Fakasigadan 16
16
Agar ay Ismael
1Ay Saray, Abram at mangena, we sisian. Dewa katanya, kanya e fagsuguan siginans talun Igiptu at ngayan Agar. 2Saray nalong sas Abram te, “Aroro Yawi wa kaylat nu e sisian au, masine nung o sa ku fagsuguan fag mangena. Bangaran ban umke sisian au siginan anya.” Ay Abram nafaning at mangena at longan anya. 3Ay Saray nafon at fagsuguan Agar sas Abram laman at mangena. (Anfasludan takatanya gina anlangfe safuluk banwa nu gbanwan sis Kanaan.) 4Ay Abram nafataladan Agar ay sanya ginan nafafion. Ay Agar nu nasaful te, gfafion wan, nafalingun at tagfayafun Saray.
5Nu katanya, Saray nalong sas Abram te, “Katsi Agar gfafion wan ay gfalingun angku. Ay o wan ke malong. Nafon kwa sa emu anya ay o wan tagsalag. Yawi wan taginsaful nu sinu ta at matuyan.”
6Ay Abram nabalus anya te, “O nunda kanya bunwa am fagsuguan? Kin, fakamuluni sa anya kata am fakaylatun.” Siginan ginanya, Saray maksvn nu gfaidapan Agar, ay sa oma taguyan Agar nalagyu wan.
7Ay Yawi at tagbarita nalag Agar sis talun at yud e taw si sik bulbug. Ay kafag bulbug munakbang sis dalan tagsas Sur. 8Ay kafag tagbarita nainto anya te, “Agar, Saray at fagsuguan, daginan o ay dada o?”
Ay Agar gbalus te, “Nalagyu au ku tagfayafun Saray.”
9Ay tagbarita nalong anya te, “Afolii wan sam tagfayafun ay namababaun o sa anya.” 10Ay tagbarita nalong yay fia anya te, “Gfayu kban am ngay kasugfunanan ay at kayuan ban wa katap ya.
11Katsi gfafion o,
ay namasalug ban o sik munama.
Ay fangayani ban anya te, Ismael,#16:11 Ismael: at masuad, Dius gdungugan.
aroro Yawi nadungug am fagetun gina o gidapan.
12Ay kanya ban kata way sik mela sis talun.
Ay gfawayan ban fagayu taw,
ay fagayu ban taw gfawayan yangay anya.
Ay anggan ban at ngay kalongan
gfabadbaboan yangay sa anya.”
13Agar nafangayan Yawi at nafakamatoan anya te, “Taglag fag Dius,” aroro Agar nalong te, “Anud! Nalag kwan Dius taglag angku.” 14Nu katanya, kafag bulbug swabilug Kades ay Bered nafangayan te, Beer-Lakay-Ruy.#16:14 Beer-Lakay-Ruy: at masuad, Tagleleg fag Dius taglag angku at bubun.
15Ay Agar anfoli wan sat tagfayafun Saray. Ay wa glugo ya, Agar anke sisian sik munama siginans Abram. Abram nafangayan kafag sisian te, Ismael. 16Abram waluk safulu labi unumk banwa gina Ismael kasalug.
Currently Selected:
Fakasigadan 16: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
