔ Ɛnza ɲɛ́n mɔɔn ólu ɲánla. 48Ɛnza ŋé fɔ a yɛ́ kó: «Nyémuso, i yɛ́ lánanya ó wɛ́ɛ í lákɛɛnya. Táa hɛ́lɛ lɔ́.»

49Kɛ Ɛnza ndo ó kóman ó la, mɔɔn lɔ é bhɔ́ sɛ́ɛbho kunndii Zayilusi yɛ́ lú ó mán kɛ́nan fɔ a yɛ́ kó: «I dhyémuso wɛ́ɛ sayakɛ, í kɛ́nan kaamɔɔn ó tɔ́lɔ bhée.»

50Ɛnza ŋé ó kóman ó myɛ́n mínngɛ, aa fɔ Zayilusi yɛ́ kó: «Í kɛ́nan sháan, lá Ala la dɔlɔun, i dhyémuso yáa kísi.»

51Ii sé Zayilusi yɛ́ lú ó man wáati min nɔn, Ɛnza mán sɔ́n ké mɔɔn lɔ a lo ni ále bhó ŋó kɔɔnnɔn fɔ Piyɛli, óni Yaya, óni Zaki, óni dhyémuso ó fá óni a wóobhaa dɔlɔun. 52Mɔɔn bɛ́ tɛ́ɛ kásila kɛ́ gbáa sínngbiinin ŋó sayako ó lɔ. Ɛnza ŋé a fɔ i yɛ kó: «A kɛ́nan kásikɛ, dhyémuso ó sayakɛnin ndɛ́, aa sunnɔɔn le lɔ.»

53Mɔɔn ólu a lɔ kó sínngbiinin ŋó wɛ́ɛ sayakɛ tínɲan in ne mínngɛ, ii yɛ́ɛbhɔ Ɛnza nɔn. 54Wáa aa lo kɛ́ dhyémuso ó myáan a bhóo mán kɛ́ fɔ a yɛ kó: «Nyé, í wíi.» 55O ywáaninngee ŋo lɔ, dhyé ŋó ní óo i kwɔ́sɛɛ a man, aa i wíi. Ɛnza ŋé fɔ́ko ii lɔ́min di a man. 56Dhyé ŋó wóobhaa ólu káwakoya koyoongɛ. Wáa Ɛnza ŋé fɔ i yɛ kɛ́ a mangbɛya ko i kɛ́nan o kó ó ɲánfɔ mɔɔn sí yɛ.

Currently Selected:

Luka 8: MXX

Highlight

Copy